Tšeela Godimo Karolo ya Jesu ya Moswana-noši Morerong wa Modimo

“Ke nna tsela le therešo le bophelo. Ga go yo a tlago go Tate ge e se ka nna.”​—JOH. 14:6.

1, 2. Ke ka baka la’ng re swanetše go kgahlwa ke go hlahloba karolo e bohlokwa yeo e kgathwago ke Jesu morerong wa Modimo?

GO THEOŠA le nywaga, batho ba bantši ba be ba katanela go bonagala ba sa swane le batho bao ba ba dikologilego, eupša ke ba sego kae bao ba kgonnego go dira bjalo. Le gona, batho ba mmalwa ba ka bolela ka mo go swanetšego gore ke ba moswana-noši ka ditsela tše itšego. Lega go le bjalo, Jesu Kriste, Morwa wa Modimo, ke wa moswana-noši ka ditsela tše dintši.

² Ke ka baka la’ng re swanetše go kgahlwa ke karolo ya moswana-noši yeo e kgathwago ke Jesu? Ka baka la gore e akaretša tswalano ya rena le Tatago rena wa legodimong, Jehofa! Jesu o boletše gore: “Ke nna tsela le therešo le bophelo. Ga go yo a tlago go Tate ge e se ka nna.” (Joh. 14:6; 17:3) Anke re hlahlobeng ditsela tše dingwe tšeo ka tšona Jesu e lego wa moswana-noši. Go dira bjalo go tla godiša tebogo ya rena karolong yeo a e kgathago morerong wa Modimo.

‘Morwa yo a Tswetšwego a Nnoši’

3, 4. (a) Ke ka baka la’ng re ka bolela gore Jesu ke wa moswana-noši karolong yeo a e kgathago bjalo ka Morwa yo a tswetšwego a nnoši? (b) Ke bjang karolo yeo e kgathilwego ke Jesu tlholong e bego e le ya moswana-noši?

³ Jesu ga e fo ba feela “morwa wa Modimo.” Yeo ke tsela yeo Sathane a ilego a bitša Jesu ka yona ge a be a mo leka. (Mat. 4:3, 6) Jesu o bitšwa ka mo go swanetšego gore ke “Morwa yo a tswetšwego a nnoši wa Modimo.” (Joh. 3:16, 18) Lentšu la Segerika leo le fetoletšwego e le “yo a tswetšwego a nnoši” le hlaloswa e le “o tee feela wa mohuta wa gagwe” goba “setho se nnoši sa lešika goba sa mohuta o itšego,” goba “wa moswana-noši.” Jehofa o na le barwa ba moya ba dimilione tše makgolo. Ka gona, ke ka kgopolo efe Jesu e lego setho se nnoši “sa lešika goba sa mohuta o itšego”?

⁴ Jesu ke wa moswana-noši ka gobane ke yena feela yo a bopilwego ke Tatagwe ka go lebanya. Ke Morwa wa leitšibulo. Ge e le gabotse, ke “leitšibulo la tlholo yohle.” (Bakol. 1:15) Ke yena “mathomo a tlholo ya Modimo.” (Kut. 3:14) Karolo yeo e kgathwago ke Morwa yo a tswetšwego a nnoši tlholong le yona ke ya moswana-noši. Ga se Mmopi, goba Mohlami wa tlholo. Eupša Jehofa o ile a mo diriša bjalo ka motseta, goba mokgwa wa go hlola dilo tše dingwe ka moka. (Bala Johane 1:3.) Moapostola Paulo o ngwadile gore: “Ge e le gabotse go rena Modimo ke o tee, Tate, yoo dilo ka moka di tšwago go yena, le rena re ba gagwe; gomme go na le Morena o tee, Jesu Kriste, yoo dilo ka moka di lego gona ka yena, le rena re lego gona ka yena.”—1 Bakor. 8:6.

5. Mangwalo a hlalosa go ba ga Jesu wa moswana-noši bjang?

⁵ Lega go le bjalo, go ba ga Jesu wa moswana-noši go akaretša go gontši. Mangwalo a mo hlalosa a e-na le direto tše dintši tšeo di hlalosago karolo ya gagwe ya moswana-noši morerong wa Modimo. Ga bjale a re hlahlobeng direto tše dingwe tše hlano tšeo di hwetšwago ka Mangwalong a Bakriste a Segerika tšeo Jesu a bitšwago ka tšona. *

“Lentšu”

