Dula o Botega ka Pelo ka Moka

“Ke tla sepela therešong ya gago. Ntire gore ke boife leina la gago ka pelo ka moka.”​—PS. 86:11, NW.

1, 2. (a) Go ya ka Psalme 86:2, 11 (NW), ke’ng seo se ka re thušago go dula re botegela Jehofa ge re lebane le diteko? (b) Potego e tšwago pelong e swanetše go hlagolelwa neng?

KE KA baka la’ng Bakriste ba bangwe bao ba tšwetšego pele ba botega ka nywaga e mentši go sa šetšwe go golegwa goba tlaišo ba feleletša ka go ineela go rateng dilo tše di bonagalago? Karabo e mabapi le pelo ya rena ya seswantšhetšo—seo re lego sona ka gare. Psalme 86 e tswalanya potego le pelo ka moka; e lego pelo e feletšego, e sego go ba pelo-pedi. Mopsalme Dafida o rapetše ka gore: “Anke o šireletše moya wa-ka hle, gobane ke a botega. O Modimo wa-ka. Phološa mohlanka wa gago yo a go botilego.” Dafida o rapetše gape ka gore: “Nthute ditsela tša gago, hle Jehofa. Ke tla sepela therešong ya gago. Ntire gore ke boife leina la gago ka pelo ka moka.”—Ps. 86:2, 11, NW.

² Ge re sa bote Jehofa ka dipelo tša rena ka moka, dilo tše dingwe tšeo re tshwenyegago ka tšona le tšeo re di ratago di tla fokodiša gabonolo potego ya rena go Modimo wa therešo. Dikganyogo tša boithati di bjalo ka dithuthupi tšeo di epetšwego tseleng yeo re sepelago go yona. Gaešita le ge re be re dutše re botegela Jehofa tlase ga maemo a thata, re ka wela melabeng goba mereong ya Sathane. Ruri go bohlokwa gore re hlagolele go bota Jehofa ka pelo ka moka gona bjale, pele re ka lebana le diteko! Beibele e re: “Mo xo  tšohle di dišwaxo, diša pelo y’axo.” (Die. 4:23) Re ka ithuta dithuto tše bohlokwa mabapi le se go tšwa phihlelong ya moporofeta yo a tšwago Juda yo a bego a romilwe ke Jehofa go Kgoši Jerobeama wa Isiraele.

“Ke tlo xo Nea Mphô”

3. Jerobeama o arabetše bjang molaetšeng wa kahlolo woo o boletšwego ke moporofeta wa Modimo?

³ Bona se ka leihlo la kgopolo. Monna wa Modimo o sa tšwa go bolela molaetša o matla go Kgoši Jerobeama, yoo a hlomilego borapedi bja namane mmušong wa Isiraele wa ka leboa wa meloko e lesome. Kgoši e a galefa. E laela banna gore ba sware motseta yoo. Eupša Jehofa o na le mohlanka wa gagwe. Gatee-tee, letsogo leo kgoši e le akgilego e galefile le omelela ka mohlolo, gomme aletare yeo e dirišetšwago borapedi bja maaka e a phušoga ya tšwa diripa tše pedi. Ke moka, boitshwaro bja Jerobeama bo a fetoga. O kgopela monna wa Modimo ka gore: “A k’o fepeletše sefahloxô sa Morêna Modimo wa xaxo, O nthapêlêlê xore letsôxô la-ka le boêlê xo nna.” Moporofeta o a rapela gomme letsogo la kgoši le a fodišwa.—1 Dikx. 13:1-6.

4. (a) Ke ka baka la’ng mpho ya kgoši e ile ya tloga e leka potego ya moporofeta? (b) Moporofeta o ile a arabela bjang?

