“Dintaka” tša Jehofa di Šetša Batho Bohle

‘Dintaka tša Jehofa di šetša bana ba batho.’​—PS. 11:4.

1. Re ikwa re gogelwa go batho ba mohuta mang?

O IKWA bjang ka batho bao ba go bontšhago kgahlego ya kgonthe? Ba go botša therešo ge o ba botšiša potšišo e itšego. Ge o nyaka thušo, ba go nea yona ka bolokologi. Ge o nyaka keletšo, ba go nea yona ka lerato. (Ps. 141:5; Bagal. 6:1) Na ga o ikwe o gogelwa ke batho ba bjalo? Go ba gona, Jehofa le Morwa wa gagwe ba bjalo. Ge e le gabotse, ba go kgahlegela kudu go feta motho le ge e le ofe, le gona maikemišetšo a bona e tloga e se a boithati, ba nyaka go go thuša gore o “swarelele ka go tia bophelong bja kgonthe.”—1 Tim. 6:19; Kut. 3:19.

2. Jehofa o kgahlegela bahlanka ba gagwe gakaaka’ng?

² Mopsalme Dafida o hlalositše kamoo Jehofa a re kgahlegelago ka gona ge a re: “Mahlô a [Jehofa] a a bôna; dintaka tša xaxwe di šetša bana ba batho.” (Ps. 11:4) Ee, Modimo ga a fo re lebelela; o a re šetša. Dafida o ngwadile le gore: “Xe O ka lekola pelo ya-ka, wa e hlôla bošexo, . . . O ka se hwetše seakanyô” se sebe. (Ps. 17:3) Go molaleng gore Dafida o be a tseba kamoo Jehofa a mo kgahlegelago ka gona. O be a tseba gore o tla nyamiša Jehofa gomme a se sa amogelwa ke Yena ge a be a ka hlagolela dikgopolo tše mpe goba go thoma go ba le pelo e logago maano-mabe. Na Jehofa ke wa kgonthe go wena go swana le ge e be e le wa kgonthe go Dafida?

Jehofa o Bona Pelo

3. Jehofa o bontšha bjang teka-tekano ge a lebelela mafokodi a rena?

³ Jehofa o kgahlegela kudu motho wa ka gare—motho yo re tlogago re le yena pelong. (Ps. 19:14; 26:2) Ka lerato, ga a šetše diphošo tše dinyenyane. Ka mohlala, ge Sara mosadi wa Aborahama, a be a sa botše morongwa yo a bego a apere mmele wa nama therešo, morongwa o ile a kgona go bona gore Sara o tšhogile e bile o lewa ke dihlong, ka gona o ile a mo sola ganyenyane. (Gen. 18:12-15) Ge mopatriareka Jobo a be “a re ke lokile, ’me a bea Modimo molato,” Jehofa ga se a ka a mo tima tšhegofatšo, ka go tseba gore Jobo o be a tlaišitšwe kudu ke Sathane. (Jobo 32:2; 42:12) Ka mo go swanago, Jehofa ga se a ka a kgopišwa ke mantšu ao mohlologadi wa Tsarepata a a boditšego moporofeta Eliya. Modimo o ile a kwešiša gore o be a nyamišitšwe ke go lahlegelwa ke ngwana a noši wa gagwe.—1 Dikx. 17:8-24.

4, 5. Jehofa o ile a bontšha botho bjang ge a be a dirišana le Abimeleke?

⁴ Ka ge Jehofa a hlahloba pelo, o bontšhitše gore o šetša gaešita le bao ba sa dumelego. Ela hloko ditirišano tša gagwe le Abimeleke, kgoši ya motse wa Bafilisita wa Gerara. Abimeleke, a sa lemoge gore Aborahama le Sara ba nyalane, o ile a tšea Sara gore a tle a mo dire mosadi wa gagwe. Lega go le bjalo, pele ga ge Abimeleke a ka ya kgole, Jehofa o ile a mmotša ka toro gore: “Le Nna ke tseba xe O di dirile, pelo ya xaxo è se na bomenetša; ’me ke Xo šexetše xore O se senyê pele xa-ka. Ké ka ’baka leo kè sa kaxo ka Xo lesa wa mo swara. Byalo bušetša mosadi yó xo mong wa xaxwe; yêna ké moporofeta; ó tlo Xo rapêlêla wa phela.”—Gen. 20:1-7.

⁵ Ge e le gabotse, Jehofa nkabe a ile a dirišana ka bogale le Abimeleke, morapedi wa medimo ya maaka. Eupša Modimo o bone gore monna yo o be a se na bomenetša lebakeng le. Ka botho Jehofa o ile a lemoga se gomme a bontšha kgoši kamoo e ka hwetšago tebalelo ka gona le go tšwela pele e “phela.” Na yo ga se mohuta wa Modimo yoo o nyakago go mo rapela?

6. Jesu o ekišitše Tatagwe ka ditsela dife?

⁶ Jesu o ekišitše Tatagwe ka mo go phethagetšego, a šetša botse go barutiwa ba gagwe  gomme a ba lebalela ka bolokologi. (Mar. 10:35-45; 14:66-72; Luka 22:31, 32; Joh. 15:15) Boemo bja Jesu bja kgopolo bo be bo dumelelana le mantšu a gagwe ao a lego go Johane 3:17, a rego: “Modimo o romile Morwa wa gagwe lefaseng, e sego gore a le ahlole, eupša gore lefase le phološwe ka yena.” Ee, Jehofa le Jesu ba re rata ka lerato leo le tseneletšego le leo le sa fetogego. Le bontšhwa ke kganyogo ya bona ya gore re hwetše bophelo. (Jobo 14:15) Lerato le bjalo le bontšha lebaka leo ka lona Jehofa a re hlahlobago, kamoo a re lebelelago ka gona le kamoo a gatago mogato ka seo a se bonago.—Bala 1 Johane 4:8, 19.

Go Šetšwa ka Lerato

7. Jehofa o re šetša ka maikemišetšo afe?

⁷ Ka gona, ruri go fošagetše go nagana gore Jehofa ke lephodisa leo le re šeditšego le le legodimong gore le re sware ge re dira sebe! Sathane ke yena yo a re šeditšego ka maikemišetšo a go re ntšha diphošo le go re bega. (Kut. 12:10) E bile o bolela gore re dira dilo ka maikemišetšo a mabe le ge go se bjalo. (Jobo 1:9-11; 2:4, 5) Mopsalme o ngwadile mabapi le Modimo gore: “Xe Wene Morêna Ò latiša molato, xôna xo ka êma mang?” (Ps. 130:3) Karabo ya potšišo yeo ke ya gore, Ga go le o tee yo a ka emago. (Mmo. 7:20) Go e na le moo, Jehofa o re lebelela ka kgaugelo le ka botho bjalo ka motswadi yo a hlokomelago yo a nyakago go šireletša bana ba gagwe ba rategago kotsing. Gantši o re lemoša ka go se phethagale le ka mafokodi a rena e le gore re efoge go ikgobatša.—Ps. 103:10-14; Mat. 26:41.

8. Jehofa o ruta le go laya bahlanka ba gagwe bjang?

⁸ Lerato la Modimo le bonagala tayong le thutong tšeo di hwetšwago ka Mangwalong gotee le dijong tša moya tšeo di newago ke “mohlanka yo a botegago le wa temogo.” (Mat. 24:45; Baheb. 12:5, 6) Jehofa gape o re thuša ka mo go oketšegilego, a diriša phuthego ya Bokriste le ‘dimpho tša yona tšeo e lego batho.’ (Baef. 4:8) Go feta moo, Jehofa o a šetša go bona kamoo re arabelago ka gona tlhahlong ya gagwe, le gona o nyaka go re thuša ka mo go oketšegilego. Psalme 32:8 e re: “Ke tlo Xo lemôša ka Xo ruta tsela ye O tl’o xo e swara, ka Xo eletša mahlô a-ka à Xo ukametše.” Ka gona, go bohlokwa gakaakang gore re theetše Jehofa ka mehla! Re swanetše go dula re ikokobeletša yena, re lemoga gore ke Morutiši le Tate wa rena yo lerato.—Bala Mateo 18:4.

