Bonang! Mohlanka yo Jehofa a mo Amogetšego

‘Bonang! Mohlanka wa-ka yo pelo ya-ka e mo thabelago.’—JES. 42:1.

1. Ke’ng seo batho ba Jehofa ba kgothaletšwago go se dira, kudu-kudu ge Segopotšo se dutše se batamela, gomme ka baka la’ng?

GE NAKO ya go gopola lehu la Kriste e dutše e batamela, batho ba Modimo ba dira gabotse ge ba latela keletšo ya moapostola Paulo ka go ‘tsepelela Moemedi yo Mogolo le Mophethagatši wa tumelo ya rena, Jesu.’ Paulo o okeditše ka gore: “Ka kgonthe, naganišišang ka yo a kgotleletšego polelo e bjalo e ganetšago ya badiradibe dikgahlegong tša bona, e le gore le se ke la lapa gomme la felelwa ke matla meoyeng ya lena.” (Baheb. 12:2, 3) Go tsepelela tsela ya Kriste ya potego yeo e ilego ya fela ge a be a dirwa sehlabelo, go tla thuša Bakriste ba tloditšwego le badirišani ba bona ba dinku tše dingwe go tšwela pele ba hlankela Jehofa ka potego le go phema go ‘felelwa ke matla meoyeng ya bona.’—Bapiša le Bagalatia 6:9.

2. Re ka ithuta’ng boporofeteng bja Jesaya bjo bo bolelago ka Morwa wa Modimo?

² Jehofa o ile a budulela tatelano ya boporofeta bjo bo bolelago ka Morwa wa gagwe ka go lebanya a diriša moporofeta Jesaya. Boporofeta bjo bo tla re thuša go ‘tsepelela Moemedi yo Mogolo le Mophethagatši wa tumelo ya rena’ Kriste Jesu. * Bo re hlabišetša seetša ka semelo sa gagwe, go tlaišega ga gagwe le go godišwa ga gagwe bjalo ka Kgoši ya rena le Molopolodi. Bo tla godiša kwešišo ya rena ka Segopotšo, seo re tlago go se gopola lenyaga ka Labone, April 9, ka morago ga ge letšatši le sobetše.

Mohlanka o a Hlaolwa

3, 4. (a) Lentšu “mohlanka” ka pukung ya Jesaya le šupa go eng? (b) Beibele ka boyona e hlaola bjang Mohlanka yo go boletšwego ka yena go Jesaya dikgaolo 42, 49, 50, 52 le 53?

³ Lentšu “mohlanka” le tšwelela ka makga a mantši ka pukung ya Jesaya. Ka dinako tše dingwe le šupa moporofeta ka boyena. (Jes. 20:3; 44:26) Ka dinako tše dingwe le dirišwa go setšhaba ka moka sa Isiraele, goba Jakobo. (Jes. 41:8, 9; 44:1, 2, 21) Eupša go thwe’ng ka boporofeta bjo bo kgahlišago bja mabapi le Mohlanka bjo bo begilwego go Jesaya dikgaolo 42, 49, 50, 52 le 53? Mangwalo a Bakriste a Segerika a hlaola Mohlanka wa Jehofa gabotse yoo a hlalositšwego dikgaolong tšeo. Se se kgahlišago ke gore mohlankedi wa mmušo wa Ethiopia yo go boletšwego ka yena ka pukung ya Ditiro o be a bala bjo bongwe bja boporofeta bjo ge moebangedi Filipi a be a hlahlwa ke moya gore a mmatamele. Ka morago ga gore mohlankedi wa mmušo a bale karolo ya Beibele yeo ga bjale re e hwetšago go Jesaya 53:7, 8, o ile a botšiša Filipi gore: “Ke a go kgopela, Moporofeta o bolela se mabapi le mang? Na o bolela ka yena  goba ka motho yo mongwe?” Gatee-tee Filipi o ile a hlalosa gore Jesaya o be a bolela ka Mesia e lego Jesu.—Dit. 8:26-35.

