“Le Ruri ke Leina la Modimo le Lekgethwa Kudu le le le Phagamego Kudu”
“Le Ruri ke Leina la Modimo le Lekgethwa Kudu le le le Phagamego Kudu”
Nicholas wa Cusa o boletše mantšu ao therong yeo a e neilego ka ngwaga wa 1430. * E be e le monna yoo a kgahlegelago dilo tše dintši, yoo ka mohlala a bego a lebišitše tlhokomelo ya gagwe go ithuteng Segerika, Seheberu, filosofi, thutatumelo, dipalo gotee le thuta-dinaledi. Ge a be a e-na le nywaga e 22, o ile a ba setsebi sa molao wa kereke ya Roma Katholika. Ka 1448 o ile a hlongwa bjalo ka mokadinale.
Mo e ka bago nywaga e 550 e fetilego, Nicholas wa Cusa o ile a hloma lefelo la go hlokomela batšofadi bakeng sa batšofadi ba Kues, yeo ga bjale e tsebjago ka la Bernkastel-Kues, e lego toropo yeo e lego dikhilomithara tše ka bago tše 130 ka borwa bja Bonn, kua Jeremane. Moago wo gona bjale ke bokgobapuku bja Cusa bjo bo nago le mangwalo a go phuthwa a ka godimo ga a 310. Le lengwe la ona ke Codex Cusanus 220 leo go lona go ka hwetšwago thero ya Cusa ya 1430. Therong yeo, In principio erat verbum (Mathomong go be go E-na le Lentšu), Nicholas wa Cusa o dirišitše mongwalelo wa Jehofa wa se-Latin e lego wa Iehoua. * Letlakala 56 le na le mantšu a a latelago mabapi le leina la Modimo: “Le tšwa go Modimo. Ke Tetragrammaton, e lego, leina leo le bopšago ke ditlhaka tše nne. . . . Le ruri ke leina la Modimo le lekgethwa kudu le le le phagamego kudu.” Mantšu a Nicholas wa Cusa a dumelelana le taba ya gore leina la Modimo le tšwelela mengwalong ya mathomo ya Mangwalo a Seheberu.—Ek. 6:3.
Codex ye ya mathomong a lekgolo la bo-15 la nywaga ke le lengwe la mangwalo a kgale kudu ao a lego gona ao go ona Tetragrammaton e fetoletšwego e le “Iehoua.” Bohlatse bjo bjo bo ngwadilwego bo hlatsela ka mo go oketšegilego gore dibopego tša leina la Modimo tšeo di swanago le “Jehofa” e be e dutše e le mokgwa o tlwaelegilego wa go ngwalolla segalo sa leina la Modimo ka nywaga-kgolo.
[Mengwalo ya tlase]
^ ser. 1 Nicholas wa Cusa o be a tsebja gape e le Nikolaus Cryfts (Krebs), Nicolaus Cusanus, le Nikolaus von Kues. Kues e be e le leina la toropo ya kua Jeremane yeo a belegetšwego go yona.
^ ser. 2 Thero yeo e be e thekga thuto ya Boraro-botee.
[Tlhaloso ya seswantšho go letlakala 16]
Bokgobapuku bja Cusa