Hlagolela Ditebelelo tše di Kwagalago Gomme o Thabe

“KE PALETŠWE gape!” Ke gakae o bolela mantšu a swanago le ao, ka baka la gore o paletšwe ke go phetha seo o se rerilego? Mma wa Mokriste a ka bolela mantšu a swanago le ao ka gobane a imelwa ke tlhokomelo yeo leseanyana la gagwe le e nyakago leboelela gomme a ba tlalelong ka ge a sa kgone go šetša dilo tša moya. Mokriste yo mongwe a ka ikwa a sa kgone go dira dilo ka botlalo ka baka la tsela yeo a godišitšwego ka yona gomme a nagana gore ga a dire dilo ka botlalo ka phuthegong. Hlatse yeo e tšofetšego e ka ikwa e nyamile ka gobane e sa kgone go tšea karolo ka botlalo medirong ya Bokriste yeo e bego e e thabela ge e be e sa na le matla le mafolofolo. Christiane yo boemo bja lapa la gagwe bo mo paledišago go direla Jehofa ka mo a ka kgonago ka gona o re: “Ka nako e nngwe polelo yeo e kgothaletšago batho go tsenela bobulamadibogo e dira gore ke lle.”

Re ka lwantšha maikwelo a bjalo bjang? Bakriste ba bangwe ba kgonne bjang go hlagolela go ba le pono e nepagetšego ka maemo a bona? Mehola ya go ba le ditebelelo tše di leka-lekanego ke efe?

E ba yo a Leka-lekanego

Moapostola Paulo o re nea senotlelo sa go boloka lethabo la rena ge a re: “Ka mehla thabang Moreneng. Ke tla buša ke re, Thabang! Anke go leka-lekana ga lena go tsebje bathong bohle.” (Bafil. 4:4, 5) E le gore re be le lethabo le kgotsofalo tirelong ya rena go Modimo, re swanetše go hlagolela go ba le ditebelelo tše di leka-lekanego mabapi le bokgoni bja rena le maemo. Ge e ba re katanela go fihlelela dipakane tše sa kwagalego go sa šetšwe gore re dira boikgafo bjo bokaakang, re ipea ka tlase ga kgatelelo e sa nyakegego. Ka lehlakoreng le lengwe, re swanetše go ela hloko gore ga re tšwafe kudu, ra diriša mafokodi a rena ka mo go feteletšego e le lebaka la go se be mafolofolo bodireding bja Bokriste.

Go sa šetšwe maemo a rena, Jehofa o nyaka gore re mo nee tše kaone—re mo direle ka moya le pelo ya rena ka moka. (Bakol. 3:23, 24) Ge e ba re ka se nee Jehofa sohle seo re ka se kgonago, re tla ba re sa phelele boineelo bja rena go yena. (Baroma 12:1) Go tlaleletša moo, re tla itima kgotsofalo e tseneletšego, lethabo la kgonthe le ditšhegofatšo tše dingwe tše di humilego tšeo di tlišwago ke go mo direla ka moya ka moka.—Die. 10:22.

Polelwana yeo ka Beibeleng e fetoletšwego e le ‘go leka-lekana’ e na le kgopolo ya go ba yoo a naganelago. Ka go lebanya, e hlaloswa e le “go itumelelanya le maemo.” (Jak. 3:17) Polelwana ye e bile e na le kgopolo ya go se be yo a gatelelago. Ka gona, ge e ba re le ba leka-lekanego, re tla kgona go lebelela maemo a rena ka teka-tekano. Na go thata go dira seo? Go ba bangwe go bjalo, le ge ba ka ba ba kgona go naganela ba bangwe. Ka mohlala, ge mogwera wa paale a bontšha dika tša gore o lapile kudu ka baka la gore o be a  dira dilo tše dintši, na re ka se leke go mo thuša gore a bone bohlale bja gore a dire diphetogo tše itšego bophelong bja gagwe? Ka mo go swanago, re swanetše go ithuta go lemoga dika tšeo di ka re lemošago ge re feteletša dilo.—Die. 11:17.

Ge e ba re godišitšwe ke batswadi bao ba nyakago go gontši go rena e ka ba tlhohlo go ba le pono e leka-lekanego ka mafokodi a rena. Ba bangwe ge e be e sa le ba banyenyane ba be ba nagana gore ba swanetše go šoma ka thata goba go dira gakaone e le gore ba hwetše lerato la batswadi ba bona. Ge e ba go be go le bjalo ka rena, re ka ba le kgopolo e fošagetšego mabapi le tsela yeo Jehofa a re lebelelago ka yona. Jehofa o re ratela mokgwa woo re mo direlago ka wona, e lego ka pelo e feletšego. Lentšu la Modimo le re kgonthišetša gore Jehofa “ó tseba lebopô le re lexo ka lôna, xa a lebale xe re le lerole.” (Ps. 103:14) O tseba mafokodi a rena gomme o a re rata ge re mo direla ka mafolofolo go sa šetšwe mafokodi ao. Go gopola gore Modimo wa rena ga se molaodi yo a gatelelago go tla re thuša go lemoga mafokodi a rena gore re se ke ra letela go gontši go rena.—Mika 6:8.

