Dula o E-na le Pono ya Mangwalo ka Tlhokomelo ya tša Maphelo

“O rate Jehofa Modimo wa gago . . . ka monagano wa gago ka moka le ka matla a gago ka moka.”​—MAR. 12:30.

1. Morero wa Modimo wa mathomong ka batho ke ofe?

MOREO wa Jehofa Modimo wa mathomong bakeng sa dibopiwa tša gagwe tšeo e lego batho o be o sa akaretše bolwetši le lehu. Adama le Efa ba ile ba bewa tšhemong ya Edene, goba paradeiseng ya lethabo, ‘gore ba e leme le gore ba e diše,’ e sego ka nywaga e 70 goba e 80 feela, eupša ka mo go sa felego. (Gen. 2:8, 15; Ps. 90:10) Ge nkabe batho bao ba babedi ba pele ba ile ba dula ba botegela Jehofa gomme ka lerato ba ikokobeletša bogoši bja gagwe, nkabe ba sa ka ba welwa ke bolwetši, bofokodi le lehu.

2, 3. (a) Botšofadi bo hlaloswa bjang ka pukung ya Mmoledi? (b) Ke mang yoo a ikarabelago ka lehu la leabela la Adama, gomme mafelelo a lona a tla dirollwa bjang?

² Mmoledi kgaolo 12 e hlalosa ka mo go kwagalago “matšatši a mabe” ao a sepedišanago le botšofadi bathong bao ba sego ba phethagala. (Bala Mmoledi 12:1-7.) Moriri o mošweu o bapišwa le matšoba a “mohlare wa amandele,” (PK). Maoto a bapišwa le “banna ba matla” bao ga bjale ba inamago le go sepela ka go ikgoga. Basadi bao ba okamelago ka maroba goba mafasetereng ba tsoma seetša gomme ba hwetša feela lefsifsi, ye ke papišo e swanetšego ya mahlo ao a foufalago. Ka ge meno a mangwe a tšwile, basadi ba “bašidi bà hlôka modirô, xò šetše ba se nene.”

³ Maoto ao a thothomelago, mahlo ao a foufalago le marinini ao a se nago meno e tloga e se seo Modimo a se rerilego go tloga mathomong bakeng sa batho. Go oketša moo, lehu leo le bakilwego ke sebe sa Adama ke o mongwe wa “mediro ya Diabolo” yeo Morwa wa Modimo a tlago go e “fediša” ka Mmušo wa gagwe wa Mesia. Moapostola Johane o ngwadile gore: “Morwa wa Modimo o bonagaditšwe bakeng sa morero wo, e lego, go fediša mediro ya Diabolo.”—1 Joh. 3:8.

Go Tshwenyega ka mo go Leka-lekanego ke ga Tlhago

4. Ke ka baka la’ng bahlanka ba Jehofa ba tshwenyega ka mo go leka-lekanego ka boemo bja bona bja tša maphelo, eupša ke’ng seo ba se gopolago?

⁴ Mo lebakeng la bjale, bahlanka ba bangwe ba Jehofa ba lebeletšane le mathata ao a tlwaelegilego bathong ba sebe, e lego bolwetši le botšofadi. Go tshwenyega ka mo go leka-lekanego ka boemo bja rena bja tša maphelo ka tlase ga maemo a bjalo ke ga tlhago e bile go a hola. Na ga re nyake go hlankela Jehofa ka ‘matla a rena ka moka’? (Mar. 12:30) Lega go le bjalo, ge re dutše re leka go dula re phetše gabotse mmeleng, re swanetše go gopola le go lemoga gore ge e le gabotse ga go selo seo re ka se dirago go thibela botšofadi goba go phema malwetši ka moka.

5. Ke’ng seo re ka ithutago sona tseleng yeo bahlanka ba Modimo ba ilego ba lebeletšana ka yona le bolwetši?

⁵ Bahlanka ba bantši ba ba botegago ba Jehofa ba ile ba swanelwa ke go lebeletšana le mathata a tša maphelo. Epaforodito e bile yo mongwe wa bona. (Bafil. 2:25-27) Mogwera yo a botegago  wa Paulo e lego Timotheo o be a e-na le go tshwenywa ke mala, ao Paulo a ilego a mo kgothaletša gore a nwe “beine e nyenyane” bakeng sa ona. (1 Tim. 5:23) Paulo le yena o ile a lebeletšana le “mootlwa nameng,” mohlomongwe bolwetši bja mahlo, goba bolwetši bjo bongwe bjoo bo bego bo se na kalafo ka nako yeo. (2 Bakor. 12:7; Bagal. 4:15; 6:11) Paulo o ile a lopa Jehofa gantši go tšwa pelong mabapi le “mootlwa nameng” ya gagwe. (Bala 2 Bakorinthe 12:8-10.) Modimo ga se a ka a tloša ‘mootlwa woo o bego o le nameng’ ya Paulo ka mohlolo. Go e na le moo, Modimo o ile a mo matlafatša gore a kgone go o kgotlelela. Ka gona, matla a Jehofa a ile a bonagala bofokoding bja Paulo. Na taba ye e ka re ruta se itšego?

