“Le Ganetše Diabolo” go Swana le ge Jesu a Dirile

“Le ganetše Diabolo, o tla le tšhaba.”​—JAK. 4:7.

1. Ke kganetšo efe yeo Jesu a bego a tseba gore o tla lebeletšana le yona ge a be a le mo lefaseng, gomme ka ditla-morago dife?

JESU KRISTE o be a tseba gore o tlo ganetšwa ke Diabolo. Se se bonagetše gabotse go seo Modimo a se boditšego noga gomme ka go rialo e lego seo a bego a se botša sebopiwa sa moya seo se bego se diriša noga yeo go bolela, ge a re: “Ke bea lehlôyô xare xa xaxo le mosadi [karolo ya legodimong ya mokgatlo wa Jehofa], le xare xa peu ya xaxo le peu ya xaxwe. Yôna e tlo Xo phšatla hlôxô; ’me wêna O tlo e loma serêthê.” (Gen. 3:14, 15; Kut. 12:9) Go longwa serethe ga Jesu go be go bolela gore ge a bolawa nakong ya ge a le mo lefaseng o be a tla tlaišega ka nakwana, ka ge Jehofa a be a tla mo tsošetša bophelong bja legodimong bja letago. Eupša go pšhatlwa ga hlogo ya noga go be go bolela gore Diabolo o tla bolawa moo e  lego gore a ka se ke a tsoga.—Bala Ditiro 2:31, 32; Baheberu 2:14.

2. Ke ka baka la’ng Jehofa a be a kgodišegile gore Jesu o tla ganetša Diabolo ka katlego?

² Jehofa o be a kgodišegile gore ge Jesu a le mo lefaseng o be a tla phetha kabelo ya gagwe ka katlego gomme a ganetša Diabolo. Ke ka baka la’ng Jehofa a be a ka kgodišega ka se? Ka gobane o be a bopile Jesu kua legodimong nywaga e mentši kudu pele ga moo, a ile a mo šetša, e bile a tseba gore “modirišani [yo] wa gagwe” le “leitšibulo la tlholo yohle” ya gagwe o tla kwa le go botega. (Die. 8:22-31, bapiša le PK; Bakol. 1:15) Ka gona, ge Jesu a be a rometšwe lefaseng gomme Diabolo a dumeletšwe go mo leka go fihla lehung, Modimo o be a kgodišegile gore Morwa wa Gagwe yo a tswetšwego a nnoši o be a tlo fenya.—Joh. 3:16.

Jehofa o Šireletša Bahlanka ba Gagwe

3. Diabolo o na le boemo bofe bja kgopolo malebana le bahlanka ba Jehofa?

³ Jesu o boletše gore Diabolo ke “mmuši wa lefase le” gomme o lemošitše barutiwa ba Gagwe gore ba tla tlaišwa, ka ge le yena a tlaišitšwe. (Joh. 12:31; 15:20) Lefase, leo le rapaletšego matleng a Sathane Diabolo, le hloile Bakriste ba therešo ka gobane ba hlankela Jehofa e bile ke baboledi ba toko. (Mat. 24:9; 1 Joh. 5:19) Bahlaselwa ba bagolo ba Diabolo ke mašaledi a batlotšwa ao a tlago go feleletša ka go buša gotee le Kriste Mmušong wa gagwe wa legodimong. Bahlaselwa ba bangwe ba Sathane ke Dihlatse tše dintši tša Jehofa tšeo di nago le kholofelo ya go phela ka mo go sa felego lefaseng la paradeise. Lentšu la Modimo le lemoša ka gore: “Lenaba la lena, Diabolo, o sepela-sepela go swana le tau e rorago, a nyaka go metša yo mongwe.”—1 Pet. 5:8.

4. Ke’ng seo se bontšhago gore batho ba Modimo ba atlegile go lwantšha Diabolo mehleng ya rena?

⁴ Ka ge re le mokgatlo woo o thekgwago ke Jehofa Modimo, re ganetša Diabolo ka katlego. Ela hloko dintlha tše: Nywageng e 100 e fetilego, e mengwe ya mebušo ya bogateledi bjo bošoro historing e ile ya leka go fediša Dihlatse tša Jehofa. Eupša Dihlatse di tšwela pele go oketšega gomme ga bjale di fihleletše palo ye e nyakilego go ba 7 000 000, diphuthegong tše fetago 100 000 go dikologa lefase. Mebušo e sehlogo ya bogateledi yeo e bego e gatelela batho ba Jehofa ke yona yeo e fedišitšwego!