⁴ Ge Jesu e be e sa le ngwana, monna wa moloki yo a bitšwago Simeone o ile a bolela a išwa ke matla a moya o mokgethwa gore “ngwana yo monyenyane Jesu” e be e tla ba “seetša sa go tloša lešira ditšhabeng” go etša ge go boletšwe e sa le pele go Jesaya 42:6 le 49:6. (Luka 2:25-32) Go feta moo, go swarwa ga Jesu ka lenyatšo bošegong bja tsheko ya gagwe go boletšwe e sa le pele boporofeteng bjo bo lego go Jesaya 50:6-9. (Mat. 26:67; Luka 22:63) Ka morago ga Pentekoste ya 33 C.E., moapostola Petro o ile a hlaola Jesu gabotse e le “Mohlanka” wa Jehofa. (Jes. 52:13; 53:11; bala Ditiro 3:13, 26.) Re ka ithuta’ng boporofeteng bjo bja mabapi le Mesia?

Jehofa o Tlwaetša Mohlanka wa Gagwe

5. Ke tlwaetšo efe yeo Mohlanka a ilego a e hwetša?

⁵ Bjo bongwe bja boporofeta bja Jesaya bja mabapi le Mohlanka wa Modimo bo re hlabišetša seetša ka tswalano ya kgaufsi ya magareng ga Jehofa le Morwa wa gagwe yo a tswetšwego a nnoši nakong ya pele ga ge Morwa e ka ba motho. (Bala Jesaya 50:4-9.) Mohlanka ka boyena o utolla gore Jehofa o be a tšwela pele a mo tlwaetša, ge a re: “Ó mphafoša tsêbê xore kê theetše byalo ka morutiwa.” (Jes. 50:4) Nakong yeo ka moka, Mohlanka wa Jehofa o ile a kwa Tatagwe gomme a ithuta go yena, a ba morutiwa yo a ikokobetšago. Ruri ke tokelo ya moswana-noši go rutwa ke Mmopi wa legohle!

6. Mohlanka o ile a bontšha bjang go ikokobeletša Tatagwe ka mo go feletšego?

⁶ Boporofeteng bjo, Mohlanka o bolela ka Tatagwe e le “Mmuši Morena Jehofa.” Se se bontšha gore Mohlanka o lemogile therešo ya motheo ya bogoši bja Jehofa bja legohle. E le ge a bontšha go ikokobeletša Tatagwe ka mo go phethagetšego, o ile a bolela gore: “Mmuši Morena Jehofa o thibolotše tsebe ya-ka, gomme ge e le nna ke be ke sa rabele. Ga se ka retologela lehlakoreng le šele.” (Jes. 50:5, NW) O ile “a ba mošomi yo a nago le bokgoni [wa Jehofa]” ge ba be ba bopa legohle le le bonagalago le batho. “Mošomi [yo] yo a nago le bokgoni” o be a “thabile pele ga Jehofa ka mehla, [a] thabela naga yeo e enywago ya lefase la gagwe, gomme dilo tšeo [Morwa wa Modimo] di bego di [mo kgahla] e be e le bana ba batho.”—Die. 8:22-31, NW.

7. Ke’ng seo se bontšhago gore Mohlanka o be a kgodišegile gore Tatagwe o tla mo thekga ge a be a lekwa?

⁷ Tlwaetšo yeo Mohlanka a e amogetšego le go rata ga gagwe batho e ile ya mo lokišeletša go tla lefaseng le go lebeletšana le kganetšo e šoro. O ile a tšwela pele a thabela go dira thato ya Tatagwe, gaešita le ge a be a lebeletšane le tlaišo e šoro. (Ps. 40:8; Mat. 26:42; Joh. 6:38) Ditekong tša gagwe ka moka mo lefaseng, Jesu o be a kgodišegile gore Tatagwe o be a mo amogela le go mo thekga. Ka ge go be go boletšwe e sa le pele boporofeteng bja Jesaya, Jesu o be a ka re: “E a ntokafatšago o kgaufsi; e a lwago le nna e ka ba mang? . . . Bonang, Morena Jehofa ke e a nthušago.” (Jes. 50:8, 9, PK) Ka kgonthe Jehofa o ile a thuša Mohlanka wa gagwe yo a botegago bodireding bja gagwe ka moka bja lefaseng, go etša ge bjo bongwe bja boporofeta bja Jesaya bo bontšha.

Bodiredi bja Mohlanka mo Lefaseng

8. Ke’ng seo se hlatselago gore Jesu e be e le yo Jehofa a mo “hlaotšexo,” go etša ge go boletšwe e sa le pele go Jesaya 42:1?

⁸ Pego ya Beibele e re botša seo se diragetšego ge Jesu a be a kolobetšwa ka 29 C.E. gore: “Moya o mokgethwa wa theogela godimo ga gagwe . . . , gomme lentšu la tšwa legodimong le re: ‘O Morwa wa-ka, morategi; ke go amogetše.’” (Luka 3:21, 22) Ka gona, Jehofa o ile a bontšha gabotse yo a mo “hlaotšexo,” yo go boletšwego ka yena boporofeteng bja Jesaya. (Bala Jesaya 42:1-7.) Bodireding bja gagwe bja lefaseng, Jesu o ile a phethagatša boporofeta bjo ka tsela e makatšago. Ka pegong ya Ebangedi ya gagwe, Mateo o ile a tsopola mantšu ao a hwetšagalago go Jesaya 42:1-4 gomme a a diriša go Jesu.—Mat. 12:15-21.

9, 10. (a) Jesu o phethagaditše bjang Jesaya 42:3 nakong ya bodiredi bja gagwe? (b) Ke bjang Kriste a ilego a “tšweletša moahlolêlô wa therešô” ge a be a le lefaseng, gona ke neng moo a ‘hlomago go loka lefaseng’?

⁹ Batho ba tlwaelegilego gare ga Bajuda ba be ba tšeelwa fase ke baetapele ba bodumedi ba Bajuda. (Joh. 7:47-49) Batho ba be ba swarwa gampe gomme ba be ba ka swantšhwa le ‘mahlaka ao a thinyegilego’ goba ‘dithapo tša mabone tša lodi’  yeo e kunyelelago. Lega go le bjalo, Jesu o ile a bontšha badiidi le bao ba tlaišegago kwelobohloko. (Mat. 9:35, 36) O ile a nea ba bjalo taletšo e botho, ge a re: “Tlang go nna, lena bohle bao le lapišitšwego le go imelwa, ke tla le lapološa.” (Mat. 11:28) Go feta moo, Jesu o be a “tlo tšweletša moahlolêlô wa therešô” ka go ruta ditekanyetšo tša Jehofa mabapi le se se nepagetšego le se se fošagetšego. (Jes. 42:3) O ile a bontšha gape gore Molao wa Modimo o be o swanetše go dirišwa ka teka-tekano le ka go bontšha kgaugelo. (Mat. 23:23) Le gona Jesu o ile a bontšha toka ka go dira boboledi ka ntle le go kgetholla bahumi le badiidi.—Mat. 11:5; Luka 18:18-23.

¹⁰ Boporofeta bja Jesaya gape bo boletše e sa le pele gore yo Jehofa a mo “hlaotšexo” “o tlo ba a hloma go loka lefaseng.” (Jes. 42:4, PK) Se o tla se dira kapejana ge bjalo ka Kgoši ya Mmušo wa Mesia a fediša mebušo ka moka ya dipolitiki gomme a e tšeela legato ka pušo ya gagwe ya go loka. O tla tliša lefase le lefsa, leo ‘toko e tlago go aga go lona.’—2 Pet. 3:13; Dan. 2:44.

“Seetša” le “Kxwêranô”

11. Ke ka kgopolo efe Jesu e bego e le “seetša sa ba-ntlê” lekgolong la pele la nywaga, gomme ke bjang a sa dutšego a le bjalo go fihla le lehono?

¹¹ E le go phethagala ga Jesaya 42:6, Jesu o ile a ipontšha e le “seetša sa ba-ntlê” e le ka kgonthe. Nakong ya bodiredi bja gagwe bja lefaseng, o ile a tliša seetša sa moya go Bajuda pele. (Mat. 15:24; Dit. 3:26) Eupša Jesu o ile a bolela gore: “Ke nna seetša sa lefase.” (Joh. 8:12) O ile a ba seetša go Bajuda le bantle e sego feela ka go ba tlišetša tshedimošo ya moya eupša gape ka go neela ka bophelo bja gagwe bjo bo phethagetšego e le sehlabelo bakeng sa batho ka moka. (Mat. 20:28) Ka morago ga tsogo ya gagwe, o ile a laela barutiwa ba gagwe gore e be dihlatse tša gagwe “go fihla karolong ya kgole ya lefase.” (Dit. 1:8) Nakong ya bodiredi bja bona, Paulo le Baranaba ba ile ba tsopola polelwana ya “seetša sa ba-ntlê” gomme ba e diriša modirong wa boboledi woo ba bego ba o dira go bao e sego Bajuda. (Dit. 13:46-48; bapiša le Jesaya 49:6.) Modiro woo o sa dirwa ka ge bana babo Jesu ba tloditšwego ba mo lefaseng le badirišani ba bona ba phatlalatša seetša sa moya gomme ba thuša batho go dumela go Jesu e lego “seetša sa ba-ntlê.”

