Re Swanetše go Swara ba Bangwe Bjang?

“Ka mo le nyakago batho ba le dira ka gona, le lena le ba direng ka wona mokgwa woo.”—LUKA 6:31.

1, 2. (a) Thuto ya Thabeng ke’ng? (b) Re tla ahla-ahla’ng sehlogong se le go se se latelago?

JESU KRISTE e be e le Morutiši yo Mogolo e le ka kgonthe. Ge manaba a gagwe a bodumedi a be a rometše bahlankedi gore ba ye go mo swara, bahlankedi bao ba ile ba se boe le yena gomme ba re: “Ga go motho yo a kilego a bolela ka mokgwa wo.” (Joh. 7:32, 45, 46) Thuto ya Thabeng ke e nngwe ya dithuto tše matla kudu tša Jesu. E begilwe go dikgaolo 5 go ya go 7 tša Ebangedi ya Mateo, gomme tsebišo e swanago e hwetšwa go Luka 6:20-49. *

² Mohlomongwe polelo e tsebjago kudu thutong yeo ya thabeng ke yeo gantši e bitšwago Molao wa Gauta. O mabapi le tsela yeo re swarago ba bangwe ka yona. Jesu o itše: “Ka mo le nyakago batho ba le dira ka gona, le lena le ba direng ka wona mokgwa woo.” (Luka 6:31) Le gona o be a tloga a direla batho dilo tše dibotse! Jesu o fodišitše balwetši gaešita le go tsoša bahu. Lega go le bjalo, batho ba be ba šegofatšwa, kudu-kudu ge ba be amogela ditaba tše dibotse tšeo a bego a ba botša tšona. (Bala Luka 7:20-22.) Bjalo ka Dihlatse tša Jehofa, re thabela go tšea karolo modirong o swanago wa go bolela ka Mmušo. (Mat. 24:14; 28:19, 20) Sehlogong se le go se se latelago, re tla ela hloko mantšu a Jesu mabapi le modiro wo gotee le dintlha tše dingwe tša Thuto ya Thabeng tšeo di sepedišanago le kamoo re swanetšego go swara ba bangwe ka gona.

E-bang le Moya o Boleta

3. O ka hlalosa bjang moya o boleta?

³ Jesu o itše: “Go thaba ba moya o boleta, ka ge ba tla ja bohwa bja lefase.” (Mat. 5:5) Ka Mangwalong, go ba yo boleta ga go bolele gore motho o a fokola. Ke bonolo bjo re bo bontšhago ge re arabela go seo Modimo a se nyakago go rena. Tshekamelo e bjalo e bonala tseleng yeo re swarago ba bangwe ka yona. Ka mohlala, ga re ‘bušetše bobe ka bobe go motho.’—Baroma 12:17-19.

4. Ke ka baka la’ng ba nago le moya o boleta ba thabile?

⁴ Ba nago le moya o boleta ba a thaba ka gobane “ba tla ja bohwa bja lefase.” Jesu, yo a bego a e-na le “moya o boleta [le] pelo e ikokobeditšego,” ke yo a “[beilwego] mojabohwa wa tšohle” gomme ka go rialo ke Mojabohwa yo mogolo wa lefase. (Mat. 11:29; Baheb. 1:2; Ps. 2:8) Go boletšwe e sa le pele gore “Morwa-motho” yo e lego Mesia o be a tla ba le babuši-gotee Mmušong wa legodimo. (Dan. 7:13, 14, 21, 22, 27) Ka ge e le “bajabohwa-gotee le Kriste,” batlotšwa ba 144- 000 ba nago le moya o boleta ba tlo ja bohwa bja lefase le Jesu. (Baroma 8:16, 17; Kut. 14:1) Batho ba bangwe ba nago le moya o boleta ba tla šegofatšwa ka bophelo bjo bo sa felego karolong ya lefaseng ya Mmušo.—Ps. 37:11.

