‘Phegelelang Dilo tše di Išago Khutšong’

TSELA e sa tšwago go tšhelwa sekontiri e bonagala e le e tiilego kudu go ka senyega. Lega go le bjalo, ge nako e dutše e e-ya, e ka thoma go palega le go ba le dikoti. Go nyakega gore e lokišwe bakeng sa go kgonthišetša gore e dula e se kotsi e bile e le e bolokegilego.

Ka tsela e swanago, ditswalano tša rena le ba bangwe ka dinako tše dingwe di ka ba le mathata gomme tša senyega. Moapostola Paulo o ile a bolela gore Bakriste ba kua Roma ba be ba fapana ka dipono. O neile Bakriste-gotee keletšo e rego: “A re phegeleleng dilo tše di išago khutšong le dilo tše e lego tša go agana.” (Baroma 14:13, 19) Ke ka baka la’ng go le bohlokwa go ‘phegelela dilo tše di išago khutšong’? Re ka phegelela khutšong bjang ka sebete le ka tsela e šomago?

Ke ka Baka la Eng re Swanetše go Phegelela Khutšo?

Ge e ba go palega mo gonyenyane tseleng go sa lokišwe, go ka gola gomme gwa fetoga mekoti e kotsi. Go se rarolle diphapano le gona go ka ba kotsi. Moapostola Johane o ngwadile gore: “Ge e ba motho a re: ‘Ke rata Modimo,’ fela a hloile ngwanabo, ke moaketši. Gobane yo a sa ratego ngwanabo yo a mmonago, a ka se rate Modimo yo a sa kago a mmona.” (1 Joh. 4:20) Go se rarolle diphapano go ka dira gore Mokriste a feleletše ka go hloya ngwanabo.

Jesu Kriste o bontšhitše gore Jehofa ga a amogele borapedi bja rena ge e ba re se ra dira khutšo le ba bangwe. Jesu o laetše barutiwa ba gagwe gore: “Ka gona, ge o tliša mpho ya gago aletareng gomme ge o le moo wa gopola gore ngwaneno o na le se sengwe ka wena, tlogela mpho ya gago moo pele ga aletare, o tloge; thoma ka go dira khutšo le ngwaneno, ke moka, ge o boile, o iše mpho ya gago.” (Mat. 5:23, 24) Ee, lebaka la rena le legolo la go phegelela khutšo ke ka gobane re nyaka go kgahla Jehofa Modimo. *

Boemo bja phuthegong ya Filipi bo bontšha lebaka le lengwe la go phegelela khutšo. Bothata bjoo bo sa bolelwego bjoo bo bego bo le gona magareng ga dikgaetšedi tše pedi tša Bakriste, e lego Ebodia le Sintike, go bonagala bo ile bja šitišana le khutšo ya phuthego ka moka. (Bafil. 4:2, 3) Diphapano tše sa rarollwego di ka tsebja ke ba bangwe kapejana. Kganyogo ya go dira gore  phuthego e dule e e-na le lerato le botee e re šušumeletša go phegelela go dira khutšo le badumedi-gotee le rena.

Jesu o itše: “Go thaba bao ba nago le khutšo.” (Mat. 5:9) Go phegelela khutšo go tliša kgotsofalo e kgahlišago. Go feta moo, khutšo e dira gore re phele gabotse mmeleng, ka gobane “pelo-thšweu ké ’phelô bya mmele.” (Die. 14:30) Ka lehlakoreng le lengwe, go boloka sekgopi go ka oketša kgonagalo ya gore re babje.

Gaešita le ge Bakriste ba bantši ba dumela gore go phegelela khutšo go bohlokwa, o ka ipotšiša gore diphapano di ka rarollwa bjang. A re hlahlobeng melao ya motheo ya Mangwalo yeo e ka re hlahlago.

Dipoledišano tše Boleta di Tsošološa Khutšo

Go palega mo go nyenyane tseleng go ka lokišwa ka go fo di bipa. Re ka kgona go lebalela le go bipa diphošo tše dinyenyane tša bana babo rena? Go bonagala mokgwa wo o ka šoma diphapanong tše dintši, ka gobane moapostola Petro o ngwadile gore “lerato le bipa dibe tše dintši.”—1 Pet. 4:8.

