Dira Tšwelopele ya Moya ka go Latela Mohlala wa Paulo

“Ke lwele ntwa e botse, ke kitimile lebelo go fihla mafelelong, ke bolokile tumelo.”—2 TIM. 4:7.

1, 2. Ke diphetogo dife tšeo Saulo wa Tareso a ilego a di dira bophelong bja gagwe, gomme ke modiro ofe o bohlokwa woo a ilego a o tsenela?

MONNA yo o be a le bohlale e bile a kgona go dira diphetho. Lega go le bjalo, o ile a ‘itshwara ka go dumelelana le dikganyogo tša nama ya gagwe.’ (Baef. 2:3) Ka morago o ile a itlhalosa e le “morogaki le motlaiši le motho wa mereba.” (1 Tim. 1:13) Monna yoo e be e le Saulo wa Tareso.

² Ge nako e dutše e e-ya, Saulo o ile a dira diphetogo tše dikgolo bophelong bja gagwe. O ile a tlogela mekgwa ya gagwe ya pele gomme a šoma ka thata a ‘sa tsome seo se holago yena a nnoši eupša seo se holago ba bantši.’ (1 Bakor. 10:33) O ile a ba bonolo gomme a bontšha maikwelo a borutho go bao e bego e le manaba a gagwe. (Bala 1 Bathesalonika 2:7, 8.) O ngwadile gore: “Ke bile modiredi,” gomme a oketša ka gore: “Nna motho yo a fetwago le ke yo monyenyane-nyenyane wa bakgethwa bohle, ke neilwe botho bjo bo sa swanelago gore ke bolele ditaba tše dibotse ditšhabeng mabapi le mahumo a ka se kego a lekanywa a Kriste.”—Baef. 3:7, 8.

3. Go ithuta mangwalo a Paulo le pego ya bodiredi bja gagwe go ka re thuša bjang?

³ Saulo, yoo gape a bego a tsebja e le Paulo, o dirile tšwelopele e botse ya moya. (Dit. 13:9) Tsela e kaone ya go akgofiša tšwelopele ya rena  therešong ke ka go ithuta mangwalo a Paulo le dipego tša bodiredi bja gagwe le go ekiša mohlala wa gagwe wa tumelo. (Bala 1 Bakorinthe 11:1; Baheberu 13:7) Anke re boneng gore go dira bjalo go ka re tutueletša bjang go hlagolela mokgwa o mobotse wa thuto ya motho ka noši, go hlagolela lerato la kgonthe la go rata batho le go itebelela ka tsela e nepagetšego.

Mokgwa wa Paulo wa go Ithuta

4, 5. Thuto ya motho ka noši e ile ya hola Paulo bjang?

⁴ Bjalo ka Mofarisei yo a bego a rutilwe “dinaong tša Gamaliele, [a] rutwa go ya ka Molao o tiilego wa bagologolo,” Paulo o be a šetše a e-na le tsebo e itšego ka Mangwalo. (Dit. 22:1-3; Bafil. 3:4-6) Gatee-tee ka morago ga go kolobetšwa, o ile a “ya Arabia”—Leganateng la Siria goba mohlomongwe lefelong le lengwe le le homotšego la Pheninsuleng ya Arabia moo go bego go tla ba bonolo go naganišiša. (Bagal. 1:17) Go bonagala Paulo a be a nyaka go naganišiša ka mangwalo ao a bego a hlatsela gore Jesu ke Mesia. Go feta moo, Paulo o be a nyaka go itokišeletša modiro woo o bego o le pele ga gagwe. (Bala Dit. 9:15, 16, 20, 22.) Paulo o ile a tšea nako a naganišiša ka dilo tša moya.

