Lentšu la Jehofa le a Phela

Dintlha tše Kgolo go tšwa Mangwalong a Bakorinthe

MOAPOSTOLA PAULO o tshwenyegile kudu ka boemo bja moya bja phuthego ya Korinthe. O kwele gore go na le diphapano magareng ga bana babo ba moo. Ba be ba kgotlelela boitshwaro bjo bo gobogilego. Le gona phuthego e ngwaletše Paulo lengwalo, e botšiša ka ditaba tše itšego. Ka gona mo e ka bago ka 55 C.E., ge a be a le Efeso nakong ya leeto la gagwe la boraro la boromiwa, Paulo o ngwala la mathomo la mangwalo a gagwe a mabedi a yago go Bakorinthe.

Lengwalo la bobedi, leo go bonagalago le ngwadilwe dikgwedi tše sego kae ka morago ga go ngwalwa ga la mathomo, le tšwetša la mathomo pele. Ka ge maemo a ka gare le a ka ntle a phuthego ya Korinthe ya lekgolong la pele la nywaga a swana ka ditsela tše dintši le a mehleng yeno, molaetša wa lengwalo la Paulo le le yago go Bakorinthe o tla re hola kudu.—Baheb. 4:12.

‘DULANG LE PHAKGAME, EMANG LE TIILE, TIANG MATLA’

(1 Bakor. 1:1–16:24)

Paulo o kgothatša ka gore: “Ka moka le bolele ka go dumelelana.” (1 Bakor. 1:10) Ga go ‘na motheo o mongwe ge e se Jesu Kriste,’ woo dika tša Bokriste di agilwego go yena. (1 Bakor. 3:11-13) Paulo o boletše mabapi le seotswa ka phuthegong gore: “Tlošang yo kgopo gare ga lena.” (1 Bakor. 5:13) O re: “Mmele ga se wa bootswa, eupša ke wa Morena.”—1 Bakor. 6:13.

Ge a nea karabo ya “dilo tšeo [ba] ngwadilego ka tšona,” Paulo o nea keletšo e kwagalago mabapi le lenyalo gotee le go se be lenyalong. (1 Bakor. 7:1) Ka morago ga go bolela ka bohlogo bja Bokriste, thulaganyo dibokeng tša Bokriste, le ka goba ga kgonthe ga tsogo, Paulo o nea temošo e rego: “Dulang le phakgame, emang le tiile tumelong, tšwelang pele le dira senna, tiang matla.”—1 Bakor. 16:13.

Dipotšišo tša Mangwalo di a Arabja:

1:21​—Na ruri Jehofa o diriša “bošilo” go phološa bao ba dumelago? Aowa, ga a dire bjalo. Lega go le bjalo, ka ge “lefase ka bohlale bja lona le se la tseba Modimo,” seo a se dirišago go phološa batho lefase le se bona e le bošilo.—Joh. 17:25.

5:5​—Ke’ng seo se bolelwago ke go ‘gafela motho yo kgopo Sathane gore go senyege nama, e le gore moya o phološwe’? Ge modiri wa sebe se segolo yo a sa itsholego a kgaolwa ka phuthego, o ba karolo ya lefase le kgopo la Sathane gape. (1 Joh. 5:19)  Ka baka leo, go bolelwa ka yena e le yo a gafelwago Sathane. Go rakwa ga motho go feleletša ka go senya, goba go tloša, tutuetšo e mpe ka phuthegong le ka go bolokwa ga moya wa yona, goba mokgwa o tutuetšago.—2 Tim. 4:22.

7:33, 34​—Ke’ng seo se bolelwago ke “dilo tša lefase” tšeo monna yo a nyetšego goba mosadi yo a nyetšwego a di belaelelago? Paulo o bolela ka dilo tše di tlwaelegilego bophelong tšeo Bakriste ba lego lenyalong ba swanetšego go tshwenyega ka tšona. Dilo tše di akaretša dijo, diaparo, le ngwako, eupša ga di akaretše dilo tše mpe tša lefase le, tšeo Bakriste ba di phemago.—1 Joh. 2:15-17.

11:26​—Lehu la Jesu le swanetše go gopolwa ‘ga kae,’ le gona go “fihlela” neng? Paulo o be a sa re gore lehu la Jesu le be le tla gopolwa gantši. Lentšu la Segerika leo le dirišitšwego e le “nako le nako” le bolela gore “ka nako le ge e le efe” goba “nako e nngwe le e nngwe ge go.” Ka go rialo, Paulo o be a e-ra gore nako le nako ge Bakriste ba tloditšwego ba e-ja diswantšhetšo tša Segopotšo, ga tee ka ngwaga, e lego ka Nisani 14, ba “tsebatša lehu la Morena.” Ba dira se “go fihlela a fihla,” e lego go fihlela a ba amogela legodimong ka go ba tsoša.—1 Bathes. 4:14-17.

