Tsoma Tlhahlo ya Modimo Dilong Tšohle
Tsoma Tlhahlo ya Modimo Dilong Tšohle
“Modimo yó ké Yêna Modimo wa rena wa mehleng le neng le neng; ó tlo re sepediša xo ya xo ile.”—PS. 48:14.
1, 2. Ke ka baka la’ng re swanetše go latela tlhahlo ya Jehofa go e na le go bota bohlale bja rena ka noši, gona go rotoga dipotšišo dife?
GE RE nagana ka dilo tša lefeela goba tše di gobatšago, go bonolo go iphora. (Die. 12:11) Ge re tloga re nyaka go dira selo seo se sa swanelego Mokriste, dipelo tša rena gantši di tla re nea mabaka ao a re šušumeletšago go se dira. (Jer. 17:5, 9) Lega go le bjalo, mopsalme o ile a bontšha bohlale ge a be a rapela Jehofa ka gore: “Roma Seetša sa xaxo le Therešô ya xaxo, ke hlahlwê ke tšôna.” (Ps. 43:3) O be a bota Jehofa, e sego bohlale bja gagwe ka noši bjoo bo lekanyeditšwego, gomme ke Yena feela yoo e bego e le mothopo wa gagwe o mokaone-kaone wa tlhahlo. Go swana le mopsalme, re dira gabotse ge re tsoma tlhahlo go Modimo.
2 Lega go le bjalo, ke ka baka la’ng re swanetše go bota tlhahlo ya Jehofa go feta tlhahlo le ge e le efe e nngwe? Re swanetše go e tsoma neng? Ke mekgwa efe yeo re swanetšego go e hlagolela e le gore re holwe ke yona, gona ke ka baka la’ng Jehofa a re hlahla lehono? Dipotšišo tše tše bohlokwa di tla ahla-ahlwa sehlogong se.
Ke ka Baka La’ng re Swanetše go Bota Tlhahlo ya Jehofa?
3-5. Ke ka baka la’ng re bota tlhahlo ya Jehofa ka mo go feletšego?
3 Jehofa ke Tatago rena wa legodimong. (1 Bakor. 8:6) O tseba dintlha ka botlalo mabapi le yo mongwe le yo mongwe wa rena e bile o kgona go hlatha dipelo tša rena. (1 Sam. 16:7; Die. 21:2) Kgoši Dafida o boditše Modimo gore: “O ntseba xe ke dula, le xe ke tsoxa; O ntemoxa tša pelong, xe di sa le kxolê. Polêlô, le xe e sešo ya tšwa ’lemeng la-ka, Morêna, ké xe O šetše O e tseba yohle.” (Ps. 139:2, 4) Ka ge Jehofa a re tseba gabotse ka tsela ye, ga se ra swanela go belaela gore o tseba seo se tlogago se re swanetše. Go oketša moo, Jehofa ke yo bohlale ka go fetišiša. O bona dilo tšohle, o lebelela ka mo go tseneletšego go feta motho le ge e le ofe, e bile o tseba mafelelo a dilo go tloga mathomong a tšona. (Jes. 46:9-11; Baroma 11:33) Ke “Modimo, yo bohlale a nnoši.”—Baroma 16:27.
4 Go oketša moo, Jehofa o a re rata e bile o dula a re kganyogela tše kaone-kaone. (Joh. 3:16; 1 Joh. 4:8) Ka ge e le Modimo yo lerato, o re fa dilo ka seatla se se bulegilego. Morutiwa Jakobo o ngwadile gore: “Mpho e nngwe le e nngwe e botse le neo e nngwe le e nngwe e phethagetšego e tšwa godimo, gobane e theoga e e-tšwa go Tate wa dietša tša legodimo.” (Jak. 1:17) Bao ba dumelago go hlahlwa ke Modimo ba holwa kudu ke go ba ga gagwe yo a nago le seatla se se bulegilego.
