Lenyalo le Botswadi Nakong ye ya Bofelo

“Nako e šetšego ke e nyenyane.”—1 BAKOR. 7:29.

1. (a) Ke diphetogo dife lehono tšeo di lego gare ga dilo tšeo go lego “thata go lebeletšana le tšona”? (b) Ke ka baka la’ng re tshwenyega ka ditekanyetšo tša lapa tše di fetogago?

LENTŠU la Modimo le boletše e sa le pele gore “lebaka la bofêlô” le tla swawa ka dintwa, ditšhišinyego tša lefase, ditlala le mauba a malwetši. (Dan. 8:17, 19; Luka 21:10, 11) Le gona Beibele e lemošitše gore nako ye ya tlalelo e kgolo historing ya batho e be e tla ba nako ya diphetogo tše dikgolo maphelong a batho. Dikgohlano tša ka malapeng di be di tla ba gare ga dilo tšeo go lego “thata go lebeletšana le tšona” ‘mehleng ye ya bofelo’ e hlobaetšago. (2 Tim. 3:1-4) Ke ka baka la’ng re tshwenyega ka diphetogo tše bjalo? Ka gobane di phatlaletše e bile di matla kudu moo di ka tutuetšago tsela yeo ka yona Bakriste lehono ba lebelelago lenyalo le botswadi. Bjang?

2. Lefase ka kakaretšo le lebelela lenyalo le tlhalo bjang?

² Mehleng ya lehono, tlhalo e bonolo e bile e atile, gomme dinageng tše dintši tlhalo e oketšega ka lebelo. Lega go le bjalo, re swanetše go dula re gopola gore Jehofa Modimo o na le pono e fapanego kudu ka lenyalo le tlhalo go fapana le yeo e latelwago kudu lefaseng leo le re dikologilego. Ka gona, pono ya Jehofa ke efe?

3. Jehofa le Jesu Kriste ba lebelela lenyalo bjang?

 ³ Jehofa Modimo o letetše gore bao ba lego lenyalong ba dule ba botegela dikeno tša bona tša lenyalo. Ge a be a kopanya monna wa pele le mosadi ka lenyalo, Jehofa o boletše gore “monna ó tlo . . . xomarêla mosadi wa xaxwe; xomme ba tlo ba nama e tee.” Jesu Kriste ka morago o ile a bušeletša mantšu ao gomme a oketša ka gore: “Ka baka leo, se Modimo a se tlemagantšego jokong go se be le motho yo a se aroganyago.” Jesu o tšwetše pele ka go bolela gore: “Mang le mang yo a hlalago mosadi wa gagwe ge e se ka lebaka la bootswa, a nyala yo mongwe, o a hlotlola.” (Gen 2:24; Mat. 19:3-6, 9) Ka gona, Jehofa le Jesu ba lebelela lenyalo e le tlemo ya bophelo ka moka yeo e felago feela ge molekane yo mongwe a e-hwa. (1 Bakor. 7:39) Ka ge lenyalo e le thulaganyo e kgethwa, tlhalo ga se ya swanela go tšeelwa fase. Ge e le gabotse, Lentšu la Modimo le bolela gore Jehofa o hloile tlhalo yeo e sego ya thewa Mangwalong. *—Bala Maleaki 2:13-16; 3:6.