5. Go ba ba boleta go swana le Kriste go re thuša bjang?

⁵ Ge re be re ka ba ba bogale, mohlomongwe re be re ka dira gore ba bangwe ba fele pelo gomme ba thome go re phema. Lega go le bjalo, go ba ba boleta go swana le Kriste go dira gore re be ba kgahlišago le ba agago ditho tša phuthego moyeng. Boleta ke karolo ya dienywa tša moya tšeo moya wa Modimo o di tšweletšago ka go rena ge re ‘phela le go sepela ka moya.’ (Bala Bagalatia 5:22-25.) Ruri re nyaka go balwa gare ga bao ba nago le moya o boleta bao ba hlahlwago ke moya o mokgethwa wa Jehofa!

 Ruri Bagaugedi ba a Thaba!

6. “Bagaugedi” ba na le dika dife tše di lemogegago?

⁶ Thutong ya gagwe ya Thabeng, Jesu o ile a ba a re: “Go thaba bagaugedi, ka ge ba tla bontšhwa kgaugelo.” (Mat. 5:7) “Bagaugedi” ba na le pelo-tlhomogi gomme ba naganela ba fokolago ka botho, gaešita le go ba šokela. Jesu ka mohlolo o ile a imolla bao ba tlaišegago ka gobane “a ba šokela,” goba a ba ‘hlomogela pelo.’ (Mat. 14:14; 20:34) Ka gona, go ba le lešoko le go naganela ba bangwe go swanetše go re tutueletša go ba le kgaugelo.—Jak. 2:13.

7. Lešoko le ile la tutueletša Jesu go dira’ng?

⁷ Ge lešaba le be le kopana le Jesu a le tseleng a e-ya go khutša, o ile “a le šokela, gobane le be le le bjalo ka dinku tše di se nago modiši.” Ke moka, “a thoma go le ruta dilo tše dintši.” (Mar. 6:34) Re thaba gakaakang ge le rena ka mo go swanago re boledišana le ba bangwe ka molaetša wa Mmušo gomme re ba botša ka kgaugelo e kgolo ya Modimo!

8. Ke ka baka la’ng bagaugedi ba thabile?

⁸ Bagaugedi ba a thaba ka gobane ba “bontšhwa kgaugelo.” Ge re gaugela batho, gantši le bona ba a re gaugela. (Luka 6:38) Go feta moo, Jesu o boletše gore: “Gobane ge e ba le lebalela batho dikarogo tša bona, Tatago lena wa legodimong le yena o tla le lebalela.” (Mat. 6:14) Bagaugedi ke bona feela bao ba tsebago lethabo leo le tlišwago ke go lebalelwa dibe le go amogelwa ke Modimo.

Lebaka Leo ka Lona “ba Nago le Khutšo” ba Thabago

9. Re tla itshwara bjang ge e ba re e-na le khutšo?

⁹ Ge Jesu a bolela selo se sengwe seo se re tlišetšago lethabo, o itše: “Go thaba bao ba nago le khutšo, ka ge ba tla bitšwa ‘barwa ba Modimo.’” (Mat. 5:9) Lentšu la Segerika leo le fetoletšwego e le “ba nago le khutšo” ka go lebanya le bolela “badira-khutšo.” Ge re le badira-khutšo, re ka se ke ra godiša goba ra tšea karolo selong le ge e le sefe seo se ka ‘amollago le bagwera ba bohloko,’ se bjalo ka lesebo le gobatšago. (Die. 16:28) Ka polelo le ka ditiro, re tla phegelela go ba le khutšo le batho ba lego ka phuthegong ya Bokriste le ba sego go yona. (Baheb. 12:14) Re tla katanela go dira sohle seo re ka se kgonago gore Jehofa Modimo a re bone re e-na le khutšo.—Bala 1 Petro 3:10-12.