⁴ Jerobeama o botša monna wa Modimo wa therešo gore: “Tlaa xo nna ka ngwakong, O lapoloxê; ke tlo Xo nea mphô.” (1 Dikx. 13:7) Moporofeta o tla dira’ng? Na o swanetše go amogela taletšo ya kgoši ka morago ga go e botša molaetša wa kahlolo? (Ps. 119:113) Goba na o swanetše go gana taletšo ya kgoši, gaešita le ge kgoši e bonagala e itshola? Ka ntle le pelaelo Jerobeama a ka kgona go fa bagwera ba gagwe dimpho tše dintši tše di bitšago. Ge e ba moporofeta wa Modimo a e-na le kganyogo yeo e utegilego ya go rata dilo tše di bonagalago, gona mpho yeo kgoši e nyakago go mo nea yona go bonala e tla ba teko e kgolo. Lega go le bjalo, Jehofa o laetše moporofeta gore: “O se kê wa ja boxôbê wa nwa meetse; le xôna O se kê wa boa ka tsela ye O yaxo ka yôna.” Ka gona moporofeta o nea karabo ya gagwe e tiilego le e kwagalago e rego: “Le xe O ka nkarolêla ngwakô wa xaxo ka boxare, nka se kê ka ya le wêna ka ja boxôbê felô fá, xoba ka nwa meetse.” Moporofeta o tloga Bethele ka tsela e nngwe. (1 Dikx. 13:8-10) Phetho ya moporofeta e re ruta’ng mabapi le go botega ka pelo ka moka?—Baroma 15:4.

“Kgotsofala”

5. Go rata dilo tše di bonagalago go leka potego ya rena bjang?

⁵ Go rata dilo tše di bonagalago go ka bonagala go sa akaretše taba ya potego, eupša go a e akaretša. Na re bota kholofetšo ya Jehofa ya gore o tla re nea dinyakwa tša rena? (Mat. 6:33; Baheb. 13:5) Go e na le go katana ka mešegofela go hwetša dilo tšeo go thwego ke tše kaone bophelong tšeo ga bjale re ka se kgonego go di fihlelela, na re ka phela ntle le tšona? (Bala Bafilipi 4:11-13.) Na re lekega go gafa ditokelo tša tirelo e le ge re katanela go hwetša seo re se nyakago gona bjale? Na go hlankela Jehofa ka potego go tla pele maphelong a rena? Dikarabo tša rena di tla ithekga kudu ka taba ya ge e ba re hlankela Modimo ka pelo ka moka goba re sa dire bjalo. Moapostola Paulo o ngwadile gore: “Boineelo bjo go Modimo gotee le kgotsofalo ke mokgwa wa go hwetša leruo le legolo. Gobane ga se ra tliša selo lefaseng, le gona re ka se ke ra tloga le selo. Ka gona, ge re e-na le dijo le diaparo re tla kgotsofala ka tšona.”—1 Tim. 6:6-8.

6. Ke dilo dife tšeo go thwego ke dimpho tšeo re kago go di fiwa, gomme ke’ng seo se ka re thušago go bona ge e ba re swanetše go di amogela?

⁶ Ka mohlala, mothwadi wa rena a ka re nea sebaka sa go hlatlošwa mošomong seo se nago le mogolo o mokaone le mehola e mengwe. Goba mohlomongwe re lemoga gore re ka hwetša meputso e megolo ya tša ditšhelete ge re ka hudugela nageng e nngwe goba lefelong le lengwe gomme ra hwetša mošomo. Mathomong dibaka tše bjalo di ka bonagala e le tšhegofatšo e tšwago go Jehofa. Eupša pele re dira phetho, na ga se ra swanela go hlahloba maikemišetšo a rena? Potšišo e kgolo yeo re swanetšego go ipotšiša yona ke e rego, “Phetho ya-ka e tla kgoma bjang tswalano ya-ka le Jehofa?”