5 Sa mafelelo ke gore Jehofa ke yo matla ohle. Mopsalme o boletše mabapi le se gore: “Xe ke dutše mo ke phêmêlwaxo ke Yo-xodimo-dimo, ka lala moriting wa Yo-matla-ohle, Ke bolêla le Morêna ke re: O ’thšabêlô sa-ka, ’me O sebô sa-ka; O Modimo wa-ka yo ke mmotilexo.” (Ps. 91:1, 2) Ge re latela tlhahlo ya Jehofa, re tsoma botšhabelo go Modimo yo a sa palelwego ke selo. Gaešita le ge re lebeletšana le kganetšo, Jehofa o a re thekga. A ka se re nyamiše. (Ps. 71:4, 5; Bala Diema 3:19-26.) Ee, Jehofa o tseba seo se tlogago se re swanetše, o re kganyogela tše kaone-kaone e bile o na le matla a go re fa tše kaone-kaone. E tla ba bošilo gakaakang ge re hlokomologa tlhahlo ya gagwe! Lega go le bjalo, ke neng moo re nyakago tlhahlo yeo?
Re Tsoma Tlhahlo Neng?
6, 7. Ke neng moo re nyakago tlhahlo ya Jehofa?
6 Ge e le gabotse, re tsoma tlhahlo ya Modimo maphelong a rena ka moka, go tloga bofseng go fihla botšofading. Mopsalme o itše: “Modimo yó ké Yêna Modimo wa rena wa mehleng le neng le neng; ó tlo re sepediša xo ya xo ile.” (Ps. 48:14) Ka go swana le mopsalme, Bakriste ba bohlale le ka mohla ga ba kgaotše go tsoma tlhahlo go Modimo.
7 Ke therešo gore go na le dinako tše dingwe tšeo ka tšona re kwago re nyaka thušo kapejana. Ka dinako tše dingwe re ikhwetša re “tlaletšwe,” mohlomongwe re lebeletšane le tlaišo, bolwetši bjo šoro, goba go lahlegelwa ke mošomo go sa letelwa. (Ps. 69:16, 17) Dinakong tše bjalo, ke mo go homotšago go retologela go Jehofa, ka kgodišego ya gore o tla re matlafatša gore re kgotlelele a ba a re hlahla gore re dire diphetho tše bohlale. (Bala Psalme 102:17.) Lega go le bjalo, re nyaka thušo ya gagwe le mabakeng a mangwe. Ka mohlala, ge re itokišeletša go yo boledišana le baagišani ba rena ka ditaba tše dibotse tša Mmušo, re swanetše go hlahlwa ke Jehofa gore go nea bohlatse ga rena go atlege. Le gona, nakong le ge e le efe ge re swanetše go dira phetho—e ka ba mabapi le boitapološo, moaparo le go itokiša, bogwera, mošomo, thuto, goba selo le ge e le sefe se sengwe—re dira gabotse ge feela re latela tlhahlo ya Jehofa. Ge e le gabotse, re nyaka tlhahlo dikarolong ka moka tša bophelo bja rena.
Dikotsi tša go se Tsome Tlhahlo ya Modimo
8. Go ja ga Efa sehlare se se ileditšwego go be go bontšha’ng?
8 Lega go le bjalo, gopola gore re swanetše go latela tlhahlo ya Jehofa ka go rata. Modimo a ka se re gapeletše go dira bjalo ge e ba re sa nyake. Motho wa mathomo yo a kgethilego go se latele tlhahlo ya Jehofa ke Efa, gomme mohlala wa gagwe o bontšha kamoo phetho e bjalo e mpe e ka bago selo se segolo ka gona. Nagana gape ka seo se bego se bolelwa ke phetho ya gagwe. Efa o jele seenywa seo se ileditšwego ka gobane o be a nyaka go “ba byalo ka Modimo, [le go] tseba botse le bobe.” (Gen. 3:5) Ka go dira bjalo, o be a ipea boemong bja Modimo, a itirela diphetho mabapi le se se lokilego le se sebe go e na le go latela tlhahlo ya Jehofa. Ka go rialo, o ile a gana go bušwa ke Jehofa. O be a nyaka go itlhahla. Monna wa gagwe, Adama, le yena o latetše tsela e swanago ya borabele.—Baroma 5:12.