9. Ke dika dife tšeo re swanetšego go di efoga, gona ka baka la’ng?

⁹ Ka lehlakoreng le lengwe, a re se keng ra thatafatšwa ke boikgogomošo, go hloka tumelo, goba ke “matla a forago a sebe.” (Baheb. 3:13; Jak. 4:6) Gantši, dika tše di thoma ge motho a hlagolela dikgopolo goba dikganyogo tše sa kgahlišego. A ka ba a fihla ntlheng ya go gana keletšo e swanetšego ya Mangwalo. Se kotsi le go feta ke gore a ka kgomarela boemo bja gagwe bjo bobe bja kgopolo goba ditsela tša gagwe kudu moo a feleletšago ka go itira lenaba la Modimo—boemo bjo bo tšhošago e le ruri! (Die. 1:22-31) Ela hloko mohlala wa Kaine, leitšibolo la Adama le Efa.

Jehofa o Bona Tšohle Gomme o Gata Mogato o Swanetšego

10. Ke ka baka la’ng Jehofa a ile a se amogele sehlabelo sa Kaine, gomme Kaine o ile a arabela bjang?

¹⁰ Ge Kaine le Abele ba be ba tliša dihlabelo  go Jehofa, O be a sa kgahlegele feela dimpho tša bona eupša o be a kgahlegela le maikemišetšo a bona. Ka baka leo, Modimo o ile a amogela sehlabelo sa Abele seo se neilwego ka tumelo, eupša a se amogele sa Kaine, seo ka tsela e itšego se bego se bontšha go hloka tumelo. (Gen. 4:4, 5; Baheb. 11:4) Go e na le gore a ithute tiragalong yeo le go fetola boemo bja gagwe bja kgopolo, Kaine o ile a befelelwa ngwanabo kudu.—Gen. 4:6.

11. Kaine o ile a bontšha pelo e nago le maano-mabe bjang, gomme ke’ng seo re ithutago sona?

¹¹ Jehofa o ile a lemoga boemo bjo bjo kotsi bja kgopolo gomme a boledišana le Kaine ka botho, a mmontšha gore ge a ka dira botse, o tla ba le lebaka la go thaba. Ka manyami, Kaine o ile a hlokomologa keletšo ya Mmopi wa gagwe gomme a bolaya ngwanabo. Bopelo-mpe bja Kaine bo ile bja bontšhwa le ke tsela ya lenyatšo yeo a arabilego potšišo ya Modimo ka yona, ge a re: “Abele monn’axo ó kae?” Kaine o arabile ka gore: “Xa ke tsebe. A ke modiši wa ngwan’ešo?” (Gen. 4:7-9) Ruri pelo ke mmata-mano-mabe—go fihla bokgoleng bja go hlokomologa keletšo e lebanyago ya Modimo! (Jer. 17:9) Ka gona a re ithuteng dipegong tše bjalo gomme re akgofele go gana dikgopolo le dikganyogo tše fošagetšego. (Bala Jakobo 1:14, 15.) Ge e ba re hwetša keletšo ya Mangwalo, anke re e tšeeleng godimo gomme re e lebelele e le bohlatse bja gore Jehofa o a re rata.

Ga go na Sebe sa ka Sephiring

12. Jehofa o arabela bjang diphošong tša rena?

¹² Ba bangwe ba ka nagana gore ge ba sa bonwe ke motho ba dira sebe, ba ka efoga kotlo. (Ps. 19:12) Ge e le gabotse, ga go selo seo go thwego ke sebe sa ka sephiring. “Dilo ka moka di hlobotše e bile di molaleng mahlong a yo re ikarabelago go yena.” (Baheb. 4:13) Jehofa ke Moahlodi yo a hlahlobago maikemišetšo a rena a ka gare-gare, gomme o arabela diphošong tša rena ka tsela yeo e bontšhago toka e phethagetšego. Ke “Modimo yo mabobo le kxauxêlô, wa xo se fêlê pelo, wa botho byo boxolo le therešô.” Lega go le bjalo, a ka “se kê a lesa xo ôtla” bao ba sa itsholego ge ba “tlwaela go dira sebe ka boomo” goba ba bontšha boemo bjo bobe bja kgopolo. (Ek. 34:6, 7; Baheb. 10:26) Therešo ye e ile ya bonagala ge Jehofa a be a dirišana le Akane gotee le Ananiase le Safira.

