Ga o Tsebe Moo e Tlogo Mela!

“Byala peu ya xaxo e sa le bosasa, le ka mantšibua ’atla s’axo se se khutsê; xa O tsebe ye e tl’o xo mela”​—MMO. 11:6.

1. Ke ka baka la’ng go bona megato ya kgolo go thabiša e bile go dira gore re ikokobetše?

MOLEMI o swanetše go se fele pelo. (Jak. 5:7) Ka morago ga go bjala peu, o swanetše go letela gore e hloge le go gola. Ge maemo e le a swanelago, mahlogedi a thoma go tšwelela ganyenyane-ganyenyane gomme a bonagala godimo ga mmu. Ke moka a gola a ba dimela tšeo di tšweletšago diako tša mabele. Molemi mafelelong o na le tšhemo yeo e loketšego go bunwa. Ke mo go thabišago gakaakang go bona mohlolo wo wa kgolo! Le gona, go lemoga Mothopo wa kgolo ye ke mo go kokobetšago e le ruri. Re ka nontšha peu. Re ka thuša ka go e nošetša. Eupša ke Modimo feela yo a ka e godišago.—Bapiša le 1 Bakorinthe 3:6.

2. Jesu o rutile ka dintlha dife mabapi le kgolo ya moya diswantšhong tšeo di ahla-ahlilwego sehlogong se se fetilego?

² Ka ge go boletšwe sehlogong se se fetilego, Jesu o ile a swantšha modiro wa go bolela ka Mmušo le molemi yo a bjalago peu. Jesu o ile a gatelela seswantšhong sa mehuta e fapa-fapanego ya mmu gore gaešita le ge molemi a bjala peu e botse, boemo bja pelo ya motho ke bjona bjoo bo bontšhago ge e ba peu e tla gola ka mo go feletšego goba go se gole. (Mar. 4:3-9) Seswantšhong sa mobjadi yo a robalago, Jesu o ile a gatelela gore molemi ga a kwešiše megato ya kgolo ka mo go feletšego. Se ke ka gobane kgolo e direga ka matla a Modimo, e sego ka maiteko a batho. (Mar. 4:26-29) Anke ga bjale re hlahlobeng diswantšho tše dingwe tše tharo tša Jesu—thoro ya mosetata, komelo le lokwa. *

Seswantšho sa Thoro ya Mosetata

3, 4. Seswantšho sa mosetata se bontšha dintlha dife mabapi le molaetša wa Mmušo?

³ Seswantšho sa thoro ya mosetata, seo le sona se begilwego go Mareka kgaolo 4, se bontšha dilo tše pedi: Sa pele, kgolo e makatšago ya molaetša wa Mmušo; sa bobedi, tšhireletšo yeo e newago bao ba amogelago molaetša. Jesu o itše: “Mmušo wa Modimo re tla o swantšha le eng, goba re tla o hlalosa ka seswantšho sefe? Go swana le thoro ya mosetata, yeo nakong ya ge e be e bjalwa mmung e bego e le e nyenyane-nyenyane go dipeu ka moka tšeo di lego lefaseng—eupša ge e bjetšwe, e a mela ya gola go feta merogo e mengwe ka moka gomme ya tšweletša makala a magolo, mo dinonyana tša legodimo di kgonago go hwetša madulo ka tlase ga moriti wa wona.”—Mar. 4:30-32.

⁴ Mo re hwetša seswantšho sa kgolo ya “Mmušo wa Modimo” se hlatselwa ke go phatlalatšwa ga molaetša wa Mmušo le kgolo ya phuthego ya Bokriste go tloga ka Pentekoste ya 33 C.E. go ya pele. Thoro ya mosetata ke peu e nyenyane yeo e ka swantšhetšago selo se senyenyane kudu. (Bapiša le Luka 17:6.) Lega go  le bjalo, semela sa mosetata se ka feleletša se gotše ka botelele bja dimithara tše tharo go ya go tše hlano, le gona sa ba le makala a tiilego, sa feleletša e le sehlare.—Mat. 13:31, 32.