10. Ke ka baka la’ng “ba nago le khutšo” ba thaba?

¹⁰ Jesu o boletše gore “bao ba nago le khutšo” ba a thaba, “ka ge ba tla bitšwa ‘barwa ba Modimo.’” Ka ge ba dumela go Jesu bjalo ka Mesia, Bakriste ba tloditšwego ba fiwa “matla a go ba bana ba Modimo.” (Joh. 1:12; 1 Pet. 2:24) Go thwe’ng ka “dinku tše dingwe” tša Jesu tšeo di nago le khutšo? O tla ba “Tatê [wa tšona] wa xo sa felexo” nakong ya Pušo ya gagwe le bajabohwa-gotee le yena ya Nywaga e Sekete. (Joh. 10:14, 16; Jes. 9:5; Kut. 20:6) Bofelong bja Pušo ya gagwe ya Nywaga e Sekete, badira-khutšo ba bjalo e tla ba bana ba Modimo ba lefaseng ka botlalo.—1 Bakor. 15:27, 28.

11. Re tla swara ba bangwe bjang ge re hlahlwa ke “bohlale bjo bo tšwago godimo”?

¹¹ E le gore re be le tswalano ya kgaufsi le Jehofa, “Modimo wa khutšo,” re swanetše go ekiša dika tša gagwe, go akaretša le go dira khutšo. (Bafil. 4:9) Ge re itumelela go hlahlwa ke “bohlale bjo bo tšwago godimo,” re tla swara ba bangwe ka tsela e nago le khutšo. (Jak. 3:17) Ee, re tla ba badira-khutšo ba thabilego.

 “Seetša sa Lena a se Bonege”

12. (a) Jesu o itše’ng mabapi le seetša sa moya? (b) Re ka dira bjang gore seetša sa rena se bonege?

¹² Re swara batho ka tsela e botse ka mo go kgonegago ge re ba thuša go hwetša seetša sa moya se se tšwago go Modimo. (Ps. 43:3) Jesu o ile a botša barutiwa ba gagwe gore ke bona “seetša sa lefase” gomme a ba kgothaletša gore ba bonege e le gore batho ba ka bona ‘mediro ya bona e mebotse,’ goba ditiro tše dibotse tšeo ba di direlago ba bangwe. Se se be se tla dira gore seetša sa moya se bonege “pele ga batho,” goba bakeng sa go hola batho. (Bala Mateo 5:14-16.) Lehono, re dira gore seetša sa rena se bonege ka go direla baagišani ba rena botse le ka go tšea karolo modirong wa go bolela ditaba tše dibotse “lefaseng ka moka,” ke gore, “ditšhabeng ka moka.” (Mat. 26:13; Mar. 13:10) Ruri ye ke tokelo e kgethegilego!

13. Re lemogwa ka’ng?

¹³ Jesu o itše: “Motse o ka se utege ge o le godimo ga thaba.” Motse le ge e le ofe woo o lego godimo ga thaba o ka bonwa gabonolo. Ka mo go swanago, re lemogwa ka mediro ya rena e mebotse bjalo ka bagoeledi ba Mmušo le ka dika tše bjalo ka go lekanetša le go seka.—Tito 2:1-14.

14. (a) O ka hlalosa bjang mabone a lekgolong la pele la nywaga? (b) Ke bjang re sa utego lebone la rena la moya ka tlase ga “seroto”?

¹⁴ Jesu o boletše ka go gotetša lebone le ka go le bea sehlomaponeng, e sego ka tlase ga seroto, e le gore le bonegele bohle ka ngwakong. Lebone le le tlwaelegilego la lekgolong la pele la nywaga e be le la sebjana sa letsopa seo se nago le thapo yeo e bego e monya makhura (gantši e le makhura a mohlware) ka sebjaneng bakeng sa go dira gore kgabo e tšwele pele e le gona. Ka ge gantši le be le bewa sehlomaponeng sa kota goba sa tšhipi, lebone le be le “bonegela ka moka bao ba lego ka ntlong.” Batho ba be ba ka se ke ba gotetša lebone gomme ba le bea ka tlase ga “seroto”—sebjana se segolo seo se ka lekanago dilithara tše senyane. Jesu o be a sa nyake barutiwa ba gagwe ba uta lebone la bona la moya ka tlase ga seroto sa seswantšhetšo. Ka gona re swanetše go dira gore seetša sa rena se bonege, re se ka ra dumelela dikganetšo goba tlaišo di re dira gore re ute therešo ya Mangwalo goba gore re se botše ba bangwe ka yona.

15. ‘Mediro ya rena e mebotse’ e tutuetša batho ba bangwe bjang?

