Ba Thuše Gore ba Boe ka Ntle le Tika-tiko!

“Morena, re tla ya go mang? O na le mantšu a bophelo bjo bo sa felego.”​—JOH. 6:68.

1. Ke’ng seo Petro a se boletšego ge barutiwa ba bantši ba be ba hlanogela Jesu?

JESU KRISTE lebakeng le lengwe o ile a hlanogelwa ke barutiwa ba bantši bao ba bego ba sa kwane le e nngwe ya dithuto tša gagwe. O ile a botšiša barutiwa ba gagwe gore: “Na le lena le nyaka go sepela?” Petro a araba ka gore: “Morena, re tla ya go mang? O na le mantšu a bophelo bjo bo sa felego.” (Joh. 6:51-69) Go be go se na moo ba ka yago. Bodumedi bja Sejuda bo be bo se na “mantšu a bophelo bjo bo sa felego” ka nako yeo, gomme ga go pelaelo gore lehono mantšu a bjalo a ka se ke a hwetšwa go Babilona o Mogolo, mmušo wa lefase wa bodumedi bja maaka. Go motho le ge e le ofe yoo a arogilego mohlapeng wa Modimo eupša a nyaka go kgahla Jehofa, ye “ke nako e akgofilego ya go phafoga” le ya go boela mohlapeng.—Baroma 13:11, King James Version.

2. Ke’ng seo re swanetšego go dula re se gopola mabapi le ditaba tšeo e lego sephiri goba tša boahlodi?

² Jehofa o ile a bontšha gore o tshwenyega ka dinku tšeo di timetšego tša Isiraele. (Bala Hesekiele 34:15, 16.) Ka mo go swanago, bagolo ba Bakriste ba na le kganyogo le boikarabelo bja go thuša bao ba swanago le dinku bao ba arogilego mohlapeng. Ge e ba ba abela mogoeledi go ithuta le motho yo a tapilego yoo a nyakago go thušwa, mogoeledi yo a swarago thuto o swanetše go dira’ng ge a lemoga gore motho yoo o dirile sebe se segolo? Go e na le gore a nee keletšo mabapi le taba le ge e le efe ya boahlodi goba yeo e lego sephiri, mogoeledi o swanetše go šišinya gore a botše bagolo. Ge e ba a palelwa ke go dira bjalo, mogoeledi o swanetše go tsebiša bagolo.—Lef. 5:1; Bagal. 6:1.

3. Monna yo a bego a e-na le dinku tše 100, o ile a arabela bjang ge a be a hwetša nku yeo e bego e timetše?

³ Sehlogong se se fetilego, go ile gwa lebišwa  tlhokomelo papišong ya Jesu ya mabapi le monna yo a bego a e-na le dinku tše 100. Ge e nngwe e be e timetše, o ile a tlogela tše 99 gomme a ya go nyaka yeo e timetšego. Monna yoo o ile a thaba kudu ge a be a e hwetša! (Luka 15:4-7) Re thaba ka tsela e swanago ge e nngwe ya dinku tša Modimo yeo e bego e arogile mohlapeng e boa. Ba tutuetšwa ke lerato, bagolo le ditho tše dingwe tša phuthego ka ntle le pelaelo ba ile ba etela motho yo a tapilego. Le bona ba nyaka go bona motho yoo a boa mohlapeng gomme a thabela thekgo ya Modimo, tšhireletšo le tšhegofatšo. (Doit. 33:27; Ps. 91:14; Die. 10:22) Ge ba e-ba le sebaka sa go ka thuša, ba ka thuša bjang?

4. Ke’ng seo se ka lemogwago go Bagalatia 6:2, 5?

⁴ Mohlomongwe ba ka kgothaletša motho gore a boele ka phuthegong ka go mmontšha ka botho gore Jehofa o rata dinku tša Gagwe le gore ga a letele gore re dire seo re ka se se kgonego. Se se akaretša go ithuta Mangwalo, go ba gona dibokeng tša Bokriste le go bolela ditaba tše dibotse tša Mmušo. E tla ba mo go swanetšego go bala Bagalatia 6:2, 5 le go bolela gore Bakriste ba ka thušana go rwalelana maima, eupša “yo mongwe le yo mongwe o tla rwala morwalo wa gagwe” wa boikarabelo bja dilo tša moya. Ga go na yo a ka botegelago Modimo legatong la rena.

Na ba Arošitšwe ke “Dipelaelo tša Bophelo”?

5, 6. (a) Ke ka baka la’ng go le bohlokwa gore re theetše ka kelohloko ge modumedi-gotee yo a tapilego a tšholla sa mafahleng? (b) O ka thuša bjang motho yo a tapilego go lemoga gore go tlogela go kopanela le batho ba Modimo go kotsi?

⁵ Gore ba lemoge kamoo ba ka thušago badumedi-gotee bao ba tapilego, bagolo le bagoeledi ba bangwe ba gotšego tsebong ba swanetše go theetša ka kelohloko ge batho ba bjalo ba tšholla sa mafahleng a bona. A re re o mogolo gomme o etela banyalani bao ba sa bego gona dibokeng ka baka la go arošwa ke “dipelaelo tša bophelo.” (Luka 21:34) Mathata a tša ditšhelete goba go oketšega ga boikarabelo bja lapa di ka ba di dirile gore ba tape moyeng. Ba ka bolela gore ba nyaka go ikhutša go se nene, eupša o ka bontšha gore go ipea lekatana ga se tharollo. (Bala Diema 18:1.) Ka bohlale o ka ba botšiša gore: “Ka ge le tlogetše go tla dibokeng, na le thabile? Na bophelo bja lapa la lena bo kaonafetše? Na go thabela Jehofa e sa dutše e le matla a lena?”—Neh. 8:10.

⁶ Go naganišiša ka dipotšišo tše bjalo go ka thuša batho ba tapilego go bona gore go se tle dibokeng go fokodišitše boemo bja bona bja moya gotee le go ba amoga lethabo. (Mat. 5:3; Baheb. 10:24, 25) Go ka kgonega go ba thuša go lemoga gore go palelwa ke go bolela ditaba tše dibotse ga bona go feleleditše ka gore ba lahlegelwe ke lethabo. (Mat. 28:19, 20) Ka gona, ke selo sefe se bohlale seo motho yo a tapilego a ka se dirago?

7. Re ka kgothaletša bao ba arogilego mohlapeng go dira’ng?

 ⁷ Jesu o itše: “Itlhokomeleng gore dipelo tša lena di se ke tša imelwa ke bojagobe le go nwa kudu le dipelaelo tša bophelo . . . Ka gona, dulang le phakgame ka dinako tšohle le lopa gore le atlege ka go phonyokga dilo tše ka moka tše di reretšwego go direga.” (Luka 21:34-36) Bao ba arogilego mohlapeng eupša ba nyaka go ba le lethabo leo ba kilego ba ba le lona, ba ka kgothaletšwa go rapelela moya o mokgethwa le thušo ya Modimo le go dira dilo ka go dumelelana le dithapelo tša bona.—Luka 11:13.

Na ba Ile ba Kgopišwa

8, 9. Mogolo a ka bea mabaka bjang le motho yoo a kgopišitšwego?

⁸ Ka ge batho ba se ba phethagala, ba ka no se bone dilo ka leihlo le tee, gomme se se ka kgopiša yo mongwe. Ba bangwe ba ile ba kgopišwa ke ge motho yoo a hlomphegago ka phuthegong a dira selo seo se thulanago le melao ya motheo ya Modimo. Ge e ba motho yo a tapilego a kgopišegile ka tsela e bjalo, mogolo yo a mo etetšego a ka bolela gore Jehofa ga a kgopiše motho. Bjale, ke ka baka la’ng motho le ge e le ofe a swanetše go fediša tswalano ya gagwe le Modimo le batho ba Gagwe? Go e na le moo, na motho ga se a swanela go tšwela pele a hlankela Jehofa a kgodišegile gore “Moahlodi wa lefase ka moka” o tseba seo se diregilego le gore o tla swaragana le boemo ka tsela e swanetšego? (Gen. 18:25; Bakol. 3:23-25) Ge e ba motho a ka kgopša ka tsela ya kgonthe gomme a wa, a ka se fo dula a le boemong bjoo a sa leke go tsoga.

