Tšwelang Pele le Dira Botse
Tšwelang Pele le Dira Botse
“Tšwelang pele . . . go dira botse.”—LUKA 6:35.
1, 2. Ke ka baka la’ng gantši go le thata go dira botse go ba bangwe?
GO DIRA botse go ba bangwe go ka ba thata. Batho bao re ba bontšhago lerato ba ka no se re bontšhe lona. Gaešita le ge re nyaka gore batho ba phele gabotse moyeng ka go katanela go boledišana le bona ka “ditaba tše dibotse tša letago tša Modimo yo a thabilego” le Morwa wa gagwe, ba ka no se šetše goba ba se bontšhe tebogo. (1 Tim. 1:11) Ba bangwe ba ipontšha e le ‘manaba a nago le lehloyo a kota ya tlhokofatšo ya Kriste.’ (Bafil. 3:18) Bjalo ka Bakriste, re swanetše go ba swara bjang?
2 Jesu Kriste o boditše barutiwa ba gagwe gore: “Tšwelang pele le rata manaba a lena le go dira botse.” (Luka 6:35) Anke ga bjale re hlahlobišišeng keletšo ye. Re tla holwa gape ke dintlha tše dingwe tšeo Jesu a di boletšego mabapi le go dira botse go ba bangwe.
‘Ratang Manaba a Lena’
3. (a) Ka mantšu a gago, bolela kakaretšo ya mantšu a Jesu ao a begilwego go Mateo 5:43-45. (b) Ke pono efe mabapi le Bajuda le batho bao e sego Bajuda yeo e bego e le gona magareng ga baetapele ba Bajuda ba lekgolong la pele la nywaga?
3 Thutong ya gagwe e tumilego ya Thabeng, Jesu o boditše batheetši ba gagwe gore ba rate manaba a bona le go rapelela bao ba ba tlaišago. (Bala Mateo 5:43-45.) Bao ba bego ba le moo ka nako yeo e be e le Bajuda, bao ba bego ba tseba taelo ya Modimo ya gore: “O se kê wa itefetša; O se kê wa dula O befeletšwe wa xeno xo ya xo ile. Wa xeno O mo ratê ka mokxwa wo O ithataxo ka wòna.” (Lef. 19:18) Baetapele ba bodumedi ba Bajuda ba lekgolong la pele la nywaga ba be ba nagana gore “wa xeno” e be e šupa go Bajuda feela. Molao wa Moše o be o nyaka gore Baisiraele ba se itswakanye le ditšhaba tše dingwe, eupša go ile gwa ba le pono ya gore batho ka moka bao e sego Bajuda e be e le batho ba manaba bao ba swanetšego go hloiwa.
4. Barutiwa ba Jesu ba be ba swanetše go swara manaba a bona bjang?
4 Ka mo go fapanego, Jesu o itše: “Tšwelang pele le rata manaba a lena le go rapelela bao ba le tlaišago.” (Mat. 5:44) Barutiwa ba gagwe ba be ba swanetše go rata batho bohle bao ba bego ba ba hloile. Go ya ka mongwadi wa Ebangedi e lego Luka, Jesu o itše: “Ke re go lena ba le theeditšego, Tšwelang pele le rata manaba a lena, le dira botse go bao ba le hloilego, le šegofatša bao ba le rogago, le rapelela bao ba le hlapaolago.” (Luka 6:27, 28) Ka go swana le batho ba lekgolong la pele la nywaga bao ba ilego ba tšeela mantšu a Jesu godimo, re “dira botse go bao ba [re] hloilego” ka go ba bontšha kgaugelo ge ba re bontšha lehloyo. Re “šegofatša bao ba [re] rogago” ka go bolela le bona ka tsela e botho. Le gona re “rapelela bao ba [re] tlaišago” ka go re gobatša mmeleng goba ka ditsela tše dingwe tša go re ‘hlapaola.’ Ditopo tše bjalo ke dikgopelo tše lerato tša gore batlaiši ba ka fetoša dipelo gomme ba gata mogato wo o dirago gore ba amogelwe ke Jehofa.
5, 6. Ke ka baka la’ng re swanetše go rata manaba a rena?
