Tlhakodišo ka Mmušo wa Modimo e Kgaufsi!
Tlhakodišo ka Mmušo wa Modimo e Kgaufsi!
“Mmušo wa gago a o tle. Thato ya gago a e direge le mo lefaseng bjalo ka ge e direga legodimong.”—MAT. 6:10.
1. Thuto ya Jesu e kgolo e be e le efe?
GE JESU KRISTE a be a ruta Thuto ya Thabeng, o akareditše le thapelo ya mohlala yeo e bego e le kakaretšo ya thuto ya gagwe e kgolo. O rutile balatedi ba gagwe go rapela Modimo ka gore: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.” (Mat. 6:9-13) Jesu o ile “a tloga motseng o mongwe a ya go o mongwe le go tloga motsaneng o mongwe go ya go o mongwe a bolela le go tsebatša ditaba tše dibotse tša mmušo wa Modimo.” (Luka 8:1) Kriste o kgothaditše balatedi ba gagwe ka gore: ‘Tšwelang pele le tsoma Mmušo le toko ya Modimo.’ (Mat. 6:33) Ge o dutše o ithuta sehlogo se, tsoma ditsela tša go diriša tsebišo ya sona bodireding. Ka mohlala, bona kamoo o ka arabago dipotšišo tše: Molaetša wa Mmušo o bohlokwa gakaaka’ng? Batho ba swanetše go hlakodišwa go eng? Le gona, Mmušo wa Modimo o tla hlakodiša batho bjang?
2. Molaetša wa Mmušo o bohlokwa gakaaka’ng?
2 Jesu o boletše e sa le pele gore: “Ditaba tše tše dibotse tša mmušo di tla bolelwa lefaseng ka moka le go agilwego go lona gore e be bohlatse go ditšhaba tšohle; ke moka bofelo bo tla tla.” (Mat. 24:14) Ditaba tše dibotse tša Mmušo wa Modimo ke tše bohlokwa kudu. Ruri ke molaetša o bohlokwa kudu lefaseng! Ka diphuthegong tše fetago tše 100 000 tša Dihlatse tša Jehofa lefaseng ka bophara, bahlanka ba Modimo ba ka bago dimilione tše šupago ba swaregile modirong wa boboledi woo go se nago o swanago le wona, ba botša ba bangwe gore Mmušo o hlomilwe. Go hlongwa ga wona ke ditaba tše dibotse ka gobane go ra gore Modimo o hlomile mmušo legodimong go laola dilo ka botlalo lefaseng. Ka pušo ya Mmušo woo, thato ya Jehofa e tla dirwa lefaseng bjalo ka legodimong.
3, 4. Mafelelo e tla ba afe ge thato ya Modimo e dirwa lefaseng?
3 Go tla direga’ng ka batho ge thato ya Modimo e dirwa mo lefaseng? Jehofa “o tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.” (Kut. 21:4) Batho ba ka se ke ba babja goba go hwa ka baka la sebe sa leabela le go se phethagale. Bahu ba lego kgopolong ya Modimo ba tla ba le sebaka sa go phela ka mo go sa felego, ka gobane Beibele e holofetša gore: “Go tla ba le tsogo ya ba lokilego gotee le ba sa lokago.” (Dit. 24:15) Go ka se sa ba le dintwa, bolwetši goba tlala gomme lefase le tlo tsošološwa ya ba paradeise. Gaešita le diphoofolo tšeo ga bjale di lego kotsi di tla ba le khutšo le batho le diphoofolo tše dingwe.—Ps. 46:9; 72:16; Jes. 11:6-9; 33:24; Luka 23:43.
4 Ka ditšhegofatšo tše bjalo tšeo di tlišwago ke go buša ga Mmušo, ga go makatše ge boporofeta bja Beibele bo bolela ka bophelo nakong yeo ka mantšu a ao a homotšago: “Ba bolêta e tlo ba bôná beng ba naxa ba tlo thaba ka botlalô bya moláô.” Eupša go thwe’ng ka bao ba bakago mathata? Mangwalo a bolela e sa le pele gore: “Xo se xokae e mobe ó tlo ba a ile.” Lega go le bjalo, “baleta-Morêna e tlo ba beng ba naxa.”—Ps. 37:9-11.