⁹ Ka maiteko a go ba thuša go boa, mogolo a ka bolela gore ge nako e dutše e e-ya, ba bangwe ba hwetša gore seo se ba kgopišitšego ga se sa bonagala se le bohlokwa gakaalo. Ge e le gabotse, seo se ka bago se ba kgopišitše se ka no ba se se sa le gona. Ge motho a kgopišegile ka gobane a hweditše tayo, go naganišiša ka thapelo go ka mo dira gore a phethe ka gore ka tsela e itšego o be a swanelwa ke tayo yeo le gore o be a sa swanela go dumelela tayo yeo e mo kgopiša.—Ps. 119:165; Baheb. 12:5-13.

Na ba Kgopišitšwe ke Thuto e Itšego?

10, 11. Ke mabaka afe ao a ka šomago ge re leka go thuša motho yoo a nago le pono e fapanego ka thuto e itšego ya Beibele?

¹⁰ Ba bangwe ba ka ba ba ile ba tlogela mohlape wa Modimo ka baka la go se dumelelane le thuto e itšego ya Mangwalo. Baisiraele ba ile ba lokollwa bokgobeng Egipita gomme ba “lebala ’tirô tša [Modimo]” tšeo a ba diretšego tšona gomme “ba lesa xo letêla morêrô wa xaxwe.” (Ps. 106:13) Go ka thuša go gopotša motho yo a tapilego gore “mohlanka yo a botegago le wa temogo” o nea dijo tše botse tša moya. (Mat. 24:45) Yeo ke tsela yeo motho a ithutilego therešo ka yona mathomong. Ka gona, ke ka baka la’ng a sa ikemišetše go sepela gape therešong?—2 Joh. 4.

¹¹ Ge mogolo a leka go thuša bao ba arogilego mohlapeng wa Modimo, a ka lebiša tlhokomelo go barutiwa bao ba ilego ba hlanogela Jesu ka baka la go gana e nngwe ya dithuto tša gagwe. (Joh. 6:53, 66) Ka baka la go kgaotša tswalano ya bona le Kriste le balatedi ba gagwe ba botegago, ba ile ba lahlegelwa ke boemo bja bona bja moya le lethabo la bona. Na bao ba sa hlwego ba kopanela le phuthego ya Bokriste ba hweditše lefelo le lengwe leo go lona go nago le dijo tše di humilego tša moya? Aowa, ka gobane ga le gona!

Na go Akaretšwa Boitshwaro bjo bo Fošagetšego?

12, 13. Ge e ba motho yoo a arogilego mohlapeng a dumela gore o dirile sebe se segolo, a ka thušwa bjang?

¹² Batho ba bangwe ba kgaotša go dira boboledi le go ya dibokeng ka gobane ba dirile sebe se segolo. Ba ka nagana gore ge e ba ba ka bolela phošo ya bona go bagolo, ba tla kgaolwa. Eupša ba ka se ke ba ntšhwa ka phuthegong ge e ba ba tlogetše go itshwara ka tsela yeo e sego ya Mangwalo gomme ba itshola e le ka kgonthe. (2 Bakor. 7:10, 11) Go e na le moo, ba tla amogelwa gape gomme bagolo ba tla ba nea thušo ya mangwalo yeo ba e nyakago.

¹³ Ge e ba o le mogoeledi yo a gotšego tsebong yoo a abetšwego go thuša motho yo a tapilego, o swanetše go dira’ng ge e ba motho yoo a go botša gore o dirile sebe se segolo? Bjalo ka ge  re boletše ka seo pejana, go e na le gore o itsenye kudu tabeng yeo, mo kgothaletše gore a botše bagolo. Ge e ba a sa nyake go dira bjalo, o tla bontšha go tshwenyega ka leina la Jehofa le bohlweki bja moya bja phuthego ka go dira dilo ka go dumelelana le tlhahlo ya Modimo mabapi le ditaba tše bjalo. (Bala Lefitiko 5:1.) Bagolo ba tseba gore ba thuša bjang motho le ge e le ofe yo a ratago go boa le go phela ka go dumelelana le thato ya Modimo. Tayo e lerato e ka nyakega. (Baheb. 12:7-11) Ge e ba motho a dumela gore o dirile sebe kgahlanong le Modimo, a kgaoditše go dira bobe gomme a itshola e le ka kgonthe, bagolo ba tla mo thuša gomme Jehofa o tla mo lebalela.—Jes. 1:18; 55:7; Jak. 5:13-16.