5. Jesaya 54:17 e phethagetše bjang go bahlanka ba Jehofa?

⁵ A bolela le phuthego ya Isiraele ya bogologolo e lego bjalo ka “mosadi” wa gagwe, Modimo o holofeditše gore: “Marumô ka moka a rulêlwaxo xo lwa naxô’, a ka se kxône selô. Maleme ka moka a a Xo pharaxo O tlo a fenya thsekong. Ké byôna bohwa bya balata ba Morêna; ké tšôna di tl’o xo ba lokêla di e-tšwa xo Nna.” (Jes. 54:6, 17) Kholofetšo yeo e phethagetše go batho ba Jehofa go dikologa lefase ‘mehleng ye ya bofelo.’ (2 Tim. 3:1-5, 13) Ka ge Jehofa a le ka lehlakoreng la rena, re tšwela pele re lwantšha Diabolo, gomme ga go na sebetša seo a ka lekago go se diriša go fediša batho ba Modimo seo se ka atlegago.—Ps. 118:6, 7.

6. Boporofeta bja Daniele bo re botša’ng ka bokamoso bja pušo ya Diabolo?

⁶ Bofelong bja tshepedišo ya gona bjale ya dilo bjo bo batamelago ka lebelo, dikarolo ka moka tša pušo ya Sathane di tla fedišwa ka mo go feletšego. Ge a ngwala a buduletšwe ke Modimo, Moporofeta Daniele o boletše e sa le pele gore: “Mehleng ya dikxoši tšeo [tšeo di phelago mehleng ya rena], ké mo Modimo a tl’o xo tsoša mmušô [legodimong] wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka [yeo e lego gona gona bjale] wa e fediša xe e le wôna, o tlo êma xo ya xo ile.” (Dan. 2:44) Ge seo se direga, bobedi pušo ya Sathane le ya batho ba sego ba phethagala di tla fela. Karolo e nngwe le e nngwe ya tshepedišo ya dilo ya Diabolo e tla fedišwa ka mo go sa felego, gomme Mmušo wa Modimo o tla buša lefase ka moka ka ntle le tšhitišo.—Bala 2 Petro 3:7, 13.

7. Re tseba bjang gore yo mongwe le yo mongwe wa bahlanka ba Jehofa a ka kgona go ganetša Diabolo ka katlego?

⁷ Ga go na pelaelo gore mokgatlo wa Jehofa o tla šireletšwa gomme o tla atlega moyeng. (Bala Psalme 125:1, 2.) Go thwe’ng ka rena? Beibele e re botša gore re ka atlega go ganetšeng Diabolo, bjalo ka ge Jesu a dirile. Ee, boporofeta bjoo Kriste  a bo neilego a diriša moapostola Johane bo bontšha gore go sa šetšwe kganetšo ya Sathane, “lešaba le legolo” la bao ba nago kholofelo ya go phela lefaseng le tla phologa phedišo ya tshepedišo ye ya dilo. Go ya ka Mangwalo, le goeletša ka gore: “Phološo e tšwa go Modimo wa rena yo a dutšego sedulong sa bogoši, le go Kwana [Jesu Kriste].” (Kut. 7:9-14) Batlotšwa ba bolelwa e le bao ba fenyago Sathane gomme bagwera ba bona, “dinku tše dingwe,” le bona ba mo ganetša ka katlego. (Joh. 10:16; Kut. 12:10, 11) Eupša se se nyaka maiteko a tseneletšego le thapelo e tšwago pelong ya go rapelela go ‘hlakodišwa go yo kgopo.’—Mat. 6:13.

