Go ba Matla go sa Šetšwe Mafokodi

MAFOKODI a gago a ka go imela. A go kgomarela wa dikgofa. O ka nagana gore o ka se tsoge o kgonne go a fenya, goba o ka ipona o sa swanelege, o ipapetša le ba bangwe le go dira phetho ya gore o phalwa ke bohle. Ka lehlakoreng le lengwe, o ka no ba o e-na le bolwetši bjo bo fokodišago bjoo bo go amogago matla gotee le lethabo bophelong. Go sa šetšwe gore bo bakwa ke eng, o bonagala o kgakgetšwe. O ka ikwa bjalo ka Jobo, yo a ilego a botša Modimo gore: “A mola O kabe O nkuta kwa bodula-bahu, boxale bya xaxo bya phôhla Ò sa mphihlile, Ò mpeetše ’baka sa xo tlo nkxopola!”—Jobo 14:13.

O ka lokologa bjang tlalelong e bjalo? Go sa šetšwe gore go thata gakaakang, go ka nyakega gore ka dinako tše dingwe o lebale ka mathata a gago go se nene. Ka mohlala, o ka ela hloko dipotšišo tše di buduletšwego tšeo Jehofa a ilego a di botšiša mohlanka wa gagwe yo a botegago e lego Jobo, tše rego: “O be O le kae mola kè thêa lefase?—Bolêla xe O tseba. Mo-naxana-kêlô ya lôna ké mang?—Ke be ke re O a tseba.—Mo-thêa-methêô ya lôna ké mang?” (Jobo 38:4, 5) Ge re nagana ka seo dipotšišo tšeo di se bolelago, gantši re tutueletšega go lemoga bohlale le matla a Jehofa a phagamego. O na le lebaka le lebotse la go dumelela maemo a gona bjale a lefase a tšwela pele.

“Mootlwa Nameng”

Mohlanka yo mongwe yo a botegago o ile a kgopela Jehofa gore a mo ntšhe “mootlwa nameng,” bothata bjo bo mo tshwenyago. Moapostola Paulo o kgopetše Modimo gararo gore a mo lokolle bothateng bjo. Go sa šetšwe gore e be e le bofe, bo ka ba bo be bo amoga Paulo lethabo, bjalo ka mootlwa o bohloko. Paulo o bo swantšhitše le go dula a phasolwa. Jehofa o arabile ka gore: “Botho bja-ka bjo bo sa swanelago bo go lekane; gobane matla a-ka a phethagatšwa bofokoding.” Jehofa ga se a ka a ntšha mootlwa woo nameng. Paulo o ile a swanelwa ke go  katana le wona, gomme o ile a tlaleletša ka gore: “Ge ke fokola, ke gona ke lego matla.” (2 Bakor. 12:7-10) O be a e-ra go re’ng?

Bothata bja Paulo ga se bja ka bja tloga ka mohlolo. Lega go le bjalo, ga se bja ka bja mo thibela go phethagatša dilo tše di kgahlišago tirelong ya Jehofa. Paulo o ile a ithekga ka Jehofa e bile a dula a mo kgopela thušo. (Bafil. 4:6, 7) Go ya bofelong bja bophelo bja gagwe bja lefaseng, Paulo o boletše ka mo go swanetšego gore: “Ke lwele ntwa e botse, ke kitimile lebelo go fihla mafelelong, ke bolokile tumelo.”—2 Tim. 4:7.

Jehofa o diriša batho ba sa phethagalago go phethagatša thato ya gagwe go sa šetšwe mafokodi a bona le mathata a bona, gomme theto e ya go yena ka mo go swanetšego. A ka ba nea tlhahlo le bohlale gore ba kgone go lebeletšana le mathata a bona le gore ba dule ba thabile tirelong ya gagwe. Ee, a ka diriša batho ba sa phethagalago go dira mediro e megolo go sa šetšwe mafokodi a bona.