5. Go tla direga’ng ka tshepedišo ya gona bjale ya dilo?
5 Bakeng sa gore tše ka moka di direge, tshepedišo ya bjale ya dilo gotee le mebušo ya yona e lwantšhanago, madumedi le tshepedišo ya tša kgwebo di tla swanelwa ke go fedišwa. Gomme seo ke sona seo mmušo wa legodimong o tlago go se dira. Moporofeta Daniele o ile a budulelwa go bolela e sa le pele gore: “Mehleng ya dikxoši tšeo [tše di lego gona lehono], ké mo Modimo a tl’o xo tsoša mmušô [legodimong] wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka [ya lehono] wa e fediša; ge e le wôna, o tlo êma xo ya xo ile.” (Dan. 2:44) Ke moka Mmušo wa Modimo—mmušo o mofsa wa legodimong—o tla buša setšhaba se sefsa sa lefaseng. Go tla ba le “magodimo a mafsa le lefase le lefsa . . . , gomme toko e tla aga go tšona.”—2 Pet. 3:13.
Go Nyakega Tlhakodišo Gona Bjale
6. Beibele e hlalosa bjang bobe bja lefase le?
6 Ge Sathane, Adama le Efa ba be ba rabela kgahlanong le Modimo, ba nyaka go itirela diphetho ka seo se lokilego le seo se fošagetšego, lapa la batho le ile la thoma go sepela tseleng e kotsi. Pele ga Meetsefula a lefase ka moka, ka morago ga nywaga e 1 600, “bokxôpô bya batho [bo be] bò xodile mo lefaseng, le tirô ka moka tša diakanyô tša dipelô tša bôná è le bobe fêla ka mehla.” (Gen. 6:5) Nywaga e ka bago e 1 300 ka morago ga moo, Solomone o ile a bona maemo e le a mabe moo a ilego a ngwala gore: “[Ke] rêta ba hwilexo kxalê, ka re ké bôná ba lehlôxônôlô, ba feta ba ba phelaxo. Ka re e a ba fetaxo bohle ka babedi, ké yeo a sešoxo a ba xôna, e a sa bonexo medirô e mebe ye e dirwaxo fá tlase xa letšatši.” (Mmo. 4:2, 3) Nywaga e ka bago e 3 000 go tloga ka nako yeo e re tliša mehleng ya rena, moo bobe bo tšwelago pele bo oketšega.
7. Ke ka baka la’ng go nyakega gakaakaa gona bjale gore Modimo a tliše tlhakodišo?
7 Le ge e le therešo gore bobe bo bile gona ka nako e telele, gona bjale go na le tlhokagalo e kgolo ya tlhakodišo ka Mmušo wa Modimo go feta le ge e le neng pele. Maemo nywageng e 100 e fetilego e be e le a mabe go feta le ge e le neng pele, gomme a tšwela pele a phuhlama. Ka mohlala, Mokgatlo wa Worldwatch o bega gore: “Palo ya batho bao ba bolailwego ntweng lekgolong [la bo-20] la nywaga e lekana le palo ya batho bao ba bolailwego dintweng ka moka tšeo di bilego gona lekgolong la pele la nywaga AD go fihla ka 1899 ge e balwa gararo.” Go tloga ka 1914 batho ba fetago ba dimilione tše 100 ba bolailwe dintweng! Saeklopedia e nngwe e lekanyetša gore batho ba ka bago ba dimilione tše 60 ba hwile Ntweng ya II ya Lefase. Ka ge dinaga tše dingwe ga bjale di bile di itlhamile ka dibetša tša nuclear, batho ba na le bokgoni bja go fediša karolo e kgolo ya badudi ba lefase. Le gona, gaešita le ge go bile le tšwelopele ya tša thutamahlale le ya tša bongaka, tlala e sa bolaya bana ba ka bago ba dimilione tše tlhano ngwaga o mongwe le o mongwe.—Bona kgaolo 9 ya puku ya Ke Eng Seo ge e le Gabotse Beibele e se Rutago?