Go Boa ga Morwa go Tliša Lethabo

14. Hlalosa papišo ya Jesu ya mabapi le morwa wa lehlaswa ka mantšu a gago.

¹⁴ Ge a nyaka go thuša nku yeo e arogilego, yoo a abetšwego go thuša motho yo bjalo a ka lebiša tlhokomelo papišong ya Jesu yeo e begilwego go Luka 15:11-24. Papišong yeo, lesogana le ile la senya bohwa bja lona ka go phela bophelo bjo bo hlephilego. Mafelelong, le lapišwa ke bophelo bjo bo hlephilego bjoo le bego le bo phela. Le swerwe ke tlala, le hlologetše gae gomme le feditše le mogopolo—le ya gae! Tatago lesogana o le bona le sa le kgole, o a le kitimela, o a le gokarela, o le atla ka lerato, gomme o tlala lethabo. Go naganišiša ka papišo ye go ka tutuetša motho yoo a arogilego go boela mohlapeng. Ka ge tshepedišo ye ya dilo e tla fedišwa kgaufsinyane, o swanetše go ‘boa gae’ ka ntle le tika-tiko.

15. Ke ka baka la’ng ba bangwe ba aroga ka phuthegong?

¹⁵ Ba bantši bao ba tlogetšego phuthego ga ba swane tlwaa le morwa wa lehlaswa. Ba bangwe ba aroga ganyenyane-ganyenyane, go fo swana le sekepe seo se tlogago nageng ganyenyane-ganyenyane. Ba bangwe ba imelwa kudu ke dipelaelo moo e lego gore ba hlokomologa dilo tša moya. Le gona ba bangwe ba itumelela go kgopišwa ke setho se sengwe sa phuthego, goba ba kgaotša go kopanela ka baka la ge ba sa kwane le thuto e itšego ya Mangwalo. Ba sego kae ba itshwara ka tsela e sego ya Mangwalo. Lega go le bjalo, keletšo yeo go boletšwego ka yona mabapi le bjo bongwe le bjo bongwe bja maemo a, e ka go thuša gore o thuše bao ba tlogetšego mohlape ka mabaka a goba ka a mangwe gore ba boe pele maloba e e-ba maabane.

“Morwa, o a Amogelwa ka Gae!”

16-18. (a) Mogolo yo mongwe o thušitše bjang ngwanabo rena yo mongwe yo a bego a tapile ka nywaga e mentši? (b) Ke ka baka la’ng ngwanabo rena yo a ile a tapa, gomme o ile a thušwa bjang, gona o ile a amogelwa bjang ke phuthego?

¹⁶ Mogolo yo mongwe wa Mokriste o re: “Sehlopha sa rena sa bagolo se kgahlegela kudu go etela bao ba tapilego. Ke ile ka nagana ka ngwanešo yoo ke ilego ka ithuta le yena e bile ke mo thušitšego go tseba therešo. O be a tapile ka nywaga e 25 gomme o ile a lebeletšana le boemo bjo boima kudu, ka gona ke ile ka mo hlalosetša gore go diriša melao ya motheo ya Beibele go ka mo thuša. Ka morago ga nako e itšego, o  ile a thoma go tla Holong ya Mmušo gomme a dumela go swarelwa thuto ya Beibele ya go mo thuša go matlafatša phetho yeo a e dirilego ya go boela mohlapeng.”

¹⁷ Ke ka baka la’ng ngwanabo rena a ile a tapa? O dumela ka gore: “Ke ile ka thoma go lebiša tlhokomelo kudu dilong tša lefase go e na le go e lebiša dilong tša moya. Ka gona ke ile ka kgaotša go ithuta, ka kgaotša go tšea karolo bodireding le go ya dibokeng. Ge ke re phaphara, ke be ke se sa hlwa ke kopanela le phuthego ya Bokriste. Eupša seo se nthušitšego go boa ke kgahlego e tseneletšego yeo mogolo a mpontšhitšego yona.” Mathata a ngwanabo rena yo a ile a thoma go fokotšega ka morago ga go amogela thuto ya Beibele. O re: “Ke ile ka lemoga gore seo ke bego ke se hloka bophelong bja-ka e be e le lerato le tlhahlo ya Jehofa le mokgatlo wa gagwe.”

