“Tsela šé! Tšeang ka Yôna!”

Kanegelo ya Emilia Pederson

Ka ge go anega Ruth E. Pappas

MMA e lego Emilia Pederson o belegwe ka 1878. Le ge a ile a ba morutiši, kganyogo ya gagwe e be e le go fetša bophelo ka moka a thuša batho go batamela kgaufsi le Modimo. Bohlatse bja kganyogo ya mma bo be bo bonagala ka theranka e kgolo yeo e lego ka gae kua toropong ya Jasper, Minnesota, U.S.A. O be a bile le yona gore a kgone go iša dilo tša gagwe China, moo a bego a nyaka go hlankela gona e le moromiwa. Lega go le bjalo, ge mmagwe a be a e-hwa, o ile a swanelwa ke go lebala ka dithulaganyo tša gagwe gomme a dule gae e le gore a hlokomele baratho ba gagwe. Ka 1907 o ile a nyalana le Theodore Holien. Ke belegwe ka December 2, 1925—ngwana wa mafelelo go ba šupa.

Mma o be a e-na le dipotšišo tša Beibele tšeo a bego a nyaka dikarabo tša tšona. Potšišo e nngwe e be e le mabapi le thuto ya gore dihele ke lefelo leo go fišwago batho ba babe. O ile a botšiša mohlokomedi yo a bego a ba etetše wa Kereke ya Luthere moo a ka hwetšago thekgo e tšwago ka Beibeleng ya thuto ye. Ge e le gabotse, o ile a mmotša gore ga go na taba gore Beibele e reng—tlhokofatšo ya dihele tše di fišago e swanetšwe go rutwa.

Kganyogo ya Gagwe ya Moya e a Kgotsofatšwa

Kapejana ka morago ga 1900, mmane e lego Emma o ile a ya Northfield, Minnesota go ya go ithutela mmino. O be a dula legaeng la morutiši wa gagwe Milius Christianson yo mosadi wa gagwe e bego e le Morutwana wa Beibele bjalo ka ge Dihlatse tša Jehofa di be di tsebja bjalo. Emma o ile a bolela gore o na le ngwanabo yo e lego mmadi yo mafolofolo wa Beibele. Ka moragonyana, mohumagadi Christianson o ile a ngwalela mma lengwalo la dikarabo tša dipotšišo tša gagwe tša Beibele.

Ka letšatši le lengwe, Morutwana wa Beibele yo a bitšwago Lora Oathout o ile a tla ka setimela go tšwa kua Sioux Falls, South Dakota go tlo dira boboledi Jasper. Mma o ile a ithuta dikgatišo tša Beibele tšeo a di amogetšego gomme ka 1915 o ile a thoma go boledišana le bangwe ka ditherešo tša Beibele, a sepediša dikgatišo tšeo Lora a mo neilego tšona.

Ka 1916, mma o ile a kwa gore Charles Taze Russell o tla ba gona kopanong ya selete kua Sioux City, Iowa. O be a nyaka go ba gona. Ka nako yeo, mma o be a šetše a e-na le bana ba bahlano gomme Marvin yo monyenyane o be a e-na le dikgwedi tše hlano feela. Lega go le bjalo, o ile a tšea leeto ka setimela la dikhilomithara tše 160 go ya kopanong ya Sioux City a e-na le bana ka moka. O ile a kwa dipolelo tša Ngwanabo rena Russell, a bona “Photo-Drama of Creation” gomme a kolobetšwa. Ge a boa gae, o ile a ngwala sehlogo seo se bego se bolela ka kopano seo se ilego sa gatišwa ka go Jasper Journal.

Ka 1922, mma o be a le gare ga ba ka bago 18 000 bao ba bilego gona kopanong ya selete kua Cedar Point, Ohio. Ka morago ga kopano yeo, ga se a ka a kgaotša go tsebatša ka Mmušo wa Modimo. Ge e le gabotse, o be a re kgothaletša go kwa  keletšo e rego: “Tsela šé! Tšeang ka yôna!”—Jes. 30:21.

Dienywa tša Bodiredi bja Mmušo

Mathomong a bo-1920, batswadi ba-ka ba ile ba hudugela ntlong yeo e lego ka ntle ga motse wa Jasper. Tate o be a e-na le kgwebo ye e atlegago le lapa le legolo leo a swanetšego go le hlokomela. O be a sa ithute Beibele go etša ge mma a be a dira, eupša o be a thekga mošomo wa boboledi ka pelo ya gagwe ka moka gomme o be a amogela balebeledi ba basepedi ka gae. Gantši ge yo mongwe wa bana babo rena ba basepedi a nea polelo ka gae, go be go e-tla batho ba lekgolo goba go feta moo—ba tlala ka phapošing ya bodulo, ya go jela le ka dikamoreng.

Ge ke be ke e-na le mo e ka bago nywaga e šupa, mmane Lettie o ile a re leletša mogala gomme a bolela gore baagišani ba gagwe, Ed Larson le mosadi wa gagwe ba nyaka go ithuta Beibele. Ka lethabo ba ile ba amogela therešo ya Beibele gomme ka morago ba laletša moagišani wa bona, Martha Van Daalen, mmago bana ba seswai go ba tlatša thutong. Martha le lapa la gagwe ka moka ba ile ba ba Barutwana ba Beibele. *

Mo e ka bago ka nako yeo, lesogana le le bitšwago Gordon Kammerud leo le bego le dula dikhilomithara tše mmalwa go tloga ga gešo, le ile la thoma go šoma le tate. Gordon o ile a lemošwa gore: “Hlokomela barwedi ba mothwadi wa gago. Ba na le bodumedi bjo bo sa tlwaelegago.” Lega go le bjalo, Gordon o ile a thoma go ithuta Beibele gomme kapejana o be a kgodišegile gore o hweditše therešo. Ka morago ga dikgwedi tše tharo, o ile a kolobetšwa. Batswadi ba gagwe le bona ba ile ba fetoga badumedi gomme ba lapa lešo—ba ga-Holien, ba ga-Kammerud le ba ga-Van Daalen—ba ile ba ba bagwera ba go ntšhana sa inong.

Go Matlafatšwa ke Dikopano tša Selete

Mma o ile a kgothatšwa kudu ke kopano ya selete ya kua Cedar Point moo e lego gore ga se a ka a nyaka go fetwa ke kopano e nngwe ya selete. Ka gona dilo tša mathomo-thomo tšeo ke bego ke di gopola e be e le go sepela maeto a matelele bakeng sa go ba gona dipokanong tše bjalo. Ya kua Columbus, Ohio, ka 1931 e be e le bohlokwa kudu ka gobane ke moo leina la Dihlatse tša Jehofa le ilego la amogelwa gona. (Jes. 43:10-12) Gape ke gopola kopano ya selete ya kua Washington, D.C., ka 1935, moo polelo e tumilego e ilego ya kgetholla “lešaba le legolo,” leo go bolelwago ka lona go Kutollo. (Kut. 7:9) Dikgaetšedi tša-ka e lego Lilian le Eunice ba be ba le gare ga batho ba 800 bao ba ilego ba kolobetšwa moo.

Lapa lešo le ile la ya dikopanong tša selete tša Columbus, Ohio, ka 1937; Seattle, Washington, ka 1938; le New York City ka 1939. Malapa a ga-Van Daalen le Kammerud le ba bangwe ba ile ba sepela le rena gomme re be re tšama re hloma mešašana mo tseleng. Eunice o ile a nyalana le Leo Van Daalen ka 1940 gomme ba ile ba ba babulamadibogo. Ka wona ngwaga woo, Lilian o ile a nyalana le Gordon Kammerud gomme le bona ba ile ba ba babulamadibogo.

 Kopano ya selete ya 1941 yeo e bego e swaretšwe kua St. Louis, Missouri, e be e le e kgethegilego. Gona moo, bafsa ba dikete ba ile ba hwetša puku ya Children. Kopano yeo e ile ya dira gore ke dire diphetogo. Nakwana ka morago ga moo, ka September 1, 1941, nna le Joyce re ile ra tšea bobulamadibogo gotee le kgaetšedi ya-ka Marvin le mosadi wa gagwe. Ke be ke e-na le nywaga e 15.

Tikologong ya rena yeo go yona re iphedišago ka tša temo, go be go le thata gore bana babo rena ka moka ba ye dikopanong tša selete ka ge gantši di be di swarwa nakong ya puno. Ka gona, ka morago ga dikopano re be re dira dipoeletšo re le ka mafuri bakeng sa go hola bao ba sa kago ba kgona go ba gona. Tše e be e le dipokano tše di thabišago.

Dikabelo tša go ya Gilead le Dinageng-dišele

Ka February 1943, Sekolo sa Gilead se ile sa hlongwa ka morero wa go tlwaetša babulamadibogo bakeng sa tirelo ya boromiwa. Sehlopha sa mathomo se be se akaretša ditho tše tshela tša lapa la ga Van Daalen—barwarre Emil, Arthur, Homer le Leo; motswala wa bona e lego Donald; le mosadi wa Leo, ngwanešo Eunice. Re ile ra laelana le bona re thabile e bile re e-kwa bohloko, ka ge re be re sa tsebe gore re tla ba bona neng gape. Ka morago ga go aloga, ka moka ga bