Dipotšišo tše Tšwago go Babadi

Moapostola Paulo o boletše gore “Isiraele ka moka e tla phološwa.” (Baroma 11:26) Na o be a e-ra gore ka nako e itšego Bajuda ka moka ba tla sokologela Bokristeng?

Aowa, Paulo o be a sa realo. E le setšhaba, ditlogolo tša tlhago tša Aborahama di ile tša gana gore Jesu ke Mesia. Le gona nywageng ya ka morago ga lehu la Jesu, go ile gwa bonagala gabotse gore e ka se be Bajuda ka moka bao ba tla sokologelago Bokristeng. Lega go le bjalo, mantšu a Paulo a gore “Isiraele ka moka e tla phološwa” e be e le therešo. Ka tsela efe?

Jesu o boditše baetapele ba bodumedi ba Bajuda ba mehleng ya gagwe gore: “Le tla amogwa mmušo wa Modimo wa newa setšhaba seo se tšweletšago dienywa tša wona.” (Mat. 21:43) Ka ge setšhaba sa Isiraele ka moka ga sona se ile sa gana Jesu, Jehofa o be a tla lebiša tlhokomelo setšhabeng se sefsa, sa moya. Paulo o biditše setšhaba se gore ke “Isiraele wa Modimo.”—Bagal. 6:16.

Ditemana tše dingwe ka Mangwalong a Bakriste a Segerika di hlatsela gore “Isiraele wa Modimo” e bopša ke Bakriste ba tloditšwego ka moya ba 144 000. (Baroma 8:15-17; Kut. 7:4) Taba ya gore sehlopha se se tla akaretša batho bao e sego Bajuda e hlatselwa ke Kutollo 5:9, 10, yeo e bontšhago gore Bakriste ba tloditšwego ba tšwa “molokong o mongwe le o mongwe le lelemeng le lengwe le le lengwe le bathong ba bangwe le ba bangwe le setšhabeng se sengwe le se sengwe.” Ditho tša Isiraele ya moya di be di kgethilwe ka mo go kgethegilego gore di be “mmušo le baperisita . . . , gomme [di] tla buša e le dikgoši godimo ga lefase.” Gaešita le ge Jehofa a ile a lahla Isiraele bjalo ka setšhaba se se kgethilwego, batho ka o tee ka o tee ba be ba ka boelana le yena. Go be go le bjalo le ka baapostola gotee le Bakriste ba bangwe ba bantši ba pele. Ke therešo gore Bajuda ba bjalo, go swana le batho ba bangwe ka moka, ba be ba swanetše go rekwa ka madi a Jesu Kriste.—1 Tim. 2:5, 6; Baheb. 2:9; 1 Pet. 1:17-19.

Taba ya gore bontši bja Bajuda ba nama ba lekgolong la pele la nywaga ba ile ba lahlegelwa ke sebaka sa go ba babuši-gotee le Jesu ga se ya folodiša morero wa Modimo. Go be go ka se be bjalo, ka gobane Jehofa o boletše ka moporofeta wa gagwe gore: “Le Lentšu la-ka le le tšwaxo molomong wa-ka, le ka se boêle xo Nna lè le fêla; le tlo dira se nkxahlaxo, le tlo phêtha se ke le rometšexo sôna.”—Jes. 55:11.

Go bjalo ge e le mabapi le morero wa Modimo wa go hloma babuši-gotee ba 144 000 gore ba be le Morwa wa gagwe legodimong. Beibele e hlalosa gabotse gore Modimo o be a tla tlotša palo e feletšego ya ba 144 000. Go be go ka se hlaele le o tee!—Kut. 14:1-5.

Ka gona, ge Paulo a be a ngwala gore “Isiraele ka moka e tla phološwa,” o be a sa bolele e sa le pele ka go sokologela Bokristeng ga Bajuda ka moka. Go e na le moo, o be a bolela gore morero wa Modimo wa gore Baisiraele ba moya ba 144 000 ba buše legodimong le Morwa wa Gagwe, Jesu Kriste, o be o tla phethagatšwa. Ka nako ya Modimo e swanetšego, palo e feletšego—“Isiraele ka moka”—e be e tla phološwa, mafelelong ya buša e le dikgoši le baperisita Mmušong wa Mesia.—Baef. 2:8.

[Diswantšho go letlakala 28]

Batlotšwa ba tšwa “molokong o mongwe le o mongwe le lelemeng le lengwe le le lengwe le bathong ba bangwe le ba bangwe le setšhabeng se sengwe le se sengwe”