7. Ke ka baka la’ng go le bohlokwa go tumola dikganyogo tša go rata dilo tše di bonagalago ka medu?

⁷ Tshepedišo ya Sathane e tšwela pele e godiša moya wa go rata dilo tše di bonagalago. (Bala  1 Johane 2:15, 16.) Boikemišetšo bja Diabolo ke go senya dipelo tša rena. Ka baka leo, re swanetše go dula re phafogile e le gore re kgone go lemoga dikganyogo tša go rata dilo tše di bonagalago le go di tumola ka medu dipelong tša rena. (Kut. 3:15-17) Jesu ga se a ka a thatafalelwa ke go gana mebušo ka moka ya lefase yeo Sathane a bego a mo fa yona. (Mat. 4:8-10) O lemošitše ka gore: “Dulang le butše mahlo le itišitše kgahlanong le mohuta o mongwe le o mongwe wa go duma tša ba bangwe, gobane gaešita le ge motho a atetšwe ke dilo, fela bophelo bja gagwe ga bo tlišwe ke dilo tše a nago le tšona.” (Luka 12:15) Potego e tla re thuša go ithekga ka Jehofa go e na le go ithekga ka rena ka noši.

Moporofeta wa Mokgalabje “ó be a mo Fora”

8. Potego ya moporofeta wa Modimo e ile ya lekwa bjang?

⁸ Dilo di ka ba di ile tša sepelela moporofeta wa Modimo gabotse ge nkabe a ile a tšwela pele a sepela leetong la gagwe la boela gae. Lega go le bjalo, mo e nyakilego go ba ka yona nako yeo, o ile a lebana le teko e nngwe. Beibele e re: “Xôna-moo Bethele xo be xo axile moporofeta e mongwê wa mokxalabye. Barwa ba xaxwe ba tla ba mmotša” tšohle tšeo di diregilego pejana letšatšing leo. Ka morago ga go kwa pego yeo, mokgalabje o ba kgopela gore ba mo lokišetše pokolo e le gore a ka hwetša moporofeta wa Modimo tseleng. Go se go ye kae, o hwetša moporofeta a dutše tlase ga sehlare se segolo gomme o re: “Tlaa O yê le nna ka xaê, O jê boxôbê.” Ge monna wa Modimo wa therešo a gana taletšo yeo, mokgalabje o araba ka gore: “Le nna ke moporofeta byalo ka wêna. Nna Morongwa wa Modimo ó ntaetše à romilwe ke Morêna a re: Mo xomišê, a tlê naxô’ lapeng la xaxo, a jê boxôbê a nwê meetse.” Eupša Mangwalo a re: “Ó be a mo fora.”—1 Dikx. 13:11-18.

9. Mangwalo a re’ng ka baradia, gona ba gobatša bomang?

⁹ Go sa šetšwe gore maikemišetšo a moporofeta wa mokgalabje e be e le afe, o boletše maaka. Mohlomongwe mokgalabje o kile a ba moporofeta yo a botegago wa Jehofa. Lega go le bjalo, mo nakong ye o be a e-na le boradia. Mangwalo a tloga a sa thekge boitshwaro bjo bjalo. (Bala Diema 3:32.) Baradia ga ba ikgobatše moyeng ba le noši eupša gantši ba gobatša le ba bangwe.

“A Xoma” le Mokgalabje

10. Moporofeta wa Modimo o arabetše bjang taletšong ya mokgalabje, gona ka mafelelo afe?

¹⁰ Moporofeta yo a tšwago Juda nkabe a ile a kgona go lemoga boradia bja moporofeta wa mokgalabje. Nkabe a ile a ipotšiša gore, ‘Ke ka baka la’ng Jehofa a be a ka romela morongwa wa gagwe go motho yo mongwe gore a nnee ditaelo tše difsa mabapi le seo ke swanetšego go se dira?’ Moporofeta a ka ba a ile a kgopela Jehofa gore a mo hlahle, eupša Mangwalo ga a bontšhe gore o  ile a dira bjalo. Go e na le moo, o ile “a xoma [le mokgalabje], ba tla, a ja boxôbê lapeng le monna eo, a nwa meetse.” Jehofa ga se a thabela seo. Mafelelong ge moporofeta yo a forilwego a wela tsela ya go boela Juda, o ile a gahlana le tau gomme ya mmolaya. A mafelelo a nyamišago gakaakang a modiro wa gagwe wa boporofeta!—1 Dikx. 13:19-25. *