Lega go le bjalo, ba bangwe ba hwetša go le thata go hlagolela pono e bjalo e leka-lekanego. Ge e ba go le bjalo ka wena, ke ka baka la’ng o sa tsome thušo go Mokriste yo a godilego ka tsebo yo a go tsebago gabotse? (Die. 27:9) Ka mohlala, na o nyaka go hlankela o le mmulamadibogo wa ka mehla? Yeo ke pakane e botse! Na o na le bothata bja go e fihlelela? Mohlomongwe o nyaka thušo gore o nolofatše bophelo bja gago. Goba mogwera wa gago yo o mmotago wa Mokriste a ka boledišana le wena ka taba ya ge e ba boikarabelo bja lapa la gago bo ka dira gore pakane ya go bula madibogo ka mehla e kgonege goba e se kgonege. A ka go thuša go bona ge e ba o ka kgona go phetha mediro e mengwe yeo o nyakago go e dira goba gore ke diphetogo dife tšeo di ka go thušago go oketša tirelo ya gago. Monna le yena o boemong bjo bobotse bja go thuša mosadi wa gagwe go hwetša tsela e kaone ya go kgona go phetha dilo ka go dumelelana le bokgoni bja gagwe. Ka mohlala, a ka šišinya gore a khutše go se nene pele a thoma kgwedi e mpsha yeo a tlago go oketša tirelo ya gagwe ka yona. Se se ka mo matlafatša gomme sa mo thuša go boloka lethabo la gagwe tirelong.

Tsoma Dilo Tšeo o ka di Dirago

Botšofadi goba bolwetši bo ka lekanyetša seo re ka kgonago go se dira tirelong ya Jehofa. Ge e ba o le motswadi, o ka nagana gore o holega ganyenyane ge o dira thuto ya motho ka noši goba ge o le dibokeng tša Bokriste ka baka la gore bontši bja nako ya gago le matla o di dirišetša go hlokomela bana ba gago. Lega go le bjalo, na e ka ba e le gore ka dinako tše dingwe go nagana kudu ka mafokodi a gago go ka go šitiša go bona seo o ka kgonago go se fihlelela?

Nywaga e dikete e fetilego, Molefi yo mongwe o ile a hlalosa kganyogo ya gagwe yeo go bego go le thata go yena go e kgotsofatša. Ngwaga o mongwe le o mongwe o be a e-ba le tokelo ya go hlankela ka tempeleng dibeke tše pedi.  Lega go le bjalo, o ile a hlalosa kganyogo ya gagwe e tseneletšego ya go nyaka go dula ka mehla kgaufsi le aletare. (Ps. 84:1-3) Ke eng seo se ilego sa thuša monna yo a botegago go kgotsofala? O ile a lemoga gore letšatši le tee ka lapeng la tempele e be e le tokelo e kgethegilego kudu. (Ps. 84:4, 5, 10) Ka mo go swanago, go e-na le go nagana kudu ka mafokodi a rena, re swanetše go lemoga le go leboga dilo tšeo re ka kgonago go di dira.

Ka mohlala, ela hloko Nerlande, kgaetšedi wa Mokriste wa kua Canada. O sepela ka setulo sa digole gomme o be a ipona a lekanyeditšwe kudu go seo a bego a ka kgona go se dira bodireding. Lega go le bjalo, o ile a fetoša pono ya gagwe ka go thoma go bona lefelo la kgaufsi la mabenkele e le tšhemo ya gagwe. O hlalosa gore: “Ke dula setulong sa-ka sa digole kgaufsi le panka lefelong leo. Ke thabišwa ke go nea bohlatse bathong bao ba tlago go dula moo gore ba khutše go se nene.” Go tšea karolo mohuteng wo o bohlokwa wa bodiredi go nea Nerlande kgotsofalo e ntši.

Dira Diphetogo ge go Nyakega

Sekepe se ka sesa ka lebelo ka ge moya o butšwetša diseila tša sona. Lega go le bjalo, ge mosesiši a kopana le moya o matla, o gapeletšega go beakanya diseila. Ga a laole moya o matla, eupša ka go dira dipeakanyo, a ka kgona go dula a laola diseila tša sekepe sa gagwe. Ka tsela e swanago, ga se gantši re kgonago go laola maemo a bophelo ao re kopanago le wona a swanago le moya o matla. Eupša re ka kgona go laola matla, monagano le maikwelo a rena go fihla bokgoleng bjoo re ka kgonago. Ge re lemoga maemo a rena a mafsa, re tla thušwa go boloka kgotsofalo ya rena le lethabo tirelong ya Modimo.—Die. 11:2.