¹⁵ Ke ka morago ga ge a boletše ka lebone le le bonegago moo Jesu a ilego a botša barutiwa ba gagwe gore: “Ka mo go swanago seetša sa lena a se bonege pele ga batho, e le gore ba bone mediro ya lena e mebotse ba nee Tatago lena yo a lego magodimong letago.” Ka baka la ‘mediro ya rena e mebotse,’ ba bangwe ba ‘nea Modimo letago’ ka go fetoga bahlanka ba gagwe. A lebaka le lebotse gakaakang leo le re tutueletšago go tšwela pele re ‘bonega re le diediši lefaseng’!—Bafil. 2:15.

16. Ke’ng seo se nyakegago go rena gore re be “seetša sa lefase”?

¹⁶ Go ba “seetša sa lefase” go nyaka gore re tšee karolo modirong wa go bolela ka Mmušo le wa go dira barutiwa. Eupša go nyakega selo se sengwe gape go rena. Moapostola Paulo o ngwadile gore: “Tšwelang pele le sepela le le bana ba seetša, gobane dienywa tša seetša di na le mohuta o mongwe le o mongwe wa bolo le toko le therešo.” (Baef. 5:8, 9) Re swanetše go ba mehlala ya go bonega ka boitshwaro bjoo bo amogelwago ke Modimo. Ee, re swanetše go kwa keletšo ya moapostola Petro e  rego: “Dulang le itshwere gabotse gare ga ditšhaba, gore selong seo ba le bolelago gampe ka sona ba re le badirabobe, ba tle ba re ka baka la mediro ya lena e mebotse yeo ba lego dihlatse tše di e bonago ka mahlo ba rete Modimo letšatšing la go lekola ga gagwe.” (1 Pet. 2:12) Eupša go swanetše go dirwa’ng ge go tsoga diphapano gare ga badumedi-gotee?

“Dira Khutšo le Ngwaneno”

17-19. (a) Ke “mpho” efe yeo go boletšwego ka yona go Mateo 5:23, 24? (b) Go bohlokwa gakaakang go lokiša ditaba le ngwaneno, gomme Jesu o bontšhitše se bjang?

¹⁷ Thutong ya gagwe ya Thabeng, Jesu o lemošitše barutiwa ba gagwe kgahlanong le go boloka sekgopi le go hloya ngwanabo rena. Go e na le moo, ba be ba swanetše go dira khutšo kapejana le ngwanabo bona yo a kgopišegilego. (Bala Mateo 5:21-25.) Ela hloko keletšo ya Jesu. Ge o be o ka re o tliša mpho ya gago aletareng gomme ge o le moo wa gopola gore ngwaneno o na le se sengwe ka wena, ke’ng seo o bego o tla swanelwa ke go se dira? O be o tla swanelwa ke go tlogela mpho ya gago pele ga aletare ge o e-ya go dira khutšo le ngwaneno. Ka morago ga go dira bjalo, o be o ka boa gomme wa neela mpho ya gago.

¹⁸ “Mpho” gantši e be e le sehlabelo sa sebego seo motho a bego a ka se neela tempeleng ya Jehofa. Dihlabelo tša diphoofolo di be di le bohlokwa kudu, ka ge Modimo a be a laetše Baisiraele Molaong wa Moše gore di dirwe e le karolo ya borapedi. Eupša ge o be o gopola gore ngwaneno o na le taba le wena, go lokiša taba yeo e be e le mo go tlogago go akgofile kudu go feta go neela mpho ya gago. Jesu o itše: “Tlogela mpho ya gago moo pele ga aletare, o tloge; thoma ka go dira khutšo le ngwaneno, ke moka, ge o boile, o iše mpho ya gago.” Go lokiša ditaba le ngwaneno go be go swanetše go tla pele ga go latela seo Molao o bego o se nyaka.