5. Phuthego ya Bokriste ya lekgolong la pele la nywaga e ile ya gola bjang?

⁵ Kgolo ya phuthego ya Bokriste e thomile ganyenyane ka 33 C.E. ge barutwana ba ka bago ba 120 ba tlotšwa ka moya o mokgethwa. Ka nako e kopana feela, phuthego ye e nyenyane ya barutiwa e ile ya ba le badumedi ba dikete. (Bala Ditiro 2:41; 4:4; 5:28; 6:7; 12:24; 19:20) Ka nywaga-some e meraro, palo ya badiri ba puno e be e oketšegile kudu moo moapostola Paulo a bego a ka botša phuthego ya Bakolose gore ditaba tše dibotse di be di šetše di ‘boletšwe tlholong yohle yeo e lego tlase ga legodimo.’ (Bakol. 1:23) A kgolo e kgahlišago gakaakang!

6, 7. (a) Ke koketšego efe yeo e bilego gona ga e sa le go tloga ka 1914? (b) Ke kgolo efe e nngwe yeo e tlago go direga?

⁶ Ga e sa le go tloga ge Mmušo wa Modimo o hlongwa legodimong ka 1914, makala a “sehlare” sa mosetata a ile a gola go feta ka tsela yeo go bego go letetšwe. Batho ba Modimo ba bone phethagatšo ya kgonthe ya boporofeta bjo bo begilwego ke Jesaya, bjo bo rego: “E monyenyane ó tlo tšwa ba sekete; ’me mmôtlana ó tlo tšwa ’thšaba se matla.” (Jes. 60:22) Sehlopha se senyenyane sa batlotšwa seo se bego se swaragane le modiro wa Mmušo mathomong a lekgolo la bo-20 la nywaga se be se sa tsebe gore ka ngwaga wa 2008, Dihlatse tše ka bago tše dimilione tše šupago di tla ba di tšea karolo modirong wo dinageng tše fetago 230. Ye ruri ke koketšego e makatšago, yeo e ka bapišwago le ya thoro ya mosetata ya seswantšhong sa Jesu!

⁷ Eupša, na kgolo e felela gona moo? Aowa. Mafelelong, balata ba Mmušo wa Modimo ba tla tlala lefase. Baganetši ka moka ba tla ba ba fedišitšwe. Se se ka se direge ka baka la maiteko a batho eupša se tla direga ka baka la gore Morena yo a Phagamego Jehofa a tsena ditaba tša lefase gare. (Bala Daniele 2:34, 35.) Ke moka re tla bona phethagatšo ya mafelelo ya boporofeta bjo bongwe bjo bo begilwego ke Jesaya, bjo bo rego: “Xo tseba Morêna xo tlo tlala ’fase lohle bo-ka meetse xe a nabile lewatleng.”—Jes. 11:9.

8. (a) Dinonyana tša seswantšhong sa Jesu di swantšhetša bomang? (b) Ke’ng seo re šireleditšwego go sona gaešita le gona bjale?

⁸ Jesu o re dinonyana tša legodimo di kgona go hwetša madulo ka tlase ga moriti wa Mmušo wo. Dinonyana tše ga di swantšhetše manaba a Mmušo ao a lekago go ja peu e botse, go fapana le dinonyana tša seswantšhong sa monna yoo a gašago Peu mehuteng e fapanego ya mmu. (Mar. 4:4) Go e na le moo, seswantšhong se dinonyana di swantšhetša batho ba dipelo tše di lokilego bao ba nyakago tšhireletšo ka phuthegong ya Bokriste. Gaešita le gona bjale, batho ba ba šireletšwa mekgweng yeo e ka ba šilafatšago moyeng le mekgweng e sa hlwekago ya lefase le le kgopo. (Bapiša le Jesaya 32:1, 2) Ka mo go swanago, Jehofa o swantšhitše  Mmušo wa Mesia le sehlare gomme a bolela ka tsela ya boporofeta gore: “Ke tlo se šema xodimo xa thaba e telele ya Isiraele, xore lè le moo le hloxê matlakala, le beê dienywa, e tlê e bê sehlare se tsôrô sa morôkwana; mo xo sôna xo tlê xo dulê dinonyana tša mehuta-huta, tša axa moriting wa makala a sôna.”—Hesek. 17:23.

