Jehofa a ka se Tlogele Bao ba Mmotegelago

“[Jehofa] a ka se tlogele bao ba mmotegelago. Ba tla šireletšwa go iša mehleng ya neng le neng.”​—PS. 37:28, NW.

1, 2. (a) Ke ditiragalo dife tša lekgolong la lesome la nywaga B.C.E. tšeo di ilego tša leka potego ya bahlanka ba Modimo? (b) Ke maemong afe a mararo ao go ona Jehofa a ilego a šireletša bao ba mmotegelago?

KE NGWAGA-KGOLO wa lesome B.C.E. gomme ke nako ya gore go dirwe phetho. Ntwa ya selegae e ile ya phengwa ka bosesane ka go dira gore meloko ya Isiraele ya ka leboa yeo e tletšego khuduego e ipuše. Kgoši ya bona e sa tšwago go kgethwa, Jerobeama, kapejana e gata mogato wa go matlafatša pušo ya yona ka go hloma bodumedi bjo bofsa bja Mmušo. E nyaka gore balata ba yona ba e botegele ka mo go feletšego. Bahlanka ba Jehofa ba botegago ba tla dira’ng? Na ba tla dula ba botegela Modimo yo ba mo rapelago? Ba dikete ba dira bjalo gomme Jehofa o a ba šireletša ge ba tšwela pele ba botega.—1 Dikx. 12:1-33; 2 Kor. 11:13, 14.

² Potego ya bahlanka ba Modimo e a lekwa le mehleng ya rena. Beibele e nea temošo e rego: “Dulang le hlaphogetšwe, le phakgame. Lenaba la lena, Diabolo, o sepela-sepela go swana le tau e rorago, a nyaka go metša yo mongwe.” Na re ka kgona go ‘emeletšana le yena re tiile tumelong’? (1 Pet. 5:8, 9) Anke re hlahlobeng ditiragalo tše itšego tšeo di diregilego nakong ya go hlongwa ga Kgoši Jerobeama ka 997 B.C.E. gomme re bone seo re ka ithutago sona go tšona. Dinakong tšeo tše hlobaetšago, bahlanka ba Jehofa ba botegago ba be ba gateletšwe. Le gona, ba be ba le kotsing ya go tutuetšwa ke bohlanogi ge ba dutše ba phetha dikabelo tša bona tše thata. Go bjo bongwe le bjo bongwe bja maemo a, Jehofa ga se a ka a tlogela batho ba gagwe ba botegago nakong yeo gomme a ka se ba tlogele le lehono.—Ps. 37:28.

Ge ba Gatelelwa

3. Ke ka baka la’ng pušo ya Kgoši Dafida e be e se na kgatelelo?

³ A re thomeng ka go hlahloba maemo ao a dirilego gore Jerobeama e be kgoši. Diema 29:2 e re: “Xe xo buša ba babe, sethšaba se a fêxêlwa.” Setšhaba ga se sa ka sa fegelwa ge se be se bušwa ke Kgoši Dafida wa Isiraele ya bogologolo. Dafida o be a se a phethagala, eupša o be a botegela Modimo e bile a ithekgile ka yena. Pušo ya Dafida e be e se na kgatelelo. Jehofa o ile a dira kgwerano le Dafida gomme a re: “Ngwakô wa xaxo wôna o tlo tia, le mmušô wa xaxo ké wa neng le neng ò e-ya; sedulô sa xaxo sa boxoši se tlo ba xôna ka mehla le mehla.”—2 Sam. 7:16.

4. Ditšhegofatšo tšeo di bego di hwetšwa mehleng ya pušo ya Solomone di be di ithekgile ka’ng?

⁴ Pušo ya morwa wa Dafida e lego Solomone e be e e-na le khutšo mathomong e bile e atlegile moo e lego gore e be e swantšhetša gabotse Pušo e tlago ya Kriste Jesu ya Nywaga e Sekete. (Ps. 72:1, 17) Ka nako yeo, go be go se na le o tee wa meloko e 12 ya Isiraele wo o bego o e-na le lebaka la go rabela. Lega go le bjalo, ditšhegofatšo tšeo Solomone le balata ba gagwe ba bego ba di thabela di be di ithekgile ka se sengwe. Jehofa o be a boditše Solomone gore: “Xe O swara ka tsela ya  melaô ya-ka, wa hlokômêla tšohle tše ke laetšexo xore di latêlwê, xôna ke tlo phêtha se ke se boditšexo Dafida tat’axo; Ke tlo dula kè le xar’a Ba-Isiraele, ke se kê ka tloxêla sethšaba sa-ka sa Isiraele.”—1 Dikx. 6:11-13.

5, 6. Go se botegele Modimo ga Solomone go bile le mafelelo afe?

⁵ Solomone botšofading bja gagwe o ile a se botegele Jehofa gomme a thoma go kopanela borapeding bja maaka. (1 Dikx. 11:4-6) Ganyenyane-ganyenyane, Solomone o ile a tlogela go latela melao ya Jehofa gomme a thoma go gatelela batho kudu. Se se ile sa fihla bokgoleng bja gore ka morago ga lehu la gagwe, batho ba belaele ka yena go morwa wa gagwe yo a ilego a mo hlatlama e lego Rehabeama, gomme ba kgopela gore a ba imolle. (1 Dikx. 12:4) Jehofa o ile a arabela bjang ge Solomone a be a sa botege?

⁶ Beibele e re botša gore: “Ké mo Morêna a befeletšwexo Salomo, ka xe pelo ya xaxwe e hlanoxêla . . . Modimo wa Isiraele e a bexo a ipônaditše xo yêna xa-bedi.” Jehofa o boditše Solomone gore: “Ke tlo Xo amoxa mmušô ka o nea mohlanka wa xaxo, ka . . . xe O sa-ka wa hlôkômêla kxwêranô ya-ka, le melaô ya-ka ye ke Xo laetšexo yôna.”—1 Dikx. 11:9-11.

7. Gaešita le ge Solomone a ile a amogwa mmušo, Jehofa o ile a hlokomela bjang bao ba Mmotegelago?

⁷ Ke moka Jehofa o ile a roma moporofeta Ahia gore a ye go tlotša mophološi. Mophološi yoo e be e le Jerobeama, monna yo a swanelegago yo e bego e le mohlankedi mmušong wa Solomone. Gaešita le ge Jehofa a ile a botegela kgwerano yeo a e dirilego le Dafida, O ile a dumelela gore meloko e 12 e tšwe mebušo e mebedi. Meloko e 10 e be e tla newa Jerobeama; e mebedi ya šala lešikeng la Dafida, leo ga bjale le bego le emelwa ke Kgoši Rehabeama. (1 Dikx. 11:29-37; 12:16, 17, 21) Jehofa o boditše Jerobeama gore: “E tlo re xe O ka theetša tšohle ke Xo laêlaxo tšôna, wa swara ka ditsela tša-ka, wa dira tše Nna ke rexo di lokile, wa hlôkômêla melaô ya-ka le ditaêlô tša-ka, wa dira se Dafida mohlanka wa-ka a bexo a se dira, xôna ke tlo êma le wêna, ka Xo axêla ngwakô o tl’o xo dula ò le xôna wa etša wo ke o axetšexo Dafida; xomme ke tlo Xo nea sethšaba sa Isiraele.” (1 Dikx. 11:38) Jehofa o ile a gata mogato wa go thuša batho ba gagwe gomme a bula tsela ya go ba imolla kgatelelong.

8. Ke diteko dife tšeo di gatelelago batho ba Modimo lehono?

⁸ Lehono go tletše kgatelelo le go hloka toka. Mmoledi 8:9 e re: ‘Motho o buša motho gore a mo senye.’ Kgwebo ya megabaru le mekgwa ya go buša e gobogilego di ka feleletša ka maemo a sa kgahlišego a tša boiphedišo. Baetapele ba mebušo, ba dikgwebo le ba bodumedi gantši ga se mehlala e mebotse ya boitshwaro. Ka gona, go swana le Lota wa moloki, bao ba botegelago Modimo lehono ba “tlaišwa kudu ke go nwelela ga batho ba nyatšago molao boitshwarong bjo bo hlephilego.” (2 Pet. 2:7) Go oketša moo, ge re dutše re katanela go phela ka ditekanyetšo tša Modimo re sa šitiše ba bangwe, gantši re hlaselwa ke babuši ba ikgogomošago.—2 Tim. 3:1-5, 12.

9. (a) Jehofa o šetše a dirile’ng bakeng sa go phološa batho ba gagwe? (b) Ke ka baka la’ng re ka kgodišega gore Jesu o tla dula a botegela Modimo?

