Dintlha tše Kgolo go tšwa Lengwalong la Baroma
Lentšu la Jehofa le a Phela
Dintlha tše Kgolo go tšwa Lengwalong la Baroma
MO E ka bago ka 56 C.E., ge a be a le leetong la gagwe la boraro la boromiwa, moapostola Paulo o goroga motseng wa Korinthe. O šetše a tseba phapano ya dipono tša Bajuda le Bakriste ba Bantle ba kua Roma. Ka ge a nyaka go dira gore ba be batee go Kriste ka mo go feletšego, Paulo o gata mogato wa pele ka go ba ngwalela lengwalo.
Lengwalong leo le le yago go Baroma, Paulo o hlalosa kamoo batho ba bolelwago e le ba lokilego le kamoo batho ba bjalo ba swanetšego go phela ka gona. Lengwalo le le tlatša kgopolo ya rena ka tsebo ya go tseba Modimo le Lentšu la gagwe, le gatelela botho bja Modimo, le go godiša tema yeo e kgathwago ke Kriste ya go re phološa.—Baheb. 4:12.
MOTHO O BOLELWA A LOKILE—BJANG?
Paulo o ngwala gore: “Gobane bohle ba dirile sebe gomme ba hlaelelwa ke letago la Modimo, go bjalo ka ge eka ke mpho e sa lefelelwego gore ba bolelwa ba lokile ka botho bja [Modimo] bjo bo sa swanelago ka go lokollwa ka topollo yeo e lefilwego ke Kriste Jesu.” Paulo o bolela gape gore: “Motho o bolelwa a lokile ka tumelo ka ntle le mediro ya molao.” (Baroma 3:23, 24, 28) Ka go dumela “tiro e tee ya tokafatšo,” Bakriste ba tloditšwego le ditho tša “lešaba le legolo” la “dinku tše dingwe” ba ka ‘bolelwa ba lokile’—Bakriste ba tloditšwego bakeng sa bophelo legodimong e le bajabohwa-gotee le Kriste gomme ba lešaba le legolo e le bagwera ba Modimo, ka tebelelo ya go phologa ‘masetlapelo a magolo.’—Baroma 5:18; Kut. 7:9, 14; Joh. 10:16; Jak. 2:21-24; Mat. 25:46.
Paulo o botšiša gore: “Na re tla dira sebe gobane re se tlase ga molao eupša re le tlase ga botho bjo bo sa swanelago?” O araba ka gore: “Anke seo se se ke sa direga le gatee!” Paulo o hlalosa ka gore: “Le bahlanka . . . , e ka ba ba sebe ka tebelelo ya lehu goba ba go kwa ka tebelelo ya toko.” (Baroma 6:15, 16) O re: “Ge e ba le bolaya ditlwaelo tša mmele ka moya, le tla phela.”—Baroma 8:13.
Dipotšišo tša Mangwalo di a Arabja:
1:24-32—Na go phuhlama ga boitshwaro moo go hlaloswago mo ke ga Bajuda goba ga Bantle? Gaešita le ge tlhaloso ye e ka swanela dihlopha ka bobedi, Paulo o be a bolela ka go lebanya ka Baisiraele ba bogologolo ba bahlanogi. Gaešita le ge ba be ba tseba melao ya Modimo ya go loka, “[ga se ba ka] ba amogela go ela Modimo hloko ka tsebo e nepagetšego.” Ka go rialo ba be ba solega.
3:24, 25—Ke bjang “topollo yeo e lefilwego ke Kriste Jesu” e bego e ka bipa “dibe tšeo di dirilwego nakong e fetilego” pele ga ge e ka lefša? Boporofeta bja mathomo bja mabapi le Mesia, bjoo bo lego go Genesi 3:15, bo ile bja phethagala ka 33 C.E. ge Jesu a be a bolawa koteng ya tlhokofatšo. (Bagal. 3:13, 16) Lega go le bjalo, ge Jehofa a be a bolela boporofeta bjoo, o ile a lebelela topollo bjalo ka ge eka e šetše e lefilwe, ka gobane ga go seo se ka thibelago Modimo go phetha morero wa gagwe. Ka go rialo, motheong wa sehlabelo sa nakong e tlago sa Jesu Kriste, Jehofa o be a ka lebalela dibe tša ditlogolwana tša Adama tšeo di dumelago kholofetšong yeo. Topollo gape e dira gore bao ba hwilego pele ga mehla ya Bokriste ba tsošwe bahung.—Dit. 24:15.