Seswantšho sa Komelo

9, 10. (a) Ke ntlha efe yeo Jesu a ilego a e gatelela seswantšhong sa komelo? (b) Ka Beibeleng, komelo gantši e swantšhetša’ng, gomme re tlo ahla-ahla potšišo efe ya mabapi le go bolela ga Jesu ka komelo?

⁹ Kgolo ka mehla ga se yeo e bonagalago mahlong a batho. Seswantšhong sa gagwe se se latelago, Jesu o ile a gatelela ntlha ye. O re: “Mmušo wa magodimo o swana le komelo, yeo mosadi a e tšerego a e bipa ka gare ga bupi bja tekanyo ya dintlatla tše tharo tše kgolo, go fihla ge tlhama ka moka e betše.” (Mat. 13:33) Komelo ye e swantšhetša’ng, le gona e tswalana bjang le kgolo ya Mmušo?

¹⁰ Ka Beibeleng, komelo gantši e dirišwa bakeng sa go swantšhetša sebe. Moapostola Paulo o ile a bolela ka komelo ka tsela ye ge a be a bolela ka tutuetšo e senyago ya modiradibe ka phuthegong ya bogologolo ya Korinthe. (1 Bakor. 5:6-8) Na ga bjale Jesu o be a diriša komelo go swantšhetša kgolo ya selo se se fošagetšego?

11. Komelo e be e dirišwa bjang Isiraeleng ya bogologolo?

¹¹ Pele re ka araba potšišo yeo, re swanetše go ela hloko dintlha tše tharo tša motheo. Ntlha ya pele, gaešita le ge Jehofa a be a sa dumelele komelo nakong ya monyanya wa paseka, dinakong tše dingwe o be a amogela dihlabelo tšeo di bego di e-na le komelo. Komelo e be e dirišwa dihlabelong tša dileboga tšeo batho ba bego ba di dira, tšeo banei ba tšona ka go rata ba bego ba di direla go leboga Jehofa bakeng sa ditšhegofatšo tša gagwe tše dintši. Dijo tše di be di ba tlišetša lethabo.—Lef. 7:11-15.

12. Re ka ithuta’ng go tšwa tseleng ya Beibele ya go diriša diswantšho?

¹² Ntlha ya bobedi, gaešita le ge ka lehlakoreng le lengwe komelo ye e ka bonala e e-na le kgopolo e fošagetšego ka Mangwalong, ka lehlakoreng le lengwe komelo e ka dirišwa go swantšhetša selo se se lokilego. Ka mohlala, go 1 Petro 5:8, Sathane o swantšhwa le tau, go bontšha gore ka tlhago o kotsi e bile o šoro. Eupša go Kutollo 5:5, Jesu o swantšhwa le tau—“Tau ya moloko wa Juda.” Tabeng e sa tšwago go hlaloswa, tau e dirišwa e le seka sa go ba le sebete go phetha toka.

13. Seswantšho sa Jesu sa komelo se bontšha’ng mabapi le kgolo ya moya?

¹³ Ntlha ya boraro, Jesu seswantšhong sa gagwe ga se a ka a bolela gore komelo e ile ya senya bupi ka moka le go bo dira gore bo se sa hlwa bo ka dirišwa. O be a fo ba a bolela ka tsela e tlwaelegilego ya go dira senkgwa. Mosadi o be a tšhela komelo buping gomme dipoelo e e-ba tše dibotse. Komelo e be e bipša ka bupi bjo bontši. Ka gona, mosadi ga a kgone go bona megato ya go bela ga tlhama. Se se re gopotša ka monna yo a bjalago peu ke moka a robala bošego. Jesu o ile a re “peu ya hloga ya gola, gore bjang [monna] ga a tsebe.” (Mar. 4:27) A tsela e bonolo gakaakang ya go bontšha tšwelopele e sa bonwego ya kgolo ya moya! Re ka no se bone kgolo mathomong, eupša mafelelo a yona a feleletša a bonagala.