9. Ge re gana tlhahlo ya Jehofa, ge e le gabotse re dira’ng, gona ke ka baka la’ng seo e le bošilo bja mafelelo?
9 Lehono, ge re sa latele tlhahlo ya Jehofa, le rena re palelwa ke go lemoga tshwanelo ya gagwe ya go buša. Ka mohlala, nagana ka motho yo a hlagolelago mokgwa wa go bogela diswantšho tše di kgothaletšago bootswa. Ge e ba a kopanela le phuthego ya Bokriste, o tseba tlhahlo ya Jehofa mabapi le taba ye. Dilo tše sa hlwekago ga se tša swanela go tšwa le ka melomo ya rena, re se sa bolela ka go di bogela ka kganyogo e kgolo. (Baef. 5:3) Ka go gana tlhahlo ya Jehofa, motho yo bjalo o gana go bušwa ke Jehofa, e bile o gana bohlogo bja Gagwe. (1 Bakor. 11:3) Bjoo ke bošilo bja mafelelo ka gobane, bjalo ka ge Jeremia a ile a bolela, “motho tsela y’axwe xa’ e buše.”—Jer. 10:23.
10. Ke ka baka la’ng re swanetše go bontšha boikarabelo ge re diriša tokologo ya rena ya boikgethelo?
10 Ba bangwe ba ka no se kwane le mantšu a Jeremia, ba re ge e ba Jehofa a re file tokologo ya boikgethelo, ga se a swanela go re swaya diphošo ge re e diriša. Lega go le bjalo, gopola gore tokologo ya boikgethelo ke boikarabelo e bile ke mpho. Re ikarabela ka dilo tšeo re kgethago go di bolela le go di dira. (Baroma 14:10) Jesu o itše: “Molomo o bolela go tšwa go se se tletšego pelong.” O ile a ba a bolela gore: “Pelong go tšwa dikeleletšo tše kgopo, dipolao, bohlotlolo, bootswa, bohodu, bohlatse bja maaka le dithogako.” (Mat. 12:34; 15:19) Ka go rialo, dipolelo tša rena le ditiro tša rena di utolla boemo bja pelo ya rena. Di bontšha seo ge e le gabotse re lego sona. Ke ka baka leo Mokriste yo bohlale a tsomago tlhahlo ya Jehofa dilong tšohle. Ka tsela yeo, Jehofa o mmona a ‘lokile pelong ya gagwe’ gomme o tla mo “setša.”—Ps. 125:4.
11. Re ithuta’ng historing ya Isiraele?
11 Gopola histori ya Isiraele. Ge setšhaba seo se be se dira dikgetho tše dibotse, se e-kwa ditaelo tša Jehofa, Jehofa o be a se šireletša. (Još. 24:15, 21, 31) Lega go le bjalo, gantši se be se diriša tokologo ya sona ya boikgethelo gampe. Jehofa o ile a bolela ka sona mehleng ya Jeremia gore: “Bôná ba xana xo kwa, ba lesa xo theetša; ba ya ka maithatêlô le ka lonya ya dipelo tša bôná tše mpe; ba boêla moraxo, ba se tšwêlêlê pele.” (Jer. 7:24-26) Seo se nyamiša gakaakang! Anke le ka mohla re se ke ra gana tlhahlo ya Jehofa ra ba ra itlhahla gomme ka go rialo ra “boêla moraxo, [ra] se tšwêlêlê pele” e le ka baka la bohlogo-thata goba boithati!
Go Nyakega’ng Gore re Latele Tayo ya Modimo?
12, 13. (a) Ke seka sefe seo se dirago gore re nyake go latela tlhahlo ya Jehofa? (b) Ke ka baka la’ng tumelo e le bohlokwa?
12 Go rata ga rena Jehofa go re dira gore re nyake go latela tlhahlo ya gagwe. (1 Joh. 5:3) Lega go le bjalo, Paulo o ile a bolela ka selo se sengwe seo re swanetšego go ba le sona ge a be a re: “Re sepela ka tumelo, e sego ka go bona.” (2 Bakor. 5:6, 7) Ke ka baka la’ng tumelo e le bohlokwa? Goba gona, Jehofa o re sepediša “mmileng wa xo loka,” eupša mmila woo ga o dire gore re hume goba go ba le maemo lefaseng le. (Ps. 23:3) Ka baka leo, leihlo la rena la tumelo le swanetše go tsepelela moputsong o sa bapišwego wa moya woo o tlišwago ke go hlankela Jehofa. (Bala 2 Bakorinthe 4:17, 18.) Le gona tumelo e re thuša go kgotsofalela dilo tša motheo tšeo re nago le tšona.—1 Tim. 6:8.