Lenyalo le le Bontšhago Boikarabelo

4. Ke ka baka la’ng bafsa ba bangwe ba Bakriste ba itshola gore ba kitimetše go tsena lenyalong?

⁴ Lefase le re phelago go lona leo le sa boifego Modimo le nweletše kudu dikopanong tša botona le botshadi. Letšatši le lengwe le le lengwe, re bontšhwa diswantšho tšeo di tsošago kganyogo ya dikopano tša botona le botshadi. Re ka se ke ra hlokomologa tutuetšo yeo di bago le yona go rena, kudu-kudu go bafsa ba rena ba rategago ba lego ka phuthegong. Bafsa ba Bakriste ba swanetše go itshwara bjang mabapi le tutuetšo ye yeo e sa hlwekago, yeo e ka tsošago kganyogo ya dikopano tša botona le botshadi gaešita le ge ba leka go e lwantšha? Ba bangwe ba ile ba leka go di fenya ka go tsena lenyalong e sa le ba banyenyane kudu. Ka tsela yeo, ba be ba nagana gore ba tla efoga go wela boitshwarong bjo bo gobogilego bja dikopano tša botona le botshadi. Lega go le bjalo, kapejana ka morago ga go tsena lenyalong ba bantši ba ile ba thoma go itsholela phetho yeo. Ka baka la’ng? Ka morago ga ge kgahlego ya go ba lenyalong e fela, ba ile ba lemoga gore bona le balekane ba bona ba be ba se na dilo tše dintši bophelong tšeo ba kwanago ka tšona. Go a kwagala gore banyalani ba bjalo ba na le bothata bjo bogolo.

5. Ke’ng seo se tla thušago banyalani gore ba dule ba botegela dikeno tša bona tša lenyalo? (Bona le mongwalo wa tlase.)

⁵ Go nyalana le motho—gaešita le ge e le Mokriste—yoo ka morago a bonagalago a fetogile go ka ba thata. (1 Bakor. 7:28) Lega go le bjalo, go sa šetšwe gore boemo bo tšweletša tlhohlo gakaakang, Bakriste ba therešo ba tseba gore tlhalo e sa thewago Mangwalong ga se tharollo e amogelwago ya mathata a lenyalo le sa thabišego. Ka gona, bao ba tšwelago pele ba katanela go kgotlelela lenyalo la bona ka ge ba nyaka go dula ba botegela dikeno tša bona tša lenyalo ba swanetše go hlompšha le go newa thušo e lerato go tšwa phuthegong ya Bokriste. *

6. Bafsa ba Bakriste ba swanetše go lebelela bjang kgonagalo ya gore ba ka tsenela lenyalo?

⁶ Na o mofsa yo a sego lenyalong? Ge e ba go le bjalo, o swanetše go lebelela bjang kgonagalo ya gore o ka tsenela lenyalo? O ka efoga bohloko bjo bogolo bja pelo ge o ka leta go fihlela ge o itokišitše mmeleng, monaganong le moyeng gore o ka tsenela lenyalo, pele ga ge o ka thoma tswalano ya lerato le Mokriste wa bong bjo bo fapanego. Ke therešo gore Mangwalo ga a bolele gore motho o swanetše go tsena lenyalong a e-na le nywaga e mekae. * Lega go le bjalo, Beibele e bontšha gore o dira  gabotse ge o leta go fihla o fetile nako ya bophelo yeo go yona dikganyogo tša dikopano tša botona le botshadi di lego matla kudu. (1 Bakor. 7:36) Ka baka la’ng? Ka gobane dikganyogo tše matla tša dikopano tša botona le botshadi di ka kgopamiša kahlolo e botse le go dira gore o dire diphetho tše sego bohlale tšeo di ka go bakelago manyami ka morago. Gopola gore keletšo e bohlale ya Jehofa yeo e lego ka Beibeleng mabapi le lenyalo ke ya go hola wena.—Bala Jesaya 48:17, 18.

Batswadi Bao ba Bontšhago Boikarabelo

7. Ke’ng seo banyalani ba bangwe bao e sa lego bafsa ba lebeletšanago le sona, gomme se se ka baka mathata bjang lenyalong?

⁷ Baratani ba bangwe bao ba tsenago lenyalong e sa le ba banyenyane ba ikhwetša ba imišane nakong ya ge bona ka noši e sa le ba banyenyane kudu. Ge e le gabotse ga se ba ka ba ba le nako ya go tsebana gabotse pele ga ge ba ka ba le ngwana, yo a nyakago tlhokomelo diiri tše 24 ka letšatši. Ge lesea ka ge go tlwaelegile le thoma go goga tlhokomelo ya mma, tate yo e sa lego yo mofsa a ka thoma go ba le lehufa. Go feta moo, go se robale bošego go ka dira gore batswadi ba gateletšege gomme tswalano ya bona e thome go se sa tia. Banyalani ba bafsa kapejana ba lemoga gore ba lahlegetšwe kudu ke tokologo ya bona. Ga bjale ga ba sa kgona go sepela gotee go ya mafelong a itšego le go dira dilo ka bolokologi go swana le pele. Ba swanetše go ba le pono efe ka boemo bja bona bjo bofsa?

