Dipotšišo tše Tšwago go Babadi

Lengwalong la gagwe le le yago go Baheberu, moapostola Paulo o boletše ka go “go bea diatla.” Na o be a bolela ka go kgethwa ga bagolo goba ka selo se sengwe seo se fapanego?​—Baheb. 6:2.

Ga go na lebaka la go bolela ka go tia tabeng ye, eupša go bonagala Paulo a be a bolela ka go bea diatla e le go nea dimpho tša moya.

Ke therešo gore Beibele e tswalanya go bea diatla le dikgetho tša pušo ya Modimo. Moše ‘o ile a bea Jošua diatla’ ge a be a mo kgetha bjalo ka mohlatlami wa gagwe. (Doit. 34:9) Thulaganyong ya Bokriste, banna ba bangwe bao ba swanelegago ba ile ba kgethwa ka go bewa diatla. (Dit. 6:6; 1 Tim. 4:14) Paulo o ile a eletša mabapi le go akgofela go bea motho diatla.—1 Tim. 5:22.

Lega go le bjalo, Paulo o ile a kgothaletša Bakriste ba Baheberu gore ba ‘phegelele kgolong’ ka ge bjale ba be ba tlogetše “thuta-tumelo ya pele.” Ke moka o ile a lokeletša “go itshola medirong e hwilego, le go ba le tumelo go Modimo, thuto ka dikolobetšo le go bea diatla.” (Baheb. 6:1, 2) Na go kgethwa ga bagolo e be e ka ba feela se sengwe sa dilo tša pele tšeo Bakriste ba swanetšego go di tlogela e le ge ba phegelela kgolong? Aowa. Go ba mogolo wa phuthego ke pakane yeo bana babo rena ba gotšego tsebong ba swanetšego go e phegelela gomme ka morago ba e tšeele godimo.—1 Tim. 3:1.

Eupša go be go e-na le morero o mongwe wa go bewa diatla. Lekgolong la pele la nywaga, Jehofa o ile a lahla Isiraele ya nama gomme bakeng sa yona a kgetha Isiraele ya moya, e lego phuthego ya Bakriste ba tloditšwego. (Mat. 21:43; Dit. 15:14; Bagal. 6:16) Dimpho tša moya tša mohlolo, tše bjalo ka go bolela ka maleme, di hlatsetše phetogo yeo. (1 Bakor. 12:4-11) Ge Koronelio le lapa la gagwe ba be ba e-ba badumedi, ba ile ba amogela moya o mokgethwa, ka ge seo se ile sa hlatselwa ke ge ba be “ba bolela ka maleme.”—Dit. 10:44-46.

Ka dinako tše dingwe, dimpho tša mohlolo di be di fetišwa ka go bewa diatla. Ge Filipi a be a bolela ditaba tše dibotse Samaria, ba bantši ba ile ba kolobetšwa. Sehlopha se bušago se ile sa romela moapostola Petro le moapostola Johane moo. Ka baka la’ng? Re bala gore: “Ke moka [ba babedi ba] ba ya ba . . . bea [batho bao ba sa tšwago go kolobetša] diatla, gomme ba thoma go amogela moya o mokgethwa.” Seo se ka ba se be se bolela gore ba be ba amogetše dimpho tša moya, e lego bokgoni bjoo bo bego bo ka bonwa. Re tseba se ka gobane Simone, yoo a kilego a dira malea, o ile a bona go šoma mo ga moya gomme ka megabaru a leka go reka bokgoni bjo bja go bea ba bangwe diatla bakeng sa go ba fa moya o mokgethwa e le gore ba kgone go dira mehlolo. (Dit. 8:5-20) Ka moragonyana, batho ba 12 kua Efeso ba ile ba kolobetšwa. Re bala gore: “Ge Paulo a ba beile diatla, moya o mokgethwa wa fologela go bona, gomme ba thoma go bolela ka maleme le go porofeta.”—Dit. 19:1-7; bapiša le 2 Timotheo 1:6.

Ka baka leo, go Baheberu 6:2, Paulo o be a bolela ka go bewa diatla bakeng sa go nea badumedi ba bafsa dimpho tša moya.