Re be re sa Boife​—Jehofa o be a E-na le Rena

Ka ge go anega Egyptia Petridou

Ka 1972, Dihlatse tša Tsipero ka moka di ile tša bokana Nicosia go tlo kwa polelo e kgethegilego ya Nathan H. Knorr, yo a bego a e-na le nywaga e mentši a etelela pele bodiredi bja Dihlatse tša Jehofa. O ile a ntseba di sa tloga fase, gaešita le pele nka hwetša sebaka sa go itsebiša, o ile a mpotšiša gore: “Na o ntshwaretše ditaba tša kua Egipita?” Ke be ke ile ka kopana le Ngwanabo rena Knorr nywaga e 20 pele ga moo toropong ya gešo ya Alexandria, Egipita.

KE BELEGETŠWE Alexandria ka January 23, 1914, gomme ke wa mathomo wa bana ba bane. Re goletše kgaufsi kudu le lewatle. Alexandria ka nako yeo e be e le toropo ya mahlakanasela, yeo e bego e tsebja kudu ka dilo tša yona tša bokgabo le tša histori. Ka ge Mayuropa a be a dirišana le Maarabia, rena bana re ile ra ithuta go bolela Searabia, Seisemane, Sefora le Setaliana, gotee le leleme la gabo rena la Segerika.

Ka morago ga go aloga sekolong, ke ile ka hwetša mošomo lebenkeleng la diaparo la Mafora, moo ke ilego ka thabela go hlama le go roka diaparo tše botse kudu tša basadi ba maemo a godimo setšhabeng. Ke be ke rata bodumedi e bile ke rata go bala Beibele, gaešita le ge ke be ke sa kwešiše bontši bja seo ke bego ke se bala.

Mo e ka bago ka yona nako yeo—nywaga ya magareng ga bo-1930—ke ile ka kopana le lesogana le lebotse, leo le tšwago Tsipero. Theodotos Petrides e be e le sebapadi seo se nago le bokgoni sa papadi ya go kakadipana, eupša gape o ile a ithuta go dira dijo tše bosana e bile a šoma lebenkeleng leo le tumilego la go paka dikuku. Theodotos o ile thoma go nthata, nna lekgarebe la meriri e meso. Gantši o be a nkopelela dikošana tše bosana tša Segerika tša marato a le kgaufsi le lefasetere. Re ile ra nyalana ka June 30, 1940. Tšeo e be e le dinako tše thabišago. Re ile ra dula phapošing yeo e bego e le ka tlasenyana ga ya gešo. Ngwana wa rena wa mathomo e lego John, o ile a belegwa ka 1941.

Go Ithuta Ditherešo tša Beibele

E be e le nako e telele Theodotos a sa kgotsofale ka bodumedi bja rena, e bile o be a botšiša dipotšišo mabapi le Beibele. Dihlatse tša Jehofa di ile tša thoma go ithuta Beibele le yena, nna ke sa tsebe. Ka letšatši le lengwe, ge ke be ke le gae le ngwana wa rena, mosadi yo mongwe o ile a kokota mojakong wa rena gomme a mpha karata e nago le molaetša wa Beibele. E le go bontšha botho, ke ile ka emanyana gomme ka e bala. Ke moka o ile a mpha dikgatišo tšeo di theilwego Beibeleng. Ruri dikgatišo tšeo di be di swana le tšeo Theodotos a bego a tlile le tšona gae!

Ke ile ka re: “Ee, dipuku tše ke natšo. Tsena ka gare hle.” Mo e ka bago ka yona nako yeo, ke ile ka hlaba Hlatse yeo, Eleni Nicolaou, ka dipotšišo. Ka go se fele pelo, o ile a nkaraba a diriša Beibele.  Ke ile ka thabela seo. Gatee-tee, ke ile ka thoma go kwešiša molaetša wa Beibele. Nakong ya ge re be re khutšitše go bolela go se nene, Eleni o ile bona seswantšho sa monna wa-ka. O ile a re: “Monna yo ke a mo tseba!” Sephiri sa Theodotos se be se utologile. Ke ile ka makala. Theo o be a e-ya dibokeng tša Bokriste a nnoši—le go mpotša a sa mpotše! Ge Theodotos a be a boa gae letšatšing leo, ke ile ka mmotša gore: “Moo o bego o ile gona Sontaga sa go feta—ke tlo ya le wena beke ye!”

