Go Fenya Ditlhohlo tša Bodiredi bja Ntlo le Ntlo

‘Re ile ra rapa sebete ka Modimo wa rena gore re bolele le lena ditaba tše dibotse tša Modimo ka go katana mo gogolo.’​—1 BATHES. 2:2.

1. Jeremia o ile a lebeletšana le ditlhohlo dife, gomme o kgonne bjang go swaragana le tšona?

JEREMIA e be e le motho yo a nago le maikwelo a go swana le a rena. Ge Jehofa a be a mo tsebiša thomo ya gagwe ya go ba “moporofeta wa dithšaba,” o ile a lla ka gore: “Joo Morêna Mong ’a-ka! Hleng xa ke tsebe xo bolêla ka xe kè sa le ngwana!” Lega go le bjalo, ka ge a bota Jehofa, o ile a amogela kabelo yeo. (Jer. 1:4-10) Ka nywaga e fetago e 40, Jeremia o ile a thulana le go se amogelwe, kganetšo, dikwero, gaešita le go itiwa. (Jer. 20:1, 2) Ka dinako tše dingwe, o be a ikwa a nyaka go bea fase. Lega bo le bjalo, o ile a phegelela go bolela molaetša woo o sa ratwego bathong bao bontši bja bona bo bego bo sa o amogele. Ka matla a Modimo, Jeremia o ile a fihlelela seo yena ka noši a bego a ka se se kgone.—Bala Jeremia 20:7-9.

2, 3. Bahlanka ba Modimo lehono ba lebeletšanago bjang le ditlhohlo tša go swana le tša Jeremia?

² Bahlanka ba bantši ba Modimo lehono ba ka ba ba ikwa go swana le Jeremia. Ge ba bangwe ba rena ba be ba nagana ka taba ya go tlo dira boboledi bja ntlo le ntlo, ba kile ba nagana gore, ‘Seo ke selo se nka se tsogego ke se dirile.’ Lega go le bjalo, ge re be re lemoga gore go bolela ditaba tše dibotse ke thato ya Jehofa, re ile ra fenya kgopolo  yeo gomme ra swarega ka go dira boboledi. Go sa dutše go le bjalo, bontši bja rena re ile ra lebeletšana le maemo ao a ilego a dira gore re thatafalelwe ke go tšwela pele re dira boboledi, bonyenyane ka lebakanyana. Ke therešo gore go thoma go bolela ka ntlo le ntlo le go tšwela pele go ba go fihla bofelong ke tlhohlo.—Mat. 24:13.

³ Go thwe’ng ge e ba o be o dutše o ithuta Beibele le Dihlatse tša Jehofa gomme o e-na le nako o e-ya dibokeng tša phuthego eupša o dika-dika go thoma go dira boboledi bja ntlo le ntlo? Goba go thwe’ng ge e ba o le Hlatse e kolobeditšwego yeo e thatafalelwago ke go tšea karolo modirong wa ntlo le ntlo, gaešita le ge o se na bofokodi bja mmele bjo bo go thibelago go dira bjalo? Kgodišega gore batho ba ditlogo ka moka ba fenya ditlhohlo tša bodiredi bja ntlo le ntlo. Ka thušo ya Jehofa, le wena o ka kgona.

Go Rapa Sebete

4. Ke’ng seo se kgontšhitšego moapostola Paulo go bolela ditaba tše dibotse ka sebete?

⁴ Ka ntle le pelaelo o lemoga gore modiro wa boboledi wa lefase ka bophara o dirwa ka moya wa Modimo, e sego ka matla goba bohlale bja batho. (Sak. 4:6) Go bjalo le ka bodiredi bja Mokriste yo mongwe le yo mongwe. (2 Bakor. 4:7) Ela hloko moapostola Paulo. Ge a gopola nakong ya ge yena le moromiwa-gotee le yena ba be ba swerwe gampe ke baganetši, o ile a ngwala gore: “E [itše] ge re tlaišegile gomme ra tlontlollwa . . . re le Filipi, re [ile] ra rapa sebete ka Modimo wa rena gore re bolele le lena ditaba tše dibotse tša Modimo ka go katana mo gogolo.” (1 Bathes. 2:2; Dit. 16:22-24) Re ka no se nagane gore mogoeledi yo mafolofolo bjalo ka Paulo o ile a ba le dinako tšeo a bego a thatafalelwa ke go dira boboledi. Lega go le bjalo, go swana le rena ka moka, Paulo o ile a swanelwa ke go ithekga ka Jehofa e le gore a ka bolela ditaba tše dibotse ka sebete. (Bala Baefeso 6:18-20.) Re ka ekiša mohlala wa Paulo bjang?

5. Tsela e nngwe yeo ka yona re ka rapago sebete sa go dira boboledi ke efe?

⁵ Tsela e nngwe yeo re rapago sebete sa go dira boboledi ka yona ke ka thapelo. Mmulamadibogo yo mongwe o itše: “Ke rapelela gore ke bolele ka kgodišego, ke rapelela gore ke kgone go fihlelela dipelo tša batho, e bile ke rapelela gore ke hwetše lethabo bodireding. Goba gona, modiro wo ke wa Jehofa, e sego wa rena, ka gona ga go na seo re ka se dirago ntle le thušo ya gagwe.” (1 Bathes. 5:17) Ka moka ga rena re swanetše re rapelela gore moya o mokgethwa wa Modimo o re thuše go dira boboledi ka sebete.—Luka 11:9-13.

6, 7. (a) Hesekiele o ile a bona pono efe, gomme e be e bolela’ng? (b) Ke thušo efe yeo pono ya Hesekiele e e neago bahlanka ba Modimo lehono?

⁶ Puku ya Hesekiele e utolla selo se sengwe seo se ka re thušago go bolela ka sebete. Ponong, Jehofa o ile a neela Hesekiele lengwalo la go phuthwa leo le ngwadilwego ka mo le ka mo, leo le nago le “tša dillô le tša diphêxêlô le tša mahlomola” gomme a mmotša gore a le je, a re: “Ngwan’a motho, metša lengwalô leo ke Xo neilexo lôna, le Xo tlalê ka teng.” Ke’ng seo se bego se bolelwa ke pono ye? Hesekiele o be a swanetše go kwešiša ka mo go feletšego molaetša woo a bego a swanetše go o bolela. O be o swanetše go ba karolo ya gagwe, gomme o kgome maikwelo a gagwe a ka gare-gare. Moporofeta o tšwela pele a anega ka gore: “Ka le ja, ka kwa lè le bose bo-ka nose ka xanong.” Go bolela molaetša wa Modimo phatlalatša e be e le mo go thabišago—go swana le todi e bose ya dinose—go Hesekiele. O ile a bona e le tokelo e kgolo go emela Jehofa gotee le go phetha kabelo ya gagwe yeo a e filwego ke Modimo, gaešita le ge seo se be se bolela gore o be a swanetše go iša molaetša o matla bathong bao ba sa o amogelego.—Bala Hesekiele 2:8–3:4, 7-9.

⁷ Pono ye e na le thuto e bohlokwa bakeng sa bahlanka ba Modimo lehono. Le rena re swanetše go bolela molaetša o matla bathong bao ba sa tšeelego maiteko a rena godimo ka mehla. Gore re dule re bona bodiredi bja Bokriste e le tokelo e tšwago go Modimo, re swanetše go hwetša phepo ya moya. Mekgwa ya go ithuta ka go fo kga ka godimo goba ya go senya hlegere ga se ya lekana go ka re dira gore re monye Lentšu la Modimo ka mo go tletšego. Na o ka kaonefatša mohola wa mmalo wa gago wa Beibele le thuto ya gago ya Beibele gotee le go dira bjalo ka mehla? Na o ka naganišiša kgafetša-kgafetša ka seo o ithutago sona?—Ps. 1:2, 3.

 Go Thoma Dipoledišano tša Beibele

8. Ke mokgwa ofe woo o thušitšego bagoeledi ba bangwe ba Mmušo go thoma dipoledišano tša Beibele bodireding bja ntlo le ntlo?

⁸ Bagoeledi ba bantši ba thatafalelwa kudu ke go thoma poledišano le mong wa ntlo ge ba le bodireding bja ntlo le ntlo. Ke therešo gore go thoma dipoledišano mafelong a mangwe ke tlhohlo. Bagoeledi ba bangwe ba thabela go bolela le motho mojako ge e ba ba thoma thero ya bona ka mantšu a sego kae ao a kgethilwego gabotse ke moka ba nea mong wa ntlo pampišana, bjalo ka ge go bontšhitšwe lepokising leo le sepelago le sehlogo se. Sehlogo sa pampišana goba seswantšho sa yona sa mebalabala se ka goga tlhokomelo ya mong wa ntlo, gomme seo se re kgontšha go bolela ka bokopana morero wa ketelo ya rena gotee le go rotoša potšišo. Mokgwa o mongwe wa go swana le wo ke wa go bontšha mong wa ntlo dipampišana tše tharo goba tše nne tše di fapa-fapanego le go mo kgopela gore a kgethe yeo e mo kgahlago. Ke therešo gore pakane ya rena ga se go fo sepediša dipampišana goba go di diriša ntlong e nngwe le e nngwe eupša ke go thoma dipoledišano tša Beibele tšeo di lebišago thutong ya Beibele.

