Lentšu la Jehofa le a Phela

Dintlha tše Kgolo go tšwa Mangwalong a Johane le Lengwalong la Juda

MANGWALO a mararo a moapostola Johane, ao a ngwadilwego mo e ka bago ka 98 C.E. a gare ga dipuku tša mafelelo tša Mangwalo a buduletšwego. Mangwalo a pele a mabedi a kgothaletša Bakriste gore ba tšwele pele ba sepela seetšeng le go ganetša bohlanogi. Lengwalong la boraro, Johane ga a bolele feela ka go sepela therešong eupša o kgothaletša Bakriste go ba le tirišano.

Lengwalong la gagwe leo le ngwadilwego Palestina, mohlomongwe ka 65 C.E., ngwanabo Jesu ka motswadi o tee, e lego Juda, o lemoša Bakriste-gotee le yena ka batho ba babe bao ba šwahletšego ka phuthegong, e bile o nea keletšo mabapi le kamoo tutuetšo e mpe e ka efogwago ka gona. Go ela hloko molaetša wa mangwalo a mararo a Johane le lengwalo la Juda go ka re thuša go dula re tiile tumelong go sa šetšwe ditšhitišo.—Baheb. 4:12.

TŠWELANG PELE LE SEPELA SEETŠENG LE LERATONG LE KA TUMELO

(1 Joh. 1:1–5:21)

Lengwalo la pele la Johane le lebišitšwe go mokgatlo ka moka wa bao ba lego boteeng le Kriste gomme le na le keletšo e kwagalago yeo e reretšwego go thuša Bakriste go gana bohlanogi le go tšwela pele ba emela therešo le toko. O gatelela bohlokwa bja go tšwela pele go sepelwa seetšeng, leratong le go sepela ka tumelo.

Johane o ngwala gore: “Ge e ba re sepela seetšeng go etša ge [Modimo] a le seetšeng, gona re na le kabelo seng sa rena.” Le gona ka ge Modimo e le Mothopo wa lerato, moapostola o re: “A re tšweleng pele re ratana.” Le ge “lerato la Modimo” le re tutueletša ‘go boloka ditaelo tša gagwe,’ re fenya lefase ka go ‘dumela ga rena’ go Jehofa Modimo,s go Lentšu la gagwe, le go Morwa wa gagwe.—1 Joh. 1:7; 4:7; 5:3, 4.

Dipotšišo tša Mangwalo di a Arabja:

2:2; 4:10​—Jesu ke “sehlabelo sa poelanyo” bjang? Go boelanya ke go “dira poelanyo,” goba go “fepeletša.” Jesu o gafile bophelo bja gagwe e le sehlabelo sa poelanyo ka kwešišo ya gore ka go dira bjalo, o be a boelanya, goba go kgotsofatša, senyakwa sa toka e feletšego. Motheong wa sehlabelo seo, Modimo o be a ka bontšha kgaugelo, gomme o be a ka lebalela dibe tša bao ba bontšhago tumelo go Jesu.—Joh. 3:16; Baroma 6:23.

2:7, 8​—Ke taelo efe yeo Johane a bolelago ka yona e le ya “kgale” gape e le “e mpsha”? Johane o bolela ka taelo yeo e lego mabapi le lerato la borwarre la boikgafo. (Joh. 13:34) O bolela ka yona e le ya “kgale” ka gobane Jesu o neile taelo yeo nywaga e 60 pele Johane a ngwala lengwalo la gagwe la pele leo le buduletšwego. Ka gona, badumedi ba be ba e-na le yona “go tloga mathomong” a maphelo a bona e le Bakriste. Taelo ye le gona ke “e mpsha” ka gobane e feta ‘go rata wa geno ka mokgwa wo o ithatago ka wona’ gomme e nyaka gore lerato e be la boikgafo.—Lef. 19:18; Joh. 15:12, 13.

3:2​—Ke’ng seo ‘se sešogo sa bonagatšwa’ go Bakriste ba tloditšwego, gomme ke mang yo ba tlago go “mmona ka wona mokgwa wo a lego ka wona”? Seo se sešogo sa bonagatšwa go bona ke lebopo leo ba tlago go ba ka lona ge ba tsošetšwa legodimong ka mebele ya moya. (Bafil. 3:20, 21) Lega go le bjalo, seo ba sa se tsebego ke gore “mohla [Modimo] a bonagatšwago [ba] tla swana le yena, gobane [ba] tla mmona ka wona mokgwa wo a lego ka wona,” ke gore, “Moya.”—2 Bakor. 3:17, 18.

