Phegelela “Bokgethwa ka go Boifa Modimo”

GE BEIBELE e bolela ka bokgethwa bja Jehofa Modimo bjo bo ka se bapišwego le selo, e re: ‘Mokgethwa, mokgethwa, mokgethwa ke Jehofa.’ (Jes. 6:3; Kut. 4:8) Lentšu la Seheberu le la Segerika bakeng sa “bokgethwa” le fetiša kgopolo ya go seka goba bohlweki bja bodumedi, ya go ba kgole le tšhilafalo. Bokgethwa bja Modimo bo šupa boitshwarong bjo bo phethagetšego ka mo go feletšego.

Na Modimo yo mokgethwa, Jehofa, a ka se letele gore bao ba mo rapelago e be ba bakgethwa, ke gore ba hlweke mmeleng le moyeng? Beibele e bontšha gabotse gore Jehofa o nyaka gore batho ba gagwe e be ba bakgethwa. Re bala go 1 Petro 1:16 gore: “E-bang ba bakgethwa, gobane ke yo mokgethwa.” Na ruri motho yo a sego a phethagala a ka ekiša bokgethwa bja Jehofa? Ee, le ge e se ka mo go phethagetšego. Modimo a ka re lebelela re le ba bakgethwa ge e ba re mo rapela re le ba hlwekilego moyeng gomme re e-na le tswalano ya kgaufsi le yena.

Ka gona, re ka hlweka bjang lefaseng leo le sego la hlweka boitshwarong? Ke mediro efe yeo re swanetšego go e phema? Ke diphetogo dife tšeo go ka nyakegago gore re di dire polelong le boitshwarong bja rena? A re boneng seo re ka ithutago sona tabeng ye mabapi le seo Modimo a bego a se nyaka go Bajuda bao ba boetšego nageng ya gabo bona ba e-tšwa Babilona ka 537 B.C.E.

‘Go tlo ba le Tsela-kgethwa’

Jehofa o be a boletše e sa le pele gore batho ba gagwe bao ba bego ba le bothopša Babilona ba be ba tla bušetšwa nageng ya bona. Boporofeta bja mabapi le tsošološo bo be bo e-na le kgonthišetšo ye: “Xo tlo ba le mmila o lekelelanexo, tsela ye ba tl’o xo re ké tsela-kxêthwa.” (Jes. 35:8a) Mantšu a a bontšha gore Jehofa ga se a bula feela tsela ya gore Bajuda ba boele gae eupša gape o ba kgonthišeditše gore o tla ba šireletša leetong la go boela gae.

Bakeng sa bahlanka ba gagwe ba lefaseng ba mehleng yeno, Jehofa o butše “tsela-kxêthwa” ya go tšwa go Babilona o Mogolo, e lego mmušo wa lefase wa bodumedi bja maaka. Ka 1919 o ile a lokolla Bakriste ba tloditšwego bokgobeng bja moya bja bodumedi bja maaka, gomme ba ile ba hlwekiša ganyenyane-ganyenyane borapedi bja bona dithutong ka moka tša maaka. Bjalo ka barapedi ba Jehofa lehono, re thabela lefelo la moya le le hlwekilego le leo le nago le khutšo, leo re ka rapelago Jehofa re le go lona gotee le go ba le tswalano ya khutšo le yena le batho ba bangwe.

Ditho tša “mohlatswana” wa Bakriste ba tloditšwego le tša “lešaba le legolo” leo le oketšegago la “dinku tše dingwe,” di kgethile go sepela tseleng e kgethwa gomme di laletša ba bangwe gore ba di tlatše. (Luka 12:32; Kut. 7:9; Joh. 10:16) “Tsela-kxêthwa” e bulegetše bohle bao ba  ikemišeditšego gore ba “neele mebele ya [bona] e le sehlabelo se se phelago, se sekgethwa, se se amogelegago go Modimo.”—Baroma 12:1.