13:13​—Ke ka tsela efe lerato le fetago tumelo le kholofelo? Ge “dilo tše di holofetšwego” di phethagala gomme “tebelelo e kgonthišeditšwego” e kgotsofatšwa, tumelo le kholofelo di a fela. (Baheb. 11:1) Lerato le feta tumelo le kholofelo ka gore le ba gona ka mo go sa felego.

15:29​—Ke’ng seo se bolelwago ke go ba bao ba “kolobeletšwago gore e be bahu”? Paulo o be a sa šišinye gore batho bao ba phelago ba kolobetšwe legatong la bao ba hwilego ba se ba kolobetšwa. Paulo mo o bolela ka go inelwa ga Bakriste ba tloditšwego tseleng ya bophelo yeo go yona ba botegago go fihla lehung leo le latelwago ke go tsošetšwa bophelong bja moya.

Seo re Ithutago Sona:

1:26-31; 3:3-9; 4:7. Go ikgantšha ka Jehofa ka boikokobetšo, e sego go ikgantšha ka rena, go dira gore go be le botee ka phuthegong.

2:3-5. Ge a be a nea bohlatse Korinthe, e lego mothopo wa filosofi ya Gerika le thuto ya gona, Paulo a ka ba a be a tshwenyega ka ge e ba a ka kgona go kgodiša batheetši ba gagwe. Lega go le bjalo, ga se a ka a dumelela bofokodi goba poifo le ge e le efe yeo a ka bego a be a e-na le yona e šitišana le go phethagatša ga gagwe bodiredi bjoo a bego a bo filwe ke Modimo. Ka mo go swanago, ga se ra swanela go dumelela maemo a tlwaelegilego a re thibela go tsebatša ditaba tše dibotse tša Mmušo wa Modimo. Re ka lebelela ka kgodišego gore Jehofa o tla re thuša go swana le ge Paulo a dirile.

2:16. Go ba le “monagano wa Kriste” ke go tseba tsela yeo a naganago ka yona, go nagana go swana le yena, go kwešiša semelo sa gagwe ka mo go feletšego, le go ekiša mohlala wa gagwe. (1 Pet. 2:21; 4:1) Go bohlokwa gakaakang gore re ithute ka bophelo bja Jesu le bodiredi bja gagwe ka kelohloko!

3:10-15; 4:17. Re swanetše go hlahloba le go kaonefatša bokgoni bja rena bja go ruta le go dira barutiwa. (Mat. 28:19, 20) Ge re sa rute gabotse, morutwana wa rena a ka no se fenye diteko tša tumelo, e bile re ka lahlegelwa gabohloko moo e lego gore go phologa ga rena e tla ba “bjalo ka ge eka [ke go] phologa mollong.”

6:18. Go ‘tšhaba bootswa’ ga se go phema feela ditiro tša por·neiʹa eupša gape ke go phema diswantšho tše di kgothaletšago bootswa, go šilafala boitshwarong, dikgopolo tša bootswa, le go bapala ka lerato—dilo ka moka tšeo di ka lebišago bootsweng.—Mat. 5:28; Jak. 3:17

7:29. Balekane ba lenyalo ba swanetše go ela hloko gore ba se ke ba šetšana kudu moo e lego gore dikgahlego tša Mmušo di tla boemong bja bobedi maphelong a bona.

10:8-11. Jehofa o ile a rumolwa kudu ke ge Baisiraele ba be ba ngongoregela Moše le Arone. Re ba bohlale ge re itiša malebana le mohuta le ge e le ofe wa go ngongorega.

16:2. Go neela ka tšhelete bakeng sa go tšwetša pele dikgahlego tša Mmušo go tla dula go dirwa ge e ba go rulaganywa e sa le pele le gona go dirwa ka lenaneo.

 ‘TŠWELANG PELE LE BUŠETŠWA TSELENG’

(2 Bakor. 1:1–13:14)

Paulo o botša Bakorinthe gore ba swanetše go ‘lebalela ka botho gomme ba homotše’ modira-bobe yo a itsholago yo bego a kgalemetšwe. Gaešita le ge lengwalo la gagwe la mathomo le ile la ba nyamiša, Paulo o bontšha lethabo ka gobane ba ile ba “nyama wa gore [ba] itshole.”—2 Bakor. 2:6, 7; 7:8, 9.

