O Nyaka go ba Motho wa Mohuta Mang?

TONA ya maphodisa ya motseng o mongwe wa Philippines e ile ya botšiša mmulamadibogo gore, “O kgonne bjang go dira gore monna yo a fetoše mekgwa ya gagwe?” E šupa mokgobo wa dipampiri o lego tesekeng ya yona, e okeditše ka gore: “Na o a tseba gore dipampiri tše ka moka ke direkoto tša melato ya gagwe ya nakong e fetilego? O hlomotše motse wo mootlwa.” Monna yo go bolelwago ka yena e be e le letagwa la ntwa-dumela leo le bego le dula le baka mathata. Ke’ng seo se dirilego gore a fetoše bophelo bja gagwe? Ke molaetša o buduletšwego wa Lentšu la Modimo, Beibele.

Batho ba bantši ba amogetše keletšo ya moapostola Paulo ya gore ‘ba lahle motho wa kgale yo a dumelelanago le tsela ya bona ya pele ya boitshwaro gomme ba apare motho yo mofsa yo a bopilwego go ya ka thato ya Modimo.’ (Baef. 4:22-24) Go sa šetšwe gore diphetogo tšeo re swanetšego go di dira ke tše dikgolo go ba tše dinyenyane, go apara motho yo mofsa ke karolo ya go fetoga Mokriste.

Lega go le bjalo, diphetogo le tšwelopele tšeo re di dirago gore re swanelegele kolobetšo ke feela mathomo. Ge re kolobetšwa, re bjalo ka kota yeo e betlilwego feela gore e be le sebopego sa motheo. O ka bona gore go betlilwe eng, eupša go sa na le modiro o montši wo o swanetšego go dirwa. Mmetli o sa swanelwa ke go tšwela pele a betla gore seo a se betlilego e be se sebotse. Nakong ya kolobetšo, re na le dika tša motheo tšeo di nyakegago bakeng sa go ba bahlanka ba Modimo. Lega go le bjalo, motho yo mofsa o sa tšwa go aparwa. Re swanetše go tšwela pele re mo kaonefatša ka go dira diphetogo.

Gaešita le Paulo o bone go nyakega gore a dire diphetogo. O dumetše ka gore: “Ge ke duma go dira se se lokilego, se sebe se gona go nna.” (Baroma 7:21) Paulo o be a tloga a tseba seo a lego sona le seo a bego a duma go ba sona. Go thwe’ng ka rena? Le rena re swanetše go ipotšiša gore: ‘Ke’ng seo se lego gona go nna? Ke motho wa mohuta mang? Le gona, ke nyaka go ba motho wa mohuta mang?’

 Ke Eng Seo se Lego “Gona go Nna”?

Ga se gwa lekana go kaonefatša ngwako wa kgale ka go o penta ka ntle feela mola go e-na le dikapa tšeo di bodilego. Go hlokomologa go senyega ga ngwako e ka ba go ipiletša mathata. Ka mo go swanago, ponagalo ya go loka ga se ya lekana. Re swanetše go itlhahloba ka gare-gare gomme re lemoge mathata ao a swanetšego go lokišwa. Ge go se bjalo, dika tša motho wa kgale di tla tšwelela gape. Ka gona, go bohlokwa gore re itlhahlobe ka mo go tseneletšego. (2 Bakor. 13:5) Re swanetše go lemoga dika tšeo di sa nyakegego gomme re di lokiše. Jehofa o re neile thušo go phetha seo.

Paulo ngwadile gore: “Lentšu la Modimo le a phela e bile ke le matla gomme le bogale go feta tšhoša le ge e le efe ya magale a mabedi, le gona le phuleletša gaešita le go arola moya le seo motho a lego sona ka gare le malokololo le moko, gomme le kgona go lemoga dikgopolo le maikemišetšo a pelo.” (Baheb. 4:12) Molaetša wa Lentšu la Modimo le le ngwadilwego, e lego Beibele, o ka ba le tutuetšo e kgolo go rena. O phuleletša ka gare-gare ga rena—ka tsela ya seswantšhetšo, go fihla mokong o lego ka gare ga marapo. O utolla dikgopolo tša rena le maikemišetšo, o utolla seo re tlogago re le sona ka gare ge se bapetšwa le seo re bonagalago re le sona ka ntle goba seo re naganago gore re sona. Ruri Lentšu la Modimo le re kgontšha go lemoga mathata a rena!