9. Ke ka baka la’ng go lokišetša gabotse go le bohlokwa?

⁹ Go sa šetšwe gore o diriša mokgwa ofe, go lokišetša gabotse go tla go thuša go thekga ditho le go ba mafolofolo bodireding bja ntlo le ntlo. Mmulamadibogo yo mongwe o boletše gore: “Ke thaba kudu ge ke lokišeditše. Go dira gore ke  nyake go bea thero ya-ka.” Mmulamadibogo yo mongwe yena o re, “Ge ke itlwaelanya le dikgatišo tšeo ke tlago go di sepediša, ke ba le mafolofolo a go di diriša.” Gaešita le ge go hlahloba ka setu seo o tlago go se bolela go e-na le mohola, ba bantši ba lemoga gore go itlwaetša thero ka go hlaboša go ba thuša kudu. Go dira bjalo go ba thuša go nea Jehofa se sekaone-kaone.—Bakol. 3:23; 2 Tim. 2:15.

10. Ke’ng seo se ka dirwago go dira gore diboka tša tirelo ya tšhemo e be tše šomago le tše holago?

¹⁰ Diboka tše di šomago tša tirelo ya tšhemo di kgatha tema go direng gore re be ba atlegago le ba thabilego bodireding bja ntlo le ntlo. Ge e ba temana ya letšatši e bolela tlwaa ka modiro wa boboledi, e ka balwa le go ahla-ahlwa ka boripana. Lega bo le bjalo, ngwanabo rena yo a swerego seboka sa tirelo ya tšhemo o swanetše go tšea nako e lekanego a ahla-ahla goba a dira pontšho e kopana ya thero yeo e swanelago tšhemo ya gabo goba a ahla-ahla tsebišo e nngwe e šomago yeo e ka dirišwago bodireding letšatšing leo. Se se tla hlama ka mo go oketšegilego bao ba lego gona gore ba nee bohlatse ka tsela e atlegago. Ka go lokišetša gabotse e sa le pele, bagolo le ba bangwe bao ba swarago diboka tše ba ka fihlelela se gotee le go phetha seboka ka nako yeo se e beetšwego.—Baroma 12:8.

Matla a go Theetša

11, 12. Go theetša ka kwelobohloko go ka re thuša bjang go fihlelela batho ka ditaba tše dibotse? Nea mehlala.

¹¹ Ga re thušwe feela ke go lokišetša gabotse eupša go kgahlegela batho ka mo go tseneletšego le gona go re thuša go thoma dipoledišano tša Beibele le go fihlelela dipelo tša batho bodireding. Tsela e nngwe yeo re bontšhago kgahlego e bjalo ka yona ke ka tsela yeo re theetšago ka yona. Molebeledi wa mosepedi o boletše gore: “Go se fele pelo le go bontšha gore re ikemišeditše go theetša batho go na le matla a makatšago a go gogela e bile ke pontšho e kgahlišago kudu ya go kgahlegela batho ka tsela e borutho.” Go theetša ka kwelobohloko e ka ba senotlelo sa go bula pelo ya mong wa ntlo, bjalo ka ge phihlelo e latelago e bontšha.

¹² Lengwalong leo le gatišitšwego kuranteng ya Le Progrès, ya kua Saint-Étienne, Fora, mosadi yo mongwe o hlalositše ketelo ya batho ba babedi bao ba ilego ba kokota mojakong wa gagwe kapejana ka morago ga go lahlegelwa ke morwedi’agwe wa dikgwedi tše tharo ka lehu. O ngwadile gore: “Gatee-tee ke ile ka lemoga gore ke Dihlatse tša Jehofa. Ke be ke ikemišeditše go ba raka ka botho, eupša ke ile ka lemoga poroutšha yeo ba bego ba e sepediša. E be e le mabapi le lebaka leo ka lona Modimo a dumelelago tlaišego. Ka gona ke ile ka phetha ka gore ke ba dumelele go tsena eupša ka maikemišetšo a go ganetša dipolelo tša bona. . . . Dihlatse di ile tša dula lebaka la ka godingwana ga iri. Ba ile ba ntheetša ka kwelobohloko e kgolo, gomme ge ba be ba sepela, ke ile ka ikwa ke le kaone kudu moo ke ilego ka ba ka dumela gore ba etele gape.” (Baroma 12:15) Ge nako e dutše e e-ya, mosadi yo o ile a amogela thuto ya Beibele. Go a bonagala gore seo mosadi yo a se gopolago ka ketelo yeo ya mathomo ga se seo dikgaetšedi di ilego tša se bolela, eupša ke kamoo di ilego tša mo theetša ka gona.