“E sa Sepelwexo ke wa Thšila”

Ka 537 B.C.E., Bajuda bao ba bego ba boela gae ba ile ba swanela go fihlelela senyakwa se bohlokwa. Mabapi le bao ba bego ba swanelega go sepela “ka tsela-kxêthwa,” Jesaya 35:8b e re: “E sa sepelwexo ke wa thšila; e tlo ba ya bôná. E a e swerexo, le xe e le lešilo, a ka se timêlê.” Ka ge morero wa gore Bajuda ba boele Jerusalema e be e le go tsošološa borapedi bjo bo sekilego, go be go ka se be le sebaka sa bao ba nago le maikemišetšo a boithati, bao ba sa hlomphego dilo tše kgethwa, goba bao ba sego ba hlweka moyeng. Bao ba boago ba be ba swanetše go kgomarela ditekanyetšo tša Jehofa tše phagamego. Bao ba nyakago go amogelwa ke Modimo lehono ba swanetše go fihlelela senyakwa se se swanago. Ba swanetše go phegelela “bokgethwa ka go boifa Modimo.” (2 Bakor. 7:1) Ka gona, ke mediro efe e sa hlwekago yeo re swanetšego go e phema?

Moapostola Paulo o ngwadile gore: “Mediro ya nama e pepeneneng, yona ke bootswa, go se hlweke, boitshwaro bjo bo hlephilego.” (Bagal. 5:19) Bootswa bo akaretša mediro ka moka ya dikopano tša botona le botshadi yeo e sepedišanago le go diriša ditho tša pelego, yeo e dirwago ka ntle ga lenyalo. Boitshwaro bjo bo gobogilego bo akaretša “go goboga, go se laolege, boitshwaro bja go se be le dihlong le boitshwaro bjo bo gobogilego.” Go molaleng gore bootswa le boitshwaro bjo bo gobogilego di thulana le bokgethwa bja Jehofa. Ka gona, bao ba tšwelago pele ba dira dilo tše bjalo ga ba dumelelwe go ba karolo ya phuthego ya Bokriste goba ba kgaolwa ka phuthegong. Go bjalo le ka bao ba dirago dilo tša go se hlweke mo go feteletšego, ke gore, “ditšhila tša mohuta o mongwe le o mongwe ka megabaru.”—Baef. 4:19.

“Go se hlweke” ke polelwana yeo e akaretšago mehuta e mentši ya dibe. Lentšu la yona la Segerika le šupa go go se hlweke goba go se seke ga mohuta o mongwe le o mongwe—boitshwarong, polelong le moyeng. Le akaretša mediro yeo e nago le go se hlweke yeo e ka no se nyakego kgato ya boahlodi. * Eupša na bao ba dirago dilo tše bjalo tša go se hlweke ba phegelela tsela ya bokgethwa?

A re re Mokriste o thoma go bogela diswantšho tše di kgothaletšago bootswa ka sephiring. Ganyenyane-ganyenyane, ge dikganyogo tša go se hlweke di gola, o nyenyefatša maikemišetšo a gagwe a go dula a hlwekile mahlong a Jehofa. Boitshwaro bja gagwe bo ka no ba bo sešo bja gola go fihla bokgoleng bja go dira mediro e feteletšego ya go se hlweke, eupša ga a tšwele pele a naganišiša ka ‘dilo le ge e le dife tše di sekilego, dilo le ge e le dife tšeo go bolelwago gabotse ka tšona, tša bokwala le tše di tumišegago.’ (Bafil. 4:8) Diswantšho tše di kgothaletšago bootswa ga se tša hlweka e bile di senya tswalano ya motho le Modimo e le ka kgonthe. Le gona, ditšhila tša mohuta o mongwe le o mongwe ga se tša swanela go bolelwa gare ga rena.—Baef. 5:3.

Ela hloko mohlala o mongwe. A re re Mokriste o tlwaela mokgwa wa go tsoša ditho tša pelego—a tsoša setho sa pelego ka boomo gore a ikgotsofatše—go sa šetšwe gore se se sepedišana  le diswantšho tše di kgothaletšago bootswa goba go se bjalo. Le ge polelwana “go tsoša ditho tša pelego” e sa tšwelele ka Beibeleng, na go ka belaetša gore mokgwa wo o šilafatša monagano le maikwelo? Na go tšwela pele ka go itšhilafatša ka tsela ye go ka se senye tswalano yeo motho a nago le yona le Jehofa le go dira gore motho yoo a se ke a hlweka mahlong a Modimo? Anke re tšeeleng godimo keletšo ya moapostola Paulo ya gore re “itlhwekišeng ditšhila tšohle tša nama le tša moya” le gore re ‘bolaye ditho tša rena tša mmele tše di lego lefaseng mabapi le bootswa, go se hlweke, kganyogo ya botona le botshadi, kganyogo e gobatšago le go duma tša ba bangwe.’—2 Bakor. 7:1; Bakol. 3:5.

