Na o a Gopola?

Na o thabetše go bala ditokollo tša morago bjale tša Morokami? Bona ge e ba o ka kgona go araba dipotšišo tše di latelago:

• Bakriste ba bangwe ba lebeletšane le tlhohlo efe e kgolo ka morago ga ge ba nyalane, gomme ke’ng seo ba swanetšego go katanela go se dira?

Bakriste ba bangwe ba ile ba lemoga gore bona le balekane ba bona ga ba na dilo tše dintši bophelong tšeo ba kwanago ka tšona. Ka ge ba tseba gore tlhalo e sa thewago Mangwalong ga se tharollo e amogelwago ya mathata, ba swanetše go katanela go phološa lenyalo la bona.​—4/15, letlakala 17.

• Mokriste yo a lego lefelong la batšofadi a ka lebeletšana le ditlhohlo dife?

A ka ba a se a tlwaelana le phuthego yeo lefelo la batšofadi le lego tšhemong ya yona. Ba bantši ba lego lefelong la batšofadi ba ka ba ba e-na le ditumelo tše di fapanego le tša gagwe gomme ba nyaka gore a tšee karolo go tšona. Ba leloko bao e lego Bakriste le ditho tša phuthego ya gabo ba swanetše go lemoga mathata a gomme ba mo thekge le go mo hlokomela.​—4/15, matlakala 25-27.

• Ke megato efe e mene yeo e ka thušago banyalani go rarolla mathata?

Bea nako ya go boledišana ka mathata. (Mmo. 3:1, 7) Bolela dikgopolo tša gago ka potego le ka tlhompho. (Baef. 4:25) Theetša molekane wa gago gomme o hlomphe maikwelo a gagwe. (Mat. 7:12) Dumelelanang ka tharollo gomme le dirišane. (Mmo. 4:9, 10)​—5/1, matlakala 10-12.

• Ditho tša Sehlopha se Bušago di hlankela dikomiting dife?

Komiti ya Balomaganyi; Komiti ya Bašomi; Komiti ya Kgatišo; Komiti ya Tirelo; Komiti ya go Ruta; Komiti ya Bongwadi.​—5/15, letlakala 29.

• Re ka kgonthišega bjang gore Meetsefula a mehleng ya Noa e be e le a lefase ka bophara?

Jesu o be a dumela gore Meetsefula a kile a ba gona le gore e be e le a lefase ka bophara. Ditemošo tša Beibele di theilwe go beng ga kgonthe ga Meetsefula a lefase ka bophara.​—6/1, letlakala 8.

• Na boitshwaro bjo bo hlalositšwego go Baroma 1:24-32 e be e le bja Bajuda goba bja Bantle?

Tlhaloso ye e ka swanela dihlopha ka bobedi, eupša moapostola Paulo o be a bolela ka go lebanya ka Baisiraele ba bogologolo bao ba paletšwego ke go kwa Molao ka nywaga e makgolo. Ba be ba tseba melao ya Modimo ya go loka, ga se ba ka ba phela ka go dumelelana le yona.​—6/15, letlakala 29.

• Tel Arad e kae, gona ke ka baka la’ng e le bohlokwa?

Mmoto wo o mogolo wa Isiraele woo o swayago motse wa bogologolo wa Arad o ka bodikela bja Lewatle le le Hwilego. Mmotong wo, baepi ba marope ba hweditše dikgapetla tše dintši tša letsopa tšeo di bego di dirišwa bjalo ka letlapa la go ngwalela. Tše dingwe di na le maina ao a hwetšwago ka Beibeleng, e bile di bontšha gore leina la Modimo le be le dirišwa mengwalong ya lefase.​—7/1, matlakala 23-24.

• Ke ka baka la’ng go hlagolela ditebelelo tše di kwagalago go ka oketša lethabo la rena?

Ge e ba re katanela go fihlelela dipakane tše sa kwagalego go sa šetšwe gore re dira boikgafo bjo bokaakang, re ipea ka tlase ga kgatelelo e sa nyakegego. Lega go le bjalo, ga se ra swanela go tšwafa kudu, ra diriša mafokodi a rena e le lebaka la go se be mafolofolo bodireding.​—7/15, letlakala 29.

• Ke’ng seo se ka šitišago batswadi go boledišana le bana ba bona bao ba lego mahlalagading?

Mapheko e ka ba go ba le dihlong ga mofsa, kganyogo ya gagwe ya go nyaka tokologo, le go se nyake ga gagwe go utolla sa mafahleng. Batswadi ba ka leka go boledišana le bana ba bona maemong a sa rulaganywago le go katanela go lemoga molaetša woo o fetišwago ke mantšu a mofsa.​—8/1, matlakala 10-11.