Ge re lokiša ngwako wa kgale, go tsenya feela dilo tše difsa legatong la tšeo di senyegilego go ka no se lekane. Go tseba dilo tšeo di bakilego tshenyego go re thuša go gata megato e swanetšego ya go thibela go tšwelela ga bothata gape. Ka mo go swanago, ga se feela go lemoga mekgwa ya rena e mebe moo go tlago go re thuša go laola mafokodi a rena eupša go tseba seo se a bakilego le gona go tla re thuša. Go na le dilo tše dintši tšeo di bopago semelo sa rena. Go tšona go na le maemo a rena setšhabeng le maemo a rena a tša ditšhelete, moo re dulago gona, setšo sa rena, batswadi ba rena, bagwera ba rena le bodumedi bja rena. Gaešita le mananeo a thelebišene le difilimi tšeo re di bogelago, gotee le mehuta e mengwe ya boithabišo, di bopa seo re lego sona. Go lemoga dilo tšeo di nago le tutuetšo e mpe semelong sa rena go re thuša go lwantšha tutuetšo ya tšona.

Ka morago ga go itlhahloba, re ka tlwaela go bolela gore, ‘Ke ka moo ke lego ka gona.’ Ye ke tsela e fošagetšego ya go bea mabaka. Ge a bolela ka bao ba bego ba le phuthegong ya Korinthe bao e bego e le diotswa, basodoma, matagwa, le ba bjalo, Paulo o itše: “Seo ke se ba bangwe ba lena le bego le le sona. Eupša le hlatswitšwe la hlweka . . . ka moya wa Modimo wa rena.” (1 Bakor. 6:9-11) Ka thušo ya moya o mokgethwa le rena re ka kgona go dira diphetogo tše di nyakegago.

Ela hloko mohlala wa monna yo a bitšwago Marcos, * yoo a dulago Philippines. Ge a bolela ka maemo a gagwe, Marcos o itše: “Batswadi ba-ka ba be ba ngangišana ka mehla. Ke ka baka leo ke ilego ka rabela ge ke be ke e-na le nywaga e 19.” Marcos o ile a ba le botumo bjo bobe bja go petšha, go utswa le go swara poo. Yena le batho ba bangwe ba be ba bile ba rera go yo tšhabiša sefofane, le ge morero wa bona o se wa ka wa atlega. Mekgwa ya Marcos e ile ya tšwela pele le ge a nyetše. Mafelelong o ile a lahlegelwa ke dilo ka moka tšeo a bego a e-na le tšona ka baka la go petšha. Nakwana ka morago, Marcos o ile tlatša mosadi wa gagwe thutong ya Beibele yeo mosadi wa gagwe a bego a e swarelwa ke Dihlatse  tša Jehofa. Mathomong o be a nagana gore ga a swanelege go ba Hlatse. Lega go le bjalo, go diriša seo a bego a ithuta sona le go ba gona dibokeng go ile gwa thuša Marcos go lahla mekgwa ya gagwe ya kgale. Ga bjale ke Mokriste yo a kolobeditšwego yo ka mehla a tšeago karolo modirong wa go ruta ba bangwe kamoo le bona ba ka fetogago ka gona.

O Nyaka go ba Motho wa Mohuta Mang?