6:3-5—Ke’ng seo se bolelwago ke go kolobeletšwa go Kriste Jesu le go kolobeletšwa lehung la gagwe? Ge Jehofa a tlotša balatedi ba Kriste ka moya o mokgethwa, ba ba batee le Jesu gomme ba ba ditho tša phuthego yeo e lego mmele wa Kriste, yeo a lego Hlogo ya yona. (1 Bakor. 12:12, 13, 27; Bakol. 1:18) Se ke go kolobeletšwa ga bona go Kriste Jesu. Bakriste ba tloditšwego gape ba “kolobeleditšwe lehung la [Kriste]” ka kgopolo ya gore ba phela bophelo bja boikgafo e bile ba gafa kholofelo ya bophelo bjo bo sa felego mo lefaseng. Ka baka leo, lehu la bona ke la sehlabelo, go swana le la Jesu, gaešita le ge lehu la bona e se la topollo. Kolobetšo ye ya go kolobeletšwa lehung la Kriste e phethwa ge ba e-hwa le go tsošetšwa bophelong bja legodimong.
7:8-11—‘Sebe se hweditše bjang tlhohleletšo ka taelo’? Molao o thušitše batho go lemoga bogolo bja sebe, ka go ba dira gore ba dule ba phafogetše go se be badiradibe. Ka baka leo, ba ile ba ipona e le badiradibe ka ditsela tše dintši, e bile batho bantši ba ile ba bonala e le badiradibe. Ka go rialo go ka thwe sebe se hweditše tlhohleletšo ka Molao.
Seo re Ithutago Sona:
1:14, 15. Re na le mabaka a mantši a go tsebatša ditaba tše dibotse ka phišego. Le lengwe la ona ke ka gobane re na le molato bathong ba rekilwego ka madi a Jesu le gona re tlamegile go ba thuša moyeng.
1:18-20. Batho bao ba sa boifego Modimo le ba sa lokago ba ‘hloka boitshwarelelo,’ ka gobane dika tša Modimo tše di sa bonagalego di bonwa tlholong.
2:28; 3:1, 2; 7:6, 7. Ka morago ga go bolela mantšu ao a bonagalago a nyatša Bajuda, Paulo o bolela a mangwe ao a a bebofatšago. Se ke mohlala wa kamoo re ka swaraganago ka bohlale le ka bokgoni le ditaba tšeo di ka kgopišago.
3:4. Ge dipolelo tša batho di thulana le seo Modimo a se bolelago ka Lentšung la gagwe, re dira gore “Modimo a hwetšwe e le wa therešo” ka go bota molaetša wa Beibele le go dira ka go dumelelana le thato ya Modimo. Re ka thuša ba bangwe go bona Modimo e le wa therešo ka go tšea karolo ka mafolofolo modirong wa go bolela ka Mmušo le wa go dira barutiwa.
4:9-12. Aborahama o ile a balelwa tumelo ya gagwe e le go loka kgale pele ga ge a bolotšwa a e-na le nywaga e 99. (Gen. 12:4; 15:6; 16:3; 17:1, 9, 10) Ka tsela yeo e matla, Modimo o bontšhitše seo se dirago gore a re bone re le ba lokilego.
4:18. Kholofelo ke karolo e kgolo kudu ya tumelo. Tumelo ya rena e theilwe kholofelong.—Baheb. 11:1.
5:18, 19. Ka go bontšha ka tsela e kwagalago gore Jesu o swana bjang le Adama, ka boripana Paulo o hlalosa kamoo motho o tee a kago “nea moya wa gagwe gore e be topollo bakeng sa ba bantši.” (Mat. 20:28) Go bea mabaka ka tsela e kwagalago le ka boripana ke mekgwa e kaone kudu ya go ruta yeo re ka e ekišago.—1 Bakor. 4:17.
7:23. Ditho tša rena tša mmele tše bjalo ka diatla, maoto le leleme di ka re ‘dira mathopša a molao wa sebe,’ ka go rialo re swanetše go katanela go se di diriše gampe.
8:26, 27. Ge re lebeletšana le mathata ao a imelago kudu moo re sa tsebego gore re rapele re re’ng, “moya ka bowona o [a] re phophothela.” Ke moka Jehofa, yena “Mokwi wa dithapêlô,” o amogela dithapelo tše di swanetšego tšeo di lego ka Lentšung la gagwe go le bjalo ka ge eka di tšwa go rena.—Ps. 65:2.
8:38, 39. Dikotsi, dibopiwa tše kgopo tša moya le mebušo ya batho di ka se dire gore Jehofa a se ke a hlwa a re rata; le gona ga se tša swanela go re dira gore re se ke ra hlwa re mo rata.
