Go Nea Bohlatse Borekišetšong

GE A be a le motseng wa Athene, letšatši le lengwe le le lengwe moapostola Paulo o be a e-ya borekišetšong go yo bolela ditaba tše dibotse mabapi Jesu. (Dit. 17:17) Paulo o ile a kgetha go ya borekišetšong ka gobane e be e le moo Baathene ba bantši ba hwetšwago gona.

Mo e nyakilego go ba nywaga e 2 000 ka morago, batho ba Jehofa ba sa dutše ba bolela molaetša wa Mmušo wa Modimo borekišetšong. Ka baka la’ng? Ka gobane batho ba bantši ba ka hwetšwa moo. Lehono, borekišetšong e ka no ba mabenkeleng. Ka morago ga go hwetša tumelelo go molaodi goba mong wa lebenkele, Dihlatse tše dingwe di diriša tafola goba sehlomo bakeng sa go bea dikgatišo tše di theilwego Beibeleng gore di bonwe ke bohle.

Ka mohlala, mabenkeleng a kua New Jersey, U.S.A., go ile gwa bewa sehlomo sa dikgatišo seo se nago le sehlogo se se rego “Go Boloka Ditekanyetšo tša Lapa—Bjang?” Ka mafelelo afe? Ka letšatši letee, go ile gwa sepedišwa dipuku tše 153 ka maleme a tshelelago.

Mosadi yo mongwe yoo a ilego a batamela sehlomo seo sa dikgatišo o ile a theetša ka kelohloko ge Hlatse e nngwe e be e hlalosa. Mosadi yoo o ile a dumela gore go bohlokwa go dira Modimo karolo ya maphelo a rena le ya malapa a rena. O ile amogela dikgatišo tše di latelago: Ithute go Morutiši yo Mogolo, Sephiri sa Lethabo la Lapa, gotee le Dipotšišo tša Bafsa le Dikarabo tše Šomago.

Mosegare, monna yo mongwe o ile a feta sehlomo seo sa dikgatišo a e-ya go tsena ka lebenkeleng leo le lego kgaufsi le sona. O ile a kgahlwa ke puku ya Dipotšišo tša Bafsa. Kgaetšedi yoo a emego moo sehlomong o ile a lemoga gore monna yo o be a kgahlwa ke puku yeo. O ile a mmotšiša gore, “Na go na le puku yeo e go kgahlago?” O ile a dumela ka hlogo gomme a šupa puku ya  Dipotšišo tša Bafsa. O ile a nea monna yoo puku yeo a bego a šetše a e obelela. O ile a re o na le bana ba bararo. Ge poledišano e tšwela pele, o ile a bolela gore o boledišana le bona gatee ka beke. Bana ba gagwe ba babedi ba bagolo ba mahlalagading. Ge a dutše a gaša puku yeo mahlo, o ile a bolela gore o tla e diriša gabonolo e le tlhahlo bakeng sa dipoledišano tša lapa. Mogoeledi o ile a ba a mmontšha puku ya Sephiri sa Lethabo la Lapa, a mo kgonthišetša gore yena le mosadi wa gagwe ba tla hwetša keletšo e nngwe e holago ya kamoo ba ka dirago diphetho tša lapa. Monna yoo o ile a kgahlwa ke tšhišinyo yeo, a ntšha moneelo gomme a dumela gore motho yo mongwe a etele lapa la gagwe.

Dihlatse di ile tša ikwa bjang ka letšatši la bona la go nea bohlatse mabenkeleng? Kgaetšedi yo mongwe o itše: “Ke thabetše sebopego se sa go dira boboledi. Go nna, yeo ke phihlelo e kgahlišago e le ruri!” Kgaetšedi yo mongwe gape o itše: “Jehofa o re ditaba tše dibotse di tla bolelwa go fihla karolong ya kgole ya lefase. Lehono, kua Paramus, New Jersey, ditaba tše tše dibotse di kgomile dipelo tša batho ba maleme a fapa-fapanego. E bile mo go kgahlišago kudu go ba karolo ya thulaganyo ye. Yo mongwe le yo mongwe yo a tšerego karolo go yona o be a thabile. Ge re feditše, ga go le o tee wa rena yo a bego a nyaka go sepela.”

Na o ka oketša mekgwa yeo o e dirišago ya go bolela ditaba tše dibotse? Mokgwa wa rena o mogolo ke wa go ya ka ntlo le ntlo. (Dit. 20:20) Lega go le bjalo, na o ka naganišiša ka go nea bohlatse borekišetšong goba mabenkeleng?