Karabo ya Jehofa ya Thapelo e Tšwago Pelong

“Gore batho ba tsebe gore wena yoo leina la gago e lego Jehofa, ke wena o nnoši o lego Yo Godimodimo godimo ga lefase ka moka.”​—PS. 83:18, NW.

1, 2. Ba bantši ba bile le phihlelo efe, gomme ke dipotšišo dife tšeo di ka botšišwago?

NYWAGA e mmalwa e fetilego, mosadi yo mongwe o ile a gateletšega kudu ka baka la kotsi yeo e diregilego motseng wa gabo. Ka ge a belegetšwe ka lapeng leo le tsenago kereke ya Roma Katholika, o ile a ya go nyaka thušo go moruti wa gona moo, eupša moruti yoo o be a sa nyake go bolela le yena. Ka gona o ile a rapela Modimo ka gore: “Ga ke tsebe gore o mang . . . , eupša ke tseba gore o gona. Hle anke ke go tsebe!” Nako e kopana ka morago, Dihlatse tša Jehofa di ile tša mo etela gomme tša mo homotša tša ba tša mo thuša go hwetša tsebo yeo a bego a e nyaka. Gare ga dilo tše dingwe tše dintši, Dihlatse di ile tša mo ruta gore Modimo o na le leina, e lego Jehofa. Go ithuta seo go ile gwa mo kgoma kudu. O boletše gore: “Nagana, yo e be e le Modimo yo ke bego ke hlologetše go mo tseba go tloga bjaneng!”

² Ba bantši ba bile le phihlelo e swanago. Gantši, ba bone leina la Jehofa la mathomo ge ba be ba bala Psalme 83:18 ka Beibeleng (goba Psalme 68:4 ka Beibeleng ya Sepedi). Ka go New World Translation, Psalme 83:18 e balega ka gore: “Gore batho ba tsebe gore wena yoo leina la gago e lego Jehofa, ke wena o nnoši o lego Yo Godimodimo godimo ga lefase ka moka.” Lega go le bjalo, na o kile wa ipotšiša gore ke ka baka la’ng Psalme 83 e ile ya ngwalwa? Ke ditiragalo dife tšeo di ka gapeletšago motho yo mongwe le mongwe go lemoga gore Jehofa ke Modimo a nnoši wa therešo? Psalme ye e re swaretše molaetša ofe lehono? Re tlo ahla-ahla dipotšišo tšeo sehlogong se. *

Maano-mabe Kgahlanong le Batho ba Jehofa

3, 4. Psalme 83 e hlamilwe ke mang, gomme o hlalosa tšhošetšo efe?

³ Go ya ka mantšu a ketapele, Psalme 83 ke “koša ya Asafa.” Mohlomongwe mohlami wa psalme ye e be e le setlogolo sa Asafa wa Molefi, rammino yo a bego a tumile nakong ya pušo ya Kgoši Dafida. Psalmeng ye, mopsalme o kgopela Jehofa gore a gate mogato e le gore a phagamiše bogoši bja Gagwe gomme a dire gore leina la Gagwe le tsebje. Psalme ye e ka ba e hlamilwe nakwana ka morago ga lehu la Solomone. Ka baka la’ng? Ka gobane nakong ya pušo ya Dafida le ya Solomone, kgoši ya Tiro e be e dirišana gabotse le Isiraele. Nakong ya ge Psalme 83 e hlangwa, badudi ba Tiro ba be ba hlanogetše Isiraele gomme ba thekga manaba a yona.

⁴ Mopsalme o bolela maina a ditšhaba tše lesome tšeo di bego di loga maano-mabe a go fediša batho ba Modimo. Manaba ao a be a dula  go dikologa Isiraele gomme a lokeleditšwe ka tsela ye: “Ké ba metse ya Edomo, le ba Isimaele, le ba xa-Moaba, le ba xa-Hagara, Le ba Gebala, le Ba-Amoni, le Ba-Amaleke, le Ba-Filisita, le ba axilexo Tiro. Le Ba-Siria ba ba phalaletše.” (Ps. 83:6-8) Mopsalme o bolela ka tiragalo efe ya histori? Ba bangwe ba nagana gore psalme e bolela ka go hlaselwa ga Isiraele ke ditšhaba tše di kopanego e lego Amoni, Moaba le badudi ba Thabeng ya Seire mehleng ya Josafate. (2 Kor. 20:1-26) Ba bangwe ba dumela gore e bolela ka lehloyo leo Isiraele e ilego ya lebeletšana le lona la baagišani ba yona historing ya yona ka moka.