¹⁹ Jesu o be a sa lekanyetše polelo ya gagwe dihlabelong tše itšego le dikarogong tše itšego. Ka baka leo, sehlabelo se sengwe le se sengwe se be se swanetše go se neelwe ka nako yeo ge e ba motho a be a ile a gopola gore ngwanabo o na le taba le yena. Ge sehlabelo e be e le phoofolo e phelago, e be e swanetše go tlogelwa “pele ga aletare” ya sehlabelo sa go fišwa ka lapeng la ka gare la tempele. Ka morago ga ge bothata bo rarolotšwe, mosenyi o be a ka boa gomme a neela sehlabelo sa gagwe.

20. Ke ka baka la’ng re swanetše go gata mogato wa gore re lokiše ditaba ka go akgofa ge e ba re galefišitšwe ke ngwanabo rena?

²⁰ Go ya ka pono ya Modimo, tswalano ya rena le bana babo rena ke karolo e bohlokwa ya borapedi bja therešo. Dihlabelo tša diphoofolo di be di se bohlokwa go Jehofa ge bao ba bego ba di neela ba be ba sa sware batho gabotse. (Mika 6:6-8) Ka gona, Jesu o kgothaleditše barutiwa ba gagwe gore ba ‘lokiše ditaba ka go akgofa.’ (Mat. 5:25)  Mabapi le taba e swanago, Paulo o ngwadile gore: “Galefang, eupša le se ke la dira sebe; letšatši le se ke la sobela le galefile, le gona le se ke la nea Diabolo sebaka.” (Baef. 4:26, 27) Ge e ba re e-na le lebaka la go galefa, re swanetše go gata mogato wa go lokiša ditaba ka go akgofa e le gore re se ke ra dula re galefile gomme ka go dira bjalo ra nea Diabolo sebaka.—Luka 17:3, 4.

Ka Mehla Swara ba Bangwe ka Tlhompho

21, 22. (a) Re ka diriša bjang keletšo ya Jesu yeo re sa tšwago go e ahla-ahla? (b) Re tla ahla-ahla’ng sehlogong se se latelago?

²¹ Go hlahloba ga rena tše dingwe tša dipolelo tšeo Jesu a di boletšego Thutong ya gagwe ya Thabeng, go swanetše go re thuša go swara ba bangwe ka botho le ka tlhompho. Le ge ka moka ga rena re se ra phethagala, re ka diriša keletšo ya Jesu ka gobane ga se a letela gore re dire seo re ka se se kgonego, le Tatago-rena wa legodimong ga se a letela seo. Ka thapelo, boiteko bjo bo tšwago pelong le ka thušo ya Jehofa Modimo, re ka bontšha moya o boleta, kgaugelo le go ba badira-khutšo. Re ka bonagatša seetša sa moya seo se phadimago bakeng sa go nea Jehofa letago. Go feta moo, re ka dira khutšo le bana babo rena ge seo se nyakega.

²² Borapedi bjo bo amogelegago go Jehofa bo akaretša go swara baagišani ba rena gabotse. (Mar. 12:31) Sehlogong se se latelago, re tla ahla-ahla dipolelo tše dingwe tša Thuto ya Thabeng tšeo di swanetšego go re thuša go tšwela pele re dira botse go ba bangwe. Lega go le bjalo, ka morago ga go naganišiša ka dintlha tše di sa tšwago go ahla-ahlwa tša polelo ya Jesu e sa bapišwego, re ka ipotšiša gore, ‘Ke swara ba bangwe bjang?’

[Mongwalo wa tlase]

O be o tla Araba Bjang?

• Go bolela’ng go ba le moya o boleta?

• Ke ka baka la’ng “bagaugedi” ba thaba?

• Re ka dira bjang gore seetša sa rena se bonege?

• Ke ka baka la’ng re swanetše go akgofela go ‘dira khutšo le ngwanabo rena’?

[Dipotšišo tša Thuto]

[Seswantšho go letlakala 4]

Go bolela molaetša wa Mmušo ke tsela e bohlokwa ya go dira gore seetša sa rena se bonege

[Seswantšho go letlakala 5]

Bakriste ba swanetše go bea mohlala ka boitshwaro bjoo bo amogelwago ke Modimo

[Seswantšho go letlakala 6]

Dira sohle seo o ka se kgonago go dira khutšo le ngwaneno