Go Aloga ga Sehlopha sa Bo-124 sa Gilead

Baromiwa ba Bapetšwa le Ditšie

DIKGWEDING tše dingwe le tše dingwe tše tshelelago, Sekolo sa Beibele sa Watchtower sa Gilead se ba le lenaneo la go aloga leo go lona go laletšwago lapa ka moka la Bethele ya United States. Ka March 8, 2008, baeng ba tšwago dinageng tše fetago tše 30 gotee le lapa la Bethele ba ile ba ba gona ge go be go aloga sehlopha sa bo-124 sa Sekolo sa Gilead. Bohle ba 6 411 bao ba ilego ba ba gona ba ile ba thaba gotee le barutwana letšatšing la bona le le kgethegilego.

Modula-setulo wa lenaneo, Stephen Lett wa Sehlopha se Bušago, o ile a thoma lenaneo ka polelo e rego “Tšwelang Pele Gotee le Ditšie tša Jehofa tša Seswantšhetšo.” Kutollo 9:1-4 e bapetša sehlopha se senyenyane sa Bakriste ba tloditšwego bao ba bilego mafolofolo gape medirong ya moya ka 1919 le bojane bja ditšie bjoo bo thomago modiro gatee-tee. Barutwana ba ile ba gopotšwa gore ka ge e le ditho tša “dinku tše dingwe,” ba ithapa gore ba šome gotee le bojane bjo bja seswantšhetšo bja ditšie.—Joh. 10:16.

Lon Schilling, setho sa Komiti ya Lekala ya United States, o latetše ka polelo e rego “Thušanang.” E be e theilwe mohlaleng wa Beibele wa Akhwila le Perisila (goba, Perisika), banyalani ba Bakriste ba lekgolong la pele la nywaga. (Baroma 16:3, 4) Sehlopha se sa Gilead se be se bopša ke dihlopha tše 28 tša banyalani. Ba ile ba gopotšwa gore ba swanetše go tšwela pele ba matlafatša tlemo ya bona ya lenyalo e le gore ba be baromiwa ba ba atlegago. Ga go moo Beibele e bolelago ka Akhwila e sa bolele ka mosadi wa gagwe, Perisila. Ka baka leo, moapostola Paulo gotee le phuthego ba be ba ba bona e le batee. Ka mo go swanago, banyalani ba baromiwa lehono ba swanetše go šoma gotee, ba rapele gotee, gomme ba swaragane le mathata kabelong ya nageng e šele gotee, ka go rialo ba thušane.—Gen. 2:18.

Polelo e latelago, e nago le sehlogo se se rego “Arabela go Lokeng ga Jehofa,” e ile ya newa ke Guy Pierce wa Sehlopha se Bušago. Ngwanabo rena Pierce o ile a hlalosa gore go ba yo a lokilego go bolela seo se fetago go phema go dira bobe. Motho yo a lokilego o dira dilo tše di lokilego bakeng sa go hola ba bangwe. Jehofa Modimo ke yo a lokilego ka go fetišiša. (Sak. 9:16, 17) Go loka ga Modimo le lerato la gagwe di ka re hlohleletša go direla ba bangwe dilo tše dibotse. A reta barutwana, Ngwanabo rena Pierce o ile a phetha ka gore: “Le be le dira gabotse. Re kgodišegile gore le tla tšwela pele le arabela go lokeng ga Modimo ka go dira gabotse dikabelong le ge e le dife tša nakong e tlago tšeo Jehofa Modimo a le fago tšona.”

Se se latelago, Michael Burnett, yo e kilego ya ba moromiwa yoo ga bjale e lego mohlahli wa Gilead, o ile a nea polelo e nago le sehlogo se se rego “E Rwaleng Bjalo ka Mefapahlogo Diphatleng tša Lena.” Bjalo ka ge eka ba be ba rwele “mefapahlogo” diphatleng tša bona, Baisiraele ba be ba swanetše go dula ba gopola ka mohlolo woo Jehofa a ba diretšego wona Egipita ka go ba  phološa. (Ek. 13:16) Barutwana ba ile ba eletšwa gore ba gopole tlhahlo e ntši yeo ba e hweditšego Sekolong sa Gilead bjalo ka ge eka ba e rwele bjalo ka mefapahlogo diphatleng tša bona. Ngwanabo rena Burnett o ile a gatelela go nyakega ga boikokobetšo le boipoetšo le go diriša melao ya motheo ya Beibele ge go rarollwa phapano le ge e le efe yeo ba ka bago le yona le baromiwa-gotee le bona le batho ba bangwe.—Mat. 5:23, 24.