5 Ke ka baka la’ng re swanetše go rata manaba a rena? Jesu o itše: “Gore le itlhatsele le le barwa ba Tatago lena yo a lego magodimong.” (Mat. 5:45) Ge e ba re e-kwa keletšo yeo, re ba “barwa” ba Modimo ka gobane re ekiša Jehofa, wa go “hlabišetša ba kgopo le ba bolo letšatši la gagwe gomme a nešetša ba lokilego le ba sa lokago pula.” Go etša ge pego ya Luka e bolela, Modimo “ke yo botho go ba sa lebogego le ba kgopo.”—Luka 6:35.
6 Ge Jesu a be a gatelela kamoo go bego go le bohlokwa ka gona gore barutiwa ba gagwe ba ‘tšwele pele ba rata manaba a bona,’ o itše: “Ge e ba le rata bao ba le ratago, le na le moputso ofe? Na balekgetho le bona ga ba dire se se swanago? Le gona ge e ba le dumediša bana babo lena feela, ke selo sefe se se sa tlwaelegago se le se dirago? Na batho ba ditšhaba le bona ga ba dire se se swanago?” (Mat. 5:46, 47) Ge e ba re be re ka rata feela bao ba re ratago, se se be se ka se dire gore re hwetše “moputso,” goba kamogelo le ge e le efe ya Modimo. Gaešita le balekgetho, bao gantši ba bego ba nyatšwa, ba be ba rata batho bao ba bego ba ba rata.—Luka 5:30; 7:34.
7. Ke ka baka la’ng e be e ka se be mo go sa tlwaelegago ge re be re ka dumediša ‘bana babo rena’ feela?
7 Tumedišo e tlwaelegilego ya Sejuda e be e e-na le lentšu “khutšo.” (Baa. 19:20, PK; Joh. 20:19) Se e be e le go lakaletša motho yo a dumedišwago gore a phele gabotse mmeleng, a iketle le gore a atlege. E be e ka se be “selo . . . se se sa tlwaelegago” ge re be re ka dumediša feela bao re ba lebelelago e le ‘bana babo rena.’ Go etša ge Jesu a bontšhitše, “batho ba ditšhaba” le bona ba be ba dira se se swanago.
8. Jesu o be a kgothaletša batheetši ba gagwe go dira’ng ge a be a re: “Le swanetše go phethagala”?
8 Sebe sa leabela ga se sa ka sa dira gore barutiwa ba Kriste e be bao ba hlokago bosodi, ba phethagetšego. (Baroma 5:12) Lega go le bjalo, Jesu o phethile karolo ye ya polelo ya gagwe ka go bolela gore: “Ka gona le swanetše go phethagala, go etša ge Tatago lena wa legodimong a phethagetše.” (Mat. 5:48) Ka go rialo o be a kgothaletša batheetši ba gagwe gore ba ekiše ‘Tatago bona wa legodimong,’ Jehofa, ka go dira gore lerato la bona e be le le phethagetšego—ba dire gore e be le le feletšego ka go rata manaba a bona. Go lebeletšwe gore le rena re dire se se swanago.
Ke ka Baka La’ng re Swanetše go Lebalela?
9. Ke’ng seo se bolelwago ke mantšu a rego: “O re lebalele melato ya rena”?
9 Re tšwela pele re dira botse ge ka kgaugelo re lebalela motho yo a re fošetšago. Ge e le gabotse, karolo ya thapelo ya Jesu ya mohlala e na le mantšu a: “O re lebalele melato ya rena, bjalo ka ge le rena re lebaletše bao ba nago le melato go rena.” (Mat. 6:12) Ebangedi ya Luka e bontšha gore “melato” yeo Jesu a bego a naganne ka yona ke dibe, ka gobane e re: “Re lebalele dibe tša rena, gobane le rena ka noši re lebalela mang le mang yo a nago le molato go rena.”—Luka 11:4.