8. Ke’ng seo nywaga e dikete ya go buša ga batho e se hlatsetšego?
8 Maiteko a batho a paletšwe ke go fediša bobe. Mekgatlo ya lefase le ya dipolitiki, ya tša kgwebo le ya bodumedi e paletšwe ke go kgotsofatša dinyakwa tša batho tša motheo e lego khutšo, katlego le bophelo bjo bobotse. Go e na le go rarolla mathata a magolo ao batho ba nago le ona, mekgatlo ye e a okeditše. Ka kgonthe, nywaga e dikete ya go buša ga batho e hlatsetše go rereša ga mantšu a: “Motho tsela y’axwe xa’ e buše; le monna mo a yaxo xa’ ikiše, le xe a xata a tiiša.” (Jer. 10:23) Ee, “motho [o bušitše] motho xore a mo senyê.” (Mmo. 8:9) Go feta moo, “tlholo yohle e tšwela pele e tsetsela gotee gomme e e-kwa bohloko gotee.”—Baroma 8:22.
9. Ke maemo afe ao Bakriste ba therešo ba letetšego go a bona ‘mehleng ye ya bofelo’?
9 Mabapi le mehla ya rena, Beibele e boletše e sa le pele gore: “Mehleng ya bofelo go tla ba le dinako tše di hlobaetšago tšeo go lego thata go lebeletšana le tšona.” Ka morago ga go hlalosa maemo a mehleng ya bofelo pušong ya batho, boporofeta bo re: “Batho ba kgopo le baikgakanyi ba tla fetelela ka bobe.” (Bala 2 Timotheo 3:1-5, 13.) Se ke seo Bakriste ba se letetšego, ka ge “lefase ka moka le rapaletše matleng a yo kgopo,” Sathane. (1 Joh. 5:19) Lega go le bjalo, ditaba tše dibotse ke tša gore Modimo kgaufsinyane o tla hlakodiša bao ba mo ratago. Ba tla hlakodišwa lefaseng le leo bobe bja lona bo mpefalago ka lebelo.
Mothopo o Nnoši o ka Botwago wa Tlhakodišo
10. Ke ka baka la’ng Jehofa e le Mothopo o nnoši o ka botwago wa tlhakodišo?
10 Ge o dutše o bolela ditaba tše dibotse, bontšha batheetši ba gago gore Jehofa ke Mothopo o nnoši o ka botwago wa tlhakodišo. Yena a nnoši o na le matla e bile o kganyoga go hlakodiša bahlanka ba gagwe boemong le ge e le bofe bjo bobe. (Dit. 4:24, 31; Kut. 4:11) Re ka kgodišega gore Jehofa ka mehla o hlakodiša batho ba gagwe le go phethagatša merero ya gagwe, ka ge a enne ka gore: “Xe xo sa direxe tše ke di xopotšexo, . . . e tlo ba è se Nna!” Lentšu la gagwe “le ka se boêle xo [yena] lè le fêla.”—Bala Jesaya 14:24, 25; 55:10, 11.
11, 12. Ke kgonthišetšo efe yeo Modimo a e neago bahlanka ba gagwe?
11 Jehofa o kgonthišeditše gore o tla hlakodiša bahlanka ba gagwe ge a phetha kahlolo bathong ba kgopo. Ge a romela moporofeta Jeremia go yo bolela ka sebete le badiri ba dibe tše dikgolo, Modimo o itše: “Se boifê.” Ka baka la’ng? “Nna ke tlo ba le wêna, ka Xo hlakodiša.” (Jer. 1:8) Ka mo go swanago, ge Jehofa a be a le kgaufsi le go senya motse o kgopo wa Sodoma le Gomora, o ile a romela barongwa ba babedi gore ba ye go šireletša Lota le lapa la gagwe ge le be le e-tšwa nageng yeo. “Byale Morêna a nešetša Sodoma le Gomora thsêbêla le mollô.”—Gen. 19:15, 24, 25.
12 Le ge e ka ba lefaseng ka bophara, Jehofa o tla hlakodiša bao ba dirago thato ya gagwe. Ge a be a senya lefase le kgopo la bogologolo ka Meetsefula, o ile “a lota Noa mmoledi wa toko le ba bangwe ba šupago.” (2 Pet. 2:5) Le mo nakong ye Jehofa o tla hlakodiša bao ba lokilego ge a senya lefase la bjale le kgopo. Ka gona, Lentšu la gagwe le re: “Nyakang Morêna, lena babôtla bohle ba lefase . . . Tsomang tokô, Le tsomê boikokobetšô; mohlomongwê Le ka efošwa mohla woo wa boxale bya Morêna.” (Tsef. 2:3) Ka baka la phedišo yeo ya lefase ka bophara, ‘baloki ba tlo dula mo nageng, eupša ba babe ba tlo fedišwa.’—Die. 2:21, 22.