Paulo o ile a bolela lebaka leo ka lona Modimo a sa kago a ntšha mootlwa nameng ya gagwe ka gore: “E le gore ke se ke ka phagama go feta tekanyo.” (2 Bakor. 12:7) “Mootlwa” wa Paulo o be o mo gopotša mafokodi a gagwe le go mo thuša go dula a ikokobeditše. Seo se dumelelana le seo Jesu a ilego a ruta ka sona ge a be a re: “Mang le mang yo a ikgodišago o tla kokobetšwa gomme mang le mang yo a ikokobetšago o tla godišwa.” (Mat. 23:12) Diteko di ka ruta bahlanka ba Modimo go ikokobetša gotee le go ba thuša go lemoga gore ba swanetše go ithekga ka Jehofa e le gore ba kgone go kgotlelela ka potego. Ka go rialo, ba ka ‘ikgantšha ka Jehofa,’ go swana le moapostola yo.—1 Bakor. 1:31.

Mafokodi a Utegilego

Ba bangwe ba ka ba le mafokodi ao ba sa a lemogego goba ba dika-dikago go amogela gore ba nawo. Ka mohlala, motho a ka ba a ikholofela ka mo go feteletšego e bile a ipota. (1 Bakor. 10:12) Bofokodi bjo bongwe bjoo bo tlwaelegilego bathong ba sa phethagalago ke kganyogo ya bophagamo.

Joaba, yo a ilego a ba molaodi wa madira a Kgoši Dafida, o be a e-na le sebete, bokgoni bja go dira diphetho gotee le bja go kgona go rarolla mathata. Lega go le bjalo, Joaba o be a e-na le molato wa go hloka boitshwaro mo gogolo moo go bontšhitšego moya wa boikgodišo le wa go nyaka maemo. O ile a bolaya balaodi ba babedi ba madira ga sehlogo. Sa pele o ile a itefeletša ka go bolaya Abenere. Ka morago, Joaba o ile a itira tše nkego o dumediša motswala’gwe Amasa gomme a mo swara maledu eka o nyaka go mo atla ke moka a mo hlaba ka tšhoša yeo e bego e le ka seatleng sa gagwe sa le letshadi. (2 Sam. 17:25; 20:8-10) Joaba o be a tšeetšwe legato ke Amasa bjalo ka molaodi wa madira gomme o ile a diriša sebaka se go bolaya mophenkgišani wa gagwe, mohlomongwe ka kholofelo ya gore o be a tla hlongwa gape bjalo ka molaodi wa madira. O ka bona gore Joaba o ile a palelwa ke go laola ditshekamelo tša gagwe, go akaretša le go rata maemo ga ga gagwe ga boithati. O dirile dilo tše sehlogo e bile a sa itshole. Ge Kgoši Dafida a be a le kgaufsi le go hwa, o ile a laela morwa wa gagwe Solomone gore a kgonthišetše gore go lefetšwa bobe bja Joaba.—1 Dikx. 2:5, 6, 29-35.

Ruri ga se ra swanela go ineela dikganyogong tša rena tšeo di fošagetšego; re ka laola mafokodi a rena. Sa pele re swanetše go a lemoga le go amogela gore re nawo. Ke moka re ka gata mogato wa go a fenya. Re ka rapela Jehofa ka mehla, ra mo kgopela thušo ya gore re fenye mafokodi ao, gomme re bale Lentšu la gagwe ka mafolofolo le go nyaka ditsela tša go lwantšha ditshekamelo tšeo. (Baheb. 4:12) Re ka swanelwa ke go dula re katana le mafokodi a rena gomme ga se ra swanelwa go nyamišwa ke seo. Go katana ga rena go ka ba gwa tšwela pele bophelong bja rena ka moka bja ge re se ra phethagala. Paulo o ile a lemoga se ka yena ka noši, moo a ilego a ba a ngwala gore: “Seo ke se dumago, ga ke se dire tlwaelo; eupša seo ke se hloilego ke sona seo ke se dirago.” Lega go le bjalo, bjalo ka ge o lemoga, Paulo ga se a ka a ineela mafokoding, moo e kego ditiro tša gagwe di be di le ka kua ga matla a gagwe ka mo go feletšego. Ka mo go fapanego, o ile a tšwela pele a katana le mafokodi a gagwe, a ithekgile ka thušo ya Modimo ka Jesu Kriste. (Baroma 7:15-25) Lebakeng le lengwe, Paulo o ile a re: “Ke tula mmele wa-ka gomme ka o laola bjalo ka lekgoba, gore e se re ka  morago ga ge ke boletše go ba bangwe, nna ka tla ka se amogelege ka tsela e itšego.”—1 Bakor. 9:27.