⁹ Lega go le bjalo, re ka kgodišega ka therešo ye ya motheo: Jehofa a ka se tlogele bao ba mmotegelago! Nagana feela ka megato yeo a šetšego a e gatile ya go dira gore babuši ba lefase ba gobogilego ba tšeelwe legato. Mmušo wa Modimo wa Mesia woo kgoši ya wona e lego Kriste Jesu o šetše o hlomilwe. Jesu Kriste o be a dutše a buša legodimong ka nywaga e nyakilego go ba e lekgolo. Go se go ye kae o tla tliša kimologo e feletšego go bao ba boifago leina la Modimo. (Bala Kutollo 11:15-18.) Jesu o šetše a ipontšhitše e le yo a botegelago Modimo go fihla lehung. A ka se tsoge a nyamišitše balata ba gagwe, go etša ge Solomone a dirile.—Baheb. 7:26; 1 Pet. 2:6.

10. (a) Re ka bontšha bjang gore re tšeela Mmušo wa Modimo godimo? (b) Ge re lebeletšana le diteko, re ka kgodišega ka’ng?

¹⁰ Mmušo wa Modimo ke pušo ya kgonthe yeo e tlago go fediša kgatelelo ka moka. Re bota Jehofa Modimo gotee le tokišetšo ya gagwe. Ka ge re holofela Mmušo ka mo go feletšego, re gana moya wa lefase wa go se boife Modimo e bile re phegelela mediro e mebotse ka phišego.  (Tito 2:12-14) Re katanela go dula re se na sepatso sa lefase. (2 Pet. 3:14) Go sa šetšwe gore re lebeletšana le diteko dife gona bjale, re ka kgodišega gore Jehofa o tla re šireletša dilong tšeo di ka re gobatšago moyeng. (Bala Psalme 97:10.) Go oketša moo, Psalme 116:15 (NW) e re kgonthišetša ka gore: “Lehu la batho ba Jehofa bao ba mmotegelago le bohlokwa mahlong a gagwe.” Bahlanka ba Jehofa ke ba bohlokwa kudu mahlong a gagwe moo e lego gore a ka se ke a dumela gore ba fedišwe e le sehlopha.

Ge ba le Kotsing ya go Tutuetšwa ke Bohlanogi

11. Jerobeama o ile a se botege bjang?

¹¹ Pušo ya Kgoši Jerobeama nkabe e ile ya tlišetša batho ba Modimo kimologo. Go e na le moo, ditiro tša gagwe di ile tša tšwela pele di leka potego ya bona go Modimo. Ka ge a be a sa kgotsofatšwe ke kgodišo le tokelo tšeo a bego a šetše a di filwe, Jerobeama o ile a thoma go tsoma ditsela tša go matlafatša pušo ya gagwe. O ile a re: “Xe batho ba fêla ba rotoxêla Jerusalêma ba iša didimo Ngwakong wa Morêna, pelo ya bôná e tlo boêla xo mong wa bôná Rehabeama kxoši ya Juda; ’me mohla ba tl’o xo boêla xo yêna kxoši ya Juda, nna ba tlo mpolaya.” Ka baka leo Jerobeama o ile a hloma borapedi bjo bofsa bjo bo theilwego go dinamane tše pedi. “E nngwê namane a e bea Bethele; e nngwê a e bea Dani. Xomme modirô woo o ba išitše sebeng; batho ba tloxa le namane e nngwê ba e iša Dani. Jerobeama a dira le ngwakô wa mmotong, a bea baperisita ba a bexo a fo ba hlaola mo dileteng tša sethšaba, bao e sexo ba leloko la Lefi.” Jerobeama o ile a ba a hloma letšatši la gagwe ka noši la ‘monyanya wa Baisiraele’ gomme a “tliša dihlabêlô le diôrêlô.”—1 Dikx. 12:26-33.

12. Bao ba botegelago Modimo ba ka mmušong wa ka leboa ba ile ba dira’ng ge Jerobeama a be a hloma borapedi bja namane Isiraele?

