Jehofa o Lebelela Botse go Rena

“Mahlô a [Jehofa] a tsepeletše lefase ka moka, xore a bônatšê matla a xaxwe ka bao ba lebeletšexo Yêna ka pelo ka moka.”​—2 KOR. 16:9.

1. Ke ka baka la’ng Jehofa a re fenyeka?

JEHOFA ke Tate yo a phethagetšego. O re tseba gabotse kudu moo e lego gore o tseba gaešita le “thopa tšohle tša dikêlêlô [tša rena].” (1 Kor. 28:9) Lega go le bjalo, ga a fo re fenyeka e le gore a hwetše diphošo tša rena. (Ps. 11:4; 130:3) Go e na le moo, ka lerato o nyaka go re šireletša selong le ge e le sefe seo se ka senyago tswalano ya rena le yena goba ditebelelo tša rena tša go hwetša bophelo bjo bo sa felego.—Ps. 25:8-10, 12, 13.

2. Jehofa o bontšha matla a gagwe bakeng sa bomang?

² Jehofa ke yo matla-ohle e bile o bona tšohle. Ka baka leo, a ka thuša bao ba mmotegelago nako le nako ge ba mo kgopela thušo, le gona a ka ba thekga ge ba lekwa. Dikoronika tša Bobedi 16:9 e re: “Mahlô a [Jehofa] a tsepeletše lefase ka moka, xore a bônatšê matla a xaxwe ka bao ba lebeletšexo Yêna ka pelo ka moka.” Ela hloko gore Jehofa o diriša matla a gagwe bakeng sa go thekga bao ba mo hlankelago ka pelo ka moka, e lego pelo e sekilego le e nago le maikemišetšo a mabotse. Ga a tshwenyege ka tsela e bjalo ka bao ba nago le boradia goba boikaketši.—Još. 7:1, 20, 21, 25; Die. 1:23-33.

 Sepela le Modimo

3, 4. Go ‘sepela le Modimo’ go bolela’ng, gomme ke mehlala efe ya Beibele yeo e re thušago go kwešiša taba ye?

³ Go ba bantši, ke mo go sa kwešišegego gore Mmopi wa legohle la rena le legolo ka go fetišiša o dumelela batho go sepela le yena ka tsela ya seswantšhetšo. Lega go le bjalo, se ke sona seo Jehofa a nyakago re se dira. Mehleng ya Beibele, Henoge le Noa ‘ba ile ba sepela ba na le Modimo.’ (Gen. 5:24; 6:9) Moše “o ile a tšwela pele a tiile go etša ge eka o bona Yo a sa bonagalego.” (Baheb. 11:27) Kgoši Dafida o ile a ikhwetša a sepela ka boikokobetšo le Tatagwe wa legodimong. O itše: “[Jehofa] ó hleng xa-ka, nka se kê ka šutha.”—Ps. 16:8.

⁴ Ke therešo gore re ka se sware seatla sa Jehofa ka go lebanya gomme ra sepela le yena. Eupša re ka dira bjalo ka tsela ya seswantšhetšo. Bjang? Mopsalme Asafa o ngwala gore: “Nna ke dula kè na naxô’; O nthswere ka seatla sa-ka sa le letona. O nthsepediša ka morêrô w’axo.” (Ps. 73:23, 24) Ge re bea taba ka go lebanya, re sepela le Jehofa ge re latela keletšo ya gagwe ka mo go feletšego, yeo re e hwetšago kudu-kudu ka Lentšu la gagwe le le ngwadilwego le ka “mohlanka yo a botegago le wa temogo.”—Mat. 24:45; 2 Tim. 3:16.