5. Bakriste lehono ba holwa bjang ke Psalme 83?

⁵ Go sa šetšwe gore boemo e be e le bofe, go molaleng gore Jehofa Modimo o buduletše go ngwalwa ga koša ye ya thapelo nakong ya ge setšhaba sa gagwe se be se le kotsing. Psalme ye le gona e kgothatša bahlanka ba Modimo lehono, bao historing ya bona ka moka ba bego ba dula ba hlaselwa ke manaba ao a bego a ikemišeditše go ba fediša. Le gona e tla re matlafatša e le ka kgonthe nakong e tlago ge Gogo wa Magogo a rapa madira a gagwe maitekong a gagwe a mafelelo a go fediša batho bohle bao ba rapelago Modimo ka moya le ka therešo.—Bala Hesekiele 38:2, 8, 9, 16.

Taba e Bohlokwa

6, 7. (a) Ke’ng seo mopsalme a se rapelelago mathomong a Psalme 83? (b) Ke’ng seo mopsalme a bego a tshwenyegile kudu ka sona?

⁶ Theetša ge mopsalme a ntšha sa mafahleng a gagwe ka thapelo: “Modimo, se homolê, O se hlwê Ò ile ’tuu’; Modimo, O se kê wa dula Ò ikhomoletše. Xobane manaba a xaxo še-ao, a tlatša mašata; banyatši ba xaxo ba tsoša dihlôxô. Ba loxa maanô-mabe; ba lakane xo lwa le sethšaba s’axo . . . Ka kxonthe ba lakane, ’me ba kwane, ba itlêma ba re ba lwa naxô’.”—Ps. 83:1-3, 5.

⁷ Ke’ng seo mopsalme a bego a tshwenyegile kudu ka sona? Ke therešo gore a ka ba a be a tshwenyegile ka polokego ya gagwe ka nnoši le ya lapa la gagwe. Lega go le bjalo, thapelo ya gagwe e lebiša tlhokomelo kudu kgobošong yeo e tlišwago leineng la Jehofa le ditšhošetšong tšeo di lebišwago setšhabeng seo se bitšwago ka leina leo. Eka ka moka re ka dula re e-na le pono e swanago le e leka-lekanego ge re kgotlelela mehla e thata ya bofelo ya lefase le la kgale.—Bala Mateo 6:9, 10.

8. Lebaka la gore ditšhaba di loge maano-mabe kgahlanong le Baisiraele ke lefe?

⁸ Mopsalme o tsopola manaba a Isiraele a re: “A re yeng, re ba fetšeng, ba se kê ba hlwa ba e-ba sethšaba; ’ina la Isiraele le napê le lebalwê!” (Ps. 83:4) Ruri batho bao ba be ba hloile batho ba Modimo ba kgethilwego! Eupša ba be ba e-na le lebaka le lengwe la go loga maano-mabe. Ba be ba duma naga ya Baisiraele e bile ba ikgantšha ba re: “A re itšeeleng mafelo ao go dulago Modimo e be leruo la rena.” (Ps. 83:12, NW) Na selo se se swanago le seo se a direga mehleng ya rena? Ee!

“Felô Xokxêthwa xa Xaxo”

9, 10. (a) Mehleng ya bogologolo, felo gokgethwa ga Modimo e be e le eng? (b) Ke ditšhegofatšo dife tšeo di thabelwago lehono ke mašaledi a tloditšwego le “dinku tše dingwe”?

⁹ Mehleng ya bogologolo, Naga ya Kholofetšo e be e bolelwa e le felo gokgethwa ga Modimo. Gopola koša ya phenyo yeo Baisiraele ba ilego ba e opela ka morago ga go phološwa Egipita, yeo e rego: “Xomme sethšaba sa baphološwa ba xaxo, O se etetša ka botho, ka matla a xaxo O se iša kua felô xokxêthwa xa xaxo.” (Ek. 15:13) Ka morago, ‘lefelo’ leo le ile la ba le tempele le baperisita ba yona le motse-mošate, Jerusalema, le dikgoši tša leloko la Dafida tšeo di bego di dula sedulong sa bogoši sa Jehofa. (1 Kor. 29:23) Ka mo go kwagalago, Jesu o ile a bitša Jerusalema gore ke “motse wa Kgoši e kgolo.”—Mat. 5:35.