13. Dikgopolo tše di fošagetšego di ka ba di lebišitše Akane bjang boitshwarong bjo bobe?

¹³ A tshela taelo ya Modimo ka go lebanya, Akane o ile a tšea dithebola tša motse wa Jeriko gomme a di fihla ka tenteng ya gagwe, mohlomongwe a thušwa ke lapa la gagwe. Ge sebe sa gagwe se be se utollwa, Akane o ile a bontšha gore o be a tseba bogolo bja seo a se dirilego, ka ge a boletše gore: “Ke rumotše Morêna.” (Još. 7:20) Go swana le Kaine, Akane o be a hlagoletše pelo e mpe. Boemong bja Akane, bothata bjo bogolo e be e le megabaru, gomme e dirile gore a be le boradia. Ka ge dithebola tša Jeriko e be e le tša Jehofa, Akane ge e le gabotse o be a utsweditše Modimo, gomme se se dirile gore yena le lapa la gagwe ba lahlegelwe ke maphelo a bona.—Još. 7:25.

14, 15. Ke ka baka la’ng Ananiase le Safira ba ile ba se amogelwe ke Modimo, gomme ke’ng seo re ithutago sona?

¹⁴ Ananiase le mosadi wa gagwe, Safira, e be e le ditho tša phuthego ya pele ya Bokriste kua Jerusalema. Ka morago ga Pentekoste ya 33 C.E., go ile gwa hlongwa sekhwama sa mohlakanelwa sa thušo bakeng sa go hlokomela dinyakwa tša nama tša bao ba sa tšwago go thoma go  dumela bao ba tšwago dinageng tša kgole bao ba ilego ba šala Jerusalema. Sekhwama seo se be se thekgwa ka meneelo ya boithatelo. Ananiase o ile a rekiša tšhemo ya gagwe gomme a neela ka karolo e nngwe ya tšhelete yeo. Lega go le bjalo, mosadi wa gagwe o be a tseba gore o ile a itira eka o neetše ka tšhelete ka moka yeo a bego a rekišitše tšhemo ka yona. Ga go pelaelo gore banyalani ba ba be ba nyaka go hwetša tlhompho e kgethegilego ka phuthegong. Eupša tiro ya bona e be e le ya boradia. Ka tsela ya mohlolo, Jehofa o ile a utollela moapostola Petro boradia bjoo bja bona, gomme yena o ile a botšiša Ananiase ka bjona. Gatee-tee, Ananiase o ile a wela fase a hwa. Nakwana ka morago, Safira le yena o ile a hwa.—Dit. 5:1-11.

¹⁵ Bofokodi bja Ananiase le Safira e be e se bja nakwana. Ba ile ba loga maano gomme ba bolela maaka ka maikemišetšo a go radia baapostola. Se se nyamišago le go feta ke gore ba be ba ‘fora moya o mokgethwa le Modimo.’ Karabelo ya Jehofa e bontšha gabotse gore o ikemišeditše go šireletša phuthego go baikaketši. Therešo ke gore, “ke mo go boifišago go wela ka diatleng tša Modimo yo a phelago.”—Baheb. 10:31.

Dula o Botega

16. (a) Sathane o leka go senya batho ba Modimo bjang? (b) Ke mekgwa efe yeo e dirišwago ke Diabolo go senya batho lefelong la geno?

¹⁶ Sathane o dira sohle seo a ka se kgonago go re senya moyeng le go dira gore re se amogelwe ke Jehofa. (Kut. 12:12, 17) Maikemišetšo a mabe a Diabolo a bonagala gabotse lefaseng, leo le laolwago ke dikopano tše di gobogilego tša botona le botshadi gotee le bošoro. Ga bjale diswantšho tšeo di kgothaletšago bootswa di ka hwetšwa gabonolo go dirišwa dikhomphutha goba didirišwa tše dingwe tša elektroniki. A re se keng ra ineela ditlhaselong tša Sathane le ka mohla. Go e na le moo, eka re ka ikwa go swana le mopsalme Dafida yo a ngwadilego gore: “A nkê ke ithutê tsela ya xo loka. . . . Ngwakong wa-ka ke ithsepelêla kè le wa pelo e se naxo bosodi.”—Ps. 101:2.

17. (a) Ke ka baka la’ng Jehofa a feleletša ka go dira gore dibe tše di utilwego di tšwelele pepeneneng? (b) Re swanetše go ikemišetša go dira’ng?

