Amogela Bolaodi bja Jehofa
Amogela Bolaodi bja Jehofa
“Se ke seo lerato la Modimo le se bolelago, gore re boloke ditaelo tša gagwe; gomme ditaelo tša gagwe ga di boima.”—1 JOH. 5:3.
1, 2. (a) Ke ka baka la’ng batho ba bantši lehono ba bona kgopolo ya bolaodi e le e sa kgahlišego? (b) Na bao ba sa nyakego go ikokobeletša bolaodi ruri ba a ipuša? Hlalosa.
“BOLAODI” ga se lentšu leo le ratwago lehono. Batho ba bantši ba lebelela kgopolo ya go ikokobeletša thato ya motho yo mongwe e le e sa kgahlišego. Polelwana e rego “nka se dumelele motho le ge e le ofe a mpotša gore ke dire’ng” e bontšha boemo bja kgopolo bja bao ba sa nyakego go ikokobeletša bolaodi bja motho. Lega go le bjalo, na ruri batho ba ba a ipuša? Le gatee! Ba bantši ba fo ba ba latela ditekanyetšo tša bontši bjoo bo “[bopegilego] ka sebopego sa tshepedišo ye ya dilo.” (Baroma 12:2) Ka ge ba le kgole kudu le go ipuša, ge re diriša mantšu a moapostola wa Mokriste Petro re ka re ke “bahlanka ba tshenyego.” (2 Pet. 2:19) Ba sepela “go ya ka tshepedišo ya dilo ya lefase le, go ya ka mmuši wa matla a moya,” e lego Sathane Diabolo.—Baef. 2:2.
2 Mongwadi yo mongwe o ile a ikgogomoša ka gore: “Ga ke dumelele batswadi ba-ka goba moruti goba mohlankedi goba morutiši wa bodumedi goba Beibele e mpotša seo ke swanetšego go se dumela.” Ke therešo gore ba bangwe ba ka diriša bolaodi bja bona gampe gomme ba se swanelwe ke gore re ba kwe. Eupša na ruri go gana tlhahlo le ge e le efe ka mo go feletšego ke yona tharollo? Go fo gaša mahlo dihlogong tša ditaba kuranteng go nea karabo e sa kgahlišego. Ke mo go nyamišago gore nakong ya ge batho ba tloga ba swanetše go nyaka tlhahlo, ba bantši ga ba nyake go e amogela.
Pono ya Rena ka Bolaodi
3. Bakriste ba lekgolong la pele la nywaga ba ipontšhitše bjang gore ba be ba sa fo dira se sengwe le se sengwe seo balaodi ba batho ba bego ba re ba se dire?
3 Bjalo ka Bakriste, boemo bja rena ga bo swane le bja lefase. Ga se gore re fo dira se sengwe le se sengwe seo go thwego re se dire. Ka Ditiro 5:27-29.
mo go fapanego, ka dinako tše dingwe re swanelwa ke go gana go ikokobeletša thato ya ba bangwe gaešita le ge ba e-na le maemo a bolaodi. Bakriste ba lekgolong la pele la nywaga le bona ba ile ba dira se se swanago. Ka mohlala, ge baapostola ba be ba laelwa go kgaotša go dira boboledi, ga se ba ka ba ikokobeletša moperisita yo a phagamego le balaodi ba bangwe bao e bego e le karolo ya Sanhedrine. Ga se ba ka ba lesa go itshwara gabotse gore ba ikokobeletše balaodi ba batho.—Bala4. Ke mehlala efe e tšwago Mangwalong a Seheberu yeo e bontšhago gore ba bantši ba batho ba Modimo ga se ba ka ba ya le mogobo?