14. Ke karolo efe ya modiro wa boboledi yeo e swantšhetšwago ke taba ya gore komelo e bediša tlhama ka moka?

 ¹⁴ Gaešita le ge kgolo ye e sa bonagale mahlong a batho, e direga lefaseng ka bophara. Ye ke ntlha e nngwe yeo e gatelelwago seswantšhong sa komelo. Komelo e bediša tlhama ka moka, e lego “[bupi] bja dintlatla tše tharo tše dikgolo.” (Luka 13:21) Go swana le komelo, modiro wa go bolela ka Mmušo woo o akgofišago kgolo ye ya moya o oketšegile go fihla bokgoleng bjoo e lego gore ga bjale go bolelwa ka Mmušo “go fihla karolong ya kgole ya lefase.” (Dit. 1:8; Mat. 24:14) A tokelo e kgahlišago gakaakang ya go ba karolo ya koketšego ye e kgahlišago ya modiro wa Mmušo!

Lokwa

15, 16. (a) Hlalosa ka boripana seswantšho sa lokwa. (b) Lokwa le swantšhetša’ng, gomme seswantšho se se šupa go karolo efe ya kgolo ya Mmušo?

¹⁵ Selo se bohlokwa kudu go feta palo ya bao ba ipolelago gore ke barutiwa ba Jesu Kriste ke go ba ga kgonthe ga barutiwa. Jesu o šupa go karolo ye ya kgolo ya Mmušo ge a nea seswantšho se sengwe, seo se lego mabapi le lokwa. O itše: “Gape mmušo wa magodimo o swana le lokwa le le gogwago leo le theošeditšwego tlase lewatleng la olela dihlapi tša mehuta ka moka.”—Mat. 13:47.

¹⁶ Lokwa, leo le swantšhetšago modiro wa go bolela ka Mmušo, le olela dihlapi tša mehuta ka moka. Jesu o tšwela pele go bolela gore: “Ge [lokwa] le tletše ba le gogela khwiting ya lewatle, gomme ba dula fase ba kgoboketša tše botse ka dibjaneng, eupša tše di sa swanelegago ba di lahla. Ke kamoo go tlago go ba ka gona bofelong bja tshepedišo ya dilo: barongwa ba tla tšwa gomme ba hlaola ba kgopo go ba lokilego ba ba lahlela sebešong sa mollo. Moo ke mo go tlago go ba le dillo le ditsikitlano tša meno.”—Mat. 13:48-50.

17. Go kgethologanywa mo go boletšwego seswantšhong sa lokwa go šupa lebakeng lefe la nako?

¹⁷ Na go kgethologanya mo go šupa go kahlolo ya mafelelo ya dinku le dipudi yeo Jesu a boletšego gore e be e tla direga ge a fihla ka letago la gagwe? (Mat. 25:31-33) Aowa. Kahlolo yeo ya mafelelo e tla direga ge Jesu a e-tla nakong ya masetlapelo a magolo. Ka mo go fapanego, go kgethologanywa moo go bolelwago seswantšhong sa lokwa go direga nakong ya “bofelo bja tshepedišo ye ya dilo.” * Ye ke nako yeo re phelago go yona ga bjale—matšatši ao a lebišago masetlapelong a magolo. Ka gona, modiro wa go hlaola o direga bjang gona bjale?

18, 19. (a) Modiro wa go kgethologanya o tšwela pele bjang ga bjale? (b) Ba dipelo tše di botegago ba swanetše go gata mogato ofe? (Bona gape le mongwalo wa tlase go letlakala 21.)

¹⁸ Mehleng ya lehono, dihlapi tša seswantšhetšo tše dimilione tšeo di tšwago lewatleng la batho di gogetšwe ka phuthegong ya Jehofa. Ba bangwe ba ba gona segopotšong, ba bangwe ba ba gona dibokeng tša rena e bile ba bangwe  ba thabela go ithuta Beibele. Eupša na batho ba ka moka ba ipontšha e le Bakriste ba kgonthe? Ba ka ‘gogelwa khwiting ya lewatle,’ eupša Jesu o re botša gore ke ‘ba botse’ feela bao ba kgobokeletšwago ka dibjaneng, tšeo di swantšhetšago diphuthego tša Bokriste. Tšeo di sa swanelegego di a lahlwa, gomme mafelelong tša lahlelwa sebešong sa mollo sa seswantšhetšo, seo se swantšhetšago phedišo e tlago.

