Na Jesu o be a Bolela ka Mollo wa Dihele?

BA BANGWE bao ba dumelago thutong ya mollo wa dihele ba e thea mantšung a Jesu ao a begilwego go Mareka 9:48 (goba go ditemana 44, 46). O boletše ka diboko tšeo di sa hwego le mollo wo o sa timego. Ge e ba yo mongwe a be a ka go botšiša mabapi le seo se bolelwago ke mantšu ao, o be o ka mo araba bjang?

Go ithekgile ka phetolelo ya Beibele yeo e šomišwago, motho a ka bala temana 44, 46, goba 48 ka baka la gore ditemana tše di a swana diphetolelong tše dingwe. * New World Translation e balega ka tsela ye: “Ge e ba leihlo la gago le go kgopiša, le lahlele kgole; go kaone gore o tsene mmušong wa Modimo o le moihlwe, go e na le gore o lahlelwe Gehenna o e-na le mahlo a mabedi, moo seboko sa bona se sa hwego gomme mollo wa gona o sa tingwego.”—Mar. 9:47, 48.

Maemong le ge e le afe, ba bangwe ba dumela gore mantšu a Jesu a thekga taba ya gore ka morago ga lehu, meoya ya batho ba kgopo e tlaišwa ka mo go sa felego. Ka mohlala, tlhaloso yeo e lego ka go Sagrada Biblia ya Sepaniši ya Yunibesithi ya Navarre e bolela gore: “Morena wa rena o diriša [mantšu a] go šupa tlhokofatšong ya dihele. Gantši ‘seboko se se sa hwego’ se hlaloswa e le bohloko bjo bo sa felego bjo bo kwewago ke bao ba lego diheleng; gomme ‘mollo wo o sa tingwego,’ e le go hlokofatšwa mmeleng.”

Lega go le bjalo, bapetša mantšu a Jesu le temana ya mafelelo ya boporofeta bja Jesaya. * Na ga go molaleng gore Jesu o be a šupa go temana yeo e lego go Jesaya kgaolo 66? Moporofeta moo gabotse o be a bolela ka go tšwa “Jerusalema go ya tikologong ya Moeding wa Hinomi (Gehenna), moo dihlabelo tša batho di kilego tša dirwa gona (Jer 7:31) moo go ilego gwa feleletša go fetogile lefelo la motse la go lahlela ditlakala.” (The Jerome Biblical Commentary) Go molaleng gore papišo yeo e dirišitšwego go Jesaya 66:24 ga e bolele ka go hlokofatšwa ga batho; e bolela ka ditopo tša batho. Ga e šupe go batho bao ba phelago goba meoya yeo e sa hwego—e šupa go diboko e le tšeo di sa hwego. Ka gona, ke’ng seo se bolelwago ke mantšu a Jesu?

Ela hloko kamoo puku ya Khatholika ya El evangelio de Marcos e hlalosago Mareka 9:48. Análisis lingüístico y comentario exegético, Bolumo II, e re: “Polelwana [ye] e tšerwe go Jesaya (66,24). Moporofeta moo o bontšha ditsela tše pedi tšeo ka tšona ditopo tša batho gantši di bego di fedišwa: go bola le go fišwa . . . Go tswalanywa ga diboko le mollo temaneng ye go gatelela kgopolo ya tshenyego. . . . Mekgwa ye e mebedi ya go fediša e hlaloswa e le ya sa ruri (‘ga e time, ga e hwe’): ga go na tsela ya go e phema. Papišong ye, go phologa diboko le mollo feela—e sego motho—le gona ka moka ga tšona di fediša selo le ge e le sefe seo se welago go tšona. Ka gona, ye ga se tlhaloso ya tlhokofatšo ya ka mo go sa felego, eupša ke e nngwe ya phedišo ya sa ruri, yeo e swanago le lehu la sa ruri ka ge e šitiša tsogo go direga. Ka gona, [mollo] ke papišo ya phedišo ya sa ruri.”

Yo mongwe le yo mongwe yo a tsebago gore Modimo wa therešo o lerato e bile o lokile a ka kgona go bona kamoo go kwagalago ka gona le kamoo go kwešišegago go bona mantšu a Jesu ka tsela yeo. O be a sa bolele gore bakgopo ba tla lebetšana le tlhokofatšo ya ka mo go sa felego. Go e-na le moo, ba kotsing ya go fedišetšwa sa ruri ba se na kholofelo ya tsogo.

[Mengwalo ya tlase]