Na o a Gopola?
Na o a Gopola?
Na o thabetše go bala ditokollo tša morago bjale tša Morokami? Bona ge e ba o ka kgona go araba dipotšišo tše di latelago:
• Re ka Bolela bjang “leleme le le sekilego” ka thelelo, e lego therešo ya mabapi le Modimo le merero ya gagwe? (Tsef. 3:9)
Go swana le leleme leo le bolelwago, gore re kgone go bolela “leleme le le sekilego” ka thelelo, go nyakega gore re theetše ka kelohloko, re ekiše ba bangwe bao ba bolelago ka thelelo, go swara ka hlogo maina a dipuku tša Beibele le ditemana tše dingwe tša Beibele, go bušeletša dilo tšeo o ithutilego tšona, go balela godimo, go lekodišiša popopolelo goba tsela ya therešo, go dira boiteko bja go dira tšwelopele, go rulaganya nako ya go ithuta, le go itlwaetša go “bolela” leleme le le sekilego.—8/15, matlakala 21-25.
• Ke dilo dife tšeo di akaretšwago mabapi le go tseba gore Modimo ke motho wa mohuta mang?
“Jehofa ke leina la gagwe,” gomme o nyaka gore re mo tsebe ka leina leo. (Ek. 15:3, PK) Ke “Modimo wa lerato le khutšo.” (2 Bakor. 13:11) Ke “Modimo wa temogo,” le wa ‘phološo.’ (1 Sam. 2:3; Ps. 25:5) Ka gona Modimo o tla batamela kgaufsi le bao ba mo tsebago.—9/1, matlakala 4-7.
• Ke bjang kgopolo ya “lenti la meloxô e meraro” e ka šomago lenyalong?
Polelwana “lenti la meloxô e meraro” ke ya seswantšhetšo. (Mmo. 4:12) Ge polelwana ye e dirišwa lenyalong, e akaretša monna le mosadi, e lego ditlhale tše pedi tša mathomo tšeo di ohlilwego, bao ba logagantšwego le tlhale ya motheo, e lego Modimo. Go tlemaganywa le Modimo go nea banyalani matla a moya a go lebeletšana le mathata le go hwetša lethabo.—9/15, letlakala 16.
• Go “bea diatla” mo go bolelwago go Baheberu 6:2, go šupa eng?
Go ena le go šupa go go kgethweng ga bagolo ba Bakriste, e ka ba e šupa go go bea matsogo bakeng sa go aba ka mohlolo dimpho tša moya o mokgethwa. (Dit. 8:14-17; 19:6)—9/15, letlakala 32.
• Ke dilo dife tšeo tate yo botse a lemogago gore bana ba gagwe ba a di nyaka?
Tše dingwe tša dinyakwa tša bona ke (1) gore a ba rate, (2) a ba beele mohlala o mobotse, (3) lapa le le thabilego, (4) thuto ya ditekanyetšo tša moya, (5) tayo, le (6) tšhireletšo.—10/1, letlakala 18-21.
• Bao ba etelelago pele ba ka bontšha ba bangwe tlhompho bjang?
Tsela e nngwe yeo ka yona mogolo a ka dirago bjalo ke ka go se kgopele batho ba bangwe go dira dilo tšeo yena a ka se di dirego. Le gona, o godiša batho ba bangwe ka go ba botša lebaka leo ka lona a kgopelago gore selo se dirwe goba la go nea tayo.—10/15, letlakala 22.
• Ke ditsela dife tše dingwe tša go kgomarela tlemo lenyalong?
Tšona ke: (1) Dira gore lenyalo la gago le tle pele. (2) Phema ditsela ka moka tša go se botegele molekane wa gago. Go sa šetšwe gore lenyalo la gago le tiile goba le a fokola, molekane wa gago o swanetše go tseba gore o ikemišeditše go dira gore lenyalo la lena le atlege; ditsela tše tše pedi di tla thuša.—11/1, matlakala 18-21.
• Mogolo wa Mokriste a ka ithuta’ng tseleng yeo badiši ba Baisiraele ba bego ba diriša lepara le le kobegilego?
Modiši o be a hlahla mohlape wa gagwe a diriša lepara le letelele le le kobegilego, kobi goba kotelo. Ge dinku di be di tsena goba di e-tšwa ka lešakeng, di be di feta “ka tlase xa kôtêlô” gomme ka go rialo di balwa ke modiši. (Lef. 27:32) Ka mo go swanago modiši wa Mokriste le yena o swanetše go tseba mohlape wa Modimo gabotse le go tseba boemo bja nku e nngwe le e nngwe.—11/15, letlakala 9.
• Mma a ka bontšha bjang gore o lebelela bohlweki bo le bohlokwa?
Dijo di ka šilafatšwa ka ditsela tše dintši, ka gona o hlapa diatla tša gagwe pele ga ge a ka swara dijo le gona o boloka dijo di khurumetšwe. O boloka ntlo e hlwekile go efoga mathata a ka bakwago ke magotlo le dikhunkhwane. Megato e mengwe e akaretša go boloka diaparo di hlwekile le go di hlatswa gotee le go hlapa ka mehla. Megato e bjalo e dumelelana le Beibele.—12/1, matlakala 9-11.