5. Jehofa o lebelela batho ba gagwe ba botegago bjang bjalo ka tate yo lerato, gomme re swanetše go ikwa bjang ka yena?

⁵ Ka ge Jehofa a tšeela godimo bao ba sepelago le yena, o ba lebelela bjalo ka tate yo lerato, o a ba hlokomela, o a ba šireletša e bile o a ba ruta. Modimo o re: “Ke tlo Xo lemôša ka Xo ruta tsela ye O tl’o xo e swara, ka Xo eletša mahlô a-ka à Xo ukametše.” (Ps. 32:8) Ipotšiše gore: ‘Na ke ipona ke sepela le Jehofa, ke gore, ke theetša bohlale bja gagwe e bile ke tseba gore mahlo a gagwe a ntebeletše? Na go lemoga ga-ka go ba gona ga gagwe go tutuetša dikgopolo tša-ka, mantšu le ditiro? Le gona ge ke dira phošo, na ke bona Jehofa e se Modimo yo a lego kgole le yo thata, eupša e le Tate yo borutho le yo a nago le kgaugelo yoo a nyakago go thuša batho ba itsholago gore ba boele ba be le tswalano e borutho le yena?’—Ps. 51:17.

6. Jehofa o phala motswadi wa motho bjang?

⁶ Ka dinako tše dingwe, Jehofa a ka re thuša gaešita le pele re ka dira bobe. Ka mohlala, a ka lemoga gore pelo ya rena yeo e lego mmata-mano-mabe e thoma go duma dilo tše sa swanelago. (Jer. 17:9) Boemong bjo bjalo, a ka gata mogato kapejana go feta batswadi ba batho ka gobane “dintaka” tša gagwe di na le bokgoni bja go bona ka gare-gare ga rena, go hlahloba dikgopolo tša rena tša ka gare-gare. (Ps. 11:4; 139:4; Jer. 17:10) Ela hloko kamoo Modimo a ilego a arabela ka gona boemong bjoo bo ilego bja tšwelela bophelong bja Baruke, mongwaledi le mogwera wa kgaufsi wa moporofeta Jeremia.

Tate wa Kgonthe go Baruke

7, 8. (a) Baruke e be e le mang, gomme o ile a thoma go ba le dikganyogo dife tše sa kgahlišego ka pelong ya gagwe? (b) Jehofa o bontšhitše bjang gore o be a tshwenyega ka Baruke bjalo ka tate yo lerato?

⁷ Baruke e be e le mongwadi yo a tsebegago yoo ka potego a ilego a hlankela le Jeremia kabelong yeo e ilego ya ba e thata—ba tsebatša dikahlolo tša Jehofa go Juda. (Jer. 1:18, 19) Lebakeng le itšego, Baruke yoo a ka bago a be a e-tšwa lapeng le le atlegilego, o ile a thoma go inyakela “tše kxolo.” Mohlomongwe o ile a thoma go lebiša tlhokomelo go dumeng dilo goba dikganyogong tša go atlega ka dilo tše di bonagalago. Go sa šetšwe gore boemo e be e le bofe, Jehofa o ile a bona gore dikgopolo tše bjalo tše kotsi di be di thoma go tšwelela ka pelong ya Baruke. A bolela a diriša Jeremia, Jehofa kapejana o botša Baruke gore: “O re: Ke yo madi-mabe! Hleng mahloko a-ka Morêna ó a hlatlaxanya le ma-ja-pelô! Ke fedile matla ka phêxêlô; mo nkaxo khutša se xo bône!” Ke moka Modimo o ile a re: “A O sa inyakêla tše kxolo? Se di nyakê!”—Jer. 45:1-5.

⁸ Gaešita le ge a be a tiile ge a be a bolela le Baruke, Jehofa o arabetše bjalo ka tate yo a tshwenyegilego yo lerato, e sego ka bogale. Go molaleng gore Modimo o ile a bona gore dikganyogo tša monna yo di be di sa bonagatše gore o na le pelo e kgopo goba ya maano-mabe. Jehofa gape o be a tseba gore Jerusalema le Juda di be di le  mehleng ya tšona ya bofelo, gomme o be a sa nyake gore Baruke a kgopše nakong yeo e bohlokwa. Ka go rialo, go dira gore mohlanka wa gagwe a hlaphogelwe, Modimo o ile a mo gopotša gore O be a “tliša bošula bo tl’o xo wêla nama yohle,” le go tlaleletša ka gore ge Baruke a ka dira ka bohlale, o be a tla phela. (Jer. 45:5) Ge e le gabotse, Modimo o be a re: ‘Hlokomela, Baruke. O se ke wa lebala seo kgaufsinyana se tlago go diragalela Juda le Jerusalema tša sebe. Dula o botega gomme o phele! Ke tla go šireletša.’ Ka ntle le pelaelo Jehofa o ile a fihlelela pelo ya Baruke, ka gobane o ile a arabela gabotse gomme a phologa phedišo ya Jerusalema, yeo e ilego ya tla ka morago ga nywaga e 17.