8. Botswadi bo swanetše go lebelelwa bjang, gona ka baka la’ng?

⁸ Bjalo ka ge lenyalo le swanetše go lebelelwa e le leo le nyakago boikarabelo, go ba motswadi go swanetše go lebelelwa e le boikarabelo bjo bo tšwago go Modimo e bile e le tokelo. Go sa šetšwe diphetogo tšeo go belegwa ga lesea go ka di bakago bophelong bja banyalani ba Bakriste, ba swanetše go leka ka gohle go lebeletšana le tšona ka tsela e bontšhago boikarabelo. Ka ge Jehofa a neile batho bokgoni bja go ba le bana, batswadi ba swanetše go lebelela lesea leo le sa tšwago go belegwa e le “neô ya Morêna.” (Ps. 127:3) Mma le tate ba Bakriste ba tla katanela go phetha boikarabelo bja bona bjalo ka ‘batswadi boteeng le Morena.’—Baef. 6:1.

9. (a) Go godiša ngwana go akaretša’ng? (b) Monna a ka dira’ng bakeng sa go thuša mosadi wa gagwe go dula a tiile moyeng?

⁹ Go godiša ngwana go nyaka boikgafo bjo bo tšeago nywaga e mentši. Go nyaka nako e ntši le matla. Monna wa Mokriste o swanetše go kwešiša gore nywaga e mentši ka morago ga ge ngwana a belegwe, mosadi wa gagwe a ka šitišega gantši nakong ya diboka gomme a ka ba le dibaka tše sego kae tša go ba le thuto ya Beibele ya motho ka noši le go naganišiša. Se se ka mo fokodiša moyeng. Go ba motswadi yo a nago le boikarabelo go nyaka gore monna a dire sohle seo a ka se kgonago go hlokomela ngwana. A ka leka go nea mosadi wa gagwe dintlha tšeo di ka bago di mo lahlegetše dibokeng ka go di ahla-ahla le yena ka morago ka gae. A ka ba a thuša ka go hlokomela ngwana gore a nee mosadi wa gagwe sebaka sa go  tšea karolo ka botlalo modirong wa go bolela ka Mmušo.—Bala Bafilipi 2:3, 4.

10, 11. (a) Bana ba godišwa bjang ka “tlhahlo ya monagano ya Jehofa”? (b) Ke ka baka la’ng batswadi ba bantši ba Bakriste ba swanelwa ke theto?

¹⁰ Go ba motswadi yo a nago le boikarabelo go akaretša se se fetago go fo nea ngwana dijo, diaparo, lefelo la bodulo le tlhokomelo ya tša maphelo. Bana ba swanetše gore ba ithute e sa le ba banyenyane melao ya motheo ya boitshwaro yeo ba swanetšego go phela ka yona, kudu-kudu nakong ye yeo e šiišago ya bofelo. Bana ba swanetše go godišwa “ka tayo le tlhahlo ya monagano ya Jehofa.” (Baef. 6:4) “Tlhahlo [ye] ya monagano” e akaretša go bjala dikgopolo tša Jehofa ka monaganong wa ngwana go tloga boseeng go ya pele le go feta nywageng e hlobaetšago ya mahlalagadi.—2 Tim. 3:14, 15.

¹¹ Ge Jesu a be a botša balatedi ba gagwe gore ba swanetše gore ba “dire batho ba ditšhaba ka moka barutiwa,” ka ntle le pelaelo o be a bolela gore batswadi ba swanetše go thuša bana ba bona gore e be barutiwa. (Mat. 28:19, 20) Yeo ke tlhohlo ka baka la kgateletšo yeo lefase le le gatelelago bafsa ka yona. Ka baka leo, batswadi bao ba atlegago go godiša bana gore e be Bakriste ba ineetšego ruri ba swanelwa ke theto e borutho go feta bohle ka phuthegong. Ba ‘fentše’ tutuetšo ya lefase ka tumelo ya bona le ka potego ya bona bjalo ka batswadi ba nago le boikarabelo.—1 Joh. 5:4.