¹⁰ Go thwe’ng ka mehla ya rena? Ka 33 C.E., setšhaba se sefsa, “Isiraele wa Modimo,” se ile sa tswalwa. (Bagal. 6:16) Setšhaba seo, se bopilwego ke bana babo Jesu Kriste ba tloditšwego, se ile sa phetha modiro woo Isiraele ya nama e paletšwego ke go o phetha, e lego wa go hlatsela leina la Modimo. (Jes. 43:10; 1 Pet. 2:9) Le sona, Jehofa o ile a se nea kholofetšo e swanago le yeo a e neilego Isiraele ya bogologolo, e rego: “Ke tla  ba Modimo wa bona, bona e tla ba batho ba-ka.” (2 Bakor. 6:16; Lef. 26:12) Ka 1919, Jehofa o ile a tliša ba šetšego ba “Isiraele wa Modimo” boemong bjo bo amogelegago, gomme ka nako yeo, ba ile ba tšea “naxa,” e lego boemo bja moya bja modiro bjoo go bjona ba thabelago paradeise ya moya. (Jes. 66:8) Go tloga ka bo-1930, “dinku tše dingwe” tše dimilione di kgeregetše lehlakoreng la bona. (Joh. 10:16) Lethabo le katlego ya moya ya Bakriste ba ba mehleng yeno di nea bohlatse bja go swanelega ga bogoši bja Jehofa. (Bala Psalme 91:1, 2.) Ruri seo se galefiša Sathane!

11. Pakane e kgolo ya manaba a Modimo ke efe?

¹¹ Nakong ka moka ya mehla ya bofelo, Sathane o be a dutše a tutueletša baemedi ba gagwe ba lefaseng go ganetša mašaledi a tloditšwego le bagwera ba ona ba dinku tše di dingwe. Seo se dirilwe ke mmušo wa Manazi kua Yuropa Bodikela sa ba sa dirwa le ke mmušo wa Bokomanisi wa Soviet Union kua Yuropa Bohlabela. Se ile sa direga gape le dinageng tše dingwe tše dintši, le gona se sa tlo direga gape, kudu-kudu tlhaselong ya mafelelo ya Gogo wa Magogo. Tlhaselong yeo, baganetši ka megabaru ba ka thopa meago le dithoto tša batho ba Jehofa, go swana le ge manaba a ile a dira bjalo nakong e fetilego. Lega go le bjalo, pakane e kgolo ya Sathane ka mehla e be e le go re fediša re le sehlopha e le gore leina la rena leo re le neilwego ke Modimo le se sa hlwa le gopolwa. Jehofa o arabela bjang ge bogoši bja gagwe bo nyatšwa ka tsela e bjalo? Ela hloko gape mantšu a mopsalme.

Mokgwa wa Jehofa wa Phenyo

12-14. Ke diphenyo dife tše pedi tša histori tšeo mopsalme a bolelago ka tšona tšeo di diregilego kgaufsi le motse wa Megido?

¹² Ela hloko gore mopsalme o na le tumelo e tiilego ya gore Jehofa o na le bokgoni bja go raranya merero ya ditšhaba tša manaba. O bolela ka diphenyo tše pedi tša Isiraele tšeo di diregilego kgaufsi le motse wa bogologolo wa Megido, woo o bego o le molaleng wo o bitšwago ka leina leo. Nakong ya selemo, lebato leo le omilego la Noka ya Kisoni le ka bonwa e le manyoke-nyoke go phatša molala. Ka morago ga pula ya marega, noka e tlala wa go falala. Mohlomongwe ka baka leo, e bitšwa gape gore ke “Megido nokeng.”—Baa. 4:13; 5:19.