9. O ka araba bjang dipotšišo tšeo di rotošitšwego serapeng?

⁹ Ge o dutše o nagana ka pego e lego mabapi le Baruke, ela hloko dipotšišo le mangwalo a latelago: Tsela yeo Modimo a dirišanego le Baruke ka yona e utolla’ng ka Jehofa gotee le tsela yeo a ikwago ka yona ka bahlanka ba gagwe? (Bala Baheberu 12:9.) Ka baka la dinako tše di hlobaetšago tšeo re phelago go tšona, re ka ithuta’ng keletšong yeo Modimo a e filego Baruke gotee le tseleng yeo Baruke a arabetšego ka yona? (Bala Luka 21:34-36.) Ka go ekiša Jeremia, bagolo ba Bakriste ba ka bontšha bjang go tshwenyega ga Jehofa ka bahlanka ba Gagwe?—Bala Bagalatia 6:1.

Lerato la Tate le Bontšhwa ke Morwa

10. Jesu o hlamilwe bjang go ka phetha boikarabelo bja gagwe bjalo ka Hlogo ya phuthego ya Bokriste?

¹⁰ Mehleng ya pele ga Bokriste, lerato leo Jehofa a ratago batho ba gagwe ka lona le ile la bontšhwa ka baporofeta gotee le ka bahlanka ba bangwe ba ba botegago. Mehleng yeno, le bonagala kudu ka Hlogo ya Phuthego ya Bokriste, e lego Jesu Kriste. (Baef. 1:22, 23) Ka baka leo, ka pukung ya Kutollo, Jesu o swantšhwa le kwana yeo e nago le “mahlo a šupago, e lego mahlo ao a bolelago meoya e šupago ya Modimo yeo e rometšwego lefaseng ka moka.” (Kut. 5:6) Ee, ka ge a matlafaditšwe ka botlalo bja moya o mokgethwa wa Modimo, Jesu o na le temogo e phethagetšego. Le yena o bona seo re lego sona ka gare, gomme ga go seo a sa kgonego go se bona.

11. Kriste o kgatha tema efe, gomme tsela yeo a re swarago ka yona e bonagatša bjang ya Tatagwe?

¹¹ Lega go le bjalo, ka go swana le Jehofa, Jesu ga se lephodisa la legodimong. O re lebelela ka mahlo a tletšego lerato. Sereto se sengwe sa Jesu sa “Tatê wa xo sa felexo,” se re gopotša ka tema yeo a tlago go e kgatha ge a tla ba a nea bao ba dumelago go yena bophelo bjo bo sa felego. (Jes. 9:5) Go oketša moo, bjalo ka Hlogo ya  phuthego ya Bokriste, Kriste a ka tutueletša Bakriste ba godilego moyeng, kudu-kudu bagolo, go homotša goba go eletša bao ba nyakago thušo.—1 Bathes. 5:14; 2 Tim. 4:1, 2.

12. (a) Mangwalo ao a yago diphuthegong tše šupago tša Asia Minor a utolla’ng ka Jesu? (b) Bagolo ba bonagatša bjang tsela yeo Kriste a swarago mohlape wa Modimo ka yona?

¹² Go tshwenyega mo go tseneletšego ga Kriste ka mohlape go bonagala mangwalong ao a yago go bagolo ba diphuthego tše šupago tša Asia Minor. (Kut. 2:1–3:22) Go ona, Jesu o bontšhitše gore o tseba seo se diregago ka phuthegong e nngwe le e nngwe gotee le kamoo a tshwenyegago ka gona ka balatedi ba gagwe. Go direga seo se swanago le lehono—eupša e le ka tekanyo e kgolo—ka gobane pono ya Kutollo e phethagala “Letšatšing la Morena.” * (Kut. 1:10) Lerato la Kriste gantši le bonagatšwa ka bagolo, bao ba hlankelago bjalo ka badiši ba moya ba phuthego. A ka tutueletša “dimpho [tše] tšeo e lego batho” go nea khomotšo, kgothatšo goba keletšo ge go nyakega. (Baef. 4:8; Dit. 20:28; bala Jesaya 32:1, 2.) Na o bona maiteko a bona e le pontšho ya gore Kriste o tshwenyega ka wena?