Go se be Lenyalong Goba go se be le Ngwana ka Morero wa Boikgafo

12. Ke ka baka la’ng Bakriste ba bangwe ba dira phetho ya go dula nako e itšego ba se lenyalong?

¹² Ka ge “nako e šetšego [e le] e nyenyane” e bile “boemo bja lefase le bo . . . fetoga,” Lentšu la Modimo le re kgothaletša go ela hloko mehola ya go se be lenyalong. (1 Bakor. 7:29-31) Ka baka leo, Bakriste ba bangwe ba kgetha go se tsene lenyalong bophelo bja bona ka moka goba ba dira phetho ya go se tsene lenyalong ka nywaga e itšego pele ba ka tsena go lona. Ba a retwa, ka ge ba sa diriše tokologo yeo e tlišwago ke go se be lenyalong go phegelela dikgahlego tša boithati. Ba bantši ga ba tsene lenyalong e le gore ba hlankele Jehofa “ka ntle le tšhitišo.” (Bala 1 Bakorinthe 7:32-35.) Bakriste ba bangwe ba sego lenyalong ba hlankela e le babulamadibogo goba ba hlankela legaeng la Bethele. Ba bantši ba nyaka go oketša dibaka tša bona tša go dirišwa ke mokgatlo wa Jehofa ka go dira gore ba swanelegele go ya Sekolong sa Tlwaetšo ya Bodiredi. Ge e le gabotse, bao ba hlanketšego ka nywaga e mentši e le badiredi ba nako e tletšego ba se lenyalong gomme ka morago ba dira phetho ya go tsena lenyalong, gantši ba ba le maikwelo a gore lenyalo la bona le holwa ke dithuto tše bohlokwa tšeo ba ithutilego tšona mathomong a nywaga yeo ya tirelo.

13. Ke ka baka la’ng banyalani ba bangwe ba Bakriste ba dira phetho ya go se be le bana?

¹³ Dikarolong tše dingwe tša lefase, go bile le phetogo e nngwe gape bophelong bja lapa—banyalani ba mmalwa ba ile ba dira phetho ya go se be le bana. Ba bangwe ba dira bjalo ka mabaka a boiphedišo; ba bangwe  ba dira bjalo ka gobane ba nyaka go phegelela dipakane tše putsago. Gare ga Bakriste, go na le banyalani bao ba kgethago go se be le bana. Lega go le bjalo, gantši ba dira bjalo gore ba be le tokologo ya go kgona go hlankela Jehofa. Se ga se bolele gore banyalani ba bjalo ga ba thabele bophelo bja lenyalo. Ba a bo thabela. Lega go le bjalo, ba ikemišeditše go bea dikgahlego tša Mmušo pele ga ditokelo tše dingwe tšeo di tlišwago ke go ba lenyalong. (1 Bakor. 7:3-5) Ba bangwe ba banyalani bao ba hlankela Jehofa le bana babo bona modirong wa tikologo le wa selete goba legaeng la Bethele. Ba bangwe ba hlankela e le babulamadibogo goba baromiwa. Jehofa a ka se lebale modiro wa bona le lerato leo ba le bontšhago leineng la gagwe.—Baheb. 6:10.

“Tlaišego Nameng”

14, 15. Batswadi ba Bakriste ba ka lebeletšana le ‘tlaišego efe nameng’?

¹⁴ Moapostola Paulo o boditše Bakriste ba lego lenyalong gore ba tla ba le “tlaišego nameng.” (1 Bakor. 7:28) Se se ka akaretša gore banyalani, bana ba bona goba batswadi ba bona ba tšofalago ba be le mathata a tša maphelo. Se ka akaretša gape le mathata le mahloko ao a sepedišanago le go godiša bana ba bona. Bjalo ka ge go bontšhitšwe mathomong a sehlogo se, Beibele e boletše e sa le pele gore ‘mehla ya bofelo’ e be e tla tliša “dinako tše di hlobaetšago tšeo go lego thata go lebeletšana le tšona.” Gare ga tše dingwe tša dilo tšeo go lego thata go lebeletšana le tšona ke bana “ba go se kwe batswadi.”—2 Tim. 3:1-3.