12. Jehofa o neelane bjang ka Mohlanka wa gagwe e le “kxwêranô ya sethšaba”?

¹² Boporofeteng bjona bjoo, Jehofa o ile a botša Mohlanka wa gagwe yo a mo hlaotšego gore: “Ke Xo lôta xore ke Xo dirê wa kxwêranô ya sethšaba.” (Jes. 42:6) Sathane o ile a leka ka mo go feletšego go bolaya Jesu le go mo thibela go phetha bodiredi bja gagwe mo lefaseng eupša Jehofa o ile a šireletša Jesu go fihlela ka nako e beilwego ya gore a hwe. (Mat. 2:13; Joh. 7:30) Ke moka, Jehofa o ile a tsoša Jesu gomme a mo gafa e le “kxwêranô,” goba kholofetšo bakeng sa batho mo lefaseng. Kholofetšo yeo e tiilego e neile kgonthišetšo ya gore Mohlanka yo a botegago wa Modimo o tla tšwela pele e le “seetša sa ba-ntlê,” a lokolla bao ba lego lefsifsing la moya.—Bala Jesaya 49:8, 9. *

13. Ke ka tsela efe Jesu a phološitšego “ba ba dutšexo lefsifsing” nakong ya bodiredi bja gagwe mo lefaseng, gomme o tšwela pele a dira bjalo bjang?

¹³ Ka go dumelelana le kholofetšo ye, Mohlanka yo a hlaotšwego wa Jehofa o tla ‘budulla mahlo a difofu’ a “lokololê ba ba tlemilwexo”  gomme a phološe “ba ba dutšexo lefsifsing.” (Jes. 42:7) Nakong ya bodiredi bja gagwe bja lefaseng, Jesu o ile a dira se ka go pepentšha metlwae ya bodumedi bja maaka gomme a ruta ditaba tše dibotse tša Mmušo. (Mat. 15:3; Luka 8:1) Ka go rialo, o ile a phološa Bajuda bao e ilego ya ba barutiwa ba gagwe bokgobeng bja moya. (Joh. 8:31, 32) Ka tsela e swanago, Jesu o tlišeditše batho ba dimilione bao e sego Bajuda phološo ya moya. O laetše balatedi ba gagwe gore ‘ba ye ba dire batho ba ditšhaba ka moka barutiwa’ gomme a ba holofetša gore o tla ba le bona “matšatši ka moka go fihla bofelong bja tshepedišo ya dilo.” (Mat. 28:19, 20) Kriste Jesu o okamela modiro wa boboledi wo o dirwago lefaseng ka bophara a le legodimong.

Jehofa o Phagamišitše “Mohlanka”

14, 15. Ke ka baka la’ng Jehofa a ile a phagamiša Mohlanka wa gagwe, gona o ile a dira seo bjang?

¹⁴ Boporofeteng bjo bongwe gape bja mabapi le Mohlanka wa gagwe yo e lego Mesia, Jehofa o re: “Mohlanka wa-ka šoo, ó tlo lêtlêxa a phaxama a xodišwa, a ba e moxolo xolo.” (Jes. 52:13) Jehofa o ile a phagamiša Morwa wa gagwe ka baka la ge a ile a ikokobeletša bogoši bja Gagwe ka potego le ka ge a ile a botega ka tlase ga teko e kgolo kudu.

¹⁵ Moapostola Petro o ngwadile mabapi le Jesu gore: “O letsogong le letona la Modimo, gobane o ile legodimong; gomme barongwa le balaodi ba ile ba dirwa gore ba ikokobeletše yena le mebušo ya dirwa gore e ikokobeletše yena.” (1 Pet. 3:22) Ka mo go swanago, moapostola Paulo o ngwadile gore: “Go feta moo, ge a ikhwetša a le ka sebopego sa motho, a ikokobetša gomme a ba yo a kwago go fihla lehung, ee, lehung koteng ya tlhokofatšo. Ka lona lebaka le gape Modimo o mo phagamišeditše boemong bja godimo gomme ka botho a mo nea leina le lego ka godimo ga leina le ge e le lefe le lengwe, e le gore letolo le lengwe le le lengwe la bao ba lego legodimong le bao ba lego lefaseng le bao ba lego ka tlase ga mmu le khuname leineng la Jesu, gomme leleme le lengwe le le lengwe le swanetše go dumela phatlalatša gore Jesu Kriste ke Morena gore go išwe letago go Modimo Tate.”—Bafil. 2:8-11.

16. Jesu o ile “a xodišwa, a ba e moxolo xolo” bjang ka 1914, gomme ke’ng seo a se fihleletšego ga e sa le go tloga ka nako yeo?

¹⁶ Ka 1914, Jehofa o ile a phagamiša Jesu kudu le go feta. O ile “a xodišwa, a ba e moxolo xolo” ge Jehofa a be a mmea e le Kgoši ya Mmušo wa Mesia. (Ps. 2:6; Dan. 7:13, 14) Ga e sa le go tloga ka nako yeo, Kriste o tšwetše pele a “buša xare xa  manaba [a gagwe].” (Ps. 110:2) Sa pele o ile a fenya Sathane le Batemona ba gagwe, a ba lahlela lefaseng. (Kut. 12:7-12) Ke moka, ka go swana le Korese yo Mogolo, Kriste o ile a phološa mašaledi a bana babo ba tloditšwego ba lefaseng diatleng tša “Babilona o Mogolo.” (Kut. 18:2; Jes. 44:28) O eteletše pele modiro wa boboledi wa lefase ka bophara woo o feleleditšego ka go kgoboketšwa ga “ba šetšego” ba bana babo ba moya gomme ka morago ya ba ga ba dimilione ba “dinku tše dingwe,” e lego badirišani ba botegago ba “mohlatswana.”—Kut. 12:17; Joh. 10:16; Luka 12:32.

17. Ke’ng seo re ithutilego sona go fihla bokgoleng bjo ka go ahla-ahla boporofeta bja Jesaya bja mabapi le “mohlanka”?

¹⁷ Go ithuta ka boporofeta bjo bjo bo makatšago ka pukung ya Jesaya ruri go okeditše tebogo ya rena bakeng sa Kgoši le Molopolodi wa rena, Kriste Jesu. Go ikokobetša ga gagwe bjalo ka morwa bodireding bja gagwe bja lefaseng go bonagaditše tlwaetšo yeo a e hweditšego ge a be a e-na le Tatagwe pele a e-tla lefaseng. O ipontšhitše e le “seetša sa ba-ntlê” ka bodiredi bja gagwe ka noši le ka modiro wa boboledi woo a o okametšego go ba go fihla le lehono. Bjalo ka ge re tla bona ka morago, boporofeta bjo bongwe bja mabapi le Mohlanka yo e lego Mesia bo utolla gore o tla tlaišega gomme a neele ka bophelo bja gagwe bakeng sa go re hola, e lego ditaba tšeo re swanetšego go ‘naganišiša’ ka tšona ge Segopotšo sa lehu la gagwe se dutše se batamela.—Baheb. 12:2, 3.

[Mengwalo ya tlase]

E le Poeletšo

• “Mohlanka” yo go boletšwego ka yena boporofeteng bja Jesaya ke mang gomme re tseba bjang?

• Ke tlwaetšo efe yeo Mohlanka a ilego a e hwetša go Jehofa?

• Ke ka tsela efe Jesu e lego “seetša sa ba-ntlê”?

• Mohlanka o ile a phagamišwa bjang?

[Dipotšišo tša Thuto]

[Seswantšho go letlakala 21]

Filipi o ile a hlalosa gabotse gore “mohlanka” yo Jesaya a boletšego ka yena ke Jesu e lego Mesia

[Seswantšho go letlakala 23]

Bjalo ka Mohlanka yo Jehofa a mo hlaotšego, Jesu o ile a bontšha badiidi le bao ba tlaišegago kwelobohloko

[Seswantšho go letlakala 24]

Jesu o ile a phagamišwa ke Tatagwe gomme a bewa e le Kgoši ya Mmušo wa Mesia