Sebokeng sa mathomo seo ka go ya go sona, sehlopha sa batho ba lesome se be se ahla-ahla puku ya Beibele ya Mika. Ke ile ka monya sohle seo se bego se bolelwa! Go tloga ka nako yeo go ya pele, George le Katerini Petraki ba be ba re etela mantšiboeng a mangwe le a mangwe a Labohlano go tlo ithuta Beibele le rena. Tate gotee le bontši bja baratho ba-ka ba be ba ganana le taba ya rena ya go ithuta le Dihlatse, eupša ngwanešo o be a se na bothata le seo, gaešita le ge a sa ka a ba Hlatse. Lega go le bjalo, mma o ile a amogela therešo ya Beibele. Ka 1942, mma, Theodotos, gotee le nna re ile ra kolobeletšwa ka lewatleng kua Alexandria e le ge re bontšha boineelo bja rena go Jehofa.

Maphelo a Rena a a Šitišwa

Ka 1939, Ntwa ya II ya lefase e ile ya thoma, gomme ya phatlalala kapejana. Mathomong a bo-1940, Tona ya Madira a Jeremane e lego Erwin Rommel gotee le madira a ditanka ba be ba le motseng wa kgaufsi wa El Alamein, gomme Alexandria e be e tletše ka bahlabani ba bantši ba Mabrithania. Re ile ra kgobela dijo tše dintši tše di omišitšwego. Ke moka Theodotos o ile a kgopelwa gore a ye go hlokomela lebenkele la go paka dikuku la mothwadi wa gagwe leo le lego kua Port Taufiq kgaufsi le Suez, ka go rialo re ile ra hudugela moo. Dihlatse tše pedi tšeo di bolelago Segerika di ile tša thoma go re nyaka. Gaešita le ge ba be ba sa tsebe aterese ya rena, ba ile ba bolela ka ntlo le ntlo go ba go fihlela ba re hwetša.

Ge re be re le Port Taufiq, re ile ra ithuta Beibele le Stavros le Giula Kypraios gotee le bana ba bona, e lego Totos le Georgia, gomme ba ile ba ba bagwera ba rena ba kgaufsi. Stavros o be a thabela go ithuta Beibele kudu moo e lego gore o be a bušetša dišupanako tša ka ngwakong wa gagwe ka moka morago ka iri e le gore re ka šiiwa ke setimela sa mafelelo sa go boela gae gomme ra dula nako e telele. Dipoledišano tša rena di be di fihla bošego kudu.

Re ile ra dula Port Taufiq dikgwedi tše 18, tšeo ka morago ga tšona re ilego ra boela Alexandria ge mma a be a babja. O ile a hwa ka 1947, a botegela Jehofa. Re ile ra bona gape ge Jehofa a re kgothatša a diriša dipoledišano tše di agago tša bagwera bao ba godilego tsebong ba Bakriste. Re ile ra ba ra kgona le go amogela baromiwa bao ba bego ba e-ya dikabelong tša bona tša dinageng dišele ge dikepe tša bona di be di khutša go se nene kua Alexandria.

 Lethabo le Mathata

Ka 1952, ke ile ka belega morwa wa rena wa bobedi e lego James. Bjalo ka batswadi, re ile ra lemoga bohlokwa bja go godišetša barwa ba rena boemong bjoo bo holago moyeng, ka gona re ile ra bula legae la rena bakeng sa thuto ya ka mehla ya Beibele e bile gantši re amogela badiredi ba nako e tletšego. Ka tsela yeo, morwa wa rena yo mogolo, John, o ile a rata therešo ya Beibele, gomme ge a be a sa le magareng ga nywaga ya gagwe ya mahlalagading, o ile a thoma go bula madibogo. Ka nako e swanago, o be a tsena sekolo bošego bakeng sa go phetha dithuto tša gagwe.

Go se go ye kae ka morago ga moo, go ile gwa lemogwa gore Theodotos o na le bolwetši bjo bošoro bja pelo gomme a eletšwa gore a tlogele mošomo wa gagwe. Morwa wa rena James o be a e-na le nywaga e mene feela. Re be re tla dira’ng? Na Jehofa o be a se a re holofetša ka gore: “O se boifê xobane ke na le wene”? (Jes. 41:10) Akanya feela ka go makala le lethabo leo re ilego ra ba le lona ka 1956 ge re be re laleletšwa go hlankela bjalo ka babulamadibogo kua Ismailia, kgaufsi le Suez Canal! Nywaga e latetšego e ile ya ba ya khuduego kua Egipita, gomme bana babo rena ba Bakriste ba be ba nyaka kgothatšo.

Ka 1960 re ile ra swanelwa ke go huduga Egipita yo mongwe le yo mongwe wa rena a swere sutukheisi. Re ile ra hudugela Tsipero, e lego sehlakahlaka sa gabo monna wa-ka. Nakong ye, Theodotos o be a babja kudu e bile a sa kgone go šoma. Lega go le bjalo, ngwanabo rena yo botho wa Mokriste gotee le mosadi wa gagwe ba ile ba re fa lefelo la bodulo legaeng la bona. Ka manyami, nywaga e mebedi ka morago monna wa-ka o ile a hlokofala, gomme a ntlogela ke e-na le James yo monyenyane feela. John, yoo le yena a bego a tlile Tsipero, o be a nyetše gomme a swanetše go hlokomela lapa la gagwe.