10. Mabapi le tebalelo, re ka ekiša Modimo bjang?
10 Re swanetše go ekiša Modimo, yoo ka bolokologi a lebalelago badiradibe bao ba itsholago. Moapostola Paulo o ngwadile gore: “E-bang ba botho yo mongwe go yo mongwe, le šokelane ka bonolo, le lebalelane ka bolokologi go etša ge Modimo le yena a le lebaletše ka bolokologi ka Kriste.” (Baef. 4:32) Mopsalme Dafida o opetše ka gore: “Morêna ké Moxauxedi, ké wa mabobo, ké Mo-se-fêle-pelo wa botho byo boxolo. . . . Se a re diraxo sôna xa se xo latiša bokxôpô, xa se xo lefeletša sebe. . . . ’Karoxô tša rena ó di tloša mo xo rena a di iša kxolê, kxolê bo-ka Bohlabêla bò le kxolê le Bodikêla. Morêna ó šôkêlwa ba ba mmoifaxo byalo ka tata xo bana xe a xauxêla bana b’axwe. Xobane Yêna ó tseba lebopô le re lexo ka lôna, xa a lebale xe re le lerole.”—Ps. 103:8-14.
11. Modimo o lebalela bomang?
11 Batho ba ka lebalelwa ke Modimo ge feela le bona ba šetše ba lebaletše bao ba ba fošeditšego. (Mar. 11:25) Ge Jesu a gatelela taba ye, o okeditše ka gore: “Gobane ge e ba le lebalela batho dikarogo tša bona, Tatago lena wa legodimong le yena o tla le lebalela; anthe ge e ba le sa lebalele batho dikarogo tša bona, Tatago lena le yena a ka se le lebalele dikarogo tša lena.” (Mat. 6:14, 15) Ee, Modimo o lebalela bao ba lebalelago ba bangwe ka bolokologi. Le gona tsela e nngwe yeo ka yona re ka tšwelago pele re dira botse ke go dira ka go dumelelana le keletšo ya Paulo e rego: “Go etša ge Jehofa a le lebaletše ka bolokologi, le lena le dire bjalo.”—Bakol. 3:13.
“Tlogelang go Ahlola”
12. Jesu o neile keletšo efe mabapi le go ahlola ba bangwe?
12 Tsela e nngwe ya go dira botse e boletšwe ke Jesu Thutong ya Thabeng ge a be a botša batheetši ba gagwe gore ba tlogele go ahlola ba bangwe gomme a diriša papišo e matla bakeng sa go gatelela ntlha ye. (Bala Mateo 7:1-5.) Anke re ahla-ahleng seo Jesu a bego a se bolela ge a be a re: “Tlogelang go ahlola.”
13. Ke bjang batheetši ba Jesu ba bego ba ka ‘tšwela pele ba lokolla’?
13 Ebangedi ya Mateo e tsopola Jesu a re: “Tlogelang go ahlola gore le se ahlolwe.” (Mat. 7:1) Go ya ka Luka, Jesu o itše: “Tlogelang go ahlola, gomme le lena le ka se ahlolwe le gatee; tlogelang go bona motho molato gomme le lena le ka se bonwe molato le gatee. Tšwelang pele le lokolla, gomme le tla lokollwa.” (Luka 6:37) Bafarisei ba lekgolong la pele la nywaga ba be ba ahlola ba bangwe makgwakgwa, ka go thea dikahlolo tša bona meetlong e sego ya Mangwalo. Motho le ge e le ofe go batheetši ba Jesu yoo a bego a dira bjalo o be a swanetše go ‘tlogela go ahlola.’ Go e na le moo, o be a swanetše go ‘tšwela pele a lokolla,’ e lego, go lebalela ba bangwe mafokodi a bona. Moapostola Paulo o neile keletšo e swanago mabapi le go lebalela, go etša ge go bontšhitšwe ka mo godimo.
14. Ka go ba ba lebalelago, barutiwa ba Jesu ba be ba tla tutueletša batho go dira’ng?
14 Ka go ba ba lebalelago, barutiwa ba Jesu ba be ba tla tutueletša batho go ba le moya wa go lebalela. Jesu o itše: “Kahlolo ye le ahlolago ka yona, le tla ahlolwa ka yona; kelo ye le elago ka yona, ba tla le elela ka yona.” (Mat. 7:2) Mabapi le tsela yeo re swarago ba bangwe ka yona, re tla buna seo re se bjalago.—Bagal. 6:7.