Mohlala o Phethagetšego wa go Ganetša Diabolo

8. Ke teko efe ya mathomo yeo Diabolo a ilego a e diriša lešokeng kgahlanong le Jesu, gona Kriste o ile a arabela bjang?

⁸ Diabolo o ile a leka go roba potego ya Jesu. Lešokeng, Sathane o ile a diriša dikgoketšo ka maiteko a go dira gore Jesu a kwanantšhe go kwa ga Gagwe Jehofa. Lega go le bjalo, Jesu o beile mohlala o mobotse wa go ganetša Sathane. Ka morago ga go ikona dijo ka matšatši a 40 le mašego a ona, mohlomongwe Jesu o ile a kwa a swerwe ke tlala. Sathane o itše: “Ge e ba o le morwa wa Modimo, botša mafsika a gore e be dinkgwa.” Eupša Jesu o ile a gana go diriša matla a gagwe ao a a filwego ke Modimo bakeng sa go ikhola. Go e na le moo, Jesu o itše: “Go ngwadilwe gwa thwe, ‘Motho a ka se phele ka senkgwa feela, eupša o tla phela ka polelo e nngwe le e nngwe e tšwago molomong wa Jehofa.’”—Mat. 4:1-4; Doit. 8:3.

9. Ke ka baka la’ng re swanetše go ganetša diteko tša Diabolo tša go diriša dikganyogo tša rena tša nama?

⁹ Lehono, Diabolo o leka go diriša gampe dikganyogo tša tlhago tša bahlanka ba Jehofa. Ka gona re swanetše go ikemišetša go ganetša ka go tia dikgoketšo tša dikopano tše di gobogilego tša botona le botshadi, tšeo di tlwaelegilego lefaseng le leo le se nago boitshwaro. Lentšu la Modimo le gatelela gore: “Eng! Na ga le tsebe gore batho ba ba sa lokago ba ka se je bohwa bja mmušo wa Modimo? Le se ke la timetšwa. Ge e le diotswa, goba barapedi ba medimo ya diswantšho, goba dihlotlolo, goba banna ba ba boloketšwego merero yeo e sego ya tlhago, goba banna ba ba robalago le banna . . . ba ka se je bohwa bja mmušo wa Modimo.” (1 Bakor. 6:9, 10) Ka gona, go molaleng gore batho bao ba phelago bophelo bjo bo gobogilego bao ba ganago go fetoga ba ka se dumelelwe go phela lefaseng le lefsa la Modimo.

10. Go ya ka Mateo 4:5, 6, ke teko efe e nngwe yeo e ilego ya dirišwa ke Sathane ge a be a leka go roba potego ya Jesu?

¹⁰ Mabapi le diteko tšeo a lebeletšanego le tšona lešokeng, Mangwalo a bolela gore: “Diabolo a mo tšea a ya le yena motseng o mokgethwa, a mo emiša tlhoreng ya lerako la tempele a re go yena: ‘Ge e ba o le morwa wa Modimo, itahlele fase; gobane go ngwadilwe gwa thwe, “O tla laela barongwa ba gagwe mabapi le wena, gomme ba tla go rwala ka diatla tša bona, e le gore lenao la gago le ka mohla le se ke la kgopša ke lefsika.”’” (Mat.  4:5, 6) Sathane o be a šišinya gore seo se tla dira gore Jesu a bonagatše gore ke Mesia. Ge e le gabotse, e be e tla ba tiro e sa swanelego, ya makoko yeo e ka se amogelwego le go thekgwa ke Modimo. Jesu o ile a botegela Jehofa gape, gomme a arabela ka go tsopola lengwalo. O itše: “Gape go ngwadilwe gwa thwe, ‘O se ke wa leka Jehofa Modimo wa gago.’”—Mat. 4:7; Doit. 6:16.

11. Sathane a ka re leka bjang, gona mafelelo e ka ba afe?

¹¹ Sathane a ka re leka go re dira gore re tsome letago ka ditsela tše dintši. A ka leka go re dira gore re ekiše mekgwa ya lefase ya go apara le go itokiša goba gore re tšee karolo boithabišong bjo bo belaetšago. Eupša ge re be re ka hlokomologa keletšo ya Beibele gomme ra ekiša lefase, na re be re ka letela gore barongwa ba re šireletše ditla-moragong tše mpe tša mekgwa yeo? Le ge Kgoši Dafida a ile a sokologa sebeng sa gagwe seo se akaretšago Batseba, o be a se a šireletšwa go ditla-morago tša ditiro tša gagwe. (2 Sam. 12:9-12) A re se keng ra leka Jehofa ka ditsela tše sa swanelago, mohlomongwe ka go hlagolela bogwera le batho ba lefase.—Bala Jakobo 4:4; 1 Johane 2:15-17.

