Dipotšišo tše Tšwago go Babadi

Go Nehemia 8:10 (PK), Bajuda ba ile ba botšwa gore ba ‘je tše di nonnego,’ le ge e le gore Molao o lego go Lefitiko 3:17 o be o re: “Le se kê la bá la ja makhura.” Dipolelo tše di ka tswalanywa bjang?

Lelemeng la mathomo, mantšu a fetoletšwego e le “tše di nonnego” go Nehemia 8:10 (PK) le “makhura” go Lefitiko 3:17 ga a swane. Lentšu la Seheberu la cheʹlev, leo le fetoletšwego e le “makhura” go Lefitiko 3:17, le šupa go makhura a diphoofolo goba a batho. (Lef. 3:3; Baa. 3:22) Kgopolo ya temana 17 e bontšha gore Baisiraele ba be ba se ba swanela go ja makhura ao a khupeditšego mala le dipshio tša diphoofolo tša dibego goba a moseko (matheka) ka baka la gore “makhura ka moka ké a Morêna.” (Lef. 3:14-16) Ka gona makhura a diphoofolo tšeo di bego di neelwa Jehofa a be a se a swanela go lewa.

Ka lehlakoreng le lengwe, go Nehemia 8:10 lentšu mash·man·nimʹ  le fetoletšwe e le “tše di nonnego,” gomme ka Mangwalong a Seheberu lentšu le le tšwelela mo feela. Le tšerwe go lediri la sha·menʹ, leo le bolelago “go nona.” Go bonala kgopolo ya motheo ya mantšu a tswalanago le lediri le e le ya katlego le bophelo bjo bobotse. (Bapiša le Jesaya 25:6.) Le lengwe la mantšu a tšerwego lediring le ke lentšu sheʹmen leo e lego leina-ina, leo gantši le fetolelwago e le “makhura” go akaretša le go polelwana “makhura a mohlware.” (Doit. 8:8; Lef. 24:2) Bjalo ka ge le dirišitšwe go Nehemia 8:10, go bonala lentšu mash·man·nimʹ  le šupa go dijo tšeo di apeilwego ka makhura a mantši e bile di ka bago di akaretša nama yeo e nago le makhura eupša e sego makhura a feletšego a phoofolo.

Gaešita le ge Baisiraele ba be ba ileditšwe go ja makhura a feletšego a phoofolo, ba be ba ka ja dijo tše di humilego, le tše bose. Dilo tše dingwe, tše bjalo ka dikuku tšeo di dirilwego ka bupi bjo bo tokilwego, di be di sa dirwe ka makhura a phoofolo, eupša di be di dirwa ka makhura a dimela, gantši e le makhura a mohlware. (Lef. 2:7) Ka gona, Insight on the Scriptures e hlalosa gore “tše di nonnego” mo “di šupa go dikarolo tše di humilego, dilo tšeo di sego tša ota goba go kwapa, eupša tše di hlabošago, go akaretša dijo tša go latswega tšeo di apeilwego ka makhura a dibjalo.”

Go ba gona, Bakriste ba dula ba gopola gore kiletšo ya go ja makhura e be e le karolo ya Molao. Ga ba ka tlase ga Molao, go akaretša le dinyakwa tša wona tšeo di sepedišanago le dihlabelo tša diphoofolo.—Baroma 3:20; 7:4, 6; 10:4; Bakol. 2:16, 17.