⁵ Tsebo le temogo ya Mangwalo tšeo Paulo a ilego a di hwetša thutong ya motho ka noši di ile tša mo thuša go ruta therešo ka katlego. Ka mohlala, sinagogeng ya Antiokia kua Pisidia, Paulo o ile a tsopola Mangwalo a Seheberu ka go lebanya bonyenyane ka makga a mahlano go hlatsela gore Jesu ke Mesia. Le gona Paulo o ile a bolela ka mangwalo a makgethwa ka makga a mmalwa. Mokgwa wa gagwe wa go fahlela ka Beibele o be o kgodiša kudu moo “Bajuda ba bantši le basokologi bao ba bego ba rapela Modimo ba [ilego ba] latela Paulo le Baranaba,” e le gore ba ithute mo go oketšegilego. (Dit. 13:14-44) Nywaga ka morago, ge sehlopha sa Bajuda ba Roma se be se e-tla moo a bego a dula gona, Paulo o ile a se hlalosetša ditaba a “nea bohlatse bjo bo tletšego mabapi le mmušo wa Modimo le ka go [se] kgodiša mabapi le Jesu go tšwa molaong wa Moše gotee le go Baporofeta.”—Dit. 28:17, 22, 23.

6. Ke’ng seo se thušitšego Paulo go dula a tiile moyeng ge a be a lebeletšane le diteko?

⁶ Ge a lebane le diteko, Paulo o ile a tšwela pele a hlahloba Mangwalo le go matlafatšwa ke molaetša wa ona o buduletšwego. (Baheb. 4:12) Ge a be a golegilwe kua Roma pele a ka bolawa, Paulo o ile a kgopela Timotheo go mo tlišetša “mangwalo a go phuthwa” le “matlalo a go ngwalela.” (2 Tim. 4:13) Mangwalo ao e ka ba e be e le dikarolo tša Mangwalo a Seheberu tšeo Paulo a bego a di diriša ge a be a ithuta kamoo go tseneletšego. Go hwetša tsebo ya Mangwalo ka go ithuta Beibele ka mehla go be go le bohlokwa go Paulo e le gore a ka kgona go dula a tiile.

7. Bolela mehola yeo o ka e hwetšago ge o ithuta Beibele ka mehla.

⁷ Thuto ya ka mehla ya Beibele, yeo e sepedišanago le go naganišiša mo go nago le morero, di tla re thuša go gola moyeng. (Baheb. 5:12-14) Mabapi le bohlokwa bja Lentšu la Modimo, mopsalme o opetše ka gore: “Melaô ya molomo w’axo e nkhola xo fetiša xauta le disilifêra tše dikete. ’Taêlô tša xaxo di nthuta bohlale ka phala manaba a-ka, ka xobane di na le nna ka mehla. ’Naô tša-ka ke di ilêla tsela-kxôpô, xore ke êlê Lentšu l’axo thlôkô.” (Ps. 119:72, 98, 101) Na o ithuta Beibele ka mehla? Na o itokišeletša dikabelo tša ka moso tirelong ya Modimo ka go bala Beibele ka mehla le go naganišiša ka seo o se balago?

Saulo o Ile a Ithuta go Rata Batho

8. Saulo o ile a swara bjang bao ba bego ba sa phele Sejuda?

⁸ Pele ga ge e ka ba Mokriste, Saulo o be a le mafolofolo bodumeding bja gagwe, eupša o be a sa re selo ka batho bao e bego e se Bajuda. (Dit. 26:4, 5) O be a lebeletše le go dumelelana le Bajuda bao ba bego ba foša Stefano ka mafsika. Saulo a ka ba a ile a matlafatšwa ke seo a se bonego, mohlomongwe a bona Stefano a swanela ke kotlo ya polao. (Dit. 6:8-14; 7:54–8:1) Pego e buduletšwego e re: “Saulo a thoma go hlokofatša phuthego. A šwahlela ntlo le ntlo, gomme a  goga banna le basadi, a ba gafela kgolegong.” (Dit. 8:3) O ile a ba a “fihla bokgoleng bja go ba hlomarela gaešita le metseng ya ka ntle.”—Dit. 26:11.

9. Ke phihlelo efe yeo e dirilego gore Saulo a hlahlobe lefsa tsela yeo a bego a swara batho ka yona?

⁹ Saulo o be a e-ya go tlaiša barutiwa ba Kriste kua Damaseko ge Morena Jesu a be a bonala go yena. Letago le le fetago la tlhago la Morwa wa Modimo le ile la dira gore Saulo e be sefofu gomme a ithekge ka ba bangwe. Nakong ya ge Jehofa a be a diriša Anania go dira gore Saulo a bone gape, boemo bja Saulo bja kgopolo mabapi le batho bo be bo fetogile ka mo go feletšego. (Dit. 9:1-30) Ka morago ga go ba molatedi wa Kriste, o ile a šoma ka thata go dirišana le batho bohle go swana le ge Jesu a dirile. Se se be se akaretša go lahla dintwa le go ba le “khutšo le batho bohle.”—Bala Baroma 12:17-21.