12. Ke teko efe yeo e boletšwego go Mateo 4:8, 9, gomme Morwa wa Modimo o ile a arabela bjang?

¹² Teko e nngwe gape yeo Diabolo a ilego a e diriša lešokeng e be e akaretša kholofetšo ya go nea Jesu mebušo. Sathane o bontšhitše Jesu mebušo ka moka ya lefase le letago la yona gomme a re: “Dilo tše ka moka ke tla go nea tšona ge o ka wela fase wa ntirela tiro ya borapedi.” (Mat. 4:8, 9) A teko ya bohwirihwiri gakaakang ya go nyaka borapedi bjo bo newago Jehofa le ya go leka go tutuetša Jesu gore a robe potego ya gagwe go Modimo! Ka go naganišiša ka kganyogo ya go rapelwa, morongwa yo yoo pele a kilego a ba yo a botegago o ile a fetoga moleki wa modiradibe, wa megabaru le yo mobe ka go fetišiša e lego Sathane Diabolo. (Jak. 1:14, 15) Lega go le bjalo, Jesu o be a ikemišeditše go dula a botegela Tatagwe wa legodimong, ka gona o boletše gore: “Tloga, Sathane! Gobane go ngwadilwe gwa thwe, ‘Ke Jehofa Modimo wa gago yo o swanetšego go mo rapela, gomme ke yena a nnoši yo o swanetšego go mo direla tirelo e kgethwa.’” Ka gona Jesu gape o ile ganetša Diabolo ka tsela e kwagalago le yeo e lebanyago. Morwa wa Modimo o be a sa nyake go ba karolo ya lefase la Sathane gomme o be a ka se rapele motho yoo yo mobe!—Mat. 4:10; Doit. 6:13; 10:20.

“Le Ganetše Diabolo, o tla le Tšhaba”

13, 14. (a) Ge Sathane a be a bontšha Jesu mebušo ka moka ya lefase, ge e le gabotse o be a leka go dira’ng? (b) Sathane o leka bjang go re senya?

¹³ Ka go bontšha Jesu mebušo ka moka ya lefase, Diabolo o be a mo holofetša matla ao go se nago motho yo a kilego a ba le ona pele. Sathane o be a holofetše gore Jesu o be a tla kgahlwa ke seo a bego a se bona le go mo kgodiša gore e tlo ba moetapele yo matla kudu wa dipolitiki. Lehono, Diabolo ga a re holofetše mebušo, eupša o leka go senya dipelo tša rena a diriša mahlo, ditsebe le menagano ya rena.

¹⁴ Diabolo o laola lefase le. Ka go rialo, o laola le mekero ya lona ya ditaba. Ka gona, ga go makatše ge dilo tša lefase tšeo di bogelwago, di theetšwago, le tšeo di balwago di tletše ka boitshwaro bjo bo gobogilego le dintwa. Mekero ya dipapatšo ya lefase e leka go dira gore re kganyoge go reka dilo tšeo re sa di nyakego. Ka go diriša dilo tše bjalo, Diabolo ka mehla o re leka ka dilo tšeo di bonagalago tšeo di ka kgahlago mahlo, ditsebe le menagano ya rena. Eupša ge re gana go bogela, go theetša le go bala dilo tšeo di sa amogelwego ke Mangwalo, ge e le gabotse re re: “Tloga go nna, Sathane!” Ka gona re ekiša Jesu ka go ba ba tiilego le go dira phetho ya go ganetša lefase la Sathane le le sa hlwekago. Taba ya gore ga re karolo ya lefase la Sathane e bonwa gape tseleng yeo re itsebišago ka yona ka sebete gore re Dihlatse tša Jehofa ge re le sekolong, go baagišani le go ba leloko.—Bala Mareka 8:38.