13 Jesu o bontšhitše gore borapedi bja therešo bo akaretša moya wa boikgafo, e lego woo o nyakago tumelo. (Luka 9:23, 24) Barapedi ba bangwe ba botegago ba dirile boikgafo bjo bogolo, ba kgotlelela bodiidi, kgatelelo, kgethollo, gaešita le tlaišo e šoro. (2 Bakor. 11:23-27; Kut. 3:8-10) Tumelo e tiilego ke yona feela yeo e dirilego gore ba kgone go dira bjalo ka lethabo. (Jak. 1:2, 3) Tumelo e tiilego e re dira gore re kgodišege ka mo go feletšego gore ka mehla go latela tlhahlo ya Jehofa ke selo se sekaone-kaone. Ka mehla go dira bjalo go tla re hola ka mo go feletšego. Ga re na pelaelo le ge e le efe ya gore moputso wa bao ba kgotlelelago ka potego o feta kgole tlaišego le ge e le efe ya lebakanyana.—Baheb. 11:6.
14. Ke ka baka la’ng Hagara a ile a swanelwa ke go bontšha boikokobetšo?
14 Gape, ela hloko tema yeo e kgathwago ke boikokobetšo go lateleng tlhahlo ya Jehofa. Mohlala wa Hagara, ngwanenyana wa mohlanka wa Sara, o bontšha se. Ge Sara a be a bona gore ga a be le ngwana, o ile nea Aborahama Hagara, gomme Hagara o ile a ima ngwana wa Aborahama. Ke moka, Hagara o ile a thoma go nyatša mong wa gagwe wa moopa. Ka baka leo, Sara o ile a ‘thoma go mo kokobetša,’ gomme Hagara a tšhaba. Morongwa wa Jehofa o ile a kopana le Hagara gomme a mmotša gore: “Boêla xó mong wa xaxo, O ikokobetšê ka tlase xa diatla tša xaxwe.” (Gen. 16:2, 6, 8, 9) Mohlomongwe Hagara o be a ka thabela go newa tlhahlo e nngwe e itšego. Gore a dire ka go dumelelana le tlhahlo ya morongwa, o be a swanetše go kgaotša go ba le makoko. Lega go le bjalo, Hagara ka boikokobetšo o ile a dira seo morongwa a mmoditšego sona, gomme morwa wa gagwe, Išimaele, a belegwa a šireletšegile ka tenteng ya tatagwe.
15. Hlalosa maemo a mangwe a lehono ao go ona go latela tlhahlo ya Jehofa go ka nyakago gore re ikokobetše.
15 Go latela tlhahlo ya Jehofa go ka ra gore le rena re ikokobetše. Ba bangwe ba ka swanelwa ke go amogela taba ya gore mohuta o itšego wa boitapološo woo ba o ratago ga o kgahle Jehofa. Mokriste a ka ba a kgopišitše yo mongwe gomme a swanetše go kgopela tebalelo. Goba a ka ba a dirile phošo gomme a swanetše go e amogela. Go thwe’ng ge e ba yo mongwe a dira sebe se segolo? O swanetše go ikokobetša gomme a botše bagolo sebe sa gagwe. Motho yoo a ka ba a kgaolwa. Gore a amogelwe gape ka phuthegong, o swanetše go itshola ka boikokobetšo gomme a sokologe. Maemong a le go ao a swanago le ona, mantšu a Diema 29:23 ke a homotšago ge a re: “Boikxoxomošô bo tlo kokobetša mong wa byôna; wa pelo e ipoetšaxo ó tlo xodišwa.”
Jehofa o re Hlahla Bjang?
16, 17. Re ka holwa bjang ka mo go feletšego ke Beibele, wona mothopo wa tlhahlo e tšwago go Modimo?
16 Mothopo o mogolo wa tlhahlo ya Modimo ke Beibele, Lentšu la Modimo le le buduletšwego. (Bala 2 Timotheo 3:16, 17.) Gore re holwe kudu le Lentšu leo, ga se ra swanela go letela gore go tšwelele boemo bjo thata pele re tsoma mantšu a thušago ka Mangwalong. Go e na le moo, re tla dira gore go bala Beibele e be mokgwa wa rena wa ka mehla. (Ps. 1:1-3) Ge re dira bjalo, re tlwaelana le mantšu a buduletšwego. Dikgopolo tša Modimo di fetoga dikgopolo tša rena, gomme re ba boemong bjo bobotse bja go lebeletšana gaešita le mathata a sa letelwago.