13. Bahlanka ba Jehofa ba hwilego ba tla hlakodišwa bjang?
13 Lega go le bjalo, ba bantši ba bahlanka ba Modimo ba šetše ba hwile ka baka la malwetši, tlaišo le mabaka a mangwe. (Mat. 24:9) Ka gona, batho ba bjalo ka moka ba tla hlakodišwa bjang? Ka ge go bontšhitšwe pejana, “go tla ba le tsogo ya ba lokilego.” (Dit. 24:15) Go homotša gakaakang go tseba gore ga go na seo se ka thibelago Jehofa go hlakodiša bahlanka ba gagwe!
Mmušo wa go Loka
14. Ke ka baka la’ng re kgodišegile gore Mmušo wa Modimo ke wa go loka?
14 Bodireding bja gago, o ka hlalosa gore Mmušo wa Jehofa wa legodimong ke mmušo wa go loka. Go bjalo ka gobane o bonatša dika tša Modimo tše dibotse tše bjalo ka toka, toko le lerato. (Doit. 32:4; 1 Joh. 4:8) Modimo o beile Mmušo ka diatleng tša Jesu Kriste, yo a swanelegago gabotse go buša lefase. Le gona, Jehofa o rerile gore Bakriste ba tloditšwego ba 144 000 ba tšerwego lefaseng le go tsošetšwa bophelong bja legodimong e le bajabohwa gotee le Kriste ba buše lefase le yena.—Kut. 14:1-5.
15. Bontšha phapano magareng ga Mmušo wa Modimo le wa batho.
15 Ruri go tla ba le phapano e kgolo gare ga pušo ya Jesu le ba 144 000 gotee le ya batho ba sa phethagalago! Babuši ba tshepedišo ye ya dilo gantši ke ba kgopo gomme ba išitše balatedi ba bona dintweng, tšeo di ilego tša feleletša ka go bolawa ga dimilione tša batho. Ga go makatše ge Mangwalo a re eletša gore re se ke ra bota bana ba batho, “bao xo sexo phološô xo bôná”! (Ps. 146:3) A moya o mobotse gakaakang woo o tlago go hlaola pušo ya Kriste! Jesu o itše: “Tlang go nna, lena bohle bao le lapišitšwego le go imelwa, ke tla le lapološa. Rwalang joko ya-ka le ithute go nna, gobane ke wa moya o boleta e bile ke wa pelo e ikokobeditšego, gomme le tla hweletša meoya ya lena tapologo. Gobane joko ya-ka e botho, morwalo wa-ka o bohwefo.”—Mat. 11:28-30.
Mehla ya Bofelo e Kgaufsi le go Fela!
16. Mehla ye ya bofelo e tla fela bjang?
16 Lefase le le bile mehleng ya bofelo, goba “[bofelong] bja tshepedišo ya dilo,” go tloga ka ngwaga wa 1914. (Mat. 24:3) Kgaufsinyane, go tla ba le seo Jesu a se biditšego “masetlapelo a magolo.” (Bala Mateo 24:21.) Masetlapelo ao a sa bapišwego a tla fediša lefase la Sathane ka moka. Eupša masetlapelo a magolo a thoma bjang? Le gona a fela bjang?
17. Beibele e bontšha’ng mabapi le go thoma ga masetlapelo a magolo?
17 Masetlapelo a magolo a tla thoma kapejana. Ee, “letšatši la Jehofa” le tla tla go se gwa letelwa “neng le neng ge ba re: ‘Khutšo le polokego!’” (Bala 1 Bathesalonika 5:2, 3.) Masetlapelo a magolo ao go boletšwego ka ona a tla thoma ge ditšhaba di nagana gore di kgaufsi le go rarolla a mangwe a mathata a tšona a magolo. Go senywa kapejana ga “Babilona o Mogolo,” mmušo wa lefase wa bodumedi bja maaka, go tla makatša lefase. Dikgoši le ba bangwe ba tla makatšwa ke ge kahlolo e phethwa go Babilona o Mogolo.—Kut. 17:1-6, 18; 18:9, 10, 15, 16, 19.