15. Jesu o bontšhitše bjang gore go swaya diphošo ka mo go feteletšego go fošagetše?
15 Gopola gore bakeng sa go bontšha kamoo go fošagetšego ka gona go swaya ba bangwe diphošo ka mo go feteletšego, Jesu o ile a botšiša gore: “Ka gona, ke ka baka la’ng o lebelela lehlokwa le le lego ka leihlong la ngwaneno, eupša o sa šetše kota ye e lego ka leihlong la gago? Goba o ka ra ngwaneno bjang wa re, ‘Anke ke ntšhe lehlokwa ka leihlong la gago’; gomme, bona! kota e ka leihlong la gago?” (Mat. 7:3, 4) Motho yoo a sekametšego go swayeng ba bangwe diphošo o šetša mafokodi a manyenyane ka “leihlong” la ngwanabo. Moswaya-diphošo o šišinya gore ngwanabo o na le pono e golofetšego le kahlolo e fošagetšego. Gaešita le ge phošo e le e nyenyane—bjalo ka lehlokwa—moswaya-diphošo o nyaka go ‘ntšha lehlokwa’ leo. Ka boikaketši o itira eka o nyaka go thuša ngwanabo go bona dilo gabotse.
16. Ke ka baka la’ng go ka thwe Bafarisei ba be ba e-na le “kota” ka mahlong a bona?
16 Baetapele ba bodumedi ba Bajuda ba be ba swaya ba bangwe diphošo ka mo go feteletšego. Ka mohlala: Ge monna yo mongwe wa sefofu yo a bego a fodišitšwe ke Kriste a be a bolela gore Jesu o swanetše go ba a e-tšwa go Modimo, Bafarisei ba ile ba fetola ka kgalefo ba re: “Ka moka ga lena le belegetšwe dibeng, lega go le bjalo, na le a re ruta?” (Joh. 9:30-34) Mabapi le go ba le pono e nepagetšego ya moya le bokgoni bja go ahlola gabotse, Bafarisei ba be ba e-na le “kota” ka leihlong la bona le gona ba be ba foufetše ka mo go feletšego. Ke ka baka leo Jesu a boletšego gore: “Moikaketši! Ntšha pele kota ka leihlong la gago, ke moka o tla bona gabotse kamoo o ka ntšhago lehlokwa ka leihlong la ngwaneno.” (Mat. 7:5; Luka 6:42) Ge e ba re ikemišeditše go dira botse le go swara ba bangwe gabotse, re ka se ke ra ba swaya diphošo ka mo go feteletšego le go dula re nyaka dikota tša seswantšhetšo ka mahlong a bana babo rena. Go e na le moo, re tla lemoga gore ga se ra phethagala e bile re swanetše go phema go ahlola le go swaya badumedi-gotee le rena diphošo.
Kamoo re Swanetšego go Swara ba Bangwe ka Gona
17. Ka go dumelelana le Mateo 7:12, re swanetše go swara ba bangwe bjang?
17 Thutong ya gagwe ya Thabeng, Jesu o bontšhitše gore Modimo o swara bahlanka ba Gagwe bjalo ka Tate ka go araba dithapelo tša bona. (Bala Mateo 7:7-12.) Re swanetše go ela hloko gore Jesu o boletše ka molao wa boitshwaro o rego: “Ka baka leo, dilo tšohle, tše le nyakago batho ba le dira tšona, le lena ka mo go swanago le ba dire tšona.” (Mat. 7:12) Ke feela ge re swara batho ba bangwe ka tsela ye moo re tla bontšhago gore re balatedi ba kgonthe ba Jesu Kriste.
18. “Molao” o bontšha bjang gore re swanetše go swara ba bangwe ka tsela yeo re nyakago ba re swara ka yona?
18 Ka morago ga ge a boletše gore re swanetše go swara ba bangwe ka tsela yeo re nyakago ba re swara ka yona, Jesu o okeditše ka gore: “Se ge e le gabotse, ke seo se bolelwago ke Molao le Baporofeta.” Ge re swara ba bangwe ka tsela yeo Jesu a e bontšhitšego, re dira ka go dumelelana le morero wa “Molao”—mangwalo ao a bopago dipuku tša Beibele go tloga go Genesi go ya go Doiteronomio. Ka ntle le go utolla morero wa Jehofa wa go tšweletša peu yeo e tlago go fediša bokgopo, dipuku tše di bolela ka Molao wo Modimo a o neilego setšhaba sa Isiraele a diriša Moše ka 1513 B.C.E. (Gen. 3:15) Gare ga dilo tše dingwe, Molao o be o bontšha gabotse gore Baisiraele ba swanetše go phetha toka, ba se bebe sefahlego gomme ba dire botse go bao ba tlaišegago le go bao ba diiletšego nageng ya bona.—Lef. 19:9, 10, 15, 34.