 5:5-8​—Meetse, madi le moya di hlatsetše bjang taba ya gore “Jesu ke Morwa wa Modimo”? Meetse a neile bohlatse ka gobane ge Jesu a be a kolobetšwa ka meetseng, Jehofa o ile a bolela mantšu a go mo amogela e le Morwa wa Gagwe. (Mat. 3:17) Madi a Jesu, goba bophelo, ao a gafilwego e le “topollo e lekanago bakeng sa bohle,” le ona a be a bontšha gore Jesu ke Morwa wa Modimo. (1 Tim. 2:5, 6) Moya o mokgethwa le wona o hlatsetše gore Jesu ke Morwa wa Modimo ge o be o theogela go yena nakong ya kolobetšo ya gagwe, o dira gore a kgone go “sepela le naga ka moka a dira botse le go fodiša bohle bao ba gateletšwego ke Diabolo.”—Joh. 1:29-34; Dit. 10:38.

Seo re Ithutago Sona:

2:9-11; 3:15. Ge e ba Mokriste a dumelela selo le ge e le sefe goba motho le ge e le ofe a senya lerato la gagwe la borwarre, o sepela lefsifsing la moya gomme ga a tsebe moo a yago.

TŠWELANG PELE LE “SEPELA THEREŠONG”

(2 Joh. 1-13)

Johane o thoma lengwalo la gagwe la bobedi ka go bolela gore: “Nna monna yo mogolo ke ngwalela mohumagadi yo a kgethilwego le bana ba gagwe.” O thabela go hwetša “ba bangwe ba bana ba [gagwe] ba sepela therešong.”—2 Joh. 1, 4.

Ka morago ga ge a neile kgothatšo ya gore ba hlagolele lerato, Johane o ngwala gore: “Se ke seo lerato le se bolelago, gore re tšwele pele re sepela go ya ka ditaelo tša gagwe.” Johane gape o lemoša ka “mofori le molwa-le-Kriste.”—2 Joh. 5-7.

Dipotšišo tša Mangwalo di a Arabja:

1, 13​—“Mohumagadi yo a kgethilwego” ke mang? Johane a ka be a bolela ka mosadi yo a bitšwago Kyria, yeo ka Segerika e lego “mohumagadi.” Goba a ka be a bolela le phuthego e itšego a diriša seka-polelo go gakantšha batlaiši ba gagwe. Ge taba ye ya morago e le therešo, bana ba gagwe e tla ba ditho tša phuthego gomme “bana ba ngwanabo” e tla šupa go ditho tša phuthego e nngwe.

7​—Mo Johane o bolela ka go ‘tla’ gofe ga Jesu, gomme ke bjang bafori ba ‘sa go bolelego’? Ga se go ‘tla’ ka mokgwa o sa bonagalego ga Jesu ga nakong e tlago. Go e na le moo, ke go tla ga Gagwe e le motho le go tlotšwa ga gagwe e le Kriste. (1 Joh. 4:2) Bafori ga ba bolele go tla mo ga gagwe a le nameng. Mohlomongwe ba gana gore Jesu o kile a phela goba ga ba dumele gore o ile a tlotšwa ka moya o mokgethwa.

Seo re Ithutago Sona:

2, 4. Go tseba ga rena “therešo”—e lego dithuto ka moka tša Bokriste tšeo di fetogilego karolo ya Beibele—le go e kgomarela go bohlokwa bakeng sa phologo ya rena.—3 Joh. 3, 4.

8-11. Ge e ba re sa nyake go lahlegelwa ke “botho bjo bo sa swanelago, kgaugelo le khutšo go tšwa go Modimo Tate le go Jesu Kriste,” gotee le bogwera bjo lerato bja badumedi-gotee le rena, re swanetše go ‘itšhetša’ moyeng le go gana bao ba ‘sa dulego thutong ya Kriste.’—2 Joh. 3.

E-BANG “BADIRIŠANI THEREŠONG”

(3 Joh. 1-14)

Lengwalo la boraro la Johane le ngwaletšwe mogwera wa gagwe e lego Gayo. O ngwala gore: “Ga ke na lebaka le legolo la go leboga go feta dilo tše, gore ke kwe gore bana ba-ka ba tšwela pele ba sepela therešong.”—3 Joh. 4.

Johane o reta Gayo ka go “dira modiro o botegago” wa go thuša bana babo rena ba baeti. Moapostola  o re: “Re tlamega go amogela batho ba bjalo ka kamogelo e borutho, gore re be badirišani therešong.”—3 Joh. 5-8.

Dipotšišo tša Mangwalo di a Arabja:

11​—Ke ka baka la’ng ba bangwe ba e-na le boitshwaro bjo bobe? Ka ge ba fokola moyeng, ba bangwe ga ba bone Modimo ka mahlo a bona a kwešišo. Ka ge ba ka se mmone ka mahlo a bona a nama, ba dira dilo eka ga a ba bone.—Hesek. 9:9.