Go Hlokomelwa Dinakong tše Thata

Ke moka Stavros le Dora Kairis ba ile ba re fa lefelo la bodulo ka ga bona. Ke ile ka khunama gomme ka leboga Jehofa bakeng sa go hlokomela dinyakwa tša rena gape. (Ps. 145:16) Ge Stavros le Dora ba be ba dira phetho ya go rekiša ntlo ya bona gotee le go aga e mpsha yeo e nago le Holo ya Mmušo lebatong la yona la mathomo, ka botho ba ile ba agela nna le James ngwako wa diphapoši tše pedi.

Mafelelong, James o ile a nyala, gomme yena le mosadi wa gagwe ba ile ba hlankela e le babulamadibogo go ba go fihla ge leitšibulo la bana ba bona ba bane le belegwa. Ka 1974, nywaga e mebedi ka morago ga ketelo e gopolegago ya Ngwanabo rena Knorr, go ile gwa ba le khuduego ya tša dipolitiki  kua Tsipero. * Batho ba bantši, go akaretša le Dihlatse, ba ile ba tšhaba magaeng a bona gomme ba hudugela dinageng tše dingwe. Morwa wa-ka John e bile yo mongwe wa bona. O ile a hudugela Canada le mosadi wa gagwe gotee le bana ba bararo. Lega go le bjalo, ka nako e swanago, re ile ra thabela go bona koketšego palong ya bagoeledi ba Mmušo kua Tsipero.

Ge ke be ke thoma go hwetša tšhelete ya mphiwa-fela, ke ile ka kgona go tšea karolo ka botlalo bodireding. Eupša nywaga e sego kae e fetilego, ke ile ka hwa lehlakore ka gonyenyane gomme ka ya go dula le morwa wa-ka James gotee le lapa la gagwe. Ka morago, ge boemo bja-ka bja tša maphelo bo be bo mpefala, ke ile ka išwa sepetlele dibeke tše mmalwa gomme ka išwa lefelong la go hlokomela batšofadi. Go sa šetšwe bohloko bjo bo bego bo sa fokotšege, ke ile ka nea bohlatse go bašomi ba moo, balwetši gotee le baeng. Ke be ke fetša diiri tše dintši ke ithuta ka noši gomme, ka thušo e botho ya bana bešo ba moya, ke kgona go ba gona Thutong ya Puku ya Phuthego ya kgaufsi.

Khomotšo Botšofading Bja-ka

Ke homotšwa ke go kwa ka bao nna le Theodotos re ilego ra ba le tokelo ya go ba thuša. Bontši bja bana ba bona le ditlogolo tša bona ba bodireding bja nako e tletšego—ba bangwe ba hlankela Australia, Canada, Engelane, Gerika gotee le Switzerland. Lehono, morwa wa-ka John le mosadi wa gagwe ba dula Canada le morwa wa bona. Morwedi wa bona yo mogolo le monna wa gagwe ke babulamadibogo. Morwedi wa bona wa mafelelo le monna wa gagwe, Linda le Joshua Snape, ba ile ba laleletšwa gore ba be gona klaseng ya bo-124 ya Sekolo sa Gilead.

Morwa wa-ka James le mosadi wa gagwe ba dula Jeremane gona bjale. Ba babedi ba barwa ba bona ba hlankela Bethele—yo mongwe o Athene, Gerika, gomme yo mongwe o Selters, Jeremane. Morwa wa bona wa mafelelo, morwedi wa bona le monna wa gagwe ke babulamadibogo gomme ba hlankela kua Jeremane.

Ruri go na le ditaba tše dintši tšeo re tlago go di botša mma gotee le Theodotos wa-ka yo a rategago ge ba tsošitšwe! Ba tla thaba kudu ge ba bona bohwa bjoo ba bo tlogeletšego lapa la bona. *

[Mengwalo ya tlase]

[Ntlhakgolo go letlakala 24]

Re ile ra bona gape ge Jehofa a re kgothatša a diriša dipoledišano tše di agago tša bagwera bao ba godilego tsebong ba Bakriste

[Mmapa go letlakala 24]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

TSIPERO

NICOSIA

LEWATLE LA MEDITERRANEAN

EGIPITA

CAIRO

Alexandria

El Alamein

I smailia

Suez

Port Taufiq

Suez Canal

[Mothopo]

Based on NASA/Visible Earth imagery

[Seswantšho go letlakala 23]

Ke e-na le Theodotos ka 1938

[Seswantšho go letlakala 25]

Morwa wa-ka John le mosadi wa gagwe

[Seswantšho go letlakala 25]

Morwa wa-ka James le mosadi wa gagwe