Lefase le leo le bušwago ke Sathane le amogela boitshwaro bjo bo sa hlwekago, e bile le a bo kgothaletša. Go gana kgoketšo ya boitshwaro bjo bo sa hlwekago e ka ba tlhohlo. Eupša Bakriste ba therešo ga se ba swanela go “sepela go etša ge le ditšhaba di sepela ka go hloka mohola ga menagano ya tšona.” (Baef. 4:17) Ke feela ge re phema boitshwaro bjo bo sa hlwekago, ka sephiring goba phatlalatša, moo Jehofa a tlago go re dumelela go tšwela pele re sepela “ka tsela-kxêthwa.”

“Xo ka se bê le Tau”

Go ka nyakega gore ba bangwe ba dire diphetogo tše dikgolo boitshwarong bja bona le polelong e le gore ba amogelwe ke Modimo yo mokgethwa, Jehofa. Jesaya 35:9 e re: “Xo ka se bê le tau, le sebata se se bolayaxo se ka se kê sa xata xôna,” yeo ke “tsela-kxêthwa.” Ge re bolela ka tsela ya seswantšhetšo, batho bao ba ratago dintwa le mediro le dipolelo tša kgalefo ba swantšhwa le dibata. Ruri ba ka se be le sebaka lefaseng le lefsa la Modimo la go loka. (Jes. 11:6; 65:25) Ka gona go bohlokwa gore bao ba nyakago go amogelwa ke Modimo ba lahle dimelo tše bjalo tša bophoofolo gomme ba phegelele tsela ya bokgethwa.

Mangwalo a re eletša ka gore: “A kgalako yohle e bošula le bogale le pefelo le mašata le polelo e gobošago di tlošwe go lena gotee le bobe bjohle.” (Baef. 4:31) Go Bakolose 3:8, re bala gore: “Ruri di lahleleng ka moka kgole le lena, kgalefo, pefelo, bobe, polelo e gobošago le polelo e lešago dihlong e tšwago molomong wa lena.” Polelwana e rego “polelo e gobošago” yeo e dirišitšwego ditemaneng tše tše pedi, ge e le gabotse e šupa go polelo e gobatšago, e tlontlollago goba ya maroga.

Lehono, polelo e kgopišago le polelo ya maroga di tlwaelegile kudu, gaešita le ka gae. Banyalani ba fošana le go foša bana ba bona ka mantšu a kwešago bohloko, a mabe goba ao a nyenyefatšago. Kgalefo e bjalo ya mantšu ga se ya swanela go ba gona ka malapeng a Bakriste.—1 Bakor. 5:11.

Go Phegelela “Bokgethwa ka go Boifa Modimo” ke Tšhegofatšo!

Ke tokelo e kgolo gakaakang go hlankela Modimo yo mokgethwa, Jehofa! (Još. 24:19) Paradeise ya moya yeo Jehofa a re tlišitšego go yona e kgahliša kudu. Go boloka boitshwaro bja rena e le bjo bokgethwa mahlong a Jehofa ruri ke tsela e kaone ya go phela.

Kgaufsinyane Paradeise ya lefaseng yeo Modimo a e holofeditšego e tla ba selo sa kgonthe. (Jes. 35:1, 2, 5-7) Bao ba e hlologetšego le go phegelela tsela ya Modimo ba tla šegofatšwa ka go ba moo. (Jes. 65:17, 21) Ka gona, a re tšweleng pele re rapela Modimo ka boemo bjo bo hlwekilego bja moya le go boloka tswalano ya kgaufsi le yena.

[Mongwalo wa tlase]

[Seswantšho go letlakala 26]

Ke’ng seo se bego se nyakega bakeng sa gore Bajuda ba sepele “ka tsela-kxêthwa”?

[Seswantšho go letlakala 27]

Diswantšho tše di kgothaletšago bootswa di senya tswalano ya rena le Jehofa

[Seswantšho go letlakala 28]

‘A mašata le polelo yohle e gobošago di tlošwe go lena’