14​—Ke bomang bao ba šupšago e le “bagwera”? Lentšu “bagwera” mo ga le akaretše feela bao e lego bagwera ba paala. Johane o le diriša go šupa badumedi-gotee ka kakaretšo.

Seo re Ithutago Sona:

4. Batho bao ba godilego moyeng ba ka phuthegong ba thaba kudu ge ditho tša yona tše dinyenyane di “sepela therešong.” Batswadi ba ba le lethabo le le sa bapišwego ge ba atlega go thušeng bana ba bona go sekamela kudu dilong tša moya!

5-8. Gare ga bao ka lerato ba šomago ka thata bakeng sa bana babo bona le Jehofa ke balebeledi ba basepedi, baromiwa, bao ba hlankelago magaeng a Bethele goba diofising tša lekala, le bao ba lego tirelong ya bobulamadibogo. Tumelo ya bona e swanetše go ekišwa, gomme ba swanelwa ke thekgo ya rena e lerato.

9-12. Re swanetše go ekiša mohlala wa Demetrio yo a botegago e sego wa Dioterefe yo a ratharathago le yoo e bego e le mothomeletši.

“ITOTENG LERATONG LA MODIMO”

(Juda 1-25)

Juda o hlalosa bao ba šwahlelago ka phuthegong e le “bangongoregi, babelaedi ba belaelago ka kabelo ya bona bophelong, ba tšwela pele go ya ka dikganyogo tša bona.” Ba bolela “dilo tša boikgogomošo, ge ba dutše ba reta batho gore ba ikhole.”—Juda 4, 16.

Bakriste ba ka gana bjang tutuetšo e mpe? Juda o ngwala gore: “Baratiwa, gopolang mantšu a ilego a bolelwa pele ke baapostola ba Morena wa rena Jesu Kriste.” O oketša ka gore: “Itoteng leratong la Modimo.”—Juda 17-21.

Dipotšišo tša Mangwalo di a Arabja:

3, 4​—Ke ka baka la’ng Juda a ile a kgothaletša Bakriste go ‘lwela tumelo ka thata’? Ka baka la gore ‘batho bao ba sa boifego Modimo ba khukhunetše ka phuthegong.’ Batho ba ba be ba ‘fetola botho bjo bo sa swanelago bja Modimo wa rena ba bo dira lebaka la boitshwarelelo bakeng sa boitshwaro bjo bo hlephilego.’

20, 21​—Re ka ‘Itota re le leratong la Modimo’ bjang? Re ka dira se ka ditsela tše tharo: (1) ka go ikaga ‘tumelong ya rena e kgethwa-kgethwa’ ka go ithuta Lentšu la Modimo ka mafolofolo le ka go tšea karolo ka mafolofolo modirong wa boboledi; (2) ka go rapela “ka moya o mokgethwa,” goba ka go dumelelana le tlhahlo ya ona; le (3) ka go dumela go seo se dirago gore bophelo bjo bo sa felego bo kgonege—sehlabelo sa topollo sa Jesu Kriste.—Joh. 3:16, 36.

Seo re Ithutago Sona:

5-7. Na batho ba kgopo ba ka phonyokga kahlolo ya Jehofa? Go ya ka mehlala e meraro e lemošago yeo e lokeleditšwego ke Juda, ga go kgonege.

8-10. Re swanetše go latela mohlala wa Mikaele morongwa yo mogolo gomme re hlomphe bao Jehofa a ba neilego matla a taolo.

12. Bahlanogi bao ba bonagalago e ka ba na le lerato ba bea tumelo ya rena kotsing go swana le mafsika ao a fihlilwego ka tlase ga meetse a lego kotsi go dikepe goba batho bao ba ruthago. Barutiši ba maaka ba ka ipontšha ba e-na le diatla tše di bulegilego, eupša ba swana le maru a se nago meetse ka ge moyeng ba se na selo. Ba bjalo ga ba enywe ba swana dihlare tšeo di hwilego sehleng sa seruthwane. Ba lebeletšane le phedišo, go swana le dihlare tšeo di tumotšwego ka medu. Ba bohlale ba swanetše go efoga bahlanogi.

22, 23. Bakriste ba therešo ba hloile se sebe. Ka boiteko bja go phološa “ba bangwe bao ba nago le dipelaelo” mollong wa phedišo ya ka mo go sa felego, bao ba gotšego ka tsebo ka phuthegong—kudu-kudu balebeledi ba kgethilwego—ba ba nea thušo ya moya.

[Diswantšho go letlakala 28]

Meetse, moya, le madi di hlatsetše gore “Jesu ke Morwa wa Modimo”