4 Bahlanka ba bantši ba Modimo ba mehleng ya pele ga Bokriste ba ile ba dira phetho e swanago. Ka mohlala, Moše “o ile a gana go bitšwa morwa wa morwedi wa Farao, a kgetha go swarwa gampe le setšhaba sa Modimo,” gaešita le ge go dira bjalo go be go tsoša “bogale bja kgoši.” (Baheb. 11:24, 25, 27) Josefa o ile a gana dikgoketšo tša mosadi wa Potifara, yo a bego a e-na le matla a go itefeletša le a go ka mo gobatša. (Gen. 39:7-9) Daniele “mo pelong ya xaxwe a tiiša a re a ka se kê a ja seilá ka dijô tša kxoši,” gaešita le ge boemo bja gagwe tabeng yeo bo be bo ka se amogelwe gabonolo ke mogolo wa dikala wa Babilona. (Dan. 1:8-14) Mehlala e bjalo e bontšha gore batho ba Modimo historing ya bona ba ile ba emela seo se nepagetšego ka go tia, go sa šetšwe ditla-morago tša seo. Ga se ba ikokobeletša batho e le go fo dira gore ba ba amogele; le rena ga se ra swanela go dira bjalo.
5. Pono ya rena ka bolaodi e fapana bjang le ya lefase?
5 Boemo bja rena bjo sebete ga bo swane le go ba le mereba; e bile ga re swane le ba bangwe bao ba rabelago bakeng sa go fo bontšha gore ga ba kwane le tshepedišo ya dipolitiki. Go e na le moo, re ikemišeditše go etiša bolaodi bja Jehofa pele ga bja batho. Ge molao wa batho o thulana le wa Modimo, ga re thatafalelwe ke go dira phetho ya seo re swanetšego go se dira. Go swana le baapostola ba lekgolong la pele la nywaga, re kwa Modimo e le mmuši go e na le batho.
6. Ke ka baka la’ng ka mehla go le kaone-kaone go kwa ditaelo tša Jehofa?
6 Ke’ng seo se re thušago go amogela bolaodi bja Modimo? Re amogela boemo bjoo bo bolelwago ke Diema 3:5, 6 e rego: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” Re dumela gore selo se sengwe le se sengwe seo Modimo a se nyakago go rena se tla feleletša ka go re hola. (Bala Doiteronomio 10:12, 13.) Ee, Jehofa o ile a itlhalosa go Baisiraele a re, ke “Xo ruta tše di Xo holaxo; ke Xo sepediša mo tseleng ye O swanetšexo xo e swara.” Ke moka o ile a oketša ka gore: “Mola O ka be O theeditše xe ke Xo laêla, moláô wa xaxo o ka be o swana le noka, xo loka xa xaxo xo ka be xo etša maphoto a lewatlê.” (Jes. 48:17, 18) Re bota mantšu a. Re kgodišegile gore go kwa ditaelo tša Modimo go tla dula go re hola.
7. Re swanetše go dira’ng ge e ba re sa kwešiše ka mo go feletšego taelo yeo e lego ka Lentšung la Modimo?
7 Re amogela bolaodi bja Jehofa e bile re mo kwa gaešita le ge re sa kwešiše ka mo go feletšego lebaka la ditaelo tše dingwe tšeo di lego ka Lentšung la gagwe. Se ga se bodumela-tšohle; ke go mmota. Se bontšha kgodišego e tšwago pelong ya gore Jehofa o tseba seo se re loketšego. Go kwa ga rena gape ke pontšho ya lerato la rena, ka gobane moapostola Johane o ngwadile gore: “Se ke seo lerato la Modimo le se bolelago, gore re boloke ditaelo tša gagwe.” (1 Joh. 5:3) Eupša go na le karolo e nngwe ya go kwa ga rena yeo re sego ra swanela go e tshediša mahlo.
Go Tlwaetša Matla a Rena a go Hlatha
8. Go ‘tlwaetša matla a rena a go hlatha’ go tswalana bjang le go amogela bolaodi bja Jehofa?
8 Beibele e re botša gore re swanetše go ‘tlwaetša matla a rena a go hlatha, re kgethologanye se se nepagetšego le se se fošagetšego.’ (Baheb. 5:14) Ka baka leo, pakane ya rena ga se go fo theetša melao ya Modimo; go e na le moo, re nyaka go kgona go ‘kgethologanya se se nepagetšego le se se fošagetšego’ go ya ka ditekanyetšo tša Jehofa. Re nyaka go bona bohlale bja ditsela tša Jehofa, e le gore re ka bolela bjalo ka mopsalme gore: “Molaô wa xaxo o dula ò le pelong ya-ka.”—Ps. 40:8.