15. Ke ka baka la’ng go ganetša Sathane go bolela go dula re phakgame?

¹⁵ Ka morago ga teko ya boraro yeo e sa kago ya atlega ya go leka go dira gore Jesu a kwanantšhe potego ya Gagwe go Modimo, ‘Diabolo o ile a mo tlogela.’ (Mat. 4:11) Lega go le bjalo, Sathane o be a se a ikemišetša go tlogela go leka Jesu, ka ge re botšwa go re: “Ka gona, ge Diabolo a feditše moleko ka moka, a mo tlogela go fihla ka nako  e nngwe e loketšego.” (Luka 4:13) Ge re atlega go ganetša Diabolo, re swanetše go leboga Jehofa. Eupša re swanetše go tšwela pele re tsoma thušo ya Modimo, ka gobane Diabolo o tla boa go tlo re leka ka nako ya gagwe e swanetšego—gomme e ka no ba ka nako yeo ka yona re sa letelago go lekwa. Ka gona, re swanetše go dula re phafogile ka dinako tšohle, re ikemišeditše go kgotlelela le go direla Jehofa tirelo e kgethwa go sa šetšwe diteko tšeo re swanetšego go lebeletšana le tšona.

16. Jehofa o re nea matla afe a magolo, le gona ke ka baka la’ng re swanetše go a rapelela?

¹⁶ Go re thuša maitekong a rena a go ganetša Diabolo, re swanetše go rapelela moya o matla legohleng ka moka—moya o mokgethwa wa Modimo—le gona re tla o amogela. O tla re dumelela go dira dilo tšeo go tla bago thata go di dira ka matla a rena. Jesu o ile a kgonthišetša balatedi ba gagwe ka go ba gona ga moya wa Modimo, ka gore: “Ge e ba lena gaešita le ge [le le ba sa phethagalago gomme ka tekanyo e itšego] le le ba kgopo le tseba go nea bana ba lena dimpho tše dibotse, gona Tate yo a lego legodimong o tla nea gakaakang moya o mokgethwa go bao ba mo kgopelago!” (Luka 11:13) A re tšweleng pele re rapela Jehofa gore a re nee moya wa gagwe. Ka ge re thekgwa ke matla a a magolo kudu boikemišetšong bja rena bja go ganetša Diabolo, re tla atlega. Go tlaleletša thapelong ya ka mehla le ya go tšwa pelong, re swanetše go apara ditlhamo tša moya tše di tšwago go Modimo e le gore re ‘emeletšane le maano a bohwirihwiri a Diabolo re tiile.’—Baef. 6:11-18.

17. Ke lethabo la mohuta mang leo le ilego la thuša Jesu go ganetša Diabolo?

¹⁷ Go na le selo se sengwe gape seo se thušitšego Jesu go ganetša Diabolo, gomme le rena se ka re thuša. Beibele e bolela gore: “Ka baka la lethabo leo le bego le beilwe pele ga [Jesu] o ile a kgotlelela kota ya tlhokofatšo, a se be le taba le go hlabišwa dihlong, gomme a dula ka letsogong le letona la sedulo sa bogoši sa Modimo.” (Baheb. 12:2) Re ka ba le lethabo leo le swanago ka go thekga bogoši bja Jehofa, go hlompha leina la gagwe le lekgethwa le go dula re nagana ka moputso wa bophelo bjo bo sa felego. A lethabo le lekaakang leo re tlago go ba le lona ge Sathane le mediro ya gagwe e fedišetšwa sa ruri gomme ba ‘boleta e e-ba ba beng ba naga, ba thaba ka botlalo bja khutšo’! (Ps. 37:11) Ka baka leo, tšwelang pele le ganetša Diabolo go swana le ge Jesu a dirile.—Bala Jakobo 4:7, 8.

O be o tla Araba Bjang?

• Ke bohlatse bofe bjo bo bontšhago gore Jehofa o šireletša batho ba gagwe?

• Jesu o beile mohlala bjang tabeng ya go ganetša Sathane?

• O ka ganetša Diabolo ka ditsela dife?

[Dipotšišo tša Thuto]

[Seswantšho go letlakala 29]

Go gwerana le lefase ke go dira bonaba le Modimo

[Seswantšho go letlakala 31]

Jesu o ile a gana mebušo ka moka ya lefase yeo Sathane a bego a mo holofetša yona