¹² Bao ba botegelago Modimo ba mmušong wa ka leboa ba be ba tla dira’ng bjale? Go swana le bo-rakgolokhukhu ba bona ba botegago, Balefi bao ba bego ba dula metseng ya mmušo wa ka leboa yeo ba bego ba ba e filwe ba ile ba arabela kapejana. (Ek. 32:26-28; Num. 35:6-8; Doit. 33:8, 9) Ba ile ba tlogela bohwa bja bona gomme ba hudušetša malapa a bona borwa e lego Juda, moo ba bego ba ka tšwela pele ba rapela Jehofa ntle le tšhitišo. (2 Kor. 11:13, 14) Baisiraele ba bangwe bao ba bego ba le Juda ka nakwana ba ile ba kgetha go dula moo go ya go ile go e na le go boela gae. (2 Kor. 10:17) Jehofa o ile a kgonthišetša gore tsela ya go boela borapeding bja therešo e dula e bulegile e le gore meloko e sa  tlago ya ba batho ba mmušo wa ka leboa e ka tla ya lahla borapedi bja namane gomme ya boela Juda.—2 Kor. 15:9-15.

13. Batho ba Modimo ba lekwa bjang ke ditutuetšo tša bahlanogi lehono?

¹³ Batho ba Modimo lehono ba ba kotsing ya go hlaselwa ke bahlanogi le ditutuetšo tša bona. Babuši ba bangwe ba ile ba leka go hloma mohuta wa bona wa bodumedi bja Naga, gomme ba gapeletša balata ba bona go bo amogela. Baruti ba Bojakane le batho ba bangwe bao ba ikgodišago ba ile ba leka go itira baperisita ba moya. Lega go le bjalo, ke go Bakriste ba therešo feela moo re hwetšago batlotšwa ba kgonthe, bao ba dirago “boperisita bja bogoši.”—1 Pet. 2:9; Kut. 14:1-5.

14. Re swanetše go arabela bjang dikgopolong tša bohlanogi?

¹⁴ Go swana le Balefi ba lekgolong la lesome la nywaga B.C.E., bao ba botegelago Modimo lehono ga ba forwe ke dikgopolo tša bohlanogi. Batlotšwa le bagwera ba bona ba Bakriste ba akgofela go phema le go gana dikgopolo tša bohlanogi. (Bala Baroma 16:17.) Gaešita le ge re ikokobeletša balaodi ba mmušo ka go rata ditabeng tša lefase e bile re boloka boema-gare bja rena dintweng tša lefase, kholofelo ya rena e go Mmušo wa Modimo. (Joh. 18:36; Baroma 13:1-8) Ga re amogele boipolelo bja bao ba itirago eka ba hlankela Modimo mola ba mo nyatša ka ditiro tša bona.—Tito 1:16.

15. Ke ka baka la’ng e le mo go swanetšego gore re bote “mohlanka yo a botegago le wa temogo”?

¹⁵ Le gona nagana ka taba ya gore Jehofa o dirile gore go kgonege gore batho ba dipelo tše di botegago ba tšwe lefaseng le kgopo, ka tsela ya seswantšhetšo, gomme ba tsene paradeiseng ya moya yeo a e hlotšego. (2 Bakor. 12:1-4) Ka dipelo tšeo di tletšego tebogo, re dula re le kgaufsi le “mohlanka yo a botegago le wa temogo, yo mong wa gagwe a mmeilego gore a hlokomele ba ntlo ya gagwe, gore a ba nee dijo tša bona ka nako e swanetšego.” Kriste o beile mohlanka yo “gore a hlokomele dilo tša gagwe ka moka.” (Mat. 24:45-47) Ka baka leo, gaešita le ge rena re le motho ka o tee ka o tee re sa kwešiše ka mo go feletšego lebaka leo ka lona sehlopha sa mohlanka se dirago phetho e itšego, se ga se lebaka la go e gana goba go boela lefaseng la Sathane. Go e na le moo, potego e tla re šušumeletša gore re dire dilo ka boikokobetšo le gore re letele gore Jehofa a re thuše go kwešiša.

Ge ba Dutše ba Phetha Dikabelo Tšeo ba di Filwego ke Modimo

16. Moporofeta yo a tšwago Juda o ile newa kabelo efe?

¹⁶ Jehofa o ile a sola Jerobeama ka baka la ditiro tša gagwe tša bohlanogi. O ile a roma moporofeta yo a tšwago Juda gore a lebe bohlabela Bethele gomme a tšwelele pele ga Jerobeama ge a sa thuntšha diorelo aletareng ya gagwe. Moporofeta o be a swanetše go botša Jerobeama molaetša o nyamišago wa kahlolo. Ka ntle le pelaelo, yeo e be e se kabelo e bonolo.—1 Dikx. 13:1-3.

17. Jehofa o ile a šireletša motseta wa gagwe bjang?

¹⁷ Jerobeama o ile a galefa kudu ge a e-kwa kahlolo ya Jehofa. O ile a akga moemedi wa Modimo ka letsogo gomme a goeletša banna bao ba bego ba le kgaufsi a re: “Mo sware’ng!” Eupša gatee-tee, pele ga ge ba ka gata mogato, “letsôxô la xaxwe le a le akxilexo la ômêlêla, a šitwa xo le hunyetša. Aletare ya fatoxa, melôra ya falala.” Jerobeama o ile gapeletšega go kgopela moporofeta gore a nolofatše sefahlego sa Jehofa gomme a rapelele gore letsogo la gagwe le le omeletšego le fodišwe. Moporofeta o ile a dira bjalo gomme letsogo la fodišwa. Ka go rialo, Jehofa o ile a šireletša motseta wa gagwe.—1 Dikx. 13:4-6.

18. Jehofa o re šireletša bjang ge re mo direla tirelo e kgethwa ka sebete?

¹⁸ Ge re tšea karolo ka potego modirong wa go  bolela ka Mmušo le wa go dira barutiwa, ka dinako tše dingwe re kopana le batho bao ba se nago bogwera, goba gaešita le bao ba sego botho. (Mat. 24:14; 28:19, 20) Eupša ga se ra swanela go dumelela poifo ya gore batho ba ka se re amogele e dira gore re se sa hlwa re le mafolofolo bodireding. Go swana le moporofeta yo a sa bolelwego ka leina wa mehleng ya Jerobeama, re na le ‘tokelo ya go direla Jehofa tirelo e kgethwa ka ntle le poifo ka potego.’ * (Luka 1:74, 75) Gaešita le ge re sa letele gore Jehofa o tla tsena ditaba gare ka tsela ya mohlolo lehono, Jehofa o sa re šireletša le go re thekga ka moya wa gagwe o mokgethwa le ka barongwa ka ge re le Dihlatse tša gagwe. (Bala Johane 14:15-17; Kutullo 14:6.) Modimo a ka se tsoge a lahlile bao ba bolelago lentšu la gagwe ka sebete.—Bafil. 1:14, 28.

Jehofa o tla Šireletša Bao ba Mmotegelago

19, 20. (a) Ke ka baka la’ng re ka kgodišega gore Jehofa a ka se tsoge a re tlogetše? (b) Ke dipotšišo dife tšeo di tlago go ahla-ahlwa sehlogong se se latelago?

¹⁹ Jehofa ke Modimo wa rena yo a botegago. (Kut. 15:4; 16:5) O a “botega ditirong tša gagwe ka moka.” (Ps. 145:17, NW) Le gona Beibele e re kgonthišetša ka gore: “Ó letile tsela ya baratwa ba xaxwe.” (Die. 2:8) Bao ba botegelago Modimo ba ka kgodišega gore Jehofa o tla ba hlahla le go ba thekga ge ba lebeletšana le diteko goba dikgopolo tša bohlanogi, goba ge ba phetha dikabelo tše thata.

²⁰ Seo yo mongwe le yo mongwe wa rena a swanetšego go naganišiša ka sona gona bjale ke se: Ke tla thušwa ke eng gore ke tšwele pele ke botegela Jehofa go sa šetšwe diteko tšeo nka kopanago le tšona? Ka mantšu a mangwe, nka matlafatša bjang potego ya-ka ya go botegela Modimo?

[Mongwalo wa tlase]

O be o tla Araba Bjang?

• Jehofa o bontšhitše bjang gore ga a tlogele bao ba mmotegelago ge ba gatelelwa?

• Re swanetše go lebelela bjang bahlanogi le dikgopolo tša bona?

• Jehofa o šireletša batho ba gagwe bjang ge ba le bodireding bja Bokriste?

[Dipotšišo tša Thuto]

[Mmapa/​Seswantšho go letlakala 5]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

MMUŠO WA KA LEBOA (Jerobeama)

Dani

SIKEME

Bethele

MMUŠO WA KA BORWA (Rehabeama)

JERUSALEMA

[Seswantšho]

Jehofa ga se a ka a lahla batho ba gagwe ge Jerobeama a be a hloma borapedi bja namane

[Seswantšho go letlakala 3]

Ditšhegofatšo tšeo Solomone le balata ba gagwe ba bego ba di thabela di be di ithekgile ka se sengwe