Tharollo e Bohlale

MASOGANA a mararo a Bogareng bja Afrika a be a nyaka go ya kopanong ya selete yeo e bego e tla swarelwa nageng ya gabo ona. A be a tla fihla bjang moo? E be e le bokgole bjo e nyakilego go ba bja dikhilomithara tše 90 tseleng ya go ba le dikoti-koti, ya lerole le gona a be a se na senamelwa. A ile a dira phetho ya go adima dipaesekele tše tharo, eupša a ile a palelwa ke go hwetša tša maleba.

Mogolo yo mongwe phuthegong ya lefelong leo o ile a bona bothata bja masogana a gomme a a adima paesekele ya gagwe—e be e le ya kgale eupša e sa le boemong bjo bobotse. O ile a hlalosa kamoo yena le ba bangwe ba bego ba itokiša ka gona ge ba be ba e-ya kopanong. Mogolo yo o ile a šišinya gore masogana a a diriše paesekele e tee ka boraro bja ona. Ke tharollo e bonolo eupša e hlohlago. Se se be se ka kgonega bjang?

Gore ba se ke ba fišwa ke letšatši, bana babo rena ba bafsa ba ile ba kopana e sa le mesong kudu gomme ba nametša merwalo ya bona godimo ga paesekele. Wa pele o be a ragela paesekele a sepelela pele gomme ba bangwe ba babedi ba mo šala morago ba sepediša. Ka morago ga mo e ka bago dimithara tše 500, yo a bego a ragela paesekele o be a ema gomme a thekga paesekele yeo e rwelego morwalo mohlareng. Go ba gona, o be a e-ba šedi gore o tlogela paesekele moo ba bangwe ba bego ba ka e bona gore e se ke ya utswa ke motho. Wa mathomo yo a bego a ragela paesekele o be a tšwela pele ka leeto a sepela ka maoto.

Ge ba bangwe ba babedi ba be ba fihlile mo paesekele e lego gona, yo mongwe o be a e ragela gomme yo mongwe a tšwela pele ka go sepela dimithara tše dingwe gape tše 500 goba go feta moo pele a ka ragela paesekele. Ka gona ka baka la peakanyo e botse le maikemišetšo, ka boraro bja bona ba be ba kgona go fokotša leeto la bona la go sepela ka maoto ka dikhilomithara tše 90 go ya go tše ka bago tše 60. Maiteko a bona a bile le mohola kudu. Ba ile ba bokana le bana babo bona ba Bakriste kopanong gomme ba ipshina ka mokete wa dijo tša moya. (Doit. 31:12) Lenyaga, na o tla dira sohle seo o ka se kgonago gore o be gona kopanong ya selete yeo e swarelwago nageng ya geno?