Lentšu la Jehofa le a Phela

Dintlha tše Kgolo go tšwa Mangwalong a Yago go Tito, Filemone le Baheberu

NAKO e itšego ka morago ga go lokollwa ga gagwe la mathomo kgolegong kua Roma ka 61 C.E., moapostola Paulo o etela sehlakahlaka sa Kereta. Ka go lemoga boemo bja moya bja diphuthego tša moo, o tlogela Tito moo gore a šale a di matlafatša. Ka morago, mohlomongwe a e-tšwa Matsedonia, Paulo o ngwalela Tito lengwalo la go mo hlahla medirong ya gagwe le go mo fa thekgo ya baapostola modirong wa gagwe.

Pejana, pele ga go lokollwa ga gagwe kgolegong ka 61 C.E., Paulo o ile a ngwalela Filemone, ngwanabo rena wa Mokriste yo a dulago Kolose, lengwalo. Ke kgopelo e yago go mogwera.

Mo e ka bago ka 61 C.E., Paulo gape o ile a ngwala lengwalo le le yago go badumedi ba Baheberu ba kua Judea, leo le bontšhago gore Bokriste bo phagametše tshepedišo ya Sejuda. Mangwalo a a mararo ka moka a na le keletšo e bohlokwa kudu go rena.—Baheb. 4:12.

DULA O PHETŠE GABOTSE MOYENG

(Tito 1:1–3:15)

Ka morago ga go nea tlhahlo ya mabapi le go “[bewa ga] bagolo motseng o mongwe le o mongwe,” Paulo o eletša Tito gore a ‘dule a sola ka thata bao ba sa laolegego, e le gore ba phele tumelong.’ O lemošitše bohle ka diphuthegong tša Kereta “go gana go se boife Modimo . . . le go phela ka monagano o hlaphogetšwego.”—Tito 1:5, 10-13; 2:12.

Paulo o nea bana babo ba Kereta keletšo e oketšegilego ya gore ba dule ba phetše gabotse moyeng. O laela Tito gore a “[pheme] dingangišano tša bošilo . . . le go lwela Molao.”—Tito 3:9.

Dipotšišo tša Mangwalo a di a Arabja:

1:15​—Ke bjang “Dilo ka moka” di ka bago di “hlwekile go batho ba hlwekilego,” eupša di šilafetše “go batho ba šilafetšego le ba se nago tumelo”? Gore re tsebe karabo, re swanetše go kwešiša seo Paulo a bego a se bolela ge a be a re “dilo ka moka.” O be a sa bolele ka dilo tšeo lentšu la Modimo leo le ngwadilwego le di ganetšago ka go lebanya, eupša o be a bolela ka dilo tšeo Mangwalo a dumelelago gore badumedi ba itirele diphetho go tšona. Go motho yoo a naganago ka go dumelelana le ditekanyetšo tša Modimo, dilo tše bjalo di hlwekile. Seo se fapane go motho yoo monagano wa gagwe o fapogilego le yoo letswalo la gagwe le šilafetšego. *

3:5​—Ke bjang Bakriste ba tloditšwego ba ‘phološwago ka go hlatswiwa’ le go ‘mpshafatšwa ka moya o mokgethwa’? Ba ‘phološwa ka go hlatswiwa’ ka kgopolo ya gore Modimo o ba hlatswitše, goba o ba hlwekišitše ka madi a Jesu a diriša mohola wa sehlabelo sa topollo. Ba ‘mpshafatšwa ka moya o mokgethwa’ ka gobane ba fetogile ‘dibopiwa tše difsa’ bjalo ka barwa ba Modimo bao ba tswetšwego ka moya.—2 Bakor. 5:17.

Seo re Ithutago Sona:

1:10-13; 2:15. Balebeledi ba Bakriste ba swanetše go bonagatša sebete ge ba phošolla seo se fošagetšego ka phuthegong.

2:3-5. Go swana le lekgolong la pele la nywaga, bo-kgaetšedi ba gotšego tsebong ba Bakriste ba swanetše go ba “ba hlomphegago boitshwarong, e se be bathomeletši, le gona e se be makgoba a beine e ntši, e be bao ba rutago se sebotse.” Ka tsela yeo, e ka ba ba ba atlegilego go nea “basadi ba bafsa” ka phuthegong tlhahlo e atlegago ka sephiring.

3:8, 14. Go boloka “menagano ya [rena] e kgomaretše  mediro e mebotse” ke mo ‘gobotse e bile go a hola’ ka gobane go re thuša go enywa dienywa tirelong ya Modimo gomme go re boloka re arogile lefaseng le kgopo.

LOPA KA “LERATO”

(Fil. 1-25)

Filemone o retwa ka baka la go ba ga gagwe mohlala ‘leratong le tumelong.’ Go lapološa ga gagwe Bakriste-gotee go dirile gore Paulo a ‘thabe kudu le go homotšwa.’—Fil. 4, 5, 7.