10, 11. Paulo o bontšhitše bjang gore o rata batho e le ka kgonthe?

¹⁰ Paulo o be a sa kgotsofatšwe ke go fo ba le khutšo le batho ba bangwe. O be a nyaka go ba bontšha lerato la kgonthe, gomme bodiredi bja Bokriste bo mo neile sebaka sa go dira bjalo. Leetong la gagwe la pele la boromiwa, o ile a bolela ditaba tše dibotse kua Asia Minor. Go sa šetšwe kganetšo e šoro, Paulo le badirišani ba gagwe ba ile ba lebiša tlhokomelo go thušeng batho ba boleta go ba Bakriste. Ba ile ba boela Lisitara le Ikonia, le ge baganetši moo metseng yeo ba ile ba leka go bolaya Paulo.—Dit. 13:1-3; 14:1-7, 19-23.

¹¹ Ka morago, Paulo le sehlopha sa gagwe ba ile ba tsoma batho ba sekametšego go lokeng motseng wa Matsedonia kua Filipi. Mojuda wa mosokologi yo a bitšwago Lidia o ile a theetša ditaba tše dibotse gomme a fetoga Mokriste. Bahlankedi ba setšhaba ba ile ba betha Paulo le Silase ka dikgati gomme ba ba lahlela kgolegong. Lega go le bjalo, Paulo o ile a dira boboledi go mohlapetši wa kgolego, moo yena le ba lapeng la gagwe ba ilego ba kolobetšwa ya ba barapedi ba Jehofa.—Dit. 16:11-34.

12. Ke’ng seo se tutueleditšego Saulo wa morogaki go ba moapostola yo lerato wa Jesu Kriste?

¹² Ke ka baka la’ng Saulo yo e kilego ya ba motlaiši a ile a amogela bodumedi bja bao e kilego ya ba bahlaselwa ba gagwe? Ke’ng seo se ilego sa tutueletša monna yoo wa morogaki go ba moapostola yo botho le yo lerato, yo a bego a ikemišeditše go bea bophelo bja gagwe kotsing e le gore ba bangwe ba ithute therešo ka Modimo le Kriste? Paulo ka boyena o hlalosa ka gore: ‘Modimo yo wa go mpitša ka botho bja gagwe bjo bo sa swanelago o bone e le mo gobotse go utolla Morwa wa gagwe ka nna.’ (Bagal. 1:15, 16) Ge a ngwalela Timotheo, Paulo o itše: ‘Ke ile ka gaugelwa e le gore ka nna ke le modiradibe wa thwadi, Kriste Jesu a bontšhe bopelotelele bja gagwe bjohle gore e be mohlala go bao ba tlago go dumela go yena bakeng sa bophelo bjo bo sa felego.’ (1 Tim. 1:16) Jehofa o ile a lebalela Paulo, gomme go amogela botho bjo bjalo le kgaugelo go ile gwa mo tutueletša go bontšha ba bangwe lerato ka go bolela le bona ditaba tše dibotse.

13. Ke’ng seo se swanetšego go re tutueletša go rata ba bangwe, gona re ka dira seo bjang?

¹³ Ka mo go swanago, Jehofa o lebalela le dibe tša rena gotee le diphošo. (Ps. 103:8-14) Mopsalme o botšišitše gore: “Xe Wene Morêna Ò latiša molato, xôna xo ka êma mang?” (Ps. 130:3) Ka ntle le kgaugelo ya Modimo, ga go le o tee wa rena yo a bego a ka thabišwa ke tirelo e  kgethwa, goba go lebelela pele go amogeleng bophelo bjo bo sa felego. Botho bja Modimo e bile bjo bogolo go rena bohle. Ka gona, go swana le Paulo, re swanetše go nyaka go bontšha ba bangwe lerato ka go ba botša le go ba ruta therešo gotee le ka go matlafatša badumedi-gotee le rena.—Bala Ditiro 14:21-23.

14. Re ka kgona bjang go oketša bodiredi bja rena?

¹⁴ Paulo o be a nyaka go ba modiredi yo a atlegago wa ditaba tše dibotse, gomme mohlala wa Jesu o ile wa kgoma pelo ya gagwe. Gare ga ditsela tšeo Morwa wa Modimo a ilego a bontšha lerato le le sa bapišwego go batho e bile ka bodiredi bja gagwe bja phatlalatša. Jesu o itše: “Puno ke e kgolo, eupša badiri ke ba sego kae. Ka baka leo, kgopelang Mong wa puno gore a romele badiri punong ya gagwe.” (Mat. 9:35-38) Ka go ba modiri yo mafolofolo, Paulo o dirile dilo ka go dumelelana le kgopelo le ge e le efe yeo a ka bego a ile a e dira ya go kgopela gore go be le badiri ba oketšegilego. Go thwe’ng ka wena? Na o ka kaonefatša bodiredi bja gago? Goba na o ka oketša nako yeo o fetšago o le modirong wa go bolela ka Mmušo, mohlomongwe le ka go lokiša maemo a gago e le gore o ka bula madibogo? A re bontšheng lerato la kgonthe go ba bangwe ka go ba thuša go ‘swarelela ka go tia lentšung la bophelo.’—Bafil. 2:16.

Kamoo Paulo a Bego a Itebelela ka Gona

15. Paulo o be a itebelela bjang ge a ipapetša le Bakriste-gotee le yena?

¹⁵ Bjalo ka modiredi wa Mokriste, Paulo o re beetše mohlala o mobotse ka tsela e nngwe gape. Le ge a ile a hwetša ditokelo tše dintši ka phuthegong ya Bokriste, Paulo o be a tseba gore ga se a ka a šomela ditšhegofatšo tšeo le gore ga se a ka a di hwetša ka baka la bokgoni bja gagwe. O ile a lemoga gore ditšhegofatšo tšeo a bego a di hwetša e be e le pontšho ya botho bja Modimo. Paulo o ile a lemoga gore Bakriste ba bangwe le bona e be e le badiredi ba atlegago ba ditaba tše dibotse. Go sa šetšwe boemo bja gagwe bathong ba Modimo, o ile dula a ikokobeditše.—Bala 1 Bakorinthe 15:9-11.

16. Paulo o bontšhitše bjang boikokobetšo le boipoetšo mabapi le kgang ya lebollo?

¹⁶ Ela hloko kamoo Paulo a ilego a swaragana le bothata bjo bo ilego bja tsoga motseng wa Siria kua Antiokia. Phuthego ya Bokriste moo e be e sa dumelelane ka kgang ya lebollo. (Dit. 14:26–15:2) Ka ge Paulo a be a kgethilwe go etelela pele modiro wa boboledi go Bantle ba sa bollago, a ka ba a ile a nagana gore o na le tsebo ya go dirišana le bao e sego Bajuda gomme a ipona a swanelega go rarolla bothata. (Bala Bagalatia 2:8, 9.) Lega go le bjalo, ge maiteko a gagwe a be a bonala a sa rarolle bothata, ka boikokobetšo le boipoetšo, o ile a latela thulaganyo ya go batamela sehlopha se bušago kua Jerusalema go boledišana le sona ka taba ye. O ile a dirišana le sona ka botlalo ge ditho tša sona di dutše di theeditše bothata, di fihlelela phetho gomme di mo nea kabelo ya go ba yo mongwe wa batseta ba tšona. (Dit. 15:22-31) Ka gona Paulo ‘o ile a etelela pele go bontšheng bahlanka-gotee le yena kgodišo.’—Baroma 12:10b.

17, 18. (a) Paulo o ile a dira gore bao ba lego ka diphuthegong ba ikwe bjang? (b) Karabelo ya bagolo ba Efeso mabapi le go tloga ga Paulo e re ruta’ng ka yena?

¹⁷ Paulo yo a ikokobeditšego ga se a ka a ikaroganya le bana babo le dikgaetšedi ka diphuthegong. Go e na le moo, o ile a ba gomarela. Bofelong bja lengwalo la gagwe le le yago go Baroma, o ile a dumediša batho ba fetago ba 20  ka maina a bona. Bontši bja bona ga ba bolelwe ka Mangwalong, gomme ba mmalwa ba be ba e-na le ditokelo tše kgethegilego. Eupša e be e le bahlanka ba botegago ba Jehofa, gomme Paulo o be a ba rata kudu.—Baroma 16:1-16.

