Kamoo Sehlopha se Bušago se Rulagantšwego ka Gona

SEHLOPHA se Bušago sa Dihlatse tša Jehofa se bopilwe ka banna ba ineetšego le bao e lego bahlanka ba tloditšwego ba Modimo. Ke baemedi ba sehlopha sa mohlanka yo a botegago le wa temogo, yo a nago le boikarabelo bja go nea dijo tša moya le tlhahlo gotee le go dira gore modiro wa go bolela ka Mmušo o etišwe pele.—Mat. 24:14, 45-47.

Sehlopha se Bušago se swara seboka beke e nngwe le e nngwe, gantši ka Laboraro. Se se thuša bana ba babo rena go šoma ka botee. (Ps. 133:1) Ditho tša Sehlopha se Bušago gape di hlankela dikomiting tše di fapa-fapanego. Bakeng sa go hlokomela dikgahlego tša Mmušo, komiti e nngwe le e nngwe e na le boikarabelo bja yona, ka ge go bontšhitšwe ka boripana ka mo tlase.

▪ KOMITI YA BALOMAGANYI: Komiti ye e bopša ke molomaganyi wa komiti e nngwe le e nngwe ya Sehlopha se Bušago le mongwaledi yoo le yena e lego setho sa Sehlopha se Bušago. E kgonthišetša gore dikomiti ka moka di šoma ka thelelo ntle le mathata. E bile ke yona e ikarabelago ge go hlagile maemo a magolo a tšhoganetšo, ditlaišo, dikotsi le ditaba tše dingwe tša tšhoganetšo tšeo di kgomago Dihlatse tša Jehofa lefaseng ka bophara.

▪ KOMITI YA BAŠOMI: Bana babo rena ba lego komiting ye ba neilwe boikarabelo bja go hlokomela dinyakwa tša nama le tša moya gotee le go thuša ditho tša lapa la Bethele lefaseng ka bophara. Komiti ye e ikarabela ka go kgetha le go laletša ditho tše difsa go tla legaeng la Bethele le go araba dipotšišo mabapi le tirelo ya tšona ya Bethele.

▪ KOMITI YA KGATIŠO: Komiti ye e ikarabela ka go gatišwa le go romelwa ga dikgatišo tša Beibele lefaseng ka bophara. E hlokomela mafapha a kgatišo le dithoto tšeo di laolwago le go dirišwa ke mekgatlo e fapa-fapanego yeo e dirišwago ke Dihlatse tša Jehofa. Komiti ye e rulaganya tsela e kaone kudu ya go diriša ditšhelete tšeo di neetšwego bakeng sa modiro wa Mmušo wa lefase ka bophara.

▪ KOMITI YA TIRELO: Bao ba lego komiting ye ba hlokomela modiro wa boboledi le ditaba tšeo di tswalanago le diphuthego, babulamadibogo, bagolo le balebeledi ba basepedi. E hlokomela go rulaganywa ga Tirelo ya Rena ya Mmušo le go laletša barutwana ba Sekolo sa Gilead le ba Sekolo sa Tlhahlo ya Bodiredi gotee le go ba nea dikabelo tša ka morago ga ge ba alogile.

▪ KOMITI YA GO RUTA: Komiti ye e hlokomela dipolelo tšeo di newago dikopanong tše dinyenyane, tše dikgolo le dibokeng tša phuthego. E rulaganya mananeo a moya bakeng sa ditho tša lapa la Bethele le gona e hlokomela dikolo tše fapa-fapanego, tše bjalo ka Sekolo sa Gilead le Sekolo sa Tirelo ya Bobulamadibogo, gotee le go rulaganya dikhasete le dibidio.

▪ KOMITI YA BONGWADI: Ke boikarabelo bja komiti ye go hlokomela thulaganyo ya go ngwala dijo tša moya bakeng sa go gatišwa le go romelwa go badumedi-gotee le batho ka kakaretšo. Komiti ye e araba dipotšišo tšeo di theilwego Beibeleng le go nea tumelelo mengwalong ya terama le dithulaganyong tša polelo. Le gona e hlokomela modiro wa bofetoledi woo o dirwago lefaseng ka bophara.

Moapostola Paulo o swantšhitše phuthego ya batlotšwa le mmele wa motho gomme a gatelela tema e bohlokwa e kgathwago ke ditho ka moka gotee le go dirišana ga tšona, lerato le tirišano ge go phethwa modiro wo o neilwego ke Modimo. (Baroma 12:4, 5; 1 Bakor. 12:12-31) Hlogo e lego Jesu Kriste, o nea ditho tša mmele seo se nyakegago bakeng sa go dirišana gabotse, go thekgana le dijo tša moya. (Baef . 4:15, 16; Bakol. 2:19) Ka tsela ye, Sehlopha se Bušago se rulagantšwe bakeng sa go etelela pele bjalo ka ge Jehofa a se hlahla ka moya o mokgethwa.