Batho gantši ba a itokafatša. Re ka lwantšha seo ka go hlagolela pono ya Jehofa, re dira ka go dumelelana le keletšo ya Paulo go Bakriste e rego: “Hlaswang se kgopo, le kgomarele go se bolo.” (Baroma 12:9) Ntweng ya rena ya go lwantšha mafokodi a rena, go nyakega gore re be le potego, boikemišetšo le boitayo. Dafida o ile a kgopela Jehofa gore: “Lekola ’phsiô tša-ka le pelo ya-ka.” (Ps. 26:2) O be a tseba gore Modimo a ka hlahloba ka mo go nepagetšego ditshekamelo tša rena tše di tseneletšego gomme a re thuša ge go nyakega. Ge re arabela tlhahlong yeo Jehofa a re fago yona ka Lentšu la gagwe le ka moya wa gagwe o mokgethwa, re ka tšwela pele go fihlela re fenya mafokodi a rena.

Ba bangwe ba ka tshwenywa ke mathata ao ba naganago gore ba ka se kgone go lebeletšana le ona ba nnoši. Bagolo ba phuthego ruri ba ka nea thušo e lerato gotee le kgothatšo. (Jes. 32:1, 2) Eupša ke gabohlale go ba le ditebelelo tše di kwagalago. Mathata a mangwe a ka se rarollwe ka mo go feletšego tshepedišong ya gona bjale ya dilo. Lega go le bjalo, ba bantši ba ithutile go lebeletšana le ona gomme seo se ba thušitše go phela maphelo a kgotsofatšago.

Kgonthišetšo ya go Thekgwa ke Jehofa

Go sa šetšwe gore re lebeletšane le mathata afe dinakong tše tše thata, re ka kgodišega gore Jehofa o tla re hlahla a ba a re matlafatša. Beibele e re eletša ka gore: “Ka baka leo, ikokobetšeng tlase ga seatla se matla sa Modimo, gore a le godiše nakong e swanetšego; ge le dutše le lahlela dipelaelo tša lena ka moka go yena, gobane o a le hlokomela.”—1 Pet. 5:6, 7.

Ge Kathy, yo a nago le nywaga e mentši a hlankela Bethele, a be a lemoga gore monna wa gagwe o na le bolwetši bja go fokola ga bjoko (Alzheimer), o ile a ikwa a ka se kgone go lebeletšana le mathata ao a letšego ka pele. O ile a swanelwa ke go dula a lopa Jehofa gore a mo fe bohlale le go mo matlafatša maikwelong ka mehla. Ge boemo bja monna wa gagwe bo be bo phuhlama ganyenyane-ganyenyane, bana babo rena ka lerato ba ile ba dira maiteko a go ithuta go lebeletšana le bolwetši bjoo gomme dikgaetšedi tše nago le tlhokomelo di ile tša nea thekgo maikwelong. Bakriste ba e be e le karolo ya thekgo e matlafatšago yeo e newago ke Jehofa, gomme  Kathy o ile a kgona go hlokomela monna wa gagwe go ba go fihla lehung la gagwe moo e ka bago nywaga e 11 ka morago. O re: “Ke lebogile Jehofa ka megokgo le ka pelo ka moka bakeng sa thušo ya gagwe ka moka; e nthušitše go tšwela pele ka bophelo. Ke be ke sa tsebe gore go be go kgonega go tšwela pele ke dira seo se nyakegago go nna ka nako e telele ka mokgwa wo le ge ke be ke lapile kudu!”