¹⁸ Boikokobetšo bja Paulo le bogwera bja gagwe di ile tša aga diphuthego. Ka morago ga ge a boledišane le bagolo ba Efeso ka lekga la mafelelo, ba ile “ba wela godimo ga molala wa Paulo ba mo atla ka borutho, gobane ba be ba kwešitšwe bohloko kudu ke lentšu leo a ilego a le bolela la gore ba be ba ka se sa hlwa ba bona sefahlego sa gagwe.” Go tloga ga motho yo a ikgantšhago, wa modula-thoko go be go ka se dire gore ba arabele ka tsela yeo.—Dit. 20:37, 38.

19. Re ka bontšha bjang “monagano o ikokobeditšego” ge re dirišana le Bakriste-gotee le rena?

¹⁹ Bohle bao ba nyakago go dira tšwelopele ya moya ba swanetše go bontšha moya wa boikokobetšo go swana le Paulo. O kgothaleditše Bakriste-gotee le yena gore ba se “dire selo ka tshele goba ka go ikgopola, eupša e be ka monagano o ikokobeditšego le tšea gore ba bangwe ba le feta ka bogolo.” (Bafil. 2:3) Re ka latela keletšo yeo bjang? Tsela e nngwe ke ka go dirišana le bagolo ka phuthegong ya gabo rena, go latela tlhahlo ya bona le go amogela dikahlolo tšeo ba di dirago. (Bala Baheberu 13:17.) Tsela e nngwe ke ka go tšeela godimo bana babo rena le dikgaetšedi ba lego ka phuthegong. Diphuthego tša batho ba Jehofa di bopilwe ke batho bao gantši e lego ba ditšhaba, ditšo, merafo le ditlogo tše fapanego. Lega go le bjalo, na ga se ra swanela go swara bohle ka go se bebe sefahlego le ka lerato bjalo ka ge Paulo a dirile? (Dit. 17:26; Baroma 12:10a) Re kgothaletšwa go ‘amogelana go etša ge Kriste le yena a re amogetše, gore go išwe letago go Modimo.’—Baroma 15:7.

‘Kitima Lebelo la Bophelo ka Kgotlelelo’

20, 21. Ke’ng seo se tla re thušago go kitima lebelo la bophelo ka katlego?

²⁰ Bophelo bja Mokriste bo ka swantšhwa le go kitima lebelo le letelele. Paulo o ngwadile gore: “Ke kitimile lebelo go fihla mafelelong, ke bolokile tumelo. Go tloga mo nakong ye go ya pele ke boloketšwe mphapahlogo wa toko, woo Morena, moahlodi wa go loka a tlago go mpha wona e le moputso letšatšing leo, fela e sego nna ke nnoši, eupša le bohle bao ba ratilego ponagatšo ya gagwe.”—2 Tim. 4:7, 8.

²¹ Go latela mohlala wa Paulo go tla re thuša go kitima lebelo la bophelo bjo bo sa felego ka katlego. (Baheb. 12:1) Ka gona, a re kataneleng go dula re dira tšwelopele ya moya ka go hlagolela mokgwa o mobotse wa thuto ya motho ka noši, ka go hlagolela go rata batho ka mo go tseneletšego le ka go dula re e-na le moya wa boikokobetšo.

O be o tla Araba Bjang?

• Paulo o ile a holwa bjang ke go ithuta Mangwalo ka mehla?

• Ke ka baka la’ng go rata batho ka mo go tseneletšego go le bohlokwa go Bakriste ba therešo?

• Ke go ba le dika dife moo go tla go thušago go swara ba bangwe ka go se bebe sefahlego?

• Mohlala wa Paulo o ka go thuša bjang go dirišana le bagolo ka phuthegong ya geno?

[Dipotšišo tša Thuto]

[Seswantšho go letlakala 23]

Hwetša matla Mangwalong, bjalo ka ge Paulo a dirile

[Seswantšho go letlakala 24]

Bontšha lerato ka go boledišana le ba bangwe ka ditaba tše dibotse

[Seswantšho go letlakala 25]

Na o tseba seo se ilego sa dira gore Paulo a ratwe ke bana babo?