Ke diphetogo dife tšeo go ka nyakegago gore re di dire e le gore re kaonefatše dika tša rena tša Bokriste? Paulo o eletša Bakriste gore: “Di lahleleng ka moka kgole le lena, kgalefo, pefelo, bobe, polelo e gobošago le polelo e lešago dihlong e tšwago molomong wa lena. Le se ke la forana. Hlobolang motho wa kgale le ditlwaelo tša gagwe, gomme le apare motho yo mofsa yo ka tsebo e nepagetšego a mpshafatšwago go ya ka seswantšho sa Yo a mmopilego.”—Bakol. 3:8-10.

Ka gona, pakane ya rena e kgolo, ke go hlobola motho wa kgale le go apara yo mofsa. Ke dika dife tšeo re swanetšego go di hlagolela e le gore re fihlelele seo? Paulo o re: “Aparang maikwelo a borutho a bonolo a lešoko, botho, monagano o ikokobeditšego, boleta le bopelotelele. Tšwelang pele le kgotlelelana gomme le lebalelana ka bolokologi ge e ba motho a e-na le lebaka la go ba le pelaelo ka yo mongwe. Go etša ge Jehofa a le lebaletše ka bolokologi, le lena le dire bjalo. Eupša, ka ntle le dilo tše ka moka, aparang lerato, gobane ke setlemo se se phethagetšego sa botee.” (Bakol. 3:12-14) Go katanela go hlagolela dika tše go tla re thuša gore re ‘ratwe ke Modimo, le go ratwa ke batho.’ (1 Sam. 2:26) Ge Jesu a be a le lefaseng o ile a bonagatša dika tše gabotse. Ka go ithuta le go ekiša mohlala wa gagwe, re ka thoma go swana le Kriste ra ba “baekiši ba Modimo.”—Baef. 5:1, 2.

Tsela e nngwe ya go lemoga diphetogo tšeo re swanetšego go di dira, ke go ithuta dika tša baanegwa ba ka Beibeleng, le go ela hloko dika tša bona tše di kgahlišago le tšeo di sa kgahlišego. Ka mohlala, nagana ka Josefa, morwa wa mopatriareka Jakobo. Go sa šetšwe gore o ile a lebeletšana le go hloka toka, Josefa o ile a dula a e-na pono e nepagetšego le bobotse bja ka gare. (Gen. 45:1-15) Ka lehlakoreng le lengwe, Abesalomo morwa wa Kgoši Dafida o ile a itira eka o tshwenyega ka batho le gona o be a retwa ka baka la botse bja gagwe. Ge e le gabotse, e be e le moeki le mmolayi. (2 Sam. 13:28, 29; 14:25; 15:1-12) Go itira eka re lokile le go ba ba babotse ga go dire gore motho a kgahliše e le ka kgonthe.

Re ka Atlega

Go kaonefatša dimelo tša rena le go ba ba babotse mahlong a Modimo, re swanetše go šetša motho wa ka gare. (1 Pet. 3:3, 4) E le gore re dire diphetogo dimelong tša rena re swanetše go fetoša dika tša rena tšeo di sa kgahlišego le dilo tšeo di di bakago goba di tlaleletšago go tšona, gotee le go hlagolela dika tša Modimo. Na re ka kgodišega gore maiteko ao re a dirago a tla atlega?

Ee, ka thušo ya Jehofa re ka dira diphetogo tšeo di nyakegago. Go swana le mopsalme, re ka rapela ka gore: “Modimo, mpopêlê pelo e sekilexo. Buša O nneêlê môya wa xo tia ka teng xa-ka.” (Ps. 51:10) Re ka rapelela gore moya wa Modimo o šome go rena, go matlafatša kganyogo ya rena ya go dira gore bophelo bja rena bo dumelelane ka go tia le thato ya gagwe. Ka kgonthe re ka atlega go ba ba kgahlišago mahlong a Jehofa!

[Mongwalo wa tlase]

[Seswantšho go letlakala 4]

Na go penta ntlo ye ka ntle ka morago ga ge e sentšwe ke pula e kgolo ke mo go lekanego?

[Seswantšho go letlakala 5]

Na semelo sa gago se swana le sa Kriste?