Thušo ka Nako e Swanetšego

13-15. Modimo a ka kgetha go araba dithapelo tša rena bjang? Nea mehlala.

¹³ Na o kile wa kgopela thušo ka thapelo e tseneletšego gomme wa hwetša karabo ya yona ka ketelo e kgothatšago ya Mokriste yo a godilego moyeng? (Jak. 5:14-16) Goba mohlomongwe thušo e tlile ka polelo sebokeng sa Bokriste goba ka taba yeo e lego ka go e nngwe ya dikgatišo tša rena. Jehofa gantši o araba dithapelo ka ditsela tše. Ka mohlala, ka morago ga go nea polelo, ngwanabo rena o ile a batamelwa ke kgaetšedi yoo a ilego a swarwa ka tsela e tlogago e hloka toka dibeke tše sego kae pele ga polelo yeo. Go e na le go belaela ka bothata bja gagwe, o ile a bontšha tebogo e tseneletšego bakeng sa dintlha tše di theilwego mangwalong tšeo di tšweletšego polelong yeo. Dintlha tšeo di be di šoma boemong bja gagwe e bile di mo homoditše kudu. O ile a thaba e le ruri gore o bile gona sebokeng seo!

¹⁴ Mabapi le thušo yeo e hwetšwago ka thapelo, ela hloko mohlala wa bagolegwa ba bararo bao ba ilego ba hwetša tsebo ya therešo ya Beibele ge ba be ba le kgolegong gomme ba ba bagoeledi ba sa kolobetšwago. Ka baka la tiragalo yeo e ilego ya ba gona ya bošoro, bagolegwa ka moka ka kgolegong yeo ba ile ba amogwa ditokelo tše mmalwa. Seo se ile sa tsoša borabele. Bagolegwa ba ile ba phetha ka gore mesong e latelago ka morago ga go fihlola ba tlo gana go bušetša dipoleiti tša bona, e le mogato wa go rabela. Bagoeledi ba bararo ba sa kolobetšwago bjale ba be ba le tlalelong. Ge e ba ba tlatša borabele, ba tla ba ba roba keletšo ya Jehofa yeo e hwetšwago go Baroma 13:1. Ge e ba ba sa tlatše borabele, bagolegwa ba tukago bogale ba be ba ka tla itefeletša.

¹⁵ Ka ge ba be ba sa kgone go ka boledišana, banna ba bararo ba ile ba rapelela bohlale. Mesong e latelago, boraro bja bona ba be ba fihleletše phetho e swanago tlwaa—ba be ba tla gana difihlolo. Ka morago ge bahlokomedi ba kgolego ba be ba tlo tšea dipoleiti, banna ba ba bararo ba be ba se natšo. Ba ile ba thabišwa gakaakang ke gore “Mokwi wa dithapêlô” o be a le kgaufsi!—Ps. 65:2.

 Go Lebelela Bokamoso ka Kgodišego

16. Modiro wa boboledi o bontšha bjang gore Jehofa o tshwenyega ka batho bao ba swanago le dinku?

¹⁶ Modiro wa boboledi bja lefase ka bophara le wona ke bohlatse bjo bongwe bja gore Jehofa o tshwenyega ka batho ba dipelo tše di botegago, go sa šetšwe gore ba dula kae. (Gen. 18:25) Jehofa, gantši ka go diriša barongwa, a ka hlahla bahlanka ba gagwe gore ba ye go batho ba bjalo ka dinku—gaešita le ge ba dula mafelong ao a sego a hlwa a fihlelelwa ka ditaba tše dibotse. (Kut. 14:6, 7) Ka mohlala, a diriša morongwa, Modimo o ile a hlahla Filipi, moebangedi wa lekgolong la pele la nywaga, gore a ye go tona ya Ethiopia gomme a mo hlathollela Mangwalo. Mafelelo e bile afe? Monna yoo o ile a amogela ditaba tše dibotse gomme a ba molatedi yo a kolobeditšwego wa Kriste. *—Joh. 10:14; Dit. 8:26-39.