¹⁸ Ngwanabo rena yo o ile a amogelwa bjang ka phuthegong? O re: “Ke ikwa bjalo ka morwa wa lehlaswa yoo Jesu Kriste a boletšego ka yena. Ge e le gabotse, yo mongwe wa dikgaetšedi tša rena tše tšofetšego yo a bego a le moo nywageng e 30 e fetilego gomme a sa dutše a hlankela Jehofa ka mafolofolo o itše go nna, ‘Morwa, o a amogelwa ka gae!’ Seo se ile sa tloga se nkgoma pelo. Ke be ke tloga ke le gae. Ke rata go leboga ka mo go tseneletšego lerato, borutho, go se fele pelo le kgahlego yeo ke ilego ka e bontšhwa ke bagolo le phuthego ka moka. Go rata ga bona Jehofa le moagišani go nthušitše go boela mohlapeng.”

Ba Kgothaletše go Gata Mogato Lehono!

19, 20. O ka kgothaletša bjang bao ba tapilego gore ba boele mohlapeng ka ntle le tika-tiko, gomme o ka ba bontšha bjang gore Modimo ga se a letela se se lego ka godimo ga matla a rena?

¹⁹ Re phela mehleng ya bofelo, gomme bofelo bja tshepedišo ye ya gona bjale ya dilo bo tla tla kgaufsinyane. Ka gona, kgothaletša bao ba tapilego gore ba be gona dibokeng tša Bokriste. Ba kgothaletše go thoma go kopanela gatee-tee. Ba gopotše gore Sathane o leka go senya tswalano ya bona le Modimo gomme o dira gore ba nagane gore kimologo dikgateletšong tša bophelo e ka tlišwa ke go hlanogela borapedi bja therešo. O ka ba kgonthišetša gore ba ka hwetša tapologo ya kgonthe ge feela e le balatedi ba botegago ba Jesu.—Bala Mateo 11:28-30.

²⁰ Gopotša bao ba tapilego gore Modimo ga se a letela gore re dire seo re ka se se kgonego. Ge Maria, kgaetšedi ya Latsaro a be a solwa ka ge a tloditše Jesu ka makhura a monko o bose nakwana pele ga lehu la Gagwe, Jesu o itše: “Mo tlogeleng. . . . O dirile se a ka se kgonago.” (Mar. 14:6-8) Jesu o ile a reta mohlologadi yo a se nago sa gagwe yo a ntšhitšego moneelo o monyenyane tempeleng. Le yena o dirile se a ka se kgonago. (Luka 21:1-4) Bontši bja rena re ka kgona go ba gona dibokeng tša Bokriste le go tšea karolo modirong wa go bolela ka Mmušo. Ka thušo ya Jehofa, bontši bja bao ga bjale ba tapilego bo tla kgona go dira dilo tše swanago.

21, 22. O ka kgonthišetša bao ba boelago go Jehofa ka eng?

²¹ Ge yo a swanago le nku yoo a arogilego mohlapeng a boifa go kopana le bana babo gape, o ka mo gopotša ka lethabo leo le bilego gona ge morwa wa lehlaswa a be a boa gae. Bao ba boelago ka phuthegong le bona ba dira gore go be le lethabo. Ba kgothaletše go gata mogato wa go ganetša Diabolo gona bjale le gore ba batamele kgaufsi le Jehofa.—Jak. 4:7, 8.

²² Bao ba boelago go Jehofa ba tla amogelwa ka borutho. (Dillo 3:40) Diphihlelo tša bona tša nako e fetilego tirelong ya Modimo ka ntle le pelaelo di ba tlišeditše lethabo le legolo. Bao ba boelago mohlapeng ka ntle le tika-tiko ba letetšwe ke ditšhegofatšo tše dintši!

O be o tla Araba Bjang?

• O ka thuša bjang Mokriste yo a kgopišitšwego gomme a tapa?

• Ke mabaka afe ao a ka thušago motho yoo a tlogetšego mohlape wa Modimo ka baka la ge a na le pono e fapanego ka thuto e itšego?

• Go ka kgonega bjang go thuša motho yoo a dika-dikago go boela ka phuthegong?

[Dipotšišo tša Thuto]

[Seswantšho go letlakala 13]

Theetša ka kelohloko ge modumedi-gotee yo a tapilego a ntšha sa mafahleng

[Seswantšho go letlakala 15]

Go naganišiša ka papišo ya Jesu ya morwa wa lehlaswa go ka tutueletša ba bangwe go boela mohlapeng