9. Re ka dira bjang gore matswalo a rena a sekamele ditekanyetšong tša Jehofa, le gona ke ka baka la’ng go dira bjalo go le bohlokwa?
9 Gore re tšeele melao ya Modimo godimo go swana le mopsalme, re swanetše go naganišiša ka seo re se balago ka Beibeleng. Ka mohlala, ge re bala ka molao o itšego wa Jehofa, re ka ipotšiša gore: ‘Ke ka baka la’ng taelo ye goba molao wo o le bohlale? Ke ka baka la’ng go o kwa go tla nkhola? Ke ditla-morago dife tše di sa kgahlišego tšeo di wetšego bao ba ilego ba hlokomologa keletšo ya Modimo tabeng ye?’ Ge matswalo a rena a sekametše ditseleng tša Jehofa, gantši re dira diphetho tša go dumelelana le thato ya gagwe. Re kgona go ‘tšwela pele re hlatha seo thato ya Jehofa e lego sona’ ke moka ra bontšha seo ka tsela ya go kwa. (Baef. 5:17) Go dira bjalo ga se ka mehla go lego bonolo.
Sathane o Nyaka go Senya Bolaodi bja Modimo
10. Tsela e nngwe yeo Sathane a lekago go senya bolaodi bja Modimo ka yona ke efe?
10 Ke kgale Sathane a nyaka go senya bolaodi bja Modimo. Moya wa gagwe wa boipušo o bonagala ka ditsela tše dintši. Ka mohlala, ela hloko go se hlompšhe ga tokišetšo ya Modimo ya lenyalo. Ba bangwe ba no kgetha go dula gotee ba se ba nyalana, mola ba bangwe ba nyaka ditsela tša go hlanogela balekane ba bona. Batho ba dihlopha tšeo tše pedi ba ka dumelelana le sebapadi sa mosadi seo se tsebjago kudu seo se ilego sa bolela gore: “Go ba le molekane o tee ke selo se se sa kgonegego go batho ba bong ka moka.” Se okeditše ka gore: “Ga go motho yo ke mo tsebago a botega goba a nyakago go botega.” Ge se nagana ka tswalano ya sona yeo e foloditšego, sebapadi se sengwe sa monna ka mo go swanago se boletše gore: “Ke tloga ke sa tsebe ge e ba e le ga tlhago gore motho a be le molekane o tee bophelo bja gagwe ka moka.” Re swanetše go ipotšiša gore, ‘Na ke amogela bolaodi bja Jehofa tabeng ya lenyalo, goba na boemo bjo bo hlephilego bja kgopolo bja lefase bo tutuetša tsela yeo ke naganago ka yona?’
11, 12. (a) Ke ka baka la’ng bafsa ba ka thatafalelwa ke go amogela bolaodi bja Jehofa? (b) Anega phihlelo yeo e bontšhago bošilo bja go hlokomologa melao ya Jehofa le melao ya gagwe ya motheo.
11 Na o mofsa yo a lego mokgatlong wa Jehofa? Ge e ba go bjalo, o ka ba mohlaselwa yo mogolo wa maiteko a Sathane a go senya bolaodi bja Jehofa. “Dikganyogo tšeo di sepedišanago le bofsa” gotee le kgateletšo ya dithaka tša gago di ka dira gore o nagane gore melao ya Modimo ke e boima. (2 Tim. 2:22) O se ke wa dumelela seo se direga. Katanela go bona bohlale bja ditekanyetšo tša Modimo. Ka mohlala, Beibele e go botša gore o ‘tšhabe bootswa.’ (1 Bakor. 6:18) Mo le gona, ipotšiše dipotšišo tše: ‘Ke ka baka la’ng molao wo o le bohlale? Go kwa go ka nkhola bjang boemong bjo?’ O ka ba o tseba ba bangwe bao ba ilego ba hlokomologa keletšo ya Modimo gomme ba ba le ditla-morago tše tlogago di sa kgahliše ka baka la phošo yeo. Na ruri ba thabile gona bjale? Na ba phela gabotse go feta ge ba be ba sa kopanela le mokgatlo wa Jehofa? Na ruri ba hweditše sephiri sa lethabo seo batho ba Modimo ka moka ba sego ba se hwetša?—Bala Jesaya 65:14.
