“Jehofa ke Matla A-ka”

Bjalo ka ge go Anega Joan Coville

Ke belegwe ka July 1925 kua Huddersfield, Engelane. Ke be ke le ngwana ke nnoši, le gona ke se ka phela gabotse mmeleng. Ge e le gabotse tate o be a rata go bolela gore, “Nako le nako ge moya o fokela go wena, o a babja.” Gomme se se be se bonagala e le therešo!

GE KE be ke sa le ngwana, baruti ba be ba dula ba rapelela gore go be le khutšo, eupša ge ntwa ya bobedi ya lefase e thoma, ba ile ba rapelela phenyo. Se se ile sa ntlaba gomme ka thoma go ba le dipelaelo. Ka yona nako yeo, go ile gwa tla Annie Ratcliffe e lego Hlatse ya Jehofa e nnoši yeo e dulago tikologong ya gabo rena.

Go Ithuta Therešo

Annie o ile a re fa puku ya Salvation gomme a laletša mma go ba gona ge ba ahla-ahla Beibele legaeng la gagwe. * Mma o ile a kgopela gore ke sepele le yena. Ke sa dutše ke gopola poledišano yeo ya mathomo. E be e le mabapi le topollo, gomme seo se ilego sa mmakatša ke gore poledišano yeo e be e sa leše bodutu le gatee. E ile ya araba dipotšišo tša-ka tše dintši. Bekeng e latetšego re ile ra ba gona gape. Ka nako yeo, boporofeta bja Jesu bja mabapi le pontšho ya mehla ya bofelo bo ile bja hlaloswa. Ka go lebelela maemo a nyamišago lefaseng, nna gotee le mma gatee-tee re ile ra lemoga gore se ke therešo. Ka lona letšatši leo, re ile ra laletšwa go ya Holong ya Mmušo.

Ka holong, ke ile ka kopana le babulamadibogo ba bangwe ba bafsa gomme yo mongwe wa bona e be e le Joyce Barber (ga bjale ke Ellis), yo a sa dutšego a hlankela le monna wa gagwe, Peter, kua Bethele ya London. Ke be ke nagana gore bobulamadibogo ke selo seo motho yo mongwe le yo mongwe a bego a se dira. Ka gona, di tloga fase ke ile ka thoma go bolela diiri tše 60 kgwedi e nngwe le e nngwe, gaešita le ge ke be ke sa tsena sekolo.

Ka morago ga dikgwedi tše hlano, ka February 11, 1940, nna le mma re ile ra kolobetšwa kopanong ya zone (yeo ga bjale e bitšwago kopano ya tikologo) kua Bradford. Tate ga se a ka a ganetšana le tumelo ya rena e mpsha, eupša ga se a ka a amogela therešo. Ka nako ya ge ke kolobetšwa, go ile gwa thongwa modiro wa go nea bohlatse seterateng. Ke ile ka tšea karolo ke swere mokotla wa dimakasine e bile ke rwele dipampiri tše di nago le molaetša. Ka Mokibelo o mongwe, ke ile ka abelwa go ema lefelong la leema-ema la mabenkeleng. Ke be ke sa boifa batho, ge ke be ke sa tšhogile bjalo go be go bonagala eka barutwana ka moka bao ke bego ke tsena le bona sekolo ba be ba feta moo ke bego ke eme gona!

Ka 1940, khamphani (ka ge phuthego e be e bitšwa bjalo mehleng yeo) yeo re bego re kopanela go yona e be e swanetše go aroganywa. Ka morago  ga go aroganywa ga yona, mo e ka bago dithaka tša-ka ka moka di be di le ka khamphaning e nngwe. Ke ile ka ipelaetša ka se go mohlanka wa khamphani (yo ga bjale a bitšwago molebeledi yo a okamelago). O ile a re, “Ge e ba o nyaka bagwera ba e sa lego bafsa, sepela o ye go ba tsoma tšhemong.” Gomme ke ile ka dira sona seo! Go se go ye kae, ke ile ka kopana le Elsie Noble. O ile a amogela therešo gomme a ba mogwera wa-ka wa bophelo ka moka.

Tirelo ya Bobulamadibogo le Ditšhegofatšo tša Yona

Ka morago ga go fetša sekolo, ke ile ka thwalwa ke ramatlotlo. Lega go le bjalo, ge ke be ke bona lethabo leo bahlanka ba nako e tletšego ba bago le lona, kganyogo ya-ka ya go hlankela Jehofa ke le mmulamadibogo e ile ya oketšega. Ka May 1945, ke ile ka thabela go hlankela ke le mmulamadibogo yo a kgethegilego. Letšatšing la-ka la pele la go bula madibogo, pula e ile ya na letšatši ka moka. Lega go le bjalo, ke be ke thabetše kudu go ba modirong wa boboledi moo e lego gore ke be ke se na taba le pula. Ge e le gabotse, go ba bodireding letšatši le lengwe le le lengwe le go šidullwa ke paesekele ya-ka ka mehla ge ke le bodireding go bile le mafelelo a mabotse boemong bja-ka bja tša maphelo. Gaešita le ge boima bja-ka bja mmele bo sa ka bja feta dikhilograma tše 42, le ka mohla ga se ka ka ka šitišega tirelong ya-ka ya bobulamadibogo. Go theoša le nywaga, ke ile ka bona e le ka kgonthe gore “Jehofa ke matla a-ka.”—Ps. 28:7 PK.

Ka pakane ya go hloma diphuthego tše difsa, ke be ke le mmulamadibogo yo a kgethegilego yo a bego a romelwa metseng yeo go se nago Dihlatse go yona. Pele, ke ile ka hlankela nywaga e meraro kua Engelane gomme ka morago ka hlankela e meraro kua Ireland. Ge ke be ke bula madibogo kua Lisburn, Ireland, ke ile ka ithuta le monna yo e bego e le mothuši wa moruti wa kereke ya Protestanta. Ge a be a ithuta therešo mabapi le dithuto tša motheo tša Beibele, o be a e ruta phuthego ya gagwe. Ditho tše dingwe tša phuthego di ile tša ipelaetša go balaodi ba kereke, gomme o ile a kgopelwa gore a hlalose. O ile a re o be a bona e le boikarabelo bja gagwe bja Bokriste go botša mohlape gore o o rutile maaka a mantši. Gaešita le ge ba lapa ba be ba mo ganetša kudu, o ile a neela bophelo bja gagwe go Jehofa gomme a mo hlankela ka potego go fihla lehung.

Kabelong ya-ka ya bobedi ya bobulamadibogo kua Larne, Ireland, ka 1950 ke ile ka hlankela ke nnoši ka dibeke tše tshela, ka ge mmulamadibogo-gotee le nna a be a le Kopanong ya Koketšego ya Pušo ya Modimo kua New York. Yeo e be e le nako e thata go nna. Ke be ke tloga ke duma go ba gona kopanong. Lega go le bjalo, dibekeng tšona tšeo, ke ile ka ba le diphihlelo tše mmalwa tše kgothatšago tirelong ya tšhemo. Ke ile ka kopana le mokgalabje yo a ilego a amogela e nngwe ya dikgatišo tša rena nywageng ya ka godimo ga e 20 e fetilego. Go theoša le nywaga, o ile a e bala gantši moo e lego gore o be a šetše a e tseba ka hlogo. Yena le morwa wa gagwe gotee le morwedi, ba ile ba amogela therešo.

Go Hwetša Tlwaetšo Sekolong sa Gileada

Ka 1951, nna gotee le babulamadibogo ba bangwe ba lesome ba tšwago Engelane, re ile ra laletšwa go ya klaseng ya bo-17 ya Sekolo Gileada kua Lansing Borwa, New York. Ruri ke ile ka thabela tlhahlo ya Beibele yeo re e hweditšego dikgweding  tšeo! Ka nako yeo dikgaetšedi di be di sa ngwadišwe Sekolong sa Bodiredi sa Pušo ya Modimo ka phuthegong, eupša kua Gileada rena dikgaetšedi re be hwetša dikabelo tša go nea dipolelo tša diithuti le dipego. Re be re tšhogile kudu! Ge ke be ke bea polelo ya-ka ya pele, seatla sa-ka seo se bego se swere puku ya go ngwalela dintlha se be se thothomela. Mofahloši, e lego Ngwanabo rena Maxwell Friend, o ile a bolela ka tsela e segišago gore: “Ga se feela gore o be o tšhogile mathomong bjalo ka diboledi tšeo di nago le bokgoni, eupša o be o tšhogile go fihla mafelelong.” Nakong yeo ya tlwaetšo, ka moka ga rena re ile ra kaonefatša bokgoni bja rena bja go itlhalosa pele ga sehlopha. Kapejana, tlwaetšo ya rena e ile ya fela gomme rena dialoga re ile ra abelwa go ya dinageng tše mmalwa tše šele. Ke ile ka abelwa go ya Thailand!

“Naga yeo e Nago le Lethabo”

Ke ile ka lebelela go abelwa Astrid Anderson e le modirišani wa-ka wa moromiwa kua Thailand e le mpho e tšwago go Jehofa. Go ile gwa re tšea dibeke tše šupago ka sekepe sa merwalo go fihla moo. Ge re fihla motse-mošate, Bangkok, re ile ra hwetša e le motse woo o nago le mebaraka yeo e nyeunyago batho gotee le ditsela tša mararankodi. Ka 1952, go be go e-na le bagoeledi ba Mmušo ba ka tlase ga ba 150 kua Thailand.

Ge re be re bona Morokami wa se-Thailand la mathomo, re ile ra ipotšiša gore, ‘Re tla kgona bjang go bolela le leleme le?’ E be e le tlhohlo go bolela mantšu ka segalo se se swanetšego. Ka mohlala, ge lentšu khaù le thongwa ka segalo sa godimo gomme le feleletšwa ka segalo sa fase le ra gore “reise,” eupša lentšu lona leo ge le bolelwa ka segalo sa fase le ra gore “ditaba.” Ka gona, ge re be re le tirelong ya tšhemo, mathomong re be re botša batho gore, “Ke go tlišetša reise e botse” go e na le gore “ditaba tše dibotse”! Eupša ganyenyane-ganyenyane—le ka morago ga go segwa gantši—re ile ra kgona go bolela leleme leo.

Batho ba Thailand ba na le bogwera kudu. Thailand e bitšwa ka tsela e swanetšego gore ke Naga yeo e Nago le Lethabo. Kabelo ya rena ya pele e be e le motse wa Khorat (woo ga bjale o bitšwago Nakhon Ratchasima), moo re ilego ra hlankela nywaga e mebedi. Ka morago re ile ra abelwa motseng wa Chiang Mai. Ma-Thailand a mantši ke Mabuddha gomme ga se a tlwaelana le Beibele. Kua Khorat, ke ile ka ithuta le molaodi wa poso. Re ile ra bolela ka mopatriareka Aborahama. Ka ge monna yo a ile a kwa ka leina Aborahama peleng, o ile a dumela ka hlogo a thabile. Lega go le bjalo, kapejana ke ile ka lemoga gore re be re sa bolele ka Aborahama o tee. Molaodi wa poso o be a nagana ka Abraham Lincoln, yo e kilego ya ba mopresidente wa United States!

Re ile ra thabela go ruta ma-Thailand a dipelo tše di botegago Beibele, eupša ka nako e swanago, batho ba Thailand ba ile ba re ruta go hwetša lethabo ka go phela bophelo bjo bonolo. Thuto yeo e be e le bohlokwa ka gobane legae la baromiwa la kua Khorat le be le se na mohlagase goba tshepedišo ya meetse. Dikabelong tše bjalo, re “ithutile sephiri sa . . . go atelwa ke dilo le go di hloka.” Go swana le moapostola Paulo, re ile ra bona seo se bolelwago ke go ba le ‘matla ka baka la yo a fago matla.’—Bafil. 4:12, 13.

Modirišani yo Mofsa le Kabelo e Mpsha

Morago kua ka 1945, ke ile ka etela London. Ketelong yeo, ke ile ka ya Musiamong wa Brithania ke e-na le babulamadibogo ba bangwe gotee le ditho tše dingwe tša lapa la Bethele. Yo mongwe wa bona e be e le Allan Coville, yo ka moragonyana ga moo a ilego a ya klaseng ya bo-11 ya Gilead. O ile a abelwa go ya Fora gomme ka morago a abelwa go ya Belgium. * Ka morago, ge ke be ke sa hlankela ke le moromiwa kua Thailand, o ile a kgopela go nnyala gomme ka dumela.

Re ile ra nyalana kua Brussels, Belgium, ka July 9, 1955. Ka mehla ke be ke duma go ya Paris maikhutšong a ka morago ga letšatši la lenyalo, ka gona Allan o ile a rulaganya gore re be gona kopanong gona moo bekeng e latelago. Lega go le bjalo, ge re fihla fela Allan o ile a kgopelwa gore a thuše ka go toloka nakong ya kopano ka moka. Letšatši le lengwe le lengwe, o be a swanetše go tloga e sa le mesong kudu gomme re boa bošego. Ka gona, ke ile ka fetša maikhutšo a ka morago ga letšatši la lenyalo ke le Paris, eupša gantši ke be bona Allan a le kgole—a le sethaleng! Lega go le bjalo, ke be ke thabetše go bona monna wa-ka yo  ke sa tšwago go nyalana le yena a dirišetšwa go hlankela bana babo le dikgaetšedi, e bile ke sa belaele gore ge e ba Jehofa e le karolo e bohlokwa ya lenyalo la rena, re tla thaba e le ka kgonthe.

Le gona lenyalo le ile la nkiša tšhemong e mpsha—Belgium. Seo ke bego ke se tseba ka Belgium ke gore e ile ya ba lefelo leo go ilego wa lwelwa dintwa tše mmalwa go lona, eupša go se go ye kae ke ile ka lemoga gore batho ba Belgium ba tloga ba rata khutšo. Kabelo ya-ka e be e akaretša le gore ke ithute Sefora, seo se bolelwago ka karolong ya ka borwa ya naga.

Ka 1955 go be go e-na le bagoeledi ba 4 500 kua Belgium. Mo e ka bago ka nywaga e 50, nna le Allan re ile ra hlankela Bethele gotee le modirong wa bosepedi. Nywaga ya pele e mebedi le seripa re be re sepela ka paesekele re namela meboto le go e fologa, go sa šetšwe boemo bja leratadima. Go theoša le nywaga, re ile ra robala magaeng a fetago a 2 000 a fapa-fapanego a Dihlatse! Gantši ke be ke kopana le bana babo rena le dikgaetšedi bao ba bego ba fokola mmeleng eupša ba hlankela Jehofa ka matla a bona ka moka. Mohlala wa bona o ile wa nkgothaletša gore ke se ke ka tlogela tirelo ya-ka. Bofelong bja beke e nngwe le e nngwe ge re be re fetša go etela phuthego, ka mehla re be re ikwa re matlafetše. (Baroma 1:11, 12) Allan o ile a ipontšha e le mogwera wa kgonthe. Mantšu a lego go Mmoledi 4:9, 10 a rereša gakaakang ge a re: “Boló ké mola è le ba babedi, . . . Xe ba ka wa ba tlo tsošana”!

Ditšhegofatšo Bophelong bja go Hlankela ka ‘Matla a Jehofa’

Go theoša le nywaga, nna le Allan re bile le diphihlelo tše dintši kudu tše thabišago mabapi le go thuša batho ba bangwe go hlankela Jehofa. Ka mohlala, ka 1983 re ile ra etela phuthego ya Sefora kua Antwerp, moo re ilego ra dula le lapa leo gape le bego le amogetše Benjamin Bandiwila, ngwanabo rena wa mofsa yo a tšwago Zaire (ga bjale ke Democratic Republic of Congo). Benjamin o be a hudugetše Belgium gore a tšwetše pele thuto e phagamego. O ile a re botša gore: “Ruri ke duma bophelo bja lena, le ineetše ka mo go feletšego tirelong ya Jehofa.” Allan o ile araba ka gore: “O re o a re duma; eupša o phegelela thuto ya lefase. Na ga o nagane gore dilo tšeo tše pedi di a thulana?” Mantšu a ao a lebanyago a ile a dira gore Benjamin a nagane ka bophelo bja gagwe. Ka morago ge a boetše Zaire o ile a thoma go bula madibogo gomme gona bjale o hlankela e le setho sa Komiti ya Lekala.

Ka 1999, ke ile ka buiwa e le gore ba ntšhe sešo mo mogolong wa-ka. Ga e sa le go tloga ka nako yeo, ke ile ka imela dikhilograma tše 30 feela. Ruri ke ‘sebjana sa letsopa.’ Lega go le bjalo, ke thabela gore Jehofa o mphile “matla a fetago a tlwaelegilego.” Ka morago ga go buiwa ga-ka, O ile a dira gore ke kgone go sepela le Allan gape modirong wa bosepedi. (2 Bakor. 4:7) Ke moka, ka March 2004, Allan o ile a hwa a robetše. Ke mo hlologetše kudu, eupša ke homotšwa ke go tseba gore o ka mogopolong wa Jehofa.

Lehono, ke na le nywaga e 83 gomme ke na le nywaga e fetago e 63 ke le tirelong ya nako e tletšego. Ke sa dutše ke le mafolofolo bodireding, ke swara thuto ya Beibele ka gae le go diriša sebaka se se bulegago letšatši le letšatši go bolela ka morero wa Jehofa o kgahlišago. Ka dinako tše dingwe ke ipotšiša gore, ‘Bophelo bja-ka bo ka be bo le bjang ge nkabe ke se ka thoma go bula madibogo ka 1945?’ Ka nako yeo, go be go bonagala boemo bja-ka bjo bo sa kgahlišego bja tša maphelo e le lebaka le le kwagalago la go se dire bjalo. Lega go le bjalo, ke leboga kudu gore ke ile ka tsenela tirelo ya bobulamadibogo ke sa le yo monyenyane! Ke bile le tokelo ya go bona gore ge e ba re etiša Jehofa pele, o tla ba matla a rena.

[Mengwalo ya tlase]

[Seswantšho go letlakala 18]

Ke e-na le modirišani wa-ka wa moromiwa, Astrid Anderson (ka go le letona)

[Seswantšho go letlakala 18]

Ke le modirong wa bosepedi le monna wa-ka, ka 1956

[Seswantšho go letlakala 20]

Ke e-na le Allan ka 2000