¹⁹ Go etša dihlapi tše sa swanelegego, ba bantši bao ba kilego ba ithuta Beibele le batho ba Jehofa ba tlogetše go ithuta. Ba bangwe bao ba belegwego ke batswadi ba Bakriste ga se ba ka ba nyaka go ba balatedi ba Jesu. Ba be ba sa nyake go dira phetho ya go hlankela Jehofa goba ka morago ga go mo hlankela ka nakwana ba ile ba tlogela go dira bjalo. * (Hesek. 33:32, 33) Lega go le bjalo, ke mo go swanetšego gore bohle ba dipelo tše botegago ba kgobokeletšwe ka diphuthegong tše di swanago le dibjana pele ga letšatši la mafelelo la kahlolo gomme ba dule ba le lefelong leo la polokego.

20, 21. (a) Ke’ng seo re ithutilego sona ka go hlahloba diswantšho tša Jesu tša mabapi le kgolo? (b) O ikemišeditše go dira’ng?

²⁰ Ka gona, ke’ng seo re ithutilego sona go tšwa tsheka-tshekong ya rena e kopana ya diswantšho tša Jesu tša mabapi le kgolo? Sa pele, go swana le kgolo ya thoro ya mosetata, go bile le kgolo e kgolo kudu ya bao ba kgahlegelago molaetša wa Mmušo mo lefaseng. Ga go selo seo se ka thibelago go phatlalala ga modiro wa Jehofa! (Jes. 54:17) Go oketša moo, tšhireletšo ya moya e ile ya newa bao ba nyakago “madulo ka tlase ga moriti [wa sehlare].” Sa bobedi, ke Modimo yo a godišago. Go swana le ge komelo yeo e bipilwego e bediša tlhama ka moka, kgolo ye ga se ka mehla e bonagalago goba e kwešišegago, eupša e a direga! Sa boraro, ga se bohle bao ba arabetšego bao ba ipontšhitšego e le ba swanelegago. Ba bangwe ba ile ba swana le dihlapi tšeo di sa swanelegego tša seswantšhong sa Jesu.

²¹ Lega go le bjalo, ke mo go kgothatšago gakaakang go bona ba bantši kudu bao ba swanelegago bao Jehofa a ba gogelago go yena! (Joh. 6:44) Se se feleleditše ka koketšego e kgolo dinageng tše dintši. Jehofa Modimo ke yena a retwago bakeng sa kgolo ye ka moka. Ka ge re bona kgolo ye, yo mongwe le yo mongwe wa rena o swanetše go tutueletšega go kwa keletšo yeo e ngwadilwego nywaga-someng e fetilego yeo e rego: “Byala peu ya xaxo e sa le bosasa. . . , xa O tsebe ye e tl’o xo mela; xoba xo tlo mela yeno xoba yela, xoba ka dipedi.”—Mmo. 11:6.

[Mengwalo ya tlase]

O be o tla Araba Bjang?

• Ke’ng seo seswantšho sa Jesu sa mabapi le thoro ya mosetata se re rutago sona ka kgolo ya Mmušo le go šireletšwa moyeng?

• Komelo ya seswantšhong sa Jesu e swantšhetša’ng, gomme ke therešo efe yeo Jesu a e bontšhago ka kgolo ya Mmušo?

• Ke karolo efe ya kgolo ya Mmušo yeo e gatelelwago seswantšhong sa lokwa?

• Ke bjang re ka kgonthišetšago gore re dula re le karolo ya bao ba ‘kgobokeleditšwego ka dibjaneng’?

[Dipotšišo tša Thuto]

[Diswantšho go letlakala 18]

Seswantšho sa thoro ya mosetata se re ruta’ng mabapi le koketšego ya modiro wa Mmušo?

[Seswantšho go letlakala 19]

Ke’ng seo re ithutago sona seswantšhong sa komelo?

[Seswantšho go letlakala 21]

Ke’ng seo se bontšhwago ke go kgethologanywa ga dihlapi tše botse go tše di sa swanelegego?