9:22-28; 11:1, 5, 17-26. Diporofeto tše dintši tša mabapi le go tsošološwa ga Isiraele di phethagatšwa ke phuthego ya Bakriste ba tloditšwego, bao ditho tša bona di “[biditšwego], e sego feela go tšwa go Bajuda eupša gape le go tšwa go ditšhaba.”
10:10, 13, 14. Go tlaleletša leratong leo re ratago Modimo le batho ka lona, tumelo e tiilego go Jehofa le dikholofetšong tša gagwe e ka re tutueletša go tšea karolo ka mafolofolo bodireding bja Bokriste.
11:16-24, 33. “Botho le go thatafa ga Modimo” ke tšeo di leka-lekanego gakaakang! Ee, “ké Yêna Lentšwê, yo tirô-phethexi, ka xe ’tsela tsa’xwe tšohle dì lokile.”—Doit. 32:4.
GO PHELA KA GO DUMELELANA LE GO BOLELWA O LOKILE
Paulo o re: “Ka baka leo, ke le lopa ka lešoko la Modimo, bana bešo, gore le neele mebele ya lena e le sehlabelo se se phelago, se sekgethwa, se se amogelegago go Modimo.” (Baroma 12:1) “Ka baka leo,” goba ka ge Bakriste ba bolelwa ba lokile ka baka la tumelo ya bona, se se latelago se swanetše go kgoma kamoo ba itebelelago ka gona, kamoo ba lebelelago ba bangwe ka gona gotee le balaodi ba mmušo.
Paulo o ngwala gore: “Ke botša yo mongwe le yo mongwe gare ga lena gore a se ke a ikgopola kudu go feta kamoo go nyakegago gore a nagane ka gona.” O lemoša ka gore: “A lerato la lena e be le le se nago boikaketši.” (Baroma 12:3, 9) “Anke moya o mongwe le o mongwe o ikokobeletše balaodi ba bagolo.” (Baroma 13:1) Ditabeng tšeo di nyakago letswalo, o kgothaletša Bakriste gore ‘ba se ke ba ahlolana.’—Baroma 14:13.
Dipotšišo tša Mangwalo di a Arabja:
12:20—Re “kgobelela magala a mollo” bjang hlogong ya lenaba? Mehleng ya Beibele, borale bo be bo tsenywa ka ontong gomme magala a bewa godimo le ka tlase ga bjona. Phišo e oketšegilego godimo ga bjona e be e thuša tšhipi go tologa le go e tloša ditšhila. Ka tsela e swanago, re bea magala a mollo hlogong ya lenaba ka go dira ditiro tše botho go lona e le gore go ba thata ga lona go ka tologa gomme dika tša lona tše dibotse tša bonagala.
12:21—Re ‘tšwela pele bjang re fenya bobe ka bolo’? Tsela e nngwe yeo re dirago se ka yona ke ka go kgomarela ka sebete modiro wo re o filwego ke Modimo wa go bolela ditaba tše dibotse tša Mmušo go fihlela Jehofa a re go lekane.—Mar. 13:10.
13:1—Ke ka tsela efe balaodi ba bagolo ba “[beilwego] ke Modimo maemong a bona a lekanyeditšwego”? Balaodi ba mebušo ba lego “gona ba beilwe ke Modimo maemong a bona a lekanyeditšwego” ka kgopolo ya gore ba buša ka tumelelo ya Modimo, le gore mabakeng a mangwe bobuši bja bona bo ile bja bonwa ke Modimo e sa le pele. Se se hlatselwa ke seo Beibele e ilego ya se bolela e sa le pele ka babuši ba mmalwa.
Seo re Ithutago Sona:
12:17, 19. Go itefeletša ke go dira seo se swanetšego go dirwa ke Jehofa feela. Ruri go “bušetša bobe ka bobe” e tla ba e le go ikgodiša!
14:14, 15. Ga se ra swanela go nyamiša ngwanabo rena goba go mo kgopiša ka dijo goba dino tšeo re mo fago tšona.
14:17. Go amogelwa ke Modimo ga se gwa ithekga kudu ka seo motho a se jago goba a se nwago goba go ithekga ka seo motho a sa se jego goba a sa se nwego. Go e na le moo, go sepedišana le toko, khutšo gotee le lethabo.
15:7. Re swanetše go amogela ka go hloka kgethollo batho ka moka bao ba tsomago therešo go tšwa pelong ka phuthegong gomme re botše batho ka moka bao re kopanago le bona molaetša wa Mmušo.
[Diswantšhogo letlakala 31]
Na topollo e ka šoma go dibe tšeo di dirilwego pele e lefelelwa?