13. Re ka dumelelanya bjang thero ya rena ya ditaba tše dibotse le batho bao re kopanago le bona?

¹³ Ge re theetša ka kwelobohloko, ge e le gabotse re dumelela batho go re botša lebaka la bona la go nyaka Mmušo. Se se re bea boemong bjo bobotse bja go bolela ditaba tše dibotse le bona. O ka ba o lemogile gore bagoeledi ba atlegago gantši ke batheetši ba babotse. (Die. 20:5) Ba bontšha go kgahlegela ka kgonthe batho bao ba kopanago le bona bodireding. Ga ba šetše feela maina a bona le diaterese tša bona eupša gape ba šetša le dilo tšeo ba di kgahlegelago le dinyakwa tša bona. Ge motho yo mongwe a bontšha go tshwenyega ka selo se itšego, ba dira nyakišišo gomme ba boela go yena kapejana go yo boledišana le yena ka seo ba se hweditšego. Go swana le moapostola Paulo, ba dumelelanya thero ya bona ya molaetša wa Mmušo le batho bao ba kopanago le bona. (Bala 1 Bakorinthe 9:19-23.) Go kgahlegela batho mo go bjalo ga kgonthe go gogela batho ditabeng tše dibotse e bile go bontšha “lešoko le botho la Modimo wa rena” ka tsela e kgahlišago.—Luka 1:78.

 Boloka Boemo bjo bo Nepagetšego bja Kgopolo

14. Ge re phetha bodiredi bja rena, re ka bontšha bjang dika tša Jehofa?

¹⁴ Jehofa o re file seriti ka go re fa tokologo ya boikgethelo. Gaešita le ge e le Modimo Ramatla-ohle, ga a gapeletše motho go mo hlankela eupša ka lerato o ipiletša bathong, e bile o šegofatša bao ba arabelago ka tebogo ditokišetšong tša gagwe tše di kgahlišago. (Baroma 2:4) Bjalo ka badiredi ba gagwe, re swanetše go itokišeletša go bolela ditaba tše dibotse ka tsela e bontšhago gore Modimo wa rena ke yo kgaugelo nako le nako ge re nea bohlatse. (2 Bakor. 5:20, 21; 6:3-6) Gore re dire bjalo, re swanetše go dula re e-na le boemo bjo bobotse bja kgopolo ka batho ba lego tšhemong ya gabo rena. Ke’ng seo se ka re thušago go lebeletšana le tlhohlo ye?

15. (a) Jesu o ile a laela barutiwa ba gagwe gore ba dire’ng ge batho ba sa amogele molaetša? (b) Ke’ng seo se ka re thušago go lebiša tlhokomelo go tsomeng batho bao ba swanelegago?

¹⁵ Jesu o ile a laela balatedi ba gagwe gore ba se ke ba tshwenyega kudu ge ba bangwe ba sa amogele molaetša eupša go e na le moo ba lebiše tlhokomelo go tsomeng bao ba swanelegago. (Bala Mateo 10:11-15.) Go ipeela dipakane tše nyenyane le tšeo di fihlelelegago go ka re thuša go dira bjalo. Ngwanabo rena yo mongwe o itshwantšha le mo-tsoma-matlotlo. Moano wa gagwe ke o rego, “Ke lebeletše pele go yo hwetša gauta lehono.” Ngwanabo rena yo mongwe gape o na le pakane ya “go kopana le motho yo a nago le kgahlego beke e nngwe le e nngwe le go boela go yena go yo hlagolela kgahlego ka morago ga matšatši a sego kae.” Bagoeledi ba bangwe ba katanela go abelana bonyenyane lengwalo letee le mong wa ntlo yo mongwe le yo mongwe ge e ba go kgonega. Ke pakane efe e kwagalago yeo o ka ipeelago yona?