11. Ahia o beile mohlala ofe o mobotse?

¹¹ Ka lehlakoreng le lengwe, moporofeta Ahia, yo a ilego a romelwa go yo tlotša Jerobeama gore a be kgoši, o ile a dula a botega go ba go fihla botšofading bja gagwe. Ge Ahia a be a tšofetše e bile e le sefofu, Jerobeama o ile a romela mosadi wa gagwe go Ahia go yo botšiša ka morwa wa bona yo a babjago. Ahia ka sebete o ile a bolela e sa le pele gore morwa wa Jerobeama o be a tlo hwa. (1 Dikx. 14:1-18) Gare ga ditšhegofatšo tše dintši tšeo Ahia a di amogetšego, o ile a ba le tokelo ya go tsenya letsogo Lentšung la Modimo le le buduletšwego. Bjang? Mangwalo a gagwe ka morago a ile a dirišwa ke moperisita Esera e le mothopo wa tsebišo.—2 Kor. 9:29.

12-14. (a) Re ithuta thuto efe tiragalong yeo e akaretšago moporofeta yo mofsa? (b) Bontšha ka mohlala bohlokwa bja go naganišiša ka kelohloko le ka thapelo ka keletšo e theilwego Beibeleng yeo e neilwego ke bagolo.

¹² Beibele ga e bolele lebaka la moporofeta yo yo mofsa la go se kgopele tlhahlo ya Jehofa pele a aroga tseleng le go ja bogobe le go nwa meetse le mokgalabje. Na e ka ba e le gore mokgalabje o mmoditše seo a bego a nyaka go se kwa? Ke’ng seo re ithutago sona? Re swanetše go kgodišega ka mo go feletšego gore ditekanyetšo tša Jehofa di lokile. Le gona re swanetše go ikemišetša go di latela, go sa šetšwe gore go direga’ng.

¹³ Ba bangwe ge ba eletšwa ba theetša feela seo ba nyakago go se kwa. Ka mohlala, mogoeledi a ka holofetšwa mošomo woo o ka šitišanago le nako yeo a ka e fetšago a na le lapa la gagwe le nako ya mediro ya moya. A ka kgopela keletšo go mogolo. Mogolo a ka thoma poledišano ya gagwe ka go bolela gore ga a boemong bjo bokaone bja go ka botša ngwanabo rena mokgwa woo a swanetšego go fepa lapa la gagwe ka wona. Ke moka mogolo a ka hlahloba le ngwanabo rena dikotsi tšeo di ka bakwago ke go amogela mošomo woo. Na ngwanabo rena o tla gopola feela mantšu a mathomo a mogolo, goba na o tla naganišiša ka taba ka moka yeo e boletšwego? Go molaleng gore ngwanabo rena o swanetše go dira seo se lego bohlokwa go yena.

¹⁴ Ela hloko boemo bjo go ka lebanwago le bjona.  Kgaetšedi a ka botšiša mogolo ge e ba a swanetše go arogana le monna wa gagwe yo a sa dumelego. Ka ntle le pelaelo mogolo o tla hlalosa gore phetho ya go arogana goba go se arogane e swanetše go dirwa ke kgaetšedi. Ke moka a ka ahla-ahla keletšo ya Beibele ya mabapi le taba yeo. (1 Bakor. 7:10-16) Na kgaetšedi o tla naganišiša ka seo mogolo a se boletšego? Goba na o šetše a dirile phetho ya go tlogela monna wa gagwe? Ge a dira phetho, e ka ba gabohlale ge a ka naganišiša ka keletšo yeo ya Beibele ka thapelo.

Ipoetše

15. Re ithuta’ng phošong ya moporofeta wa Modimo?

¹⁵ Ke’ng se sengwe seo re ka ithutago sona phošong ya moporofeta yo a tšwago Juda? Diema 3:5 e bolela gore: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô.” Go e na le go tšwela pele a ithekgile ka Jehofa go etša ge a dirile nakong e fetilego, mo boemong bjo moporofeta yo a tšwago Juda o ile a ipota. Phošo ya gagwe e ile ya mo iša lehung le go senya tswalano ya gagwe le Modimo. Phihlelo ya gagwe e gatelela bohlokwa bja go ikokobetša le go botega tirelong ya rena go Jehofa!

16, 17. Ke’ng seo se ka re thušago go dula re botegela Jehofa?

¹⁶ Tshekamelo ya dipelo tša rena ya boithati e na le matla a go re fapoša. “Pelo ké yôna mmata-mâno-mabe, ké yôna lešaedi; e hlathwa ke mang?” (Jer. 17:9) Gore re dule re botegela Jehofa, re swanetše go tšwela pele re šoma ka thata go apola motho wa kgale le tshekamelo ya gagwe ya go ikgodiša le ya go ipota. Re swanetše go apara motho yo mofsa, “yo a bopilwego go ya ka thato ya Modimo tokong ya therešo le potegong.”—Bala Baefeso 4:22-24.

¹⁷ Diema 11:2 e re: “Bohlale bo na le moipoetši.” Go ithekga ka Jehofa re e-na le boipoetšo go re thuša go phema go dira diphošo tše nago le ditla-morago tše sa kgahlišego. Ka mohlala, go nyama go ka kgopamiša gabonolo pono ya rena ka dilo. (Die. 24:10) Re ka lapišwa ke go tšea karolo dibopegong tše dingwe tša tirelo e kgethwa gomme ra thoma go nagana gore ke kgale re hlankela, ra nagana gore ke nako ya gore ba bangwe ba tšwetše modiro pele. Goba re ka ba re kganyoga go ba le seo batho ba se bitšago gore ke bophelo bja kgonthe. Lega go le bjalo, ge re ‘katana ka matla’ gomme ‘ka mehla re e-na le go gontši mo re go dirago modirong wa Morena,’ re tla šireletša dipelo tša rena.—Luka 13:24; 1 Bakor. 15:58.

18. Re ka dira’ng ge re sa tsebe gore re dire phetho efe?

¹⁸ Ka dinako tše dingwe, go ka nyakega gore re dire diphetho tše thata, gomme re ka no se tsebe gore re dire’ng. Na re ka lekega go itirela diphetho tšeo re naganago gore ke tše kaone-kaone? Ge re ikhwetša re le boemong bjo bjalo, re tla ba re dira ka bohlale ge re kgopela Jehofa gore a re thuše. Jakobo 1:5 e re: “Ge e ba mang le mang wa lena a hloka bohlale, a a tšwele pele a kgopela Modimo, gobane o fa bohle.” Tatago rena wa legodimong o tla re nea moya o mokgethwa woo re o nyakago e le gore re dire diphetho tše bohlale.—Bala Luka 11:9, 13.

Ikemišetše go Dula o Botega

19, 20. Ke’ng seo re swanetšego go ikemišetša go se dira?

¹⁹ Nywaga ya khuduego yeo e latetšego go aroga borapeding bja therešo ga Solomone e ile ya leka potego ya batho ba Modimo o šoro. Ke therešo gore ba bantši ba ile ba kwanantšha ka ditsela tše itšego. Go sa šetšwe seo, ba bangwe ba ile ba dula ba botegela Jehofa.

²⁰ Letšatši le lengwe le le lengwe, re lebana le dikgetho le diphetho tšeo di lekago potego ya rena. Le rena re ka itlhatsela re botega. A re botegeleng Jehofa ka mehla ge re dutše re mmoifa ka pelo ka moka, re kgodišegile gore o tla dula a šegofatša bao ba mmotegelago.—2 Sam. 22:26.

[Mongwalo wa tlase]

O be o tla Araba Bjang?

• Ke ka baka la’ng re swanetše go katanela go tumola dikganyogo tša go rata dilo tše di bonagalago ka medu dipelong tša rena?

• Ke’ng seo se ka re thušago go dula re botegela Jehofa?

• Boipoetšo bo ka re thuša bjang go dula re botegela Modimo?

[Dipotšišo tša Thuto]

[Diswantšho go letlakala 9]

Na o thatafalelwa ke go gana diteko?

[Diswantšho go letlakala 10]

Na o tla naganišiša ka thapelo ka keletšo yeo e theilwego Mangwalong?