12 Ela hloko mantšu ao a boletšwego ke Mokriste yo a bitšwago Sharon ngwageng e itšego e fetilego: “Ka baka la go se kwe melao ya Jehofa, ke na le bolwetši bjo bo bolayago bja AIDS. Gantši Joh. 8:44) Ee, selo se sekaone-kaone ka mehla ke go ikokobeletša bolaodi bja Jehofa.
ke nagana ka dinako tša lethabo tšeo ke ilego ka ba le tšona tirelong ya-ka go Jehofa.” O ile a lemoga gore go roba melao ya Jehofa e be e le ga bošilo le gore nkabe a ile a e hlompha ka mo go tseneletšego. Melao ya Jehofa e a re šireletša. Sharon o ile a hwa dikgwedi tše šupago feela ka morago ga go ngwala mantšu a lego ka mo godimo. Bjalo ka ge phihlelo ya gagwe e bohloko e bontšha, ga go selo se sebotse seo Sathane a ka se fago bao ba bago karolo ya tshepedišo ya gagwe e kgopo. Ka ge e le “tatago maaka,” o dira dikholofetšo tše dintši, eupša ga a di phethagatše, go fo swana le yeo a ilego a e holofetša Efa. (Itšhireletše Malebana le Moya wa Boipušo
13. Ke karolong efe e nngwe yeo go yona re swanetšego go itšhireletša malebana le moya wa boipušo?
13 Ge re amogela bolaodi bja Jehofa, re swanetše go itšhireletša malebana le moya wa boipušo. Boikgodišo bo ka re dira gore re ikwe re sa nyake tlhahlo ya motho. Ka mohlala, re ka gana keletšo yeo re e fiwago ke bao ba etelelago pele bathong ba Modimo. Modimo o dirile tokišetšo ya gore sehlopha sa mohlanka yo a botegago le wa temogo se nee dijo tša moya ka nako e swanetšego. (Mat. 24:45-47) Re swanetše go lemoga ka boikokobetšo gore ye ke tsela yeo Jehofa a hlokomelago batho ba gagwe ka yona lehono. E-ba bjalo ka baapostola ba botegago. Ge barutiwa ba bangwe ba be ba kgopša, Jesu o ile a botšiša baapostola gore: “Na le lena le nyaka go sepela?” Petro o ile a araba ka gore: “Morena, re tla ya go mang? O na le mantšu a bophelo bjo bo sa felego.”—Joh. 6:66-68.
14, 15. Ke ka baka la’ng re swanetše go kwa keletšo ya Beibele ka boikokobetšo?
14 Go amogela bolaodi bja Jehofa go akaretša go dira ka go dumelelana le keletšo e theilwego Lentšung la gagwe. Ka mohlala, sehlopha sa mohlanka yo a botegago le wa temogo se be se dutše se re lemoša gore re “duleng re phafogile gomme re dule re hlaphogetšwe monaganong.” (1 Bathes. 5:6) Keletšo e bjalo ke e swanetšego kudu mo mehleng ya bofelo yeo go yona batho ba bantši e lego “baithati [le] barati ba tšhelete.” (2 Tim. 3:1, 2) Na re ka kgongwa ke mekgwa e bjalo e tlwaelegilego? Ee. Dipakane tšeo e sego tša moya di ka re kunkureletša gore re robale moyeng, goba ra rata dilo tše di bonagalago. (Luka 12:16-21) Ka gona, ke gabohlale gakaakang go amogela keletšo ya Beibele gomme ra phema tsela ya bophelo ya boithati yeo e tlwaelegilego kudu lefaseng la Sathane!—1 Joh. 2:16.