Ela hloko mehlala e mmalwa. Ge e ba re e-na le matla a lekanyeditšwego, re ka hwetša e le mo go swanetšego gore ka letšatši la diboka tša Bokriste re efoge mediro e lapišago e le gore re kgone go ba go tšona bošegong bjoo. Se se tla dira gore re holege kudu ge re bokane le Bakriste-gotee le rena. Goba ge e ba mma a sa kgone go tšea karolo modirong wa ntlo le ntlo ka baka la gore ngwana wa gagwe a babja, a ka hwetša e le mo go swanetšego go laleletša kgaetšedi wa Mokriste legaeng la gagwe gore a tšee karolo le yena modirong wa go nea bohlatse ka mogala ge ngwana a sa robetše.

Go thwe’ng ge e ba maemo a gago a sa go dumelele go ithuta e sa le pele dilo tšohle tšeo di tlago go ahla-ahlwa dibokeng tša phuthego? O ka lekanyetša gore ke mošomo o mokaakang woo o swanetšego go o lokišetša, le go o  lokišetša gabotse ka mo go ka kgonegago ka gona. Ka go beakanya dipakane tša rena tša gona bjale, re ka dula re e-na le mafolofolo e bile re thabile.

Go beakanya dipakane tša rena go ka nyaka boikemišetšo le boiteko. Serge le Agnès, banyalani ba kua Fora, ba ile ba swanelwa ke go dira diphetogo tše dikgolo dipakaneng tša bona. Serge o re: “Ge re be re e-kwa gore Agnès o imile, toro ya rena ya go ba baromiwa e ile ya hwelela.” Serge yo ga bjale e lego tatago banenyana ba babedi ba thabilego o hlalosa kamoo yena le mosadi wa gagwe ba ilego ba ipeela pakane e mpsha. O re: “Ka ge re be re ka se kgone go hlankela nageng e šele, re ile ra dira phetho ya gore re be ‘baromiwa’ nageng ya rena. Re ile ra thoma go kopanela le sehlopha se se bolelago leleme le šele.” Na ba ile ba holwa ke go ipeela pakane ye e mpsha? Serge o bega gore: “Re ipona re thuša ka phuthegong kudu.”

Odile, kgaetšedi wa Mokriste wa kua Fora yo a lego nywageng ya gagwe ya bo-70 le yo a swerwego ke bolwetši bjo šoro bja dikhuru, ga a kgone go ema lebaka le letelele. O be a nyamišitšwe ke gore mathata a gagwe a tša maphelo a be a mo palediša go tšea karolo bodireding bja ntlo le ntlo. Lega go le bjalo, ga se a ka a langwa. O ile a beakanya mediro ya gagwe ka go nea bohlatse ka mogala. O re: “Go bonolo e bile go thabiša go feta kamoo ke bego ke nagana ka gona!” Mokgwa wo wa go dira boboledi o ile wa tsošološa mafolofolo a gagwe bodireding.

Ditebelelo tše di Kwagalago di Tliša Ditšhegofatšo

Go hlagolela pono e kwagalago mabapi le seo re ka se dirago go tla re efoša dikgakanego tše ntši. Ka go ipeela dipakane tše di kwagalago, go sa šetšwe mafokodi a rena re tla ikwa re kgonne go di fihlelela. Ka gona, re thabišwa ke seo re ka kgonago go se fihlelela, le ge e le se senyenyane.—Bagal. 6:4.

Ge re hlagolela pono e kwagalago ka seo re ka kgonago go se fihlelela, re tla kgona go naganela Bakriste-gotee le rena kudu. Ka mehla ge re lemoga gore ba na le mafokodi, re tla thabišwa ke seo ba re direlago sona. Ka go bontšha go leboga thušo yeo re e hwetšago, re tlaleletša moyeng wa tirišano le wa kwešišano. (1 Pet. 3:8) Gopola, ka ge Jehofa e le Tate yo lerato, ga a re kgopele selo seo re ka palelwago ke go mo nea sona. Le gona ge re e-na le ditebelelo tše di kwagalago gomme re ipeetše dipakane tše di ka fihlelelegago, mediro ya rena ya moya e tla re tlišetša lethabo le kgotsofalo.

[Ntlhakgolo go letlakala 29]

Gore re hwetše lethabo le kgotsofalo tirelong ya rena go Modimo, re swanetše go hlagolela ditebelelo tšeo di kwagalago go ithekgilwe ka bokgoni bja rena le maemo

[Seswantšho go letlakala 30]

Nerlande o hwetša lethabo ka go dira seo a ka se kgonago bodireding

[Seswantšho go letlakala 31]

Ithute go “beakanya diseila”

[Mothopo]

© Wave Royalty Free/age fotostock

[Seswantšho go letlakala 32]

Serge le Agnès ba ile ba holwa ke go ipeela dipakane tše difsa