16. Re na le mabaka afe a go tšwela pele re dira boboledi?

¹⁶ Go atlega ga bodiredi bja ntlo le ntlo ga se gwa ithekga kudu ka karabelo ya batho tšhemong. Ke therešo gore modiro wa boboledi o kgatha tema e kgolo go phologeng ga batho ba dipelo tše di botegago, eupša gape o na le merero e mengwe e bohlokwa. Bodiredi bja Bokriste bo re nea sebaka sa go bonagatša lerato leo re ratago Jehofa ka lona. (1 Joh. 5:3) Bo re kgontšha go phema go ba le molato wa madi. (Dit. 20:26, 27) Bo nea batho ba sa boifego Modimo temošo ya gore “nako ya kahlolo ya [Modimo] e fihlile.” (Kut. 14:6, 7) Godimo ga tšeo ka moka, ka boboledi bja ditaba tše dibotse, leina la Jehofa le retwa lefaseng ka moka. (Ps. 113:3) Ka baka leo, go sa šetšwe gore batho ba a theetša goba ga ba theetše, re swanetše go tšwela pele re bolela molaetša wa Mmušo. Ee, maiteko a rena ka moka a go bolela ditaba tše dibotse ke a bohlokwa mahlong a Jehofa.—Baroma 10:13-15.

17. Batho kgaufsinyana ba tla gapeletšega go lemoga’ng?

¹⁷ Gaešita le ge ba bantši lehono ba sa tšeele modiro wa rena wa boboledi godimo, go se go ye kae ba tla o bona ka leihlo le le fapanego. (Mat. 24:37-39) Jehofa o ile a kgonthišetša Hesekiele gore ge dikahlolo tšeo a bego a di bolela di phethagala, Baisiraele ba marabele ba be ba tla ‘tseba gobane ba be ba na le moporofeta.’ (Hesek. 2:5) Ka mo go swanago, ge Modimo a phethagatša dikahlolo tša gagwe malebana le tshepedišo ya gona bjale ya dilo, batho ba tla gapeletšega go lemoga gore molaetša woo Dihlatse tša Jehofa di bego di o bolela phatlalatša le ka ntlo le ntlo o be o e-tšwa go Modimo, Jehofa, le gore Dihlatse di be di hlankela bjalo ka baemedi ba gagwe e le ka kgonthe. Re na le tokelo e kgolo gakaakang ya go rwala leina la gagwe le go tsebatša molaetša wa gagwe mo dinakong tše tše thata! Ka matla a gagwe, anke re tšweleng pele re fenya ditlhohlo tša bodiredi bja ntlo le ntlo.

O be o tla Araba Bjang?

• Re ka rapa bjang sebete sa go dira boboledi?

• Ke’ng seo se ka re thušago go thoma dipoledišano tša Beibele bodireding bja ntlo le ntlo?

• Re ka bontšha bjang gore re kgahlegela batho e le ka kgonthe?

• Ke’ng seo se ka re thušago go dula re e-na le boemo bjo bobotse bja kgopolo ka batho ba lego tšhemong ya gabo rena?

[Dipotšišo tša Thuto]

[Lepokisi/​Seswantšho go letlakala 9]

Tsela e Nngwe ya go Thoma Dipoledišano tša Beibele

Mathomo:

▪ Ka morago ga go dumediša mong wa ntlo, o ka mo nea pampišana gomme wa re, “Morero wa ketelo ya-ka lehono ke go boledišana le wena ka taba ye e bohlokwa yeo e kgothatšago.”

▪ Goba o ka mo nea pampišana gomme wa re, “Ke go etetše ka gonyenyane lehono ka gobane ke rata go tseba gore o ikwa bjang ka taba ye.”

Ge e ba pampišana e amogelwa:

▪ Ntle le go khutša nako e teletšana, botšiša potšišo e bonolo yeo e theilwego sehlogong sa pampišana, yeo e nyakago pono ya gagwe.

▪ Theetša ka kelohloko, ka go nyaka go kwešiša dipono tša mong wa ntlo. Leboga ditlhaloso tša gagwe.

Go tšwetša pele poledišano:

▪ Bala o be a ahla-ahle lengwalo letee goba go feta moo, o dumelelanya thero ya gago le dikgahlego tša mong wa ntlo gotee le dinyakwa tša gagwe.

▪ Moo go bontšhwago kgahlego, sepediša kgatišo gomme o bontšhe kamoo thuto ya Beibele e swarwago ka gona ge e ba go kgonega. Rulaganya leeto la go boela.