¹⁷ Lehono, Jehofa ga a utolle ka mohlolo dibe tše dikgolo le ditiro tša boradia go swana le ge a be a dira dinakong tše dingwe tše di fetilego. Lega go le bjalo, o bona tšohle gomme ka nako ya gagwe le ka tsela ya gagwe o dira gore dilo tše di utilwego di tšwelele pepeneneng. Paulo o itše: “Dibe tša batho ba bangwe di bonagala phatlalatša, tša iša ka go lebanya kahlolong, eupša ge e le batho ba bangwe dibe tša bona le tšona di bonagala ka morago.” (1 Tim. 5:24) Maikemišetšo a Jehofa a go utolla dibe tše di utilwego ke a lerato. O rata phuthego gomme o nyaka go šireletša bohlweki bja yona. Go feta moo, o gaugela bao ba ilego ba dira sebe eupša ga bjale ba itsholago e le ka kgonthe. (Die. 28:13) Ka gona a re kataneleng go rata Modimo ka  dipelo tše feletšego gomme re gane ditutuetšo ka moka tšeo di ka re senyago.

Dula o E-na le Pelo e Feletšego

18. Kgoši Dafida o be a nyaka gore morwa wa gagwe a ikwe bjang ka Modimo?

¹⁸ Kgoši Dafida o boditše Morwa wa gagwe Solomone gore: “Tseba Modimo wa tat’axo, O mo hlankêlê ka pelo yohle le ka môya wa mafolofolo; xobane Morêna ó fenyêka dipelo ka moka, ó hlaoloxanya thopa tšohle tša dikêlêlô.” (1 Kor. 28:9) Dafida o be a nyaka gore morwa wa gagwe a dire se se fetago go fo dumela go Modimo. O be a nyaka gore Solomone a lemoge kamoo Jehofa a kgahlegelago bahlanka ba Gagwe ka gona. Na o leboga Jehofa bakeng sa seo?

19, 20. Go ya ka Psalme 19:7-11, ke’ng seo se thušitšego Dafida go batamela kgaufsi le Modimo, gomme re ka mo ekiša bjang?

¹⁹ Jehofa o tseba gore batho bao ba sekametšego go lokeng ba tla gogelega go yena le gore ba tla thabišwa ke go tseba dika tša gagwe tše kgahlišago. Ka go rialo, Jehofa o nyaka gore re mo tsebe le gore re tlwaelane le semelo sa gagwe se se kgahlišago. Re dira seo bjang? Ka go ithuta Lentšu la gagwe le ka go lemoga ditšhegofatšo tša gagwe maphelong a rena.—Die. 10:22; Joh. 14:9.

²⁰ Na o bala Lentšu la Modimo ka mehla o lemoga gore le tšwa go Modimo le go rapelela gore a go thuše go le diriša bophelong? Na o bona bohlokwa bja go phela ka go dumelelana le melao ya motheo ya Beibele? (Bala Psalme 19:7-11.) Ge e ba go le bjalo, tumelo ya gago go Jehofa le lerato la gago go yena di tla tšwela pele di gola. Gomme le yena o tla batamela kgaufsi kudu le wena, a sepela a go swere ka letsogo. (Jes. 42:6; Jak. 4:8) Ee, Jehofa o tla bontšha gore o a go rata ka go go šegofatša le go go šireletša moyeng ge o dutše o sepela tseleng e pitlaganego e išago bophelong.—Ps. 91:1, 2; Mat. 7:13, 14.

O be o tla Araba Bjang?

• Ke ka baka la’ng Jehofa a re šetša?

• Ke’ng seo se dirilego gore batho ba bangwe ba fetoge manaba a Modimo?

• Re ka bontšha bjang gore Jehofa ke wa kgonthe go rena?

• Ke bjang re ka tšwelago pele re rata Modimo ka pelo e feletšego?

[Dipotšišo tša Thuto]

[Seswantšho go letlakala 4]

Jehofa o re šetša bjang bjalo ka motswadi yo lerato?

[Seswantšho go letlakala 5]

Ke’ng seo re ithutago sona mohlaleng wa Ananiase?

[Seswantšho go letlakala 6]

Ke’ng seo se tla re thušago go tšwela pele re hlankela Jehofa ka pelo e feletšego?