Mark Noumair, mohlahli wa nako e telele wa Gilead, o file polelo e rego “Go tla Opelwa Koša Efe ka Wena?” Mehleng ya bogologolo, go be go tlwaelegile go keteka diphenyo tša ntwa ka koša. E nngwe ya dikoša tše bjalo e pepentšha moloko wa Rubeni, wa Dani, le wa Ašere e le yeo e itšimeletšago, mola moloko wa Sebulone wona o retwa ka baka la moya wa wona wa boikgafo. (Baa. 5:16-18) Bjalo ka mantšu a koša, mediro ya Mokriste yo mongwe le yo mongwe e feleletša e tsebja ke ba bangwe. Phišego ya motho modirong wa  Modimo gotee le go kgotlelela ga gagwe ka potego thulaganyong ya Modimo di tla dira gore motho a be le pego e botse go Jehofa gomme a be mohlala o mobotse go bana babo. Ge ba bangwe ka phuthegong ba theeditše koša ya seswantšhetšo e opelwago ke mediro ya rena, ba tutueletšega go ekiša mohlala woo o mobotse.

E le karolo ya tlhahlo ya bona ya Gilead, sehlopha sa bo-124 se feditše palo-moka ya diiri tše e ka bago tše 3 000 modirong wa boboledi. Sehlogong se se rego “Go Latela Tlhahlo ya Moya o Mokgethwa,” barutwana ba ile ba laodišetša Sam Roberson wa Lefapha la Dikolo tša Pušo ya Modimo diphihlelo tše mmalwa tšeo ba bilego le tšona tirelong ya tšhemo. Diphihlelo tše tše di kgothatšago di ile tša latelwa ke dipoledišano, tšeo di bego di eteletšwe pele ke Patrick LaFranca wa Komiti ya Lekala la United States, gotee le dialoga tša Gilead tšeo ga bjale di hlankelago dinageng tše fapa-fapanego. Barutwana ba ile ba leboga keletšo e kwagalago yeo ba e hweditšego go bana ba babo rena.

Anthony Morris wa Sehlopha se Bušago o file polelo ya mafelelo e rego, “Gopola, Dilo Tšeo di Bonwago ka Mahlo ke tša Nakwana.” Mangwalo a re eletša gore re lebiše tlhokomelo ditšhegofatšong tša ka moso tše tšwago go Jehofa go e na le go e lebiša ditlaišegong le ge e le dife tšeo re ka bago re lebeletšane le tšona gona bjale. (2 Bakor. 4:16-18) Bodiidi bjo bogolo, go hloka toka, kgatelelo, bolwetši le lehu ke dilo tše di tlwaelegilego tšeo re di bonago lehono. Baromiwa ba ka lebeletšana le tše dingwe tša dilo tše tšeo di nyamišago. Eupša go gopola gore dilo tše ke tša nakwana go tla re thuša go dula re leka-lekane moyeng le go ba le kholofelo.

Lenaneo le ile la fela ge dialoga ka moka di le sethaleng di theeditše mantšu a go phetha a Ngwanabo rena Lett. O ba kgothaleditše gore ba se ke ba langwa gomme a re: “Ga go na sebaka sa go langwa potegong ya rena ge Jehofa a le ka lehlakoreng la rena.” O kgothaleditše baromiwa ba bafsa gore ba swane le ditšie, ba tšwele pele ka tirelo ya Jehofa gomme ba be mafolofolo, ba botege le gore ba kwe go iša ka mo go sa felego.

[Lepokisi go letlakala 30]

DIPALO-PALO TŠA SEHLOPHA

Palo ya dinaga tše di emetšwego: 7

Palo ya dinaga tšeo ba abetšwego go tšona: 16

Palo ya barutwana: 56

Palo-gare ya nywaga: 33.8

Palo-gare ya nywaga therešong: 18.2

Palo-gare ya nywaga bodireding bja nako e tletšego: 13.8

[Seswantšho go letlakala 31]

Sehlopha se se Alogago sa bo-124 sa Sekolo sa Beibele sa Watchtower sa Gilead

Lelokelelong le le lego ka mo tlase, methaladi e balwa go tloga ka pele go ya ka morago gomme maina a lokeleditšwe go tloga ka go le letshadi go ya go le letona mothalading o mongwe le o mongwe.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Seswantšho go letlakala 32]

Sekolo sa Gilead se Lefelong la tša Thuto la Watchtower