Thušo ya go Fenya Mafokodi a Utegilego

Ge batho ba ikwa ba sa swanelege, ba ka nagana gore Jehofa a ka se theetše ge ba kgopela thušo ge ba le mathateng. Ka gona e tloga e le mo gobotse go nagana ka seo Dafida a ilego a se bolela ge a be a itshola ka baka la sebe se segolo seo a bego a se dirile le Batseba ge a be a re: “Pelo xe e rôbêxile, xe e setlêxile, Wene Modimo O ka se e nyatše.” (Ps. 51:17) Dafida o be a itshola e le ka kgonthe, gomme o be a tseba gore o be a ka batamela Modimo e bile o be a dumela gore a ka mo gaugela. Jesu o bonagatša tlhokomelo ya Jehofa. Mongwadi wa Ebangedi Mateo o dirišitše mantšu a Jesaya go Jesu ge a re: “Ga go lehlaka le le thinyegilego le a tlago go le robaganya, gomme ga go thapo ya lebone ya lodi yeo e kunyelelago yeo a tlago go e tima.” (Mat. 12:20; Jes. 42:3) Ge a be a le mo lefaseng, Jesu o ile a bontšha kwelobohloko go batho ba tlasana le ba gateletšwego. Ga se a ka a tima tlhasenyana ya mafelelo ya bophelo ya motho yo a bego a le bjalo ka thapo ya lebone ya lodi yeo e kunyelelago. Go e na le moo, ka botho o ile a thuša bao ba bego ba tlaišega e le gore a tsošološe kgabo ya bophelo ka go bona. Yeo ke tsela yeo a bego a le ka yona ge a be a le mo lefaseng. Na ga o dumele gore Jesu o sa dutše a le ka wona mokgwa woo le gore o kgona go go kwela bohloko ge o fokola? Ela hloko gore Baheberu 4:15 e bontšha gore ke Yo a ka re ‘kwelago bohloko bofokoding bja rena.’

Ge a be a ngwala ka “mootlwa nameng” ya gagwe, Paulo o ile a lemoga gore matla a Kriste a be a le godimo ga gagwe “bjalo ka tente.” (2 Bakor. 12:7-9) O ile a kwa tšhireletšo ya Modimo ka Kriste, go fo swana le ge motho yo a lego ka tenteng a ikwa a šireletšegile boemong bjo bo sa kgahlišego bja leratadima. Go swana le Paulo, ga se ra swanela go ineela mafokoding le mathateng a rena. Gore re dule re tiile moyeng, re ka diriša ditokišetšo ka moka tšeo Jehofa a re fago tšona ka phuthego ya gagwe ya lefaseng. Re ka dira sohle seo re ka se kgonago bjalo ka batho ke moka ra retologela go Jehofa ka kgodišego e tletšego ya gore o tla hlahla dikgato tša rena. Ge re bona kamoo matla a Modimo a re thušago ka gona mafokoding a rena, re tla kgona go bolela go swana le Paulo gore: “Ge ke fokola, ke gona ke lego matla.”—2 Bakor. 12:10.

[Seswantšho go letlakala 3]

Paulo o ile a dula a rapela Jehofa gore a mo hlahle ge a phethagatša bodiredi bja gagwe

[Seswantšho go letlakala 5]

Kgoši Dafida o ile nea Joaba boikarabelo go tša bohlabani

[Seswantšho go letlakala 5]

Joaba o ile a ikgakanya gore a bolaye mophenkišani wa gagwe Amasa

[Seswantšho go letlakala 6]

Bagolo ba nea tlhahlo e lerato ya Mangwalo yeo e ka re thušago go lebeletšana le mathata a rena