¹³ Dikhilomithara tše e ka bago tše 15 go tloga Megido go putlaganya molala go na le thaba ya More moo mehleng ya Moahlodi Gideoni, dihlopha tše kopanego tša Bamidiane, Baamaleke gotee le Ma-tšwa-bohlabela di ilego tša kgobokana bakeng sa ntwa. (Baa. 7:1, 12) Mafelelong sehlopha sa madira a mmalwa sa Gideoni se ile sa ba palo ya banna ba 300, eupša ka thušo ya Jehofa, se ile sa fenya madira a mantši a manaba. Bjang? Ka go latela tlhahlo ya Modimo, a ile a dikologa kampa ya manaba bošego a swere dipitša tšeo di bego di fihlile dirumula tše di tukago. Ge Gideoni a dira seka, banna ba gagwe ba ile ba thuba dipitša gomme dirumula di ile tša thoma go bonala. Ka nako yeo, ba ile ba thoma go letša diphalafala tša bona gomme ba goeletša ka gore: “Ka lerumô la Morêna le la Gideoni.” Manaba a ile a gakanega gomme a thoma go bolayana; baphologi ba ile ba tšhabela ka kua ga Noka ya Jorodane. Go sa le bjalo, Baisiraele ba bantši ba ile ba rakediša manaba ao. Madira a manaba ka moka ao a ilego a bolawa ke a 120- 000.—Baa. 7:19-25; 8:10.

¹⁴ Go putlaganya molala go tloga Megido go na le Thaba ya Thabora yeo e lego dikhilomithara tše tshela go tloga Thabeng ya More. Mo ke moo Moahlodi Baraka pejana a ilego a kgoboketša  dihlopha tša madira a Baisiraele a 10- 000 go lwa le madira a Jabini, kgoši ya Mokanana ya Hatsore, ao a bego a laolwa ke letona la madira e lego Sisera. Madira a a Bakanana a be a e-na le dikoloi tša ntwa tše 900 tšeo di bego di tsentšwe disekela tšeo di hlometšwego bogareng bja maotwana a koloi tšeo di bego di dikologa le maotwana. Ge madira a Isiraele ao a bego a se a itlhama ka mo go lekanego a be a kgobokana Thabeng ya Thabora, madira a Sisera a ile a goketšwa go ya moeding. Ke moka, “Morêna a raranya Sisera le dikoloi tša xaxwe ka moka le madirá a xaxwe ka moka.” Mohlomongwe pula yeo e ilego ya thoma go na kapejana e ile ya dira gore maotwana a dikoloi a tanywe ke leraga ka gobane Noka ya Kisoni e be e tletše wa go falala. Madira ao ka moka a ile a bolawa ke Baisiraele.—Baa. 4:13-16; 5:19-21.

15. (a) Mopsalme o rapelela gore Jehofa a dire’ng? (b) Leina la ntwa ya Modimo ya mafelelo le re gopotša’ng?

¹⁵ Mopsalme o kgopela Jehofa gore a dire se se swanago go ditšhaba tšeo di tšhošetšago Isiraele mehleng ya gagwe. O rapela ka gore: “Ba dirê tšela tša xo dirwa Midiane, le Sisera, le Jabini nokeng ya Kisone, Ba xo fedišetšwa xôna-kwa Endoro, ba ba byalo ka lerole la lefase.” (Ps. 83:9, 10) Se se lemogegago ke gore ntwa ya Modimo ya mafelelo kgahlanong le lefase la Sathane e bitšwa gore ke Haramagedone (yeo e bolelago “Thaba ya Megido”). Leina leo le re gopotša dintwa tša makgaola-kgang tšeo di ilego tša lwelwa kgaufsi le Megido. Diphenyo tša Jehofa dintweng tšeo tša bogologolo di re kgonthišetša gore o tla fenya ntweng ya Haramagedone.—Kut. 16:13-16.

Rapelela Gore Jehofa a Godišwe

16. Difahlego tša baganetši di ‘apešitšwe kgobogo’ bjang lehono?

¹⁶ “Mehleng [ye] ya bofelo,” Jehofa o thibetše maiteko ka moka a go fediša batho ba gagwe. (2 Tim. 3:1) Ka baka leo, baganetši ba lešitšwe dihlong. Psalme 83:16 e bontšhitše se ge e re: “Ba bipišê difahloxô ka dihlong, ba bê ba Xo nyakê, Wene Morêna.” Dinageng ka go latelana, baganetši ba paletšwe ka mo go feletšego ke go homotša Dihlatse tša Jehofa. Dinageng tšeo, go tsepama le go kgotlelela ga barapedi ba Modimo a nnoši wa therešo go neile bohlatse bathong ba dipelo tše sekametšego go lokeng, gomme ba bantši ba ile ba ‘nyaka leina la Jehofa.’ Dinageng tše dintši moo Dihlatse tša Jehofa di kilego tša tlaišwa o šoro, ga bjale go na le bareti ba thabilego ba Jehofa ba dikete tše masome, gaešita le ba dikete tše makgolo. A phenyo e kgahlišago gakaakang ya Jehofa! A nyatšego e kaakaang manabeng a gagwe!—Bala Jeremia 1:19.