‘Bjalo ka ge ba atelwa ke se sengwe le se sengwe,’ Paulo o kgothaletša Bakorinthe gore ba ‘atiše go nea.’ Ka morago ga go araba baganetši, o nea bohle keletšo ya mafelelo e rego: “Tšwelang pele le thaba, le bušetšwa tseleng, le homotšega, le nagana ka go dumelelana, le phela ka khutšo.”—2 Bakor. 8:7; 13:11.

Dipotšišo tša Mangwalo di a Arabja:

2:15, 16​—Ke bjang re lego “monkgo o mobose wa Kriste”? Go bjalo ka gobane re kgomarela Beibele e bile re tšea karolo go abjeng ga molaetša wa yona. Gaešita le ge “monkgo” o bjalo e ka ba o šišimišago bathong ba sa lokago, ke monkgo o mobose go Jehofa le bathong ba dipelo tše di botegago.

5:16​—Ke bjang Bakriste ba tloditšwego ba sa “[tsebego] motho go ya ka nama”? Ga ba lebelele batho go ya ka pono ya nama, ke gore, go bontšha kgethollo go ithekgilwe ka lehumo, mmala wa motho, goba morafo goba gore ke wa setšhaba sefe. Seo se lego bohlokwa go bona ke tswalano ya bona ya moya le badumedi-gotee.

11:1, 16; 12:11​—Na Paulo o be a swere Bakorinthe ka tsela e se nago teka-tekano? Aowa, ga go bjalo. Lega go le bjalo, a ka ba a ile a bonagala a ikgantšha go ba bangwe e bile a se na teka-tekano ka baka la seo a bego a gapeletšega go se bolela e le ge a emela boapostola bja gagwe.

12:1-4​—Ke mang yo ‘a ilego a išwa paradeiseng’? Ka ge Beibele e sa bolele ka motho le ge e le ofe yo mongwe yo a ilego a ba le pono e swanago le yeo e bile temana ye e e-tla ka morago ga temana yeo e bolelago ka go emelela ga Paulo boapostola bja gagwe, go bonagala a be a bolela ka phihlelo ya gagwe ka noši. Seo moapostola a se bonego ponong e ka ba e be e le paradeise ya moya yeo e thabelwago ke phuthego ya Bokriste ‘lebakeng la bofelo.’—Dan. 12:4.

Seo re Ithutago Sona:

3:5. Ge e le gabotse, temana ye e re botša gore Jehofa ka mo go swanetšego o diriša Lentšu la gagwe, moya wa gagwe, le karolo ya lefaseng ya mokgatlo wa gagwe go dira gore Bakriste ba swanelegele bodiredi. (Joh. 16:7; 2 Tim. 3:16, 17) Re dira gabotse ge ka mafolofolo re ithuta Beibele le dikgatišo tše di theilwego Beibeleng, re rapelela moya o mokgethwa ka go phegelela, le ge re e-ba gona dibokeng tša Bokriste ka mehla le go tšea karolo go tšona.—Ps. 1:1-3; Luka 11:10-13; Baheb. 10:24, 25.

4:16. Ka ge Jehofa a mpshafatša ‘motho yo re lego yena ka gare letšatši le letšatši,’ re swanetše go ikgafa ka mehla bakeng sa ditokišetšo tša Jehofa, re se ke ra dumelela letšatši le feta ntle le go šetša dilo tša moya.

4:17, 18. Go gopola gore ‘tlaišego ke ya nakwana e bile e bohwefo’ go ka re thuša go dula re botegela Jehofa dinakong tša mathata.

5:1-5. Paulo o hlalosa gabotse gakaakang maikwelo a Bakriste ba tloditšwego a kholofelo ya bona ya bophelo bja legodimong!

10:13. Bjalo ka molao o akaretšago, ka ntle le ge go dirilwe dithulaganyo tše itšego tša gore re thuše moo go nyakegago thušo e kgolo, re swanetše go šoma feela tšhemo yeo e abetšwego phuthego ya gabo rena.

13:5. Gore re ‘itekole ge e ba re le tumelong,’ re swanetše go ela boitshwaro bja rena ka go dumelelana le seo re ithutago sona ka Beibeleng. Gore re ‘itlhatsele seo rena ka noši re lego sona,’ re swanetše go ela boemo bja rena bja moya, go akaretša le bogale bja ‘matla a go hlatha’ gotee le bogolo bja mediro ya rena ya tumelo. (Baheb. 5:14; Jak. 1:22-25) Ka go diriša keletšo ya Paulo e kwagalago, re ka tšwela pele re sepela tseleng ya therešo.

[Seswantšho go letlakala 26, 27]

Ke’ng seo se bolelwago ke mantšu a rego “nako le nako ge le e-ja senkgwa se le go nwa senwelo se”?—1 Bakor. 11:26.