18. Jehofa o arabela bjang ge Sathane a hlasela batho ba Gagwe?
18 Nakong e hlobaetšago kudu, go tla ba le “dipontšho letšatšing le kgweding le dinaleding,” gomme “pontšho ya Morwa wa motho e tla bonagala legodimong.” Ke moka re tla ‘inamologa gobane topollo ya rena e a batamela.’ (Luka 21:25-28; Mat. 24:29, 30) Sathane, goba Gogo, o tla diriša madira a gagwe go lwa le batho ba Modimo. Eupša mabapi le bahlanka ba gagwe ba botegago, bao ba hlaselwago Jehofa o re: “Yo a kgwathišago lena, o kgwathiša thaka ya leihlo [la-ka].” (Sak. 2:8, PK) Ka gona, maiteko a Sathane a go ba fediša a ka se ke a atlega. Ka baka la’ng? Ka gobane Morena wa Legohle Jehofa o tla gata mogato kapejana bakeng sa go hlakodiša bahlanka ba gagwe.—Hes. 38:9, 18.
19. Ke ka baka la’ng re ka kgodišega gore madira a Modimo ao a phethago kahlolo a tla fediša tshepedišo ya Sathane?
19 Ge Modimo a gata mogato kgahlanong le ditšhaba, ‘di tla tseba ge Jehofa e le yena.’ (Hes. 36:23) O tla romela madira a gagwe a go ahlola—dimiriate tša dibopiwa tša moya tšeo di etilwego pele ke Kriste Jesu—bakeng sa go senya tshepedišo ka moka ya Sathane lefaseng. (Kut. 19:11-19) Ge re gopola gore go tšere morongwa o tee feela bošego botee go “bolaya banna ba dikxao tše lekxolo le masome a seswai le metšô e mehlano” ba manaba a Modimo, re ka kgodišega gore madira a legodimo a tla fediša gabonolo mohlala o mongwe le o mongwe wa tshepedišo ya Sathane mo lefaseng ge masetlapelo a magolo a thoma ka Haramagedone. (2 Dikx. 19:35; Kut. 16:14, 16) Sathane le batemona ba gagwe ba tla lahlelwa sekoting ka nywaga e sekete. Mafelelong, ba tla fedišwa.—Kut. 20:1-3.
20. Ke’ng seo Jehofa a tlago go se phetha ka Mmušo?
20 Ka go rialo, bokgopo bo tla fedišwa lefaseng, gomme batho ba lokilego ba tla phela ka mo go sa felego mo lefaseng. Jehofa o tla ba a ipontšhitše e le Mohlakodiši yo Mogolo. (Ps. 145:20) A diriša Mmušo, o tla godiša bogoši bja gagwe, a kgethagatša leina la gagwe le lekgethwa le go phethagatša morero wa gagwe o mogolo bakeng sa lefase. Eka o ka ba le lethabo le legolo bodireding bja gago ge o dutše o tsebatša ditaba tše tše dibotse le go thuša bao “ba nago le tshekamelo e swanetšego ka bophelo bjo bo sa felego” go lemoga gore tlhakodišo ka Mmušo wa Modimo e kgaufsi!—Dit. 13:48.
Na o a Gopola?
• Jesu o gateletše bjang bohlokwa bja Mmušo?
• Ke ka baka la’ng tlhakodišo e nyakega kudu gona bjale go feta le ge e le neng pele?
• Ke ditiragalo dife tšeo re ka di letelago nakong ya masetlapelo a magolo?
• Jehofa o hlatsela bjang gore ke Mohlakodiši yo Mogolo?
[Dipotšišo tša Thuto]
[Diswantšho go letlakala 12, 13]
Lentšu la Modimo le boletše e sa le pele ka modiro wa boboledi wa mehleng yeno wo go se nago o swanago le wona woo o bego o tla dirwa lefaseng ka bophara
[Seswantšho go letlakala 15]
Ka ge Jehofa a ile a hlakodiša Noa le lapa la gagwe, le rena A ka re hlakodiša
[Seswantšho go letlakala 16]
Jehofa o tla “phumola megokgo ka moka . . . gomme lehu le ka se hlwe le sa ba gona.”—Kut. 21:4