17. Ke boemo bofe bjo kotsi bjoo moloko wa batho o lebanego le bjona, gomme ke mantšu afe ao kgaufsinyane re tlago go a gopola?

¹⁷ Go ba gona, re a tseba gore ntwa ga se ya fela. Le gona re tšwela pele re bolela ditaba tše dibotse—gaešita le go baganetši. (Mat. 24:14, 21) Lega go le bjalo, sebaka seo se bulegetšego baganetši ba bjalo gore ba sokologe le go hlakodišwa se tla fela kgaufsinyane. Go kgethagatšwa ga leina la Jehofa go bohlokwa kudu go feta go phološwa ga batho. (Bala Hesekiele 38:23.) Ge ditšhaba di bokana maitekong a tšona a boletšwego e sa le pele a go fediša batho ba Modimo, re tla gopola mantšu a a thapelo ya mopsalme a rego: “A ba dumalê ba dule bà thšoxile xo ya xo ile, ba šexamê ba senyêxê.”—Ps. 83:17.

18, 19. (a) Baganetši ba ikemišeditšego ba pušo ya Jehofa ba letetšwe ke’ng? (b) Go lwela mo go batamelago ga makgaola-kgang ga bogoši bja Jehofa go swanetše go go kgoma bjang?

 ¹⁸ Baganetši ba ikemišeditšego ba pušo ya Jehofa ba letetšwe ke mafelelo a nyamišago. Lentšu la Modimo le utolla gore bao ba “sa kwego ditaba tše dibotse”—e bile ba fedišetšwa sona seo ka Haramagedone—ba tla lebana le “tshenyego ya ka mo go sa felego.” (2 Bathes. 1:7-9) Go fedišwa ga bona le go phološwa ga bao ba rapelago Jehofa ka therešo e tla ba bohlatse bjo bo kgodišago bja gore Jehofa ke Modimo a nnoši wa therešo. Lefaseng le lefsa, phenyo yeo e kgolo e ka se ke ya lebalwa. Bao ba tlago go go bušetšwa bophelong ‘tsogong ya ba lokilego gotee le ba sa lokago’ ba tla ithuta mabapi le tiro ya Jehofa e kgolo. (Dit. 24:15) Lefaseng le lefsa, ba tla bona bohlatse bjo bo kgodišago bja bohlale bja go phela ka tlase ga pušo ya Jehofa. Le gona, ba boleta bao ba lego gare ga bona ba tla kgodišega ka pela gore Jehofa ke Modimo a nnoši wa therešo.

¹⁹ A bokamoso bjo bo kgahlišago gakaakang bjo Tatago rena yo lerato wa legodimong a bo lokišeditšego barapedi ba gagwe ba botegago! Na ga o šušumeletšege go rapelela gore Jehofa kgaufsinyane a nee karabo ya mafelelo thapelong ya mopsalme e rego: “A ba dumalê ba dule bà thšoxile xo ya xo ile, ba šexamê ba senyêxê. Ba tsebê xobane Morêna ké Wene, Mong’a ’ina leo Ò nnoši, Yo-xodimo-dimo Kukama-lefase”?—Ps. 83:17, 18.

[Mongwalo wa tlase]

Na o ka Hlalosa?

• Baisiraele ba be ba lebane le’ng ge Psalme 83 e be e ngwalwa?

• Mongwadi wa Psalme 83 o be a tshwenyegile kudu ka’ng?

• Ke bomang bao ba hloilwego ke Sathane lehono?

• Jehofa mafelelong o tla araba bjang thapelo yeo e lego go Psalme 83:18 (NW)?

[Dipotšišo tša Thuto]

[Mmapa go letlakala 15]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Dintwa tšeo di lwetšwego kgaufsi le Megido ya bogologolo di tswalana bjang le bokamoso bja rena?

Noka ya Kisoni

Harosethe

Thaba ya Karamele

Moedi wa Jeseriele

Megido

Thaanake

Thaba ya Giliboa

Sediba sa Harodi

More

Endoro

Thaba ya Thabora

Lewatle la Galilea

Noka ya Jorodane

[Seswantšho go letlakala 12]

Ke’ng seo se tutueleditšego mopsalme yo mongwe go hlama thapelo e tšwago pelong?