19. “Baporofeta” ba bontšhitše bjang gore re swanetše go dira botse?
19 Ge Jesu a be a bolela ka “Baporofeta,” o be a naganne ka dipuku tša boporofeta tša Mangwalo a Seheberu. Di na le boporofeta bja Mesia bjoo bo ilego bja phethagala go Kriste ka boyena. Dipuku tše bjalo di bile di bontšha gore Modimo o šegofatša batho ba gagwe ge ba dira se se lokilego mahlong a gagwe le go swara ba bangwe ka tsela e swanetšego. Ka mohlala, boporofeta bja Jesaya bo neile Baisiraele keletšo ye: “Morêna ό re: Lôtôlang moahlolêlô, Le yê ka tokô . . . motho wa lehlôxônôlô ké e a di diraxo, ngwan’a-motho e a di swaraxo . . a iletša ’atla s’axwe bobe byohle.” (Jes. 56:1, 2) Ee, Modimo o letetše gore batho ba gagwe ba tšwele pele ba dira botse.
Dira Botse go ba Bangwe ka Mehla
20, 21. Mašaba a ile a arabela bjang Thutong ya Jesu ya Thabeng, gomme ke ka baka la’ng o swanetše go naganišiša ka yona?
20 Re ahla-ahlile dintlha tše mmalwa dintlheng tše dintši tše bohlokwa tšeo di tšweleditšwego ke Jesu Thutong ya gagwe ya Thabeng yeo e ka se bapišwego le e nngwe. Lega go le bjalo, re ka kwešiša kapejana karabelo ya bao ba kwelego seo a se boletšego nakong yeo. Pego e buduletšwego e re: “Bjale ge Jesu a feditše dipolelo tše, mafelelo ya ba gore mašaba a ile a tlabja kudu ke tsela ya gagwe ya go ruta; gobane o be a ba ruta bjalo ka motho yo a nago le matla, e sego bjalo ka bamangwalo ba bona.”—Mat. 7:28, 29.
21 Jesu Kriste ka ntle le pelaelo o hlatsetše gore ke yena “Matete, Moeletši” yo a boletšwego e sa le pele. (Jes. 9:5) Thuto ya Thabeng ke mohlala o bohlokwa woo o bontšhago gabotse gore Jesu o tseba tsela yeo Tatagwe wa legodimong a lebelelago dilo ka yona. Go okeletša go dintlha tšeo re di ahla-ahlilego, thuto yeo e na le go gontši moo e go bolelago mabapi le lethabo la kgonthe, go phema boitshwaro bjo bo gobogilego, tsela ya go dira toka, seo re ka se dirago gore re be le bokamoso bjo bo šireletšegilego le bjo bo thabišago gotee le ditaba tše dingwe tše dintši. Ke ka baka la’ng o sa bale Mateo dikgaolo 5 go ya go 7 gape ka kelohloko le ka thapelo? Naganišiša ka keletšo ya Jesu e kgahlišago yeo e begilwego moo. Diriša seo Kriste a se boletšego Thutong ya Thabeng bophelong bja gago. Ke moka o tla kgona go thabiša Jehofa, go swara ba bangwe gabotse le go tšwela pele o dira botse.
O be o tla Araba Bjang?
• Re swanetše go swara manaba a rena bjang?
• Ke ka baka la’ng re swanetše go lebalela?
• Ke’ng seo Jesu a se boletšego mabapi le go ahlola ba bangwe?
• Go ya ka Mateo 7:12, re swanetše go swara ba bangwe bjang?
[Dipotšišo tša Thuto]
[Mantšu a ipiletšago a tsopotšwego go letlakala 10]
Na o tseba gore ke ka baka la’ng Jesu a boletše gore: “Tlogelang go ahlola”?
[Seswantšho go letlakala 8]
Ke ka baka la’ng re swanetše go rapelela bao ba re tlaišago?
[Seswantšho go letlakala 10]
Na ka mehla o swara ba bangwe ka tsela yeo o nyakago ba go swara ka yona?