6. Ke ka baka la’ng e le mo go swanetšego ge Jesu a bitšwa “Lentšu”?

⁶ Bala Johane 1:14. Ke ka baka la’ng Jesu a bitšwa  “Lentšu,” goba Logos? Sereto se se hlalosa modiro wo a bego a o phetha go tloga mola dibopiwa tše dingwe tše bohlale di bago gona. Jehofa o ile a diriša Morwa wa gagwe go botša barwa ba bangwe ba moya tsebišo le ditaelo, go swana le ge Modimo a ile a diriša Morwa wa gagwe go botša batho ba lego lefaseng molaetša wa Gagwe. Taba ya gore Jesu ke Lentšu, goba Mmoleledi wa Modimo, e gatelelwa ke seo Kriste a se boditšego batheetši ba gagwe ba Bajuda, ge a re: “Seo ke se rutago ga se sa-ka, eupša ke sa yo a nthomilego. Ge motho a rata go dira thato ya Gagwe, o tla tseba mabapi le thuto ye ge e ba e e-tšwa go Modimo, goba ke bolela ka la-ka.” (Joh. 7:16, 17) Jesu o sa bitšwa ka sereto, “Lentšu la Modimo” gaešita le ka morago ga ge a boetše letagong la legodimong.—Kut. 19:11, 13, 16.

7. Re ka ekiša bjang boikokobetšo bjoo Jesu a bo bontšhago karolong ya gagwe e le “Lentšu”?

⁷ Nagana ka seo se bolelwago ke sereto se. Le ge Jesu e le motho yo a hlalefilego go feta dibopiwa ka moka tša Jehofa, ga a ithekge ka bohlale bja gagwe. O bolela seo Tatagwe a mo laelago sona. Ka mehla o lebiša tlhokomelo go Jehofa go e na le go e lebiša go yena. (Joh. 12:50) A mohlala o mobotse gakaakang wo re swanetšego go o latela! Le rena re neilwe tokelo ya go ‘bolela ditaba tše dibotse tša dilo tše dibotse.’ (Baroma 10:15) Go lemoga mohlala wa Jesu wa boikokobetšo go swanetše go re tutueletša go efoga go bolela ka la rena. Ge go tliwa tabeng ya go bolela molaetša o phološago maphelo o lego ka Mangwalong, ga re nyake go “fetela ka kua ga dilo tše di ngwadilwego.”—1 Bakor. 4:6.

“Amene”

8, 9. (a) Lentšu “amene” le ra go re’ng, gomme ke ka baka la’ng Jesu a bitšwa “Amene”? (b) Jesu o phethile karolo ya gagwe ya go ba “Amene” bjang?

⁸ Bala Kutollo 3:14. Ke ka baka la’ng Jesu a bitšwa “Amene”? Lentšu leo le fetoletšwego e le “amene” ke phetolelo ya mmiletšo wa lentšu la Seheberu leo le rago gore “a go be bjalo,” goba “ka kgonthe.” Modu wa lentšu le ka Seheberu o bolela go ba “yo a botegago” goba “yo a ka botwago.” Lona lentšu le le dirišwa go hlalosa potego ya Jehofa. (Doit. 7:9; Jes. 49:7) Ka gona, ke ka tsela efe Jesu e lego wa moswana-noši ge go bolelwa ka yena e le “Amene”? Ela hloko kamoo 2 Bakorinthe 1:19, 20 e arabago ka gona: “Morwa wa Modimo, Kriste Jesu yo a boletšwego gare ga lena . . . , ga se ya ba Ee ye e lego Aowa, eupša go yena Ee e bile Ee. Gobane go sa šetšwe gore dikholofetšo tša Modimo ke tše dintši gakaakang, di bile Ee ka yena. Ka baka leo, gape ka yena go na le ‘Amene’ e bolelwago go Modimo gore go išwe letago go yena.”

⁹ Jesu ke “Amene” dikholofetšong ka moka tša Modimo. Bophelo bja gagwe bja lefaseng bja go hloka sebe, go akaretša le lehu la sehlabelo, di ile tša gatelela le go dira gore go kgonege gore dikholofetšo ka moka tša Jehofa Modimo di phethagale. Ka go dula a botega, Jesu le yena o hlatsetše gore tatofatšo ya Sathane yeo e begilwego ka pukung ya Jobo ya gore bahlanka ba Modimo ba tla latola Modimo ge ba le ka tlase ga mathata, tlaišo le diteko, ke ya maaka. (Jobo 1:6-12; 2:2-7) Go dibopiwa ka moka tša Modimo, ke Morwa wa leitšibulo feela yo a bego a ka nea karabo e feletšego tatofatšong yeo. Go tlaleletša moo, Jesu o neile bohlatse bjo bo bontšhago gore o thekga lehlakore la Tatagwe go kgang e kgolo ya go swanelega ga bogoši bja Jehofa bja legohle.