Phema go Tshwenyega ka mo go Feteletšego ka Tlhokomelo ya tša Maphelo

6, 7. Ke ka baka la’ng re swanetše go phema go tshwenyega ka mo go feteletšego ka boemo bja rena bja tša maphelo?

⁶ Ka ge o tseba, Dihlatse tša Jehofa di amogela thušo ypa tša maphelo le mekgwa ya mehuta-huta ya tša kalafo. Makasine wa rena wa Phafoga! gantši o ba le dihlogo tšeo di bolelago ka tša maphelo. Le gona, gaešita le ge re sa thekge mohuta o itšego wa kalafo, re leboga thušo le tirišano tša bao ba šomago ka tša kalafo. Ke therešo gore re lemoga gore go ba le boemo bjo bo phethagetšego bja tša maphelo ga se gwa hlwa go kgonega. Ka baka leo, re a tseba gore ke gabohlale go phema go tshwenyega ka mo go feteletšego ka tlhokomelo ya tša maphelo. Boemo bja rena bja kgopolo bo swanetše go fapana le bja batho ‘ba se nago kholofelo’ bao ba naganago gore bophelo bjo ke bjona feela bjo bo lego gona, le bao ba ka dirišago mokgwa le ge e le ofe wa tša kalafo maitekong a go alafa malwetši a bona. (Baef. 2:2, 12) Re ikemišeditše gore re se ke ra lahlegelwa ke kamogelo ya Jehofa e le ge re leka go phološa bophelo bja rena bja gona bjale, gobane re kgodišegile gore ge e ba re dula re botegela Jehofa re tla ‘swarelela ka go tia bophelong bja kgonthe,’ e lego bophelo bjo bo sa felego tshepedišong ya gagwe e mpsha ya dilo yeo a e holofeditšego.—1 Tim. 6:12, 19; 2 Pet. 3:13.

⁷ Ka baka la lebaka le lengwe gape, re phema go tshwenyega ka mo go feteletšego ka boemo bja rena bja tša maphelo. Go tshwenyega ka mo go feteletšego ka boemo bja rena bja tša maphelo go ka dira gore re be le boithati. Moapostola Paulo o ile a lemoša malebana le kotsi ye ge a kgothaletša Bafilipi gore ba dule ba “beile leihlo, e sego ka kgahlego ya motho ka noši ditabeng tša [bona] feela, eupša le ka kgahlego ya motho ka noši go tša ba bangwe.” (Bafil. 2:4) Ke mo go swanetšego gore re itlhokomele ka tsela e lekanetšego, eupša kgahlego e tseneletšego yeo re e bontšhago bana babo rena le batho bao re ba tlišetšago “ditaba tše tše dibotse tša mmušo,” e tla re thibela gore re se ke ra tshwenyega ka mo go feteletšego ka go phela gabotse ga rena mmeleng.—Mat. 24:14.

8. Go tshwenyega ka mo go feteletšego ka boemo bja rena bja tša maphelo go ka dira gore re dire’ng?

⁸ Go na le kotsi ya gore Mokriste a ka dumelela go tshwenyega ka boemo bja tša maphelo go šuthišetša mediro ya Mmušo boemong bja bobedi. Le gona go tshwenyega ka mo go feteletšego ka tlhokomelo ya tša maphelo go ka dira gore re leke go gapeletša ba bangwe gore ba amogele dipono tša rena mabapi le mehola ya mohuta o itšego wa kalafo goba dijo. Mabapi le se, ela hloko molao wa motheo o lego mantšung a Paulo a rego: “Le kgonthišetše dilo tše bohlokwa kudu, e le gore le se be le bosodi le gore le se ke la kgopiša ba bangwe go fihlela letšatšing la Kriste.”—Bafil. 1:10.

Ke Eng Seo se Lego Bohlokwa Kudu?

