Go Ikemišetša go Nea Bohlatse ka Botlalo

“O re laetše gore re bolele bathong le go nea bohlatse bjo bo feletšego.”​—DIT. 10:42.

1. Ge a be a bolela pele ga Koronelio, Petro o gateletše taelo efe?

TONA ya madira a Italia e ile ya kgobokanya ba leloko le bagwera go seo e ilego ya ba phetogo e kgolo ditirišanong tša Modimo le batho. Monna yo yoo a boifago Modimo e be e le Koronelio. Moapostola Petro o boditše sehlopha seo gore baapostola ba be ba laetšwe gore ba “bolele bathong le go nea bohlatse bjo bo feletšego” mabapi le Jesu. Bohlatse bjoo Petro a bo neilego bo bile le mafelelo a kgahlišago kudu. Bantle ba sa bollago ba ile ba amogela moya wa Modimo, ba kolobetšwa gomme ba ba le tebelelo ya go ba dikgoši-gotee le Jesu legodimong. A mafelelo a kgahlišago gakaakang a go nea ga Petro bohlatse ka botlalo!—Dit. 10:22, 34-48.

2. Re tseba bjang gore taelo ya go nea bohlatse e be e sa lebišwe go baapostola ba 12 feela?

² Seo se diregile ka 36 C.E. Nywaga e ka bago e mebedi pele ga moo, bophelo bja moganetši yo šoro wa Bokriste bo ile bja fetoga. Saulo wa Tareso o be a le tseleng ya go ya Damaseko ge Jesu a be a itšweletša go yena gomme a mmotša gore: “[Tsena] motseng, gomme o tla botšwa seo o swanetšego go se dira.” Jesu o ile a kgonthišetša morutiwa Ananiase gore Saulo o be a tla iša bohlatse “ditšhabeng gotee le go dikgoši le go bana ba Isiraele.” (Bala Ditiro 9:3-6, 13-20.) Ge a be a e-na le Saulo, Ananiase o ile a re: “Modimo wa bo-rakgolokhukhu ba rena o go kgethile . . . gobane o swanetše go ba hlatse ya gagwe go batho ka moka.” (Dit. 22:12-16) Saulo, yoo ka morago a ilego a tsebja e le Paulo, o ile a tšeela godimo gakaaka’ng kabelo ya go nea bohlatse?

O Ile a Nea Bohlatse ka Botlalo!

3. (a) Re tlo lebiša tlhokomelo pegong efe? (b) Bagolo ba Efeso ba ile ba arabela bjang molaetšeng wa Paulo, e le ge ba bea mohlala ofe o mobotse?

³ E be e tla ba mo go kgahlišago kudu go hlahloba ka botlalo tša seo Paulo a ilego a se dira ka morago ga moo, eupša ga bjale a re lebišeng tlhokomelo polelong yeo Paulo a e neilego mo e ka bago ka 56 C.E., bjalo ka ge e begilwe go Ditiro kgaolo 20. Paulo o neile polelo ye mo e nyakilego go ba mafelelong a leeto la gagwe la boraro la boromiwa. O be a gorogetše Mileto, boema-kepeng bja Lewatleng la Aegean, gomme a rometše lentšu go bagolo ba phuthego ya Efeso. Efeso e be e le dikhilomithara tše ka bago tše 50 go tloga moo, gaešita le ge leeto e be e le le letelele go feta moo ge ka baka la ditsela tša manyokenyoke. O ka akanya ka lethabo leo bagolo  ba Efeso ba bilego le lona ge ba be ba amogela molaetša wa Paulo. (Bapiša le Diema 10:28.) Lega go le bjalo, ba be ba sa swanetšwe ke go dira dithulaganyo tša go ya Mileto. Na ba bangwe ba ile ba swanelwa ke go se ye mošomong goba go tswalela mabenkele a bona? Bakriste ba bantši lehono ba dira bjalo go kgonthišetša gore ga ba fetwe le ke karolo e tee ya lenaneo la ngwaga le ngwaga la kopano ya selete.

4. Paulo o ile a latela mokgwa ofe ge a be a le Efeso ka nywaga e itšego?

⁴ O nagana gore Paulo o be a dira’ng Mileto lebakeng la matšatši a mararo goba a mane go fihlela ge bagolo bao ba goroga? Ke’ng seo wena o bego o tla se dira? (Bapiša Ditiro 17:16, 17.) Seo Paulo a se boditšego bagolo ba Efeso se re thuša go hwetša karabo. O ile a hlalosa seo a bego a e-na le nywaga a tlwaetše go se dira, go akaretša le nakong ya ge a be a le Efeso pejana. (Bala Ditiro 20:18-21.) O ile a bolela a tseba gore a ka se ganetšwe ke motho gore: “Le tseba gabotse kamoo go tloga letšatšing la pele leo ka lona ke tlilego seleteng sa Asia . . . ke [neilego] bohlatse ka botlalo.” Ee, o be a ikemišeditše go phetha taelo yeo a e filwego ke Jesu. O e phethile bjang ge a be a le Efeso? Tsela e nngwe e be e le ka go nea Bajuda bohlatse, gomme a e-ya moo ba bego ba le gona ka bontši. Luka o bega gore ge Paulo a be a le Efeso mo e ka bago ka 52-55 C.E., o ile a “nea dipolelo le go diriša mabaka a kgodišago” disinagogeng. Ge Bajuda “ba thoma go ithatafatša gomme ba sa dumele,” Paulo o ile a thoma go lebiša tlhokomelo go batho ba bangwe, a ya lefelong le lengwe motseng woo eupša a sa dutše a dira boboledi. Ka go rialo, o ile a nea bohlatse go Bajuda le Bagerika motseng woo o mogolo.—Dit. 19:1, 8, 9.

5, 6. Ke ka baka la’ng re ka kgodišega gore ge Paulo a be a dira boboledi ka ntlo le ntlo o be a bolela le ba sa dumelego?

⁵ Ba bangwe bao ba ilego ba fetoga Bakriste ba ile ba swanelegela go ba bagolo ge nako e dutše e e-ya, e lego bao Paulo a boletšego le bona kua Mileto. Paulo ile a ba gopotša ka mekgwa yeo a bego a e diriša, ka gore: “Ke be ke sa lese go le botša selo le ge e le sefe sa dilo tšeo e bego e le tše di holago goba go le ruta phatlalatša le ka ntlo le ntlo.” Batho ba bangwe lehono ba be ba dutše ba bolela gore Paulo mo o be a fo ba a bolela ka go dira maeto a bodiši go badumedi. Eupša ga go bjalo. Tlhaloso e rego go “ruta phatlalatša le ka ntlo le ntlo” e šupa kudu-kudu go go dira boboledi go ba sa dumelego. Seo se kwagala gabotse mantšung a gagwe ao a latelago. Paulo o re o neile bohlatse “go Bajuda gotee le go Bagerika mabapi le boitsholo go Modimo le go dumela go Morena wa rena Jesu.” Go molaleng gore Paulo o be a nea bohlatse go ba sa dumelego, bao ba bego ba swanetše go itshola gomme ba dumele go Jesu.—Dit. 20:20, 21.

⁶ Tlhahlobong e tseneletšego ya Mangwalo a Bakriste a Segerika, seithuti se sengwe se boletše ka Ditiro 20:20 gore: “Paulo o be a feditše nywaga e meraro a le Efeso. O ile a etela ntlong e nngwe le e nngwe, goba bonyenyane o dirile boboledi go batho ka moka (temana 26). Bjo ke bohlatse bjo bo tšwago ka Mangwalong bja go bontšha gore ebangedi e be e gašwa ka ntlo le ntlo gotee le dibokeng tša phatlalatša.” Go sa šetšwe gore o ile a etela ntlo e  nngwe le e nngwe ka go lebanya, bjalo ka ge seithuti se se bolela, goba go se bjalo, Paulo o be a sa nyake gore bagolo ba Efeso ba lebale kamoo a ilego a nea bohlatse ka gona le mafelelo a go dira bjalo. Luka o bega gore: “Bohle bao ba dulago seleteng sa Asia ba [ile] ba kwa lentšu la Morena, Bajuda gotee le Bagerika.” (Dit. 19:10) Eupša ke bjang “bohle” kua Asia ba ka bago ba ile ba kwa, gomme se se šišinya’ng mabapi le go nea ga rena bohlatse?

7. Go dira ga Paulo boboledi go ka ba go bile le mafelelo afe bathong bao a sa kago a ba nea bohlatse ka go lebanya?

⁷ Ka go nea ga Paulo bohlatse phatlalatša le ka ntlo le ntlo, ba bantši ba ile ba kwa molaetša. Na o nagana gore bohle bao ba ilego ba kwa molaetša woo ba ka ba ba ile ba dula Efeso, gwa se be le yo a hudugelago felo go gongwe bakeng sa tša kgwebo, go yo ba le ba leloko goba go tšhabela semphete-ke-go-fete sa toropong e kgolo? Ga go bonagale go le bjalo. Ba bantši lehono ba ile ba huduga ka mabaka a swanago; le wena o ka no ba o dirile bjalo. Le gona, mehleng yeo, batho ba tšwago dikarolong tše dingwe ba be ba etela Efeso ka mabaka a tša leago goba a tša kgwebo. Ge ba be ba le moo, ba ka no ba ba ile ba kopana le Paulo goba ba ile ba mo kwa a nea bohlatse. Ke’ng seo se bego se ka direga ge ba boela gae? Bao ba amogetšego therešo ba be ba tla nea bohlatse. Ba bangwe ba ka ba ba sa ka ba dumela eupša ba be ba ka bolela ka seo ba se kwelego ge ba be ba le Efeso. Ka go rialo, ba leloko, baagišani, goba bareki ba ile ba kwa therešo gomme ba ka ba ba ile ba e amogela. (Bapiša le Mareka 5:14.) Se se šišinya’ng mabapi le mafelelo a go nea ga gago bohlatse?

8. Batho ba seleteng sa Asia ba ka ba ba ile ba kwa therešo bjang?

⁸ Mabapi le bodiredi bja gagwe bja pejana Efeso, Paulo o ngwadile gore o be a “bulegetšwe ke mojako o mogolo o išago modirong.” (1 Bakor. 16:8, 9) Ke mojako ofe, le gona o be o mmulegetše bjang? Go tšwela pele ga bodiredi bja Paulo Efeso go feleleditše ka go phatlalatšwa ga ditaba tše dibotse. Ela hloko Kolose, Laoditsea le Hierapoli, e lego metse e meraro e lego ka gare ga naga go tloga Efeso. Paulo ga se a ka a ya go yona, eupša ditaba tše dibotse di ile tša fihla go yona. Epafora o be a e-tšwa moo. (Bakol. 2:1; 4:12, 13) Na Epafora o be ile a kwa Paulo a nea bohlatse Efeso gomme a fetoga Mokriste? Beibele ga e bolele ka go lebanya. Eupša ka go phatlalatša therešo nageng ya gabo, Epafora a ka no ba a ile a emela Paulo. (Bakol. 1:7) Molaetša wa Bokriste o ka no ba o ile a wa fihla le metseng e bjalo ka Filadelefia, Sarede le Thiathira nakong ya ge Paulo a be a nea bohlatse Efeso.

9. (a) Ke kganyogo efe e tšwago pelong yeo Paulo a bego a e-na le yona? (b) Temana ya ngwaga wa 2009 e tla ba efe?

⁹ Ka baka leo, bagolo ba Efeso ba be ba e-na le lebaka le le kwagalago la go amogela mantšu a Paulo  a rego: “Ga ke tšeele moya wa-ka godimo e le wa bohlokwa go nna, ge feela nka fetša tsela ya-ka le bodiredi bjo ke bo amogetšego go Morena Jesu, gore ke hlatsele ka botlalo ditaba tše dibotse tša botho bjo bo sa swanelago bja Modimo.” Temaneng yeo go tšerwe temana ya ngwaga wa 2009 e kgothatšago le e tutuetšago, e rego: ‘Hlatsela ditaba tše dibotse ka botlalo.’—Dit. 20:24.

Go Nea Bohlatse ka Botlalo Lehono

10. Re tseba bjang gore re swanetše go nea bohlatse ka botlalo?

¹⁰ Taelo ya go “[bolela] bathong le go nea bohlatse bjo bo feletšego” e ile ya newa le ba bangwe bao e sego baapostola. Ge Jesu yoo a tsošitšwego bahung a be a bolela le barutiwa bao ba bego ba bokane Galilea, bao e ka bago e be e le ba 500, o neile taelo e rego: “Ka gona, e-yang le dire batho ba ditšhaba ka moka barutiwa, le ba kolobetša leineng la Tate le la Morwa le la moya o mokgethwa, le ba ruta go boloka dilo tšohle tšeo ke le laetšego tšona.” Taelo yeo e šoma le go Bakriste ka moka ba therešo lehono, bjalo ka ge mantšu a Jesu a bontšha se, ge a re: “Bonang! Ke na le lena matšatši ka moka go fihla bofelong bja tshepedišo ya dilo.”—Mat. 28:19, 20.

11. Dihlatse tša Jehofa di tsebja ka go dira modiro ofe o bohlokwa?

¹¹ Bakriste ba fišegago ba tšwela pele ba e-kwa taelo yeo, ba katanela go ‘hlatsela ditaba tše dibotse ka botlalo.’ Tsela e kgolo ya go dira bjalo ke ka go diriša mokgwa woo Paulo a o boditšego bagolo ba Efeso—boboledi bja ntlo le ntlo. Ka pukung ya 2007 yeo e bolelago ka modiro o atlegago wa boromiwa, David G. Stewart yo monyenyane, o itše: “Mokgwa wo Dihlatse tša Jehofa di o dirišago go ruta batho go bolela le ba bangwe ka ditumelo tša bona o itlhatsetše e le o šomago kudu go feta [dikgothaletšo tša baruti tša sethaleng] tše sa kwagalego gabotse le tša molomo feela. Go Dihlatse tše dintši tša Jehofa, go bolela ditumelo tša tšona le batho ba bangwe ke modiro o o ratwago.” Mafelelo e ba afe? “Ka 1999, palo ya pedi-lekgolong go ya go nne-lekgolong ya batho bao ke dirilego nyakišišo go bona ditoropong tše pedi tše dikgolo tša Yuropa bohlabela bao ba dumetšego gore ba ile ba batamelwa ke Bakgethwa ba Mehleng Yeno goba baromiwa ba ‘ma-Mormon,’ gore ba boledišane le bona. Ba fetago 70 lekgolong ba begile gore Dihlatse tša Jehofa di ile tša boledišana le bona ka go lebanya gomme gantši ka makga a mmalwa.”

12. (a) Ke ka baka la’ng re etela malapa a lego tšhemong ya gabo rena “ka makga a mmalwa”? (b) Na o ka anega phihlelo ya motho yoo boemo bja gagwe bja kgopolo mabapi le molaetša wa rena bo ilego bja fetoga?

¹² Go ka bolelwa se se swanago ka batho ba nageng ya geno. Le wena o ka ba o dirile se se swanago. Ge o be o ‘bolela ka go lebanya’ le batho bodireding bja ntlo le ntlo, o boletše le banna, basadi le bafsa mejakong. Ba bangwe ba ka no ba ba sa ka ba theetša gaešita le ge go ile gwa bolelwa le bona “ka makga a mmalwa.” Ba bangwe ba ka no ba ba ile ba theetša go se nene ge o be o bolela ka temana ya Beibele goba kgopolo ya Mangwalo. Lega go le bjalo, o kgonne go nea bohlatse bjo bobotse go ba bangwe gomme ba arabetše gabotse. Dikarabelo tše ka moka ke tšeo re ka di hwetšago ge re ‘hlatsela ditaba tše dibotse ka botlalo.’ Bjalo ka ge o ka ba o tseba, go na le mehlala e mentši kudu ya bao ba ilego ba bontšha kgahlego e nyenyane ge go be go bolelwa le bona “ka makga a mmalwa,” eupša bao ka morago ba ilego ba fetoga. Mohlomongwe go na le seo se ilego sa ba diragalela, goba sa diragalela yoo ba mo ratago, seo se ba thušitšego go amogela therešo. Gona bjale ke bana babo rena le dikgaetšedi. Ka baka leo, o se ke wa langwa, gaešita le ge morago bjale o se wa kopana le ba bantši bao ba arabelago. Ga se ra letela gore motho yo mongwe le yo mongwe a amogele therešo. Eupša Modimo o letetše gore re tšwele pele re nea bohlatse bjo bo feletšego ka mafolofolo le ka phišego.

Mafelelo ao re ka se a Tsebego

13. Ke bjang go nea ga rena bohlatse go ka bago le mafelelo ao re ka no se tsebego ka ona?

¹³ Bodiredi bja Paulo ga se bja ka bja kgoma feela  batho bao a ilego a ba thuša ka go lebanya gore e be Bakriste; le bodiredi bja rena ga bo kgome feela bao re bolelago le bona ka go lebanya. Re katanela go tšea karolo ka mehla bodireding bja ntlo le ntlo, le go nea bohlatse bathong ba bantši ka mo re ka kgonago. Re bolela ditaba tše dibotse go baagišani, bašomi-gotee, barutwana-gotee le go ba leloko. Na re tseba mafelelo ka moka a go dira bjalo? Ba bangwe ba ka arabela gabotse le semeetseng. Go ba bangwe, peu ya therešo e ka tšea nako e telele e sa mele eupša ka morago ya tsema medu mobung wa pelo ya motho gomme ya mela. Gaešita le ge seo se sa direge, batho bao re bolelago le bona ba ka bolela le ba bangwe ka seo re se boletšego, ditumelo tša rena le kamoo re dirago dilo ka gona. Ee, ka go se tsebe ba ka dira gore peu yeo e hwetše mobu o nonnego felo tsoko.

14, 15. Go nea bohlatse ga ngwanabo rena yo mongwe go bile le mafelelo afe?

¹⁴ Ka mohlala, ela hloko Ryan le mosadi wa gagwe, Mandi, bao ba dulago Florida, U.S.A. Ge a be a le mošomong, Ryan o ile a nea bohlatse bjo bo sa rulaganyetšwago go mošomi-gotee. Monna yoo, yo a bego a e-na le setlogo sa bo-Hindu, o be a kgahlwa ke moaparo wa Ryan le kamoo a bego a itlhalosa ka gona. Dipoledišanong tša bona, Ryan o be a bolela ka ditaba tše bjalo ka tsogo le boemo bja bahu. Mantšiboeng a mangwe a January, monna yoo o ile a botšiša mosadi wa gagwe, Jodi, gore o be a tseba eng ka Dihlatse tša Jehofa. Jodi e be e le Mokatholika, gomme o ile a bolela gore selo seo a tsebago Dihlatse ka sona e be e le “bodiredi bja ntlo le ntlo.” Ka gona Jodi o ile a dira nyakišišo ka “Dihlatse tša Jehofa” go Inthanete, gomme a hwetša mokero wa rena wa Web wa www.watchtower.org. Jodi o ile a tšea dikgwedi a bala dikgatišo tšeo di lego mokerong woo, go akaretša Beibele le dihlogo tše di kgahlišago.

¹⁵ Ge nako e dutše e e-ya, Jodi o ile a kopana le Mandi, bjalo ka ge bobedi bja bona e be e le baoki. Mandi o ile a thabela go araba dipotšišo tša Jodi. Ka morago ga nako e itšego, ba ile ba ba le seo Jodi a rego ke poledišano “ya go tloga go Adama go ya go Haramagedone.” Jodi o ile a dumela go swarelwa thuto ya legae ya Beibele. Go se go ye kae ke ge a thoma go ya dibokeng Holong ya Mmušo. Ka October, Jodi o ile a ba mogoeledi yo a sa kolobetšwago, gomme o ile a kolobetšwa ka February. O ngwala gore: “Ka ge bjale ke tseba therešo, ke thabile kudu bophelong e bile ke kgotsofetše.”

16. Phihlelo ya ngwanabo rena wa kua Florida e šišinya’ng mabapi le maiteko a rena a go nea bohlatse ka botlalo?

¹⁶ Ryan o be a sa tsebe gore go nea bohlatse ga gagwe go monna yo mongwe go be go tla feleletša ka go dira gore motho yo mongwe a amogele therešo. Ke therešo gore boemong bja gagwe, o ile a tseba ka mafelelo a boikemišetšo bja gagwe bja go “nea bohlatse bjo bo feletšego.” Lega go le bjalo, go ka direga gore o nea bohlatse ntlong e itšego, mošomong, sekolong goba o nea bohlatse bjo bo sa rulaganyetšwago gomme se ya ba tsela ya go phatlalatša therešo go ba bangwe wena o sa lemoge seo. Go fo swana le ge Paulo a se a ka a tseba ka mafelelo a go nea ga gagwe bohlatse “seleteng sa Asia,” o ka no se tsebe mafelelo ka moka a kgahlišago a go nea ga gago bohlatse ka botlalo. (Bala Ditiro 23:11; 28:23.) Eupša, go tloga go le bohlokwa gore o dire bjalo!

17. O ikemišeditše go dira’ng ngwageng wa 2009?

¹⁷ Ngwageng wa 2009, anke ka moka re tšeele godimo taelo yeo e neilwego ya gore re nee bohlatse ka ntlo le ntlo le ka ditsela tše dingwe. Ka go rialo, re tla kgona go ikwa bjalo ka Paulo, ge a re: “Ga ke tšeele moya wa-ka godimo e le wa bohlokwa go nna, ge feela nka fetša tsela ya-ka le bodiredi bjo ke bo amogetšego go Morena Jesu, gore ke hlatsele ka botlalo ditaba tše dibotse tša botho bjo bo sa swanelago bja Modimo.”

O be o tla Araba Bjang?

• Ke bjang moapostola Petro le moapostola Paulo gotee le ba bangwe ba ilego ba nea bohlatse ka botlalo lekgolong la pele la nywaga?

• Ke ka baka la’ng mafelelo a boboledi bja rena e ka ba a magolo go feta kamoo re naganago ka gona?

• Temana ya ngwaga wa 2009 e tla ba efe, gona ke ka baka la’ng e le e swanetšego?

[Dipotšišo tša Thuto]

[Ntlhakgolo go letlakala 19]

Temana ya ngwaga wa 2009 e tla ba e rego: ‘Hlatsela ditaba tše dibotse ka botlalo.’—Dit. 20:24.

[Seswantšho go letlakala 17]

Bagolo ba Efeso ba be ba tseba mokgwa wa Paulo wa go nea bohlatse ka ntlo le ntlo

[Seswantšho go letlakala 18]

Go nea ga gago bohlatse ka botlalo go tla ba le mafelelo afe a magolo?