17 Go oketša moo, go bohlokwa go naganišiša ka seo re se balago Mangwalong gotee le go rapela mabapi le sona. Ge re eleletša ka ditemana tša Beibele, re ela hloko kamoo di ka šomago ka gona maemong a itšego. (1 Tim. 4:15) Ge re lebeletšane le mathata a magolo, re rapela Jehofa gomme ra mo kgopela gore a re thuše go hwetša tlhahlo yeo re e nyakago. Moya wa Jehofa o tla re thuša go gopola melao ya motheo e šomago ya Mangwalo yeo re e badilego ka Beibeleng goba ka dikgatišong tše theilwego Beibeleng.—Bala Psalme 25:4, 5.
18. Jehofa o diriša borwarre bja Bokriste ka ditsela dife bakeng sa go re hlahla?
18 Borwarre bja rena bja Bokriste le bjona ke sedirišwa sa ge re tsoma tlhahlo ya Jehofa. Karolo e bohlokwa kudu ya borwarre bjoo ke “mohlanka yo a botegago le wa temogo” gotee le moemedi wa gagwe e lego Sehlopha se Bušago, seo se tšweletšago dijo tša moya ka mehla di le ka sebopego sa taba yeo e gatišitšwego gotee le mananeo a diboka gotee le dikopano. (Mat. 24:45-47; bapiša le Dit. 15:6, 22-31.) Go oketša moo, ka gare ga borwarre bja Bokriste go na le batho ba godilego ka tsebo, kudu-kudu bagolo, bao ba swanelegago go ka nea thušo gotee le keletšo ya Mangwalo. (Jes. 32:1) Bafsa ba ka magaeng a Bakriste le bona ba na le thušo e nngwe e bohlokwa. Batswadi ba bona bao ba dumelago ke mokero o hlomilwego ke Modimo woo ba dulago ba kgothaletšwa go ya go wona bakeng sa tlhahlo.—Baef. 6:1-3.
19. Ke ditšhegofatšo dife tšeo re di amogelago ka baka la go dula re tsoma tlhahlo ya Jehofa?
19 Ee, Jehofa o re fa tlhahlo ka ditsela tše dintši gomme re dira gabotse ge re e diriša ka mo go tletšego. Ge a bolela mabapi le nako ya ge Isiraele e be e botega, Kgoši Dafida o itše: “Ò [be o] le wa xo bôtwa ke bô-tata-wešo, wa ba hlakodiša. Bôná ba Xo hlabetše mokxoši, ba namolêlwa; ba be ba botile Wêna, ba se kê ba nyamišwa.” (Ps. 22:3-5) Ge re latela tlhahlo ya Jehofa ka go e bota, le rena re ka “se kê [ra] nyamišwa.” Kholofelo ya rena e ka se ke ya nyamišwa. Ge e ba re ‘gafela Jehofa tsela tša rena,’ go e na le go ithekga ka bohlale bja rena ka noši, moputso e tla ba ditšhegofatšo tše humilego gaešita le gona bjale. (Ps. 37:5) Le gona ge e ba re phegelela ka potego tseleng yeo, ditšhegofatšo tšeo e tla ba tša ka mo go sa felego. Kgoši Dafida o ngwadile gore: “Morêna ó rata tša tokô; baxauxêlwa ba xaxwe xa’ ba lahle; ό tlo ba lôtôla neng le neng. . . . Baloki e ba beng ba naxa, ba dula mo xo yôna ka mehla le ka mehla.”—Ps. 37:28, 29.
[Na o ka Hlalosa?]
• Ke ka baka la’ng re bota tlhahlo ya Jehofa?
• Ke’ng seo se ka bontšhwago ke go gana ga rena tlhahlo ya Jehofa?
• Ke maemong afe a mangwe moo Mokriste a swanetšego go ikokobetša?
• Jehofa o re hlahla bjang lehono?
[Dipotšišo tša Thuto]
[Seswantšho go letlakala 8]
Na o ithekga ka Jehofa dikarolong ka moka tša bophelo bja gago?
[Seswantšho go letlakala 9]
Efa o ile a gana go bušwa ke Jehofa
[Seswantšho go letlakala 10]
Ke seka sefe seo Hagara a bego a swanetše go ba le sona gore a latele tlhahlo ya morongwa?