9. E nngwe ya dilo tše bohlokwa kudu tšeo re sego ra swanela go di hlokomologa ke efe, gona ka baka la’ng?

⁹ Ge e ba re kgonthišetša dilo tšeo di lego bohlokwa kudu, gona re tla be re tšea karolo ka mafolofolo modirong wa go alafa batho moyeng. O phethwa ka go dira boboledi le ka go ruta Lentšu la Modimo. Modiro wo woo o thabišago o a re hola e bile o hola bao re ba rutago. (Die. 17:22; 1 Tim. 4:15, 16) Ka dinako tše dingwe dimakasine tša Morokami le Phafoga! di ba le dihlogo tšeo di bolelago ka bana babo rena le dikgaetšedi bao ba lebeletšanago le malwetši a šoro. Dihlogo tše ka dinako tše dingwe di hlalosa kamoo ba kgonago go lebeletšana le maemo a bona ka gona goba gaešita le go a lebala ka lebakanyana, ka go tsoma  go thuša ba bangwe go tseba ka Jehofa le ka merero ya gagwe e kgahlišago. *

10. Ke ka baka la’ng kgetho yeo re e dirago mabapi le tša kalafo e le taba e bohlokwa?

¹⁰ Ge Mokriste yo mongwe le yo mongwe yo e lego motho yo mogolo a lebeletšane le bothata bja tša maphelo, o swanetše go “rwala morwalo wa gagwe” wa boikarabelo wa go kgetha mokgwa wa tša kalafo. (Bagal. 6:5) Eupša re swanetše go gopola gore Jehofa o lebelela kgetho yeo re e dirago mabapi le tša kalafo e le taba e bohlokwa. Go fo etša ge go hlompha melao ya motheo ya Beibele go re tutueletša go ‘ila madi,’ ka mo go swanago go hlompha ga rena Lentšu la Modimo go swanetše go re tutueletša go phema go diriša mekgwa ya tša kalafo yeo e ka re gobatšago moyeng goba ya senya tswalano ya rena le Jehofa. (Dit. 15:20) Mekgwa e mengwe ya go hlahloba le go alafa malwetši e batamelane kgaufsi kudu le mekgwa ya go dirišana le meoya. Jehofa ga se a ka a amogela Baisiraele ba bahlanogi, bao ba bego ba retologetše go ‘maleatlana’ goba mekgweng ya go dirišana le meoya. O boletše gore: “Le se sa tliša dibego tše sa rego selo tša mabele. Seorelo sa lena se a ntšhišimiša. Ga ke kgotlelele menyanya ya lena ya ge kgwedi e dula le disabatha tša lena le dikopano tše le di rulaganyago; ga ke kgotlelele go diriša maleatlana gotee le dipokano tša lena tše kgethwa.” (Jes. 1:13, NW) Nakong ya bolwetši ga se ra swanela go dira selo seo se kago go šitiša dithapelo tša rena le go bea tswalano ya rena le Modimo kotsing.—Dillo 3:44.

Go ba le “Monagano o Hlaphogetšwego” go Bohlokwa

11, 12. Go ba le “monagano o hlaphogetšwego” go tsena bjang tabeng ya go kgetha tlhokomelo e itšego ya tša maphelo?

¹¹ Ge re babja, re ka se ke ra letela gore Jehofa a re fodiše ka mohlolo, eupša re ka rapelela bohlale ge re kgetha mohuta o itšego wa kalafo. Re swanetše go dumelelela melao ya motheo ya Beibele le go hlaphogelwa monaganong go re hlahla kgethong ya rena ya tša kalafo. Ge e ba boemo e le bjo šoro, e ka ba gabohlale go bonana le ditsebi tše mmalwa, ka go dumelelana le kgopolo e lego go Diema 15:22 yeo e rego: “Maanô a padile, xò se keletšanô; a tlo kxônêxa xe baeletši ba ka ata.” Moapostola Paulo o kgothaleditše badumedi-gotee le yena go “phela ka monagano o hlaphogetšwego le toko le boineelo go Modimo gare ga tshepedišo ye ya dilo ya gona bjale.”—Tito 2:12.

¹² Batho ba bantši ba ikhwetša ba le boemong bjo bo swanago le bja mosadi yo a babjago wa mehleng ya Jesu. Go Mareka 5:25, 26 re bala gore: “Go be go e-na le mosadi yo a bego a swerwe ke bolwetši bja ngope ka nywaga e lesome-pedi, a tlaišitšwe kudu ke dingaka tše dintši, a feditše dilo tša gagwe ka moka gomme a se a ka a holega, eupša go e na le moo boemo bja gagwe bo be bo befetše pele.” Jesu o ile a fodiša mosadi yoo gomme a mmontšha kwelobohloko. (Mar. 5:27-34) Ka baka la tlalelo ya go nyaka go hwetša kalafo, Bakriste ba bangwe ba ile ba lekega gore ba kgethe mekgwa ya go hlahlobja le go alafša malwetši yeo e thulanago le melao ya motheo ya borapedi bjo bo sekilego.

13, 14. (a) Sathane a ka diriša bjang kgetho ya rena ya tša kalafo go roba potego ya rena? (b) Ke ka baka la’ng re swanetše go efoga selo le ge e le sefe seo se nyakago se swana le bonoge?

 ¹³ Sathane o tla diriša mekgwa le ge e le efe gore a re aroše borapeding bja therešo. Go fo etša ge a diriša boitshwaro bjo bo gobogilego bja tša botona le botshadi le go rata dilo tše di bonagalago go aroša ba bangwe, o leka go roba potego ya ba bangwe ka go diriša mekgwa e belaetšago ya tša kalafo yeo e swanago le go diriša bonoge goba go dirišana le meoya. Re rapelela gore Jehofa a re hlakodiše go “yo kgopo” le “mohuteng o mongwe le o mongwe wa go hloka molao.” Ka gona ga se ra swanela go bapalela ka diatleng tša Sathane ka go diriša mekgwa yeo e nyakago e swana le go dirišana le meoya gotee le bonoge.—Mat. 6:13; Tito 2:14.

¹⁴ Jehofa o be a iletša Baisiraele go dirišana le meoya le go diriša maleatlana. (Doit. 18:10-12) Paulo o lokeletša “go dirišana le meoya” gotee le “mediro ya nama.” (Bagal. 5:19, 20) Go oketša moo, “bao ba dirišanago le meoya” ba ka se be le karolo tshepedišong e mpsha ya Jehofa ya dilo. (Kut. 21:8) Ka gona, go molaleng gore selo le ge e le sefe seo se sepedišanago le go dirišana le meoya ke makgapha go Jehofa.

“Anke go Leka-lekana ga Lena go Tsebje Bathong Bohle”

15, 16. Ke ka baka la’ng re swanetše go diriša bohlale ge re kgetha tlhokomelo ya tša maphelo, le gona sehlopha se bušago sa lekgolong la pele la nywaga se neile keletšo efe e bohlale?

¹⁵ Ka baka la mabaka a re boletšego ka ona, ge e ba mokgwa o itšego wa go hlahloba le go alafa malwetši o belaetša, e tla ba gabohlale gore re o gane. Ke therešo gore taba feela ya gore ga re kgone go hlalosa tsela yeo mokgwa wa tša kalafo o šomago ka yona ga e bolele gore mokgwa woo o akaretša sebopego se itšego sa go dirišana le meoya. Gore re dule re e-na le pono ya Mangwalo ka tlhokomelo ya tša maphelo, go nyakega bohlale bjo bo tšwago go Modimo le gore re be le kahlolo e botse. Go Diema kgaolo 3, re hwetša keletšo ye: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela. . . . Ipolokêlê thlaloxanyô le pelo-keledi. Ké tšôna di phedišaxo môya w’axo, di Xo apeša pheta molaléng.”—Die. 3:5, 6, 21, 22.

¹⁶ Ka gona, le ge re katanela go dula re le ba phetšego gabotse ka mo go ka kgonegago, re swanetše go ba šedi gore re se ke ra lahlegelwa ke kamogelo ya Modimo ge re dutše re leka go hwetša kalafo ya malwetši a rena goba go lebeletšana le botšofadi. Tabeng ya tlhokomelo ya tša maphelo, go fo etša ditabeng tše dingwe, re swanetše go dira gore ‘go leka-lekana ga rena go tsebje bathong bohle’ ka go phela ka go dumelelana le melao ya motheo ya Beibele. (Bafil. 4:5) Lengwalong le bohlokwa kudu, sehlopha se bušago sa lekgolong la pele la nywaga se laetše Bakriste go ila medimo ya diswantšho, madi le bootswa. Lengwalo leo le be le e-na le kgonthišetšo e rego: “Ge e ba le phema dilo tše ka mo go feletšego, le tla atlega.” (Dit. 15:28, 29) Ka tsela efe?

Tlhokomelo e Leka-lekanego ka Tebelelo ya Boemo bjo bo Phethagetšego bja tša Maphelo

17. Re holegile bjang mmeleng ka baka la go kgomarela ga rena melao ya motheo ya Beibele?

¹⁷ Yo mongwe le yo mongwe wa rena o swanetše go ipotšiša gore: ‘Na ke lemoga bogolo bja katlego  yeo ke šetšego ke bile le yona ka baka la go latela ka go tia melao ya motheo ya Beibele ya mabapi le madi le bootswa?’ Le gona, nagana ka mehola yeo re e hweditšego ka baka la maiteko a rena a go ‘itlhwekiša ditšhila tšohle tša nama le tša moya.’ (2 Bakor. 7:1) Re phema malwetši a mantši ka baka la go kgomarela ditekanyetšong tša Beibele tša bohlweki. Re a atlega ka baka la go phema go diriša motšoko le dihlare-tagi tše dingwe tšeo di šilafatšago mmeleng le moyeng. Nagana le ka boemo bjo bobotse bja tša maphelo bjo bo tlišwago ke go lekanyetša ge re e-ja le ge re e-nwa. (Bala Diema 23:20; Tito 2:2, 3.) Gaešita le ge go robala nako e lekanego le go itšhidulla go kaonefatša boemo bja rena bja tša maphelo, ge e le gabotse re ba phetšego gabotse mmeleng le moyeng ka baka la go amogela ga rena tlhahlo ya Mangwalo.

18. Ke’ng seo re swanetšego go tshwenyega kudu ka sona, gomme re ka lebelela pele go phethagaleng ga boporofeta bofe bja mabapi le boemo bja tša maphelo?

¹⁸ Go feta tšohle, re swanetše go hlokomela boemo bja rena bja moya gomme re matlafatše tswalano ya rena e bohlokwa le Tatago rena wa legodimong, Mothopo wa ‘bophelo bja rena bja gona bjale le bja nakong e tlago’ lefaseng la gagwe le lefsa leo le holofeditšwego. (1 Tim. 4:8; Ps. 36:9) Tshepedišong e mpsha ya Modimo ya dilo, go tla ba le phodišo e feletšego mmeleng le moyeng, e tla tlišwago ke tebalelo ya dibe motheong wa sehlabelo sa Jesu sa topollo. Kwana ya Modimo, Kriste Jesu, e tla re iša “methopong ya meetse a bophelo,” gomme Modimo o tla “phumola megokgo ka moka” mahlong a rena. (Kut. 7:14-17; 22:1, 2) Se sengwe gape, ka nako yeo re tla bona go phethagala ga boporofeta bjo bjo bo kgahlišago kudu bjo bo rego: “Mo xo ba ba axilexo fá xo ka se bê le e a rexo: Ke a babya!”—Jes. 33:24.

19. Ge re dutše re hlokomela boemo bja rena bja tša maphelo ka tsela e leka-lekanego, ke’ng seo re ka kgodišegago ka sona?

¹⁹ Re kgodišegile gore tlhakodišo e kgaufsi e bile re fagahletše letšatši la ge Jehofa a tla dira gore batho ba se sa hlwa ba babja le go hwa. Mo lebakeng le, re kgonthišeditšwe gore Tatago rena yo lerato o tla re thuša go kgotlelela bohloko le dihlabi ka gobane ‘o a re hlokomela.’ (1 Pet. 5:7) Ka gona, a re hlokomeleng boemo bja rena bja tša maphelo, eupša ka mehla e le ka go dumelelana le tlhahlo e kwagalago yeo e lego ka Lentšung le le buduletšwego la Modimo!

[Mongwalo wa tlase]

E le Poeletšo

• Ke mang yo a ikarabelago ka bolwetši, gomme ke mang yo a tlago go re imolla ditla-moragong tša sebe?

• Gaešita le ge go tshwenyega ka boemo bja rena bja tša maphelo e le ga tlhago, re swanetše go phema’ng?

• Ke ka baka la’ng kgetho yeo re e dirago mabapi le tša kalafo e le taba e bohlokwa go Jehofa?

• Mabapi le boemo bja rena bja tša maphelo, re ka holwa bjang ke go kgomarela melao ya motheo ya Beibele?

[Dipotšišo tša Thuto]

[Seswantšho go letlakala 23]

Batho ga se ba bopelwa bo babja le go tšofala

[Seswantšho go letlakala 25]

Go sa šetšwe mathata a tša maphelo, batho ba Jehofa ba hwetša lethabo bodireding