Lega go le bjalo, ka dinako tše dingwe bothata bo bonagala e le bjo bogolo kudu moo e lego gore bo ka se fo hlokomologwa. Ela hloko seo se ilego sa diragalela Baisiraele ka morago ga go tšea Naga ya Kholofetšo. Pele ga ge “Ba-Rubeni le Ba-Gada le seripa sa Ba-Manase” ba tshela Noka ya Jorodane, ba ile ba aga “aletare e kxolo kxakala.” Meloko e mengwe ya Isiraele e ile ya dumela gore aletare e be e dirišetšwa borapedi bja diswantšho gomme e ka se kgone go hlokomologa bothata bjoo. E ile ya itokišetša ntwa.—Još. 22:9-12.

Baisiraele ba bangwe ba ka ba ba ile ba bona eka go šetše go e-na le bohlatse bjo bo lekanego bja tiro ya bobe le gore ge ba ka ba hlasela ka go ba khukhunetša ba ka se hwelwe ke madira a mantši. Lega go le bjalo, go e-na le go dira dilo ka lepotla-potla, meloko ya ka bodikela bja Jorodane e ile ya romela baemedi gore ba yo boledišana le bana babo bona ka bothata bjoo. Ba ile ba botšiša ka gore: “Le re’ng Lè hlala Modimo wa Isiraele ka mokxwa wó? A Le lahla Morêna lehono?” Ge e le gabotse, meloko yeo e bego e agile aletare e be e sa dire ka go se botege. Eupša ba be ba tla arabela bjang tatofatšong e bjalo? Na ba be ba tla itia balatofatši ba bona ka noga e phela goba ba gana go boledišana le bona? Meloko e latofatšwago e ile ya arabela ka boleta le go bolela ka mo go kwagalago gore ditiro tša bona di be di tloga di tutuetšwa ke kganyogo ya bona ya go hlankela Jehofa. Karabelo ya bona e ile ya šireletša tswalano ya bona le Modimo gotee le go phološa maphelo. Poledišano e boleta e ile ya rarolla bothata gomme ya tsošološa khutšo.—Još. 22:13-34.

Pele ga ge ba ka gata mogato ka bogale, Baisiraele ba bangwe ka bohlale ba ile ba boledišana ka bothata bjoo le meloko ya Barubeni le Bagada gotee le seripa sa Bamanase. Lentšu la Modimo  le re: “Se phakê xo selekêxa ka pelong; thselekêxô e axile mo pelong ya setlatla.” (Mmo. 7:9) Tsela ya Mangwalo ya go rarolla diphapano ke go boledišana ka tsela e boleta le ka bolokologi. Na ruri re ka letela go amogelwa ke Jehofa ge e ba re ka boloka sekgopi gomme ra palelwa ke go boledišana le motho yoo re bonago eka o re fošeditše?

Ka lehlakoreng le lengwe, go thwe’ng ge e ba Mokriste-gotee a re batamela mabapi le bothata bjo itšego, mohlomongwe e bile a re latofatša ka maaka? Beibele e re: “Phetolô e bolêta e phohliša dipêfêlô.” (Die. 15:1) Meloko ya Isiraele yeo e bego e latofatšwa e ile ya hlalosa boemo bja bona ka boleta le ka tsela e kwagalago, eupša ba gana seo ka ntle le pelaelo e bego e le molato woo o bego o theilwe maikwelong a bana babo bona. Go sa šetšwe gore re gata mogato wa pele wa go batamela ngwanabo rena goba gore yena o batamela rena ka bothata bjo itšego, re swanetše go ipotšiša gore, ‘Ke mantšu afe, segalo sefe sa lentšu, le boitshwaro bofe tšeo di ka dirago gore go dule go e-na le khutšo?’