Ge a beela balebeledi ka moka mohlala, Paulo o swaragana le taba e kgolo ya mabapi le Onesimo ka go mo lopa ‘ka lerato,’ e sego ka go mo laela. O botša Filemone gore: “Ke go ngwalela ke holofela gore o tla dumelelana le se, ke tseba gore o tla ba wa dira dilo tše di fetago tše ke di bolelago.”—Fil. 8, 9, 21.

Dipotšišo tša Mangwalo di a Arabja:

10, 11, 18​—Go tlile bjang gore Onesimo yo a bego “a se na mohola” a be “yo a holago”? Onesimo e be e le mohlanka yo a bego a sa rate bohlanka yo a ilego a tšhaba lapeng la Filemone kua Kolose gomme a tšhabela Roma. Go bonagala Onesimo a ile a ba a utswetša mong wa gagwe e le gore a lefelele leeto leo la dikhilomithara tše 1 400. Ruri o be a se na mohola go Filemone. Lega go le bjalo, ge a le kua Roma, Paulo o ile a thuša Onesimo gore a fetoge Mokriste. Ka ge gona bjale e le Mokriste, mohlanka yo yoo a bego a “se na mohola” o ile a ba “yo a holago.”

15, 16​—Ke ka baka la’ng Paulo a se a ka a kgopela Filemone gore a lokolle Onesimo? Paulo o be a nyaka go kgomarela taelong ya gagwe ya go ‘bolela ka mmušo wa Modimo le go ruta dilo tše di lego mabapi le morena Jesu Kriste.’ Ka baka leo, o ile a kgetha go se tsena-tsene ditaba tša batho, tše bjalo ka tša mabapi le bokgoba.—Dit. 28:31.

Seo re Ithutago Sona:

2. Filemone o ile a bula legae la gagwe bakeng sa gore go swarelwe diboka tša Bokriste go lona. Go swarela seboka sa tirelo ya tšhemo ka magaeng a rena ke tokelo.—Baroma 16:5; Bakol. 4:15.

4-7. Re swanetše go gata mogato wa pele go reta badumedi-gotee le rena bao ba beago mohlala wa tumelo le lerato.

15, 16. Go tšwelela ga maemo a sa kgahlišego bophelong ga se gwa swanela go dumelelwa go dira gore re belaele go sa nyakege. Mafelelo a go dira bjalo e ka ba a holago, go swana le boemong bja Onesimo.

21. Paulo o be a letetše gore Filemone a lebalele Onesimo. Go lebeletšwe gore le rena re lebalele ngwanabo rena yo a ka bago a re fošeditše.—Mat. 6:14.

‘PHEGELELANG KGOLONG’

(Baheb. 1:1–13:25)

Ge a hlatsela gore go ba le tumelo sehlabelong sa Jesu go feta mediro ya Molao, Paulo o gatelela bogolo bja Mothomi wa Bokriste, boperisita bja gagwe, sehlabelo sa gagwe gotee le kgwerano e mpsha. (Baheb. 3:1-3; 7:1-3, 22; 8:6; 9:11-14, 25, 26) Tsebo ye ka ntle le pelaelo e swanetše go ba e ile ya thuša Bakriste ba Baheberu go kgotlelela go tlaišwa ke Bajuda. Paulo o kgothaletša badumedi-gotee le yena ba Baheberu gore ba ‘phegelele kgolong.’—Baheb. 6:1.

Tumelo e bohlokwa gakaaka’ng thulaganyong ya Bokriste? Paulo o ngwala gore: “Ka ntle le tumelo go kgahliša Modimo gabotse ga go kgonege.” O nea Baheberu kgothatšo e rego: “A re kitimeng ka kgotlelelo lebelo leo le beilwego pele ga rena,” re dira bjalo ka tumelo.—Baheb. 11:6; 12:1.

Dipotšišo tša Mangwalo di a Arabja:

2:14, 15​—Na go ba ga Sathane le “mokgwa wa go baka lehu” go bontšha gore a ka dira gore motho le ge e le ofe yo a mo kgethago a hwe lehu le le sa letelwago? Aowa, ga go bjalo. Lega go le bjalo, go tloga mathomong a tsela ya Sathane ya bokgopo kua Edene, maaka a gagwe a bakile lehu ka gobane Adama o ile a dira sebe gomme a fetišetša sebe seo le lehu molokong wa batho. (Baroma 5:12) Go oketša moo, bahlanka ba Sathane ba lefaseng ba tlaišitše bahlanka ba Modimo go fihlela ba e-hwa, go etša ge ba dirile go Jesu. Eupša seo ga se bolele gore Sathane o na le matla a sa lekanywego a go bolaya motho le ge e le ofe yoo a mo nyakago. Ge e ba go be go le bjalo, ga go pelaelo gore nkabe a bolaile barapedi ka  moka ba Jehofa kgale. Jehofa o šireletša batho ba gagwe e le sehlopha gomme ga a dumelele Sathane go ba bolaya molokwana-rite. Gaešita le ge Modimo a dumelela gore ba bangwe ba rena ba hwe ka baka la tlhaselo ya Sathane, re ka kgodišega gore Modimo o tla lokiša kgobalo le ge e le efe yeo re bago le yona.

4:9-11​—Re ‘tsena boikhutšong bja Modimo’ bjang? Bofelong bja matšatši a tshelelago a tlholo, Modimo o ile a khutša modirong wa gagwe wa tlholo a kgodišegile gore morero wa gagwe ka lefase le batho o tla phethagala. (Gen. 1:28; 2:2, 3) Re ‘tsena boikhutšong bjoo’ ka go tlogela go dira mediro ya go itokafatša le ka go amogela tokišetšo ya Modimo ya go re phološa. Ge re dumela go Jehofa gomme re latela Morwa wa gagwe ka go mo kwa go e na le go phegelela dikgahlego tša boithati, re thabela ditšhegofatšo tše lapološago le tšeo di tlišago boiketlo letšatši le letšatši.—Mat. 11:28-30.

9:16​—“Mogweranyi yo e lego motho” wa kgwerano e mpsha ke mang? Jehofa ke Modiri wa kgwerano e mpsha, mola Jesu e le “mogweranyi yo e lego motho.” Jesu ke Mmoelanyi wa kgwerano yeo, gomme ka lehu la gagwe o neile sehlabelo seo se bego se nyakega bakeng sa go e tiiša ka molao.—Luka 22:20; Baheb. 9:15.

11:10, 13-16​—Aborahama o be a letetše “motse” ofe? Wo e be e se motse wa kgonthe eupša e be e le motse wa seswantšhetšo. Aborahama o be a letetše “Jerusalema wa legodimong,” wo o bopšago ke Kriste Jesu gotee le babuši-gotee le yena ba 144 000. Babuši-gotee ba ba le letagong la bona la legodimong gape ba bolelwa e le “motse o mokgethwa, Jerusalema o Mofsa.” (Baheb. 12:22; Kut. 14:1; 21:2) Aborahama o be a lebeletše pele go phela ka tlase ga pušo ya Mmušo wa Modimo.

12:2​—“Lethabo leo le bego le beilwe pele ga [Jesu]” leo a ilego a “kgotlelela kota ya tlhokofatšo” ka baka la lona e be e le eng? E be e le lethabo la go bona seo se tlago go fihlelelwa ke bodiredi bja gagwe—go akaretša le go kgethagatšwa ga leina la Jehofa, go godišwa ga bogoši bja Modimo gotee le go lopollwa ga moloko wa batho lehung. Le gona Jesu o be a lebeletše pele moputsong wa go tlo buša e le Kgoši gotee le go hlankela e le Moperisita yo Mogolo bakeng sa go hola moloko wa batho.

13:20​—Ke ka baka la’ng go thwe kgwerano e mpsha ke “e sa felego”? Ke e sa felego ka baka la mabaka a mararo: (1) Ga go yeo e ka tsogago e e tšeetše sebaka, (2) mafelelo a yona ke a sa ruri, e bile (3) ba “dinku tše dingwe” ba tla tšwela pele ba holwa ke thulaganyo ya kgwerano e mpsha ka morago ga Haramagedone.—Joh. 10:16.

Seo re Ithutago Sona:

5:14. Re swanetše go ba barutwana ba mafolofolo ba Lentšu la Modimo, Beibele, gomme re dire seo re ithutago sona. Ga go na tsela e nngwe yeo ka yona re ka ‘tlwaetšago matla a rena a go hlatha go kgethologanya se se nepagetšego le se se fošagetšego.’—1 Bakor. 2:10.

6:17-19. Go thea kholofelo ya rena ka mo go tiilego kholofetšong ya Modimo le kenong ya gagwe go tla re thuša gore re se ke ra fapoga tseleng ya therešo.

12:3, 4. Go e na le go ‘lapa gomme ra felelwa ke matla meoyeng ya rena’ ka baka la diteko tše nyenyane goba kganetšo yeo re ka lebeletšanago le yona, re swanetše go dira tšwelopele e lebišago kgolong gomme re kaonefatše bokgoni bja rena bja go kgotlelela diteko. Re swanetše go ikemišetša go lwa “go fihla tšhollong ya Madi,” e lego go fihla lehung.—Baheb. 10:36-39.

12:13-15. Ga se ra swanela go dumelela “modu wa mpholo,” goba motho le ge e le ofe ka phuthegong yoo a sola-solago tsela yeo dilo di dirwago ka yona, go re palediša go ‘lokiša ditsela bakeng sa dinao tša rena.’

12:26-28. “Dilo tšeo di dirilwego” ka diatla tšeo e sego tša Modimo—tshepedišo ka moka ya gona bjale ya dilo, gaešita le “legodimo” le kgopo—di tla šišinywa e le gore di se sa hlwa di e-ba gona. Ge seo se direga, go tla šala feela “dilo tšeo di sa šišinywego,” e lego Mmušo gotee le bathekgi ba wona. Go bohlokwa e le ruri gore re bolele ka Mmušo ka mafolofolo gomme re phele ka go dumelelana le melao ya wona ya motheo!

13:7, 17. Go dula re gopola keletšo ye ya gore re kwe balebeledi ba phuthego le go ikokobeletša bona go tla re thuša go bonagatša moya wa tirišano.

[Mongwalo wa tlase]