¹⁵ Go godiša bana ke tlhohlo e kgolo go batswadi ba Bakriste. Re kgongwa ke mafelelo a kwešago bohloko a “dinako tše di hlobaetšago” tšeo re phelago go tšona. Ka gona, batswadi ba Bakriste ba swanetše go tšwela pele ba e-lwa kgahlanong le tutuetšo e bolayago yeo “tshepedišo ya dilo ya lefase le” e ka bago le yona baneng ba bona. (Baef. 2:2, 3) Le gona ga se ka mehla ntwa e fenywago! Ge morwa goba morwedi ka lapeng la Bakriste a kgaotša go hlankela Jehofa, ka kgonthe e ba “tlaišego” go batswadi bao ba lekilego go godiša ngwana wa bona ka therešo ya Modimo.—Die. 17:25.

“Go tla ba le Masetlapelo a Magolo”

16. Jesu o ile a porofeta mabapi le “tlaišego” efe?

¹⁶ Lega go le bjalo, “tlaišego” le ge e le efe yeo e tšwelelago lenyalong le kgodišong ya bana, e tla fetwa ke tlaišego e nngwe e kgolo-kgolo. Boporofeteng bja gagwe bja mabapi le go ba gona ga gagwe le bja bofelo bja tshepedišo ya dilo, Jesu o itše: “Go tla ba le masetlapelo a magolo a sa kago a ba gona ga e sa le go tloga mathomong a lefase go ba go fihla gona bjale, aowa, le go ba gona a ka se sa ba gona gape.” (Mat. 24:3, 21) Jesu ka morago o boletše gore lešaba le legolo le tla phologa “masetlapelo [a] a magolo.” Lega go le bjalo, tshepedišo ya Sathane e tla tšwela pele e le ntweng ya go tlaiša la mafelelo Dihlatse tša Jehofa tšeo di nago le khutšo. Ka ntle le pelaelo, e tla ba nako e thata go rena ka moka—batho ba bagolo le bana.

17. (a) Ke ka baka la’ng re ka kgona go lebeletšana le bokamoso ka kgodišego? (b) Ke’ng seo se swanetšego go tutuetša pono ya rena ka lenyalo le botswadi?

¹⁷ Lega go le bjalo, ga se ra swanela go ba le poifo e kgolo ka bokamoso ka mo go sa nyakegego. Batswadi bao ba botegelago Jehofa ba ka holofela go šireletšwa le bana ba bona. (Bala Jesaya 26:20, 21; Tsef. 2:2, 3; 1 Bakor. 7:14) Lega go le bjalo, anke ga bjale go lemoga matšatši a hlobaetšago ao re phelago go ona go tutuetše tsela yeo re naganago ka yona ka lenyalo le botswadi nakong ye ya bofelo. (2 Pet. 3:10-13) Ka tsela yeo, maphelo a rena—go sa šetšwe gore re lenyalong goba ga re lenyalong, re na le bana goba ga re na bana—a tla tliša kgodišo le theto go Jehofa le go phuthego ya Bokriste.

[Mengwalo ya tlase]

[E le Poeletšo]

• Ke ka baka la’ng bafsa ba Bakriste ba se ba swanela go kitimela go tsena lenyalong?

• Go godiša ngwana go akaretša’ng?

• Ke ka baka la’ng Bakriste ba bantši ba sa tsene lenyalong goba ba sa be le bana gaešita le ge ba tsene lenyalong?

• Ke “tlaišego” efe yeo batswadi ba Bakriste ba lebeletšanago le yona?

[Dipotšišo tša Thuto]

[Seswantšho go letlakala 17]

Ke ka baka la’ng e le gabohlale gore bafsa ba Bakriste ba lete pele ba tsena lenyalong?

[Seswantšho go letlakala 18]

Monna a ka dira mo gontši go thuša mosadi wa gagwe go tšea karolo ka botlalo medirong ya moya

[Seswantšho go letlakala 19]

Ke ka baka la’ng banyalani ba bangwe ba Bakriste ba dira phetho ya go se be le bana?