17. Ke ka baka la’ng re se ra swanela go tshwenyega ka mo go feteletšego ka bokamoso?

¹⁷ Ge tshepedišo ya gona bjale ya dilo e dutše e batamela bofelo bja yona, “dihlabi tša tlalelo” tšeo go boletšwego ka tšona e sa le pele di tla tšwela pele. (Mat. 24:8) Ka mohlala, theko ya dijo e ka hlatloga kudu ka baka la go nyakega ga tšona mo gogolo, boemo bjo bo feteletšego bja leratadima, goba go se tsepame ga boemo bja tša boiphedišo. Go ka ba thata kudu go hwetša mošomo, le gona bašomi ba ka ba ka tlase ga kgateletšo e kgolo ya go šoma diiri tše ditelele. Go sa šetšwe gore go direga’ng, bohle bao ba etišago dikgahlego tša moya pele le go boloka ‘leihlo le le lokilego’ ga se ba swanela go tshwenyega ka mo go feteletšego. Ba a tseba gore Modimo o a ba rata e bile o tla ba hlokomela. (Mat. 6:22-34) Ka mohlala, ela hloko kamoo Jehofa a ilego a hlokomela Jeremia ka gona nakong e thata ya bofelo bja Jerusalema ka 607 B.C.E.

18. Jehofa o ile a bontšha lerato la gagwe go Jeremia bjang nakong ya thakelelo ya Jerusalema?

¹⁸ Mafelelong a thakelelo ya Bababilona Jerusalema, Jeremia o be a golegilwe ngwakong wa mohlokomedi wa kgolego. O be a tla hwetša dijo bjang? Ge nkabe a be a lokologile, o be a tla inyakela tšona. Go e na le moo, o be a ithekgile ka mo go feletšego ka bao ba bego ba mo dikologile, bao bontši bja bona ba bego ba mo hloile! Lega go le bjalo, Jeremia ga se a ka a bota batho eupša o ile a bota Modimo, yoo a bego a holofeditše gore o tla mo hlokomela. Na Jehofa o ile a phethagatša kholofetšo ya gagwe? O dirile bjalo e le ruri! O ile a kgonthišetša gore letšatši le lengwe le le lengwe Jeremia o hwetša “kgokolo ya borotho . . . go fihla ga marotho ka moka a fela motseng.” (Jer. 37:21, PK) Jeremia, gotee le Baruke, Ebede-meleke le ba bangwe, ba ile ba phologa nakong yeo ya tlala, bolwetši le lehu.—Jer. 38:2; 39:15-18.

19. Ge re dutše re lebeletše bokamoso, re swanetše go ikemišetša’ng?

¹⁹ Ee, “mahlo a Jehofa a lebeletše baloki, gomme ditsebe tša gagwe di kwa ditopo tša bona.” (1 Pet. 3:12) Na o thabela go bewa leihlo ke Tatago wa legodimong? Na o ikwa o bolokegile e bile o šireletšegile ka baka la go tseba gore mahlo a gagwe a lebeletše dika tša gago tše dibotse? Ka gona, ikemišetše go tšwela pele o sepela le Modimo—go sa šetšwe seo bokamoso bo ka bago bo re boloketše sona. Re ka kgodišega gore Jehofa o tla dula a lebeletše bahlanka ba gagwe ba botegago bjalo ka tate yo lerato.—Ps. 32:8; bala Jesaya 41:13.

[Mengwalo ya tlase]

Na o ka Hlalosa?

• Re ka bontšha bjang gore re ‘sepela le Modimo’?

• Jehofa o ile a bontšha bjang gore o rata Baruke?

• Bjalo ka Hlogo ya phuthego ya Bokriste, Jesu o bonagatša dika tša Tatagwe bjang?

• Re ka bontšha ka ditsela dife gore re bota Jehofa dinakong tše tšeo di hlobaetšago?

[Dipotšišo tša Thuto]

[Diswantšho go letlakala 9]

Bjalo ka ge Jeremia a bontšhitše Baruke seo, bagolo ba Bakriste lehono ba bonagatša go tshwenyega ga Jehofa

[Seswantšho go letlakala 10]

Jehofa a ka re nea bjang thušo ka nako e swanetšego?