Go Hlankela Modimo ka “Pelo e Tee le Moya o Tee”

BAJUDA le basokologi ba dikologile barutiwa ba Jesu Kriste. Ke Monyanya wa Paseka gomme ba tlile Jerusalema ba e-tšwa dinageng tša kgole, tše bjalo ka Roma e lego ka bodikela le Pareta e lego ka bohlabela. Go bolelwa maleme a fapa-fapanego lešabeng le. Lega go le bjalo, barutiwa ba Jesu bao ba bolelago le lešaba ke Bagalilea. Ba bangwe ba baeng bao ba maketšego ba botšiša gore: “Go tla bjang gore yo mongwe le yo mongwe wa rena a kwe leleme la gabo leo re tswaletšwego go lona?”—Dit. 2:8.

Moapostola Petro o a emelela gomme o hlalosa lebaka la motheo la mohlolo woo ba o bonago.  Lešaba le arabela ka ntle le tika-tiko. Go kolobetšwa ba dikete ba bafsa! (Dit. 2:41) Gaešita le ge phuthego e gola ka lebelo, e dula e e-na le botee. Mongwadi wa Beibele e lego Luka o re: “Bontši bja bao ba ilego ba dumela e be e le ba pelo e tee le moya o tee.”—Dit. 4:32.

Ba dikete bao ba kolobeditšwego letšatšing la Paseka ya 33 C.E. ba ile ba kgetha go dula Jerusalema lebakanyaka e le gore ba ithute mo gontši ka tumelo ya bona e mpsha. Eupša ge ba be ba e-tla ba be ba se ba ikemišetša go dula lebakanyana. Ka baka leo, go ile gwa kgoboketšwa meneelo ya nakwana ya tšhelete. Badumedi ba itšego ba ile ba rekiša dithoto tša bona ka go rata gomme ba tliša tšhelete ya tšona go baapostola e le moneelo bakeng sa bao ba nyakago thušo. (Dit. 2:42-47) A moya o mobotse gakaakang wa lerato le wa go nea!

Bakriste ba therešo ba be ba dutše ba e-na le moya o bjalo wa lerato le wa go nea. Lehono, phuthego ya Bokriste e tšwela pele e hlankela Jehofa ka botee, ka “pelo e tee le moya o tee.” Mokriste yo mongwe le yo mongwe o neela ka nako ya gagwe, matla le tšhelete ka go rata bakeng sa go thekga boboledi bja ditaba tše dibotse le go tšwetša pele dikgahlego tša Mmušo wa Modimo.—Bona lepokisi leo le nago le sehlogo se se rego  “Ditsela Tšeo ka Tšona ba Bangwe ba Kgethago go Nea.”

[Lepokisi go letlakala 6, 7]

 DITSELA TŠEO KA TŠONA BA BANGWE BA KGETHAGO GO NEA

MENEELO BAKENG SA MODIRO WA LEFASE KA BOPHARA

Ba bantši ba beela ka thoko tekanyo ya tšhelete yeo ba e tsenyago ka mapokising a ngwadilwego “Modiro wa Lefase ka Bophara.”

Kgweding e nngwe le e nngwe, diphuthego di romela ditšhelete tše ofising ya Dihlatse tša Jehofa yeo e hlankelago naga ya gabo tšona. Meneelo ya boithatelo ya ditšhelete le yona e ka romelwa ka go lebanya go WatchTower Bible and Tract Society of South Africa, Attention: Ac­count­ing Office, Private Bag X2067, Kru­gers­dorp, 1740, South Africa, goba ofising ya lekala ya Dihlatse tša Jehofa yeo e hlankelago naga ya geno. Ditšheke tšeo di romelwago atereseng yeo e lego ka mo godimo di swanetše go dirwa gore di lefelelwe go “WatchTower Society.” Hle ikgokaganye le ofisi ya lekala ge e ba o rata go neela ka mabenyabje goba dilo tše dingwe tše bohlokwa. Ka morago ga moo, lengwalo le le kopana leo le bolelago gore selo se se bjalo ke mpho e neelwago ka go lebanya le swanetše go sepela le meneelo ye.

GO NEA MO GO RULAGANYEDITŠWEGO

Go tlaleletša go dimpho tša ditšhelete tše di newago ka go lebanya, go na le mekgwa e mengwe ya go nea bakeng sa go hola tirelo ya Mmušo ya lefase ka bophara. Ye e akaretša:

Phemelo (Inšuranse): Watch Tower Bi­ble and Tract Society of South Africa e ka ngwadišwa e le moja-bohwa wa thulaganyo ya tša phemelo ya bophelo goba thulaganyo ya go rola modiro/phenšene.

Di-Stock le Di-Bond: Di-Stock le di-bond di ka neelwa go Watch Tower Bible and Tract Society of South Africa e le mpho e neelwago ka go lebanya.

Mafelo ao e Lego Dithoto: Mafelo ao e lego dithoto tšeo di ka rekišwago a ka neelwa e le mpho e neelwago ka go lebanya goba ge e ba e le lefelo la bodulo, ka go boloka thoto e le go monei, yo a ka tšwelago pele a dula go yona ge a sa dutše a phela. Ikgokaganye le ofisi ya lekala ya nageng ya geno pele o fetiša lefelo le ge e le lefe leo e lego thoto.

Dikeno: Dithoto goba tšhelete di ka tlogelelwa Watch Tower Bible and Tract Society of South Africa e le bohwa ka go dirišwa ga keno e dirilwego ka molao.

Bakeng sa tsebišo e oketšegilego, o ka ikgokaganya le Accounting Office, e ka ba ka go ngwala goba ka mogala atereseng yeo e lokeleditšwego ka mo tlase goba wa ikgokaganya le ofisi ya lekala ya Dihlatse tša Jehofa yeo e hlankelago naga ya geno.

Accounting Office

Watch Tower Bible and Tract Society

of South Africa

Private Bag X2067

Krugersdorp

1740

South Africa

Mogala: 011 761 1000