15 Dijo tša moya tšeo di tšwago go sehlopha sa mohlanka yo a botegago le wa temogo di abja ke bagolo ba kgethilwego diphuthegong tša gabo rena. Beibele e re eletša ka gore: “Kwang bao ba etelelago pele gare ga lena gomme le ikokobetše, gobane ba hlokomela meoya ya lena e le bao ba tlago go ikarabela; e le gore ba dire se ka lethabo e sego ka go fegelwa, gobane se se tla le gobatša.” (Baheb. 13:17) Na se se ra gore bagolo ba phuthego ga ba dire diphošo? Ga go bjalo le gatee! Modimo o bona go se phethagale ga bona gabotse kudu go feta motho le ge e le ofe. Go sa dutše go le bjalo, o lebeletše gore re ikokobetše. Go dirišana le bagolo, gaešita le ge ba sa phethagala, go nea bohlatse bja gore re amogela bolaodi bja Jehofa.
Bohlokwa bja Boikokobetšo
16. Re ka bontšha Jesu tlhompho bjang bjalo ka Hlogo ya phuthego ya Bokriste?
16 Re swanetše go dula re gopola gore Jesu ke Hlogo ya kgonthe ya phuthego. (Bakol. 1:18) Leo ke lebaka le lengwe leo ka lona re kwago ka boikokobetšo tlhahlo ya bagolo ba kgethilwego, re ba fa “kgodišo e fetago e tlwaelegilego.” (1 Bathes. 5:12, 13) Ke therešo gore bagolo ba phuthego ba ka bontšha gore le bona ba a ikokobetša ka go ela hloko gore ba nea phuthego molaetša wa Modimo, e sego dikgopolo tša bona ka noši. Ga ba “[fetele] ka kua ga dilo tše di ngwadilwego” bakeng sa go godiša dikgopolo tša bona.—1 Bakor. 4:6.
17. Ke ka baka la’ng moya wa go rata maemo o le kotsi?
17 Bohle ka phuthegong ba swanetše go itšhireletša malebana le go inyakela letago. (Die. 25:27) Go molaleng gore woo ke molaba woo o ilego wa tanya morutiwa yo mongwe yoo moapostola Johane a ilego a kopana le yena. O ngwadile gore: “Dioterefe yo a ratago go ba maemong a pele gare ga bona, ga a amogele selo le ge e le sefe go rena ka tlhompho. Ke ka baka leo, ge e ba ke e-tla ke tlago go gopola mediro ya gagwe yeo a tšwelago pele a e dira, a ratharatha ka rena ka mantšu a mabe.” (3 Joh. 9, 10) Go na le seo le rena re ka ithutago sona lehono tabeng yeo. Re na le lebaka le le kwagalago la go tumola modu le ge e le ofe wa go rata maemo woo re ka o bonago ka go rena. Beibele e re botša gore: “Boikgogomošo bo eta thobego pele; gomme go wa go etwa pele ke go ikgantšha.” Bao ba amogelago bolaodi bja Modimo ba swanetše go phema molaba wa boikgantšho, gobane ge ba ka se dire bjalo ba tla lewa ke dihlong.—Die. 11:2; 16:18, PK.
18. Ke’ng seo se tla re thušago go amogela bolaodi bja Jehofa?
18 Ee, ikemišetše go gana moya wa lefase wa boipušo gomme o amogele bolaodi bja Jehofa. Dula o naganišiša ka tsela e nago le tebogo ka tokelo e kgolo yeo o nago le yona ya go hlankela Jehofa. Taba ya gore o gare ga batho ba Modimo ke bohlatse bja gore o go gogile ka moya wa gagwe o mokgethwa. (Joh. 6:44) O se ke wa tsoga o tšeetše tswalano ya gago le Jehofa fase. Dira seo o ka se kgonago dikarolong ka moka tša bophelo go bontšha gore o gana moya wa boipušo le gore o amogela bolaodi bja Jehofa.
Na o a Gopola?
• Go amogela bolaodi bja Jehofa go akaretša’ng?
• Go tlwaetša matla a rena a go hlatha go tswalana bjang le go amogela bolaodi bja Jehofa?
• Ke dikarolong dife moo Sathane a lekago go senya bolaodi bja Modimo?
• Ke ka baka la’ng boikokobetšo bo le bohlokwa go amogeleng bolaodi bja Jehofa?
[Dipotšišo tša Thuto]
[Seswantšho go letlakala 18]
“Re swanetše go kwa Modimo e le mmuši go e-na le batho”
[Seswantšho go letlakala 20]
Ka mehla go bohlale go latela ditekanyetšo tša Modimo