10. Re ka ekiša Jesu bjang karolong ya gagwe ya moswana-noši e le “Amene”?

¹⁰ Re ka ekiša Jesu bjang karolong ya gagwe ya moswana-noši e le “Amene”? Ka go dula re botegela Jehofa le go thekga bogoši bja gagwe bja legohle. Ka go dira bjalo, re tla be re arabela gabotse kgopelong yeo e begilwego go Diema 27:11, e rego: “Ngwan’a-ka! Hlalefa, O nthabišê pelo, ke tsebê se nkaxo fetola sôna xe ba nnyatša.”

“Mmoelanyi wa Kgwerano e Mpsha”

11, 12. Ke bjang karolo ya Jesu ya go ba Mmoelanyi e lego ya moswana-noši?

¹¹ Bala 1 Timotheo 2:5, 6. Jesu ke “mmoelanyi o tee magareng ga Modimo le batho.” Ke “mmoelanyi wa kgwerano e mpsha.” (Baheb. 9:15; 12:24) Lega go le bjalo, Moše le yena o bolelwa e le mmoelanyi—mmoelanyi wa kgwerano ya Molao. (Bagal. 3:19) Ka gona, ke bjang karolo ya Jesu ya go ba Mmoelanyi e lego ya moswana-noši?

¹² Lentšu leo le fetoletšwego e le “mmoelanyi,” lelemeng la mathomo ke polelwana ya molao. Le šupa go Jesu e le Mmoelanyi wa molao (goba, ka kwešišo e itšego e le moemedi) wa kgwerano e mpsha yeo e dirilego gore go tswalwa ga setšhaba se sefsa, e lego “Isiraele wa Modimo” go kgonege.  (Bagal. 6:16) Setšhaba se se bopša ke Bakriste ba tloditšwego ka moya, bao ba bopago “boperisita bja bogoši.” (1 Pet. 2:9; Ek. 19:6) Kgwerano ya Molao, yeo Moše e lego mmoelanyi wa yona, e be e sa kgone go tšweletša setšhaba se se swanago le seo.

13. Ke’ng seo se akaretšwago karolong ya Jesu e le Mmoelanyi?

¹³ Karolo ya Jesu ya go ba Mmoelanyi e akaretša’ng? Ge e le gabotse, Jehofa o diriša mohola wa madi a Jesu go bao ba tsentšwego kgweranong e mpsha. Ka tsela ye, Jehofa o ba amogela ka molao e le ba lokilego. (Baroma 3:24; Baheb. 9:15) Ke moka, Modimo o tla ba lebelela e le ba swanelwago ke go tsena kgweranong e mpsha, ba e-na le tebelelo ya go ba dikgoši tšeo e lego baperisita legodimong! Ka ge Jesu e le Mmoelanyi wa bona, o ba thuša go dula ba le boemong bjo bobotse pele ga Modimo.—Baheb. 2:16.

14. Ke ka baka la’ng Bakriste ka moka, go sa šetšwe kholofelo ya bona, ba swanetše go tšeela godimo karolo ya Jesu e le Mmoelanyi?

¹⁴ Go thwe’ng ka bao ba sego kgweranong e mpsha, bao ba nago le kholofelo ya go phela ka mo go sa felego lefaseng, e sego legodimong? Le ge e se batšea-karolo kgweranong e mpsha, e a ba hola. Ba amogela tebalelo ya dibe gomme ba bolelwa ba lokile e le bagwera ba Modimo. (Jak. 2:23; 1 Joh. 2:1, 2) Go sa šetšwe gore re na le kholofelo ya go phela legodimong goba ya go phela lefaseng, yo mongwe le yo mongwe wa rena o na le lebaka la go tšeela godimo karolo ya Jesu e le Mmoelanyi wa kgwerano e mpsha.

“Moperisita yo a Phagamego”

15. Ke bjang karolo ya Jesu ya go ba Moperisita yo a Phagamego e fapanago le ya banna ba bangwe ka moka bao ba hlanketšego e le baperisita ba phagamego?

¹⁵ Nakong e fetilego banna ba bantši ba hlanketše e le baperisita ba phagamego, lega go le bjalo, karolo ya Jesu e le Moperisita yo a Phagamego ke ya moswana-noši e le ruri. Bjang? Paulo o a hlalosa: “Ga go nyakege gore letšatši le letšatši a dire dihlabelo pele bakeng sa dibe tša gagwe, ke moka e be bakeng sa tša setšhaba, go etša ge baperisita bao ba phagamego ba dira: (gobane se o se dirile gatee ya ba moka ge a be a itira sebego;) gobane Molao o bea banna gore e be baperisita ba phagamego ba e-na le bofokodi, eupša lentšu la keno e ennwego leo le tlilego ka morago ga Molao le bea Morwa, yo a dirilwego gore e be yo a phethagetšego ka mo go sa felego.”—Baheb. 7:27, 28. *

16. Ke ka baka la’ng sehlabelo sa Jesu e tloga e le sa moswana-noši?

¹⁶ Jesu e be e le motho yo a phethagetšego, yo a bego a swana tlwaa le Adama pele ga ge a ka dira sebe. (1 Bakor. 15:45) Lega go le bjalo, Jesu e be e le motho a nnoši yoo a bego a ka nea sehlabelo se se phethagetšego le se se feletšego—sehlabelo seo se ka se kego sa bušeletšwa gape. Ka tlase ga Molao wa Moše, dihlabelo di be di neelwa ka mehla. Lega go le bjalo, dihlabelo tše bjalo ka moka le ditirelo tša boperisita e be e le feela meriti ya seo Jesu a bego a tla se dira. (Baheb. 8:5; 10:1) Ka gona, ka ge Jesu a kgona go phetha karolo e kgolo go feta ya baperisita ba phagamego gomme a tla hlankela ka mo go sa felego, karolo ya Jesu e le Moperisita yo a Phagamego ke ya moswana-noši.

17. Ke ka baka la’ng re swanetše go lemoga ka tebogo karolo ya Jesu e le Moperisita wa rena yo a Phagamego, gomme re ka dira seo bjang?

¹⁷ Re nyaka ditirelo tša Jesu bjalo ka Moperisita yo a Phagamego go re thuša go ba le boemo bjo bobotse pele ga Modimo. Ruri Moperisita yo a Phagamego yo re nago le yena o a kgahliša! Paulo o ngwadile gore: “Moperisita yo a phagamego yo re nago le yena ga se yo a ka se kego a re kwela bohloko bofokoding bja rena, eupša ke yo a lekilwego ka ditsela tšohle go swana le rena, eupša a se na sebe.” (Baheb. 4:15) Go ba gona, go lemoga ntlha ye ka tebogo go swanetše go re tutueletša go ‘se sa hlwa re iphelela, eupša re phelele yena yo a re hwetšego.’—2 Bakor. 5:14, 15; Luka 9:23.

 “Peu” Yeo go Boletšwego ka Yona e sa le Pele

18. Ke boporofeta bofe bjoo bo ilego bja bolelwa ka morago ga gore Adama a dire sebe, gomme ke’ng seo se ilego sa utollwa mabapi le boporofeta bjoo?

¹⁸ Morago kua Edene, ge go be go bonala eka batho ba lahlegetšwe ke dilo tšohle—tswalano e amogelegago le Modimo, bophelo bjo bo sa felego, lethabo le Paradeise—Jehofa Modimo o boletše e sa le pele ka Mohlakodiši. Yena yo go boletšwe ka yena e le “peu.” (Gen. 3:15) Peu ye yeo e sego ya hlaloswa e ile ya ba sehlogo sa diporofeto tše mmalwa tša Beibele ka nywaga e mentši. E be e tla ba setlogolwana sa Aborahama, Isaka le Jakobo. Le gona, e be e swanetše go tšwelela molokong wa Kgoši Dafida.—Gen. 21:12; 22:16-18; 28:14; 2 Sam. 7:12-16.

19, 20. (a) Peu e holofeditšwego ke mang? (b) Ke ka baka la’ng re ka bolela gore peu e holofeditšwego ga e akaretše Jesu feela?

¹⁹ Peu ye yeo e holofeditšwego e be e le mang? Karabo ya potšišo ye e ka hwetšwa go Bagalatia 3:16. (Bala.) Lega go le bjalo, mafelelong a kgaolo yeo, moapostola Paulo o tšwela pele go bolela le Bakriste ba tloditšwego gore: “Godimo ga moo, ge e ba le le ba Kriste ruri le peu ya Aborahama, bajabohwa go ya ka kholofetšo.” (Bagal. 3:29) Go tla bjang gore Kriste e be Peu e holofeditšwego, gomme go be le ba bangwe gape bao ba akaretšwago?

²⁰ Ba dimilione ba bolela gore ke ditlogolwana tša Aborahama, e bile ba bangwe ba itshwara bjalo ka baporofeta. Madumedi a mangwe a tšeela godimo boipolelo bja gore baporofeta ba bona ke ditlogolwana tša Aborahama. Eupša na ka moka ga bona ke Peu e holofeditšwego? Aowa. Ka ge moapostola Paulo a bontšhitše ge a be a le ka tlase ga pudulelo, ga se ditlogolwana tša Aborahama ka moka tšeo di ka bolelago gore ke Peu e holofeditšwego. Bana ba barwa ba bangwe ba Aborahama ga se ba dirišwa go šegofatša batho. Peu e šegofatšago e be e tla tšwelela go Isaka feela. (Baheb. 11:18) Ka gona, ke motho o tee feela, Jesu Kriste, yoo pego ya lešika la gagwe go thoma ka Aborahama e begilwego ka Beibeleng, ke karolo ya motheo ya peu e holofeditšwego. * Ba  bangwe ka moka bao ba fetogago karolo ya peu ya Aborahama, ba ba bjalo ka gobane ke “ba Kriste.” Ee, ruri karolo ya Jesu go phethagatšeng boporofeta bjo e tloga e le ya moswana-noši.

21. Ke’ng seo se go kgahlago mabapi le tsela yeo Jesu a phethilego karolo ya gagwe morerong wa Jehofa?

²¹ Re ithutile’ng tlhahlobong ye e kopana ya karolo ya Jesu ya moswana-noši morerong wa Jehofa? Go tloga nakong ya tlholo ya gagwe go ya pele, Morwa wa Modimo yo a tswetšwego a noši ruri e bile wa moswana-noši. Lega go le bjalo, Morwa yo wa moswana-noši wa Modimo yo e bilego Jesu, ka mehla o be a hlankela ka boikokobetšo ka go dumelelana le thato ya Tatagwe, a sa inyakele letago. (Joh. 5:41; 8:50) A mohlala o mobotse gakaakang bakeng sa rena lehono! Go swana le Jesu, eka go ‘dira dilo tšohle bakeng sa letago la Modimo,’ e ka ba pakane ya rena.—1 Bakor. 10:31.

[Mengwalo ya tlase]

Na o a Gopola?

• O ithutile’ng mabapi le karolo ya Jesu ya moswana-noši diretong tša gagwe? (Bona lepokisi.)

• O ka ekiša mohlala wa Morwa wa Jehofa wa moswana-noši bjang?

[Dipotšišo tša Thuto]

[Lepokisi/​Seswantšho go letlakala 15]

Tše Dingwe tša Direto Tšeo di Bontšhago Karolo ya Jesu ya Moswana-noši Morerong wa Modimo

▪ Morwa yo a Tswetšwego a Nnoši. (Joh. 1:3) Jesu ke yena feela yo a bopilwego ke Tatagwe ka go lebanya.

▪ Lentšu. (Joh. 1:14) Jehofa o diriša Morwa wa gagwe e le Mmoleledi go botša dibopiwa tše dingwe tsebišo le ditaelo.

▪ Amene. (Kut. 3:14) Bophelo bja gagwe bja lefaseng bja go hloka sebe, go akaretša le lehu la sehlabelo, di ile tša gatelela le go dira gore go kgonege gore dikholofetšo ka moka tša Jehofa Modimo di phethagale.

▪ Mmoelanyi wa Kgwerano e Mpsha. (1 Tim. 2:5, 6) Ka ge e le Mmoelanyi, Jesu o dirile gore go tswalwa ga setšhaba se sefsa go kgonege, “Isiraele wa Modimo,” seo se bopšago ke Bakriste bao ba bopago “boperisita bja bogoši.”—Bagal. 6:16; 1 Pet. 2:9.

▪ Moperisita yo a Phagamego. (Baheb. 7:27, 28) Jesu e be e le motho a nnoši yoo a bego a ka nea sehlabelo se se phethagetšego, seo se bego se sa nyake go bušeletšwa gape. A ka re hlatswa sebe gomme a re lokolla lehung leo le bakwago ke sona.

▪ Peu e Holofeditšwego. (Gen. 3:15) Jesu Kriste, ke motho o tee feela yoo e lego karolo ya motheo ya peu yeo go boletšwego ka yona e sa le pele. Ba bangwe ka moka bao ba ilego ba fetoga karolo ya peu ya Aborahama ke “ba Kriste.”—Bagal. 3:29.