Diriša Leleme ka Bohlale

Jehofa o kwešiša gore re nyaka go tšholla sa mafahleng a rena. Lega go le bjalo, ge e ba re palelwa ke go rarolla phapano, gantši re ka lekega go botša motho yo mongwe. Ge e ba go bolokilwe sekgopi, go ka ba bonolo go bolela ka motho yo mongwe ka tsela e sa kgahlišego. Diema 11:11 e bolela mabapi le go diriša leleme ka tsela e sa swanelago, gore: “[Motse] o thubya ke melomo ya ba babe.” Ka tsela e swanago, polelo e sa kgahlišego mabapi le Mokriste-gotee e ka šitišana le khutšo ya phuthego e swanago le motse.

Lega go le bjalo, go phegelela khutšo ga go bolele gore re swanetše go phema go bolela ka bana babo rena le dikgaetšedi. Moapostola Paulo o eleditše Bakriste-gotee ka gore: “Le ka mohla go se ke gwa tšwa polelo e mpe molomong wa gago.” Eupša o okeditše ka gore: “Bolela dilo tše dibotse feela tšeo batho ba nyakago go di kwa, dilo tšeo di tlago go ba thuša e le ka kgonthe. . . . Bontšhanang botho, kwelanang bohloko gomme le lebalelaneng e le ka kgonthe.” (Baef. 4:29-32, The New American Bible) Ge o be o ka batamelwa ke ngwanabo rena yoo a kgopišitšwego ke mantšu a gago goba boitshwaro, na go be go ka se be bonolo go mo kgopela tshwarelo le go dira khutšo ge e ba a ile a bolela gabotse ka wena go ba bangwe nakong e fetilego? Ge e le gabotse, go dula re bolela gabotse ka Bakriste-gotee le rena go tla dira gore re nolofalelwe ke go dira khutšo ge go tsoga diphapano.—Luka 6:31.

Hlankelang Modimo “ka Botee”

Tshekamelo ya motho wa sebe ke go hlokomologa bao ba re fošeditšego le go ipea lekatana. Eupša tsela e bjalo ga e bohlale. (Die. 18:1) Bjalo ka batho ba nago le botee bao ba bitšago leina la Jehofa, re ikemišeditše go “mo [direla] ka botee.”—Tsef. 3:9, NW.

Polelo e sa kgahlišego goba boitshwaro bja ba bangwe le ka mohla ga se tša swanela go re dira gore re se sa fišegela borapedi bjo bo sekilego. Matšatši a sego kae feela pele ga ge sehlabelo sa Jesu se ka tšeela dihlabelo tša tempeleng legato le kapejana ka morago ga gore Jesu a sole bamangwalo ka mo go kwagalago, o ile a bona mohlologadi wa modiidi a tšhela “sohle seo a bego a iphediša ka sona” ka letloleng la matlotlo la ka tempeleng. Na Jesu o ile a leka go mo thibela? Go e na le moo, o ile a bolela gabotse ka maiteko a gagwe a botegago a go thekga phuthego ya Jehofa ka nako yeo. (Luka 21:1-4) Ditiro tše mpe tša ba bangwe ga se tša ka tša mo thibela go thekga borapedi bja Jehofa.

Gaešita le ge re bona eka ngwanabo rena goba kgaetšedi o dirile dilo ka tsela e sa swanelago, le e hlokago toka, re tla arabela bjang? Na re tla dumelela se se kgoma tirelo ya rena ya moya ka moka go Jehofa? Goba na ka sebete re tla lokiša diphapano le ge e le dife e le gore re boloke khutšo e bohlokwa ya phuthego ya Modimo lehono?

Mangwalo a re eletša ka gore: “Ge e ba go kgonega, go fihla moo go ithekgilego ka lena, e-bang le khutšo le batho bohle.” (Baroma 12:18) Anke re ikemišetšeng go dira bjalo gomme ka go rialo re sepele tseleng e išago bophelong re bolokegile.

[Mongwalo wa tlase]

[Seswantšho go letlakala 17]

Ebodia le Sintike ba be ba swanetše go phegelela khutšo

[Seswantšho go letlakala 18]

Ke mantšu afe, segalo sefe sa lentšu, le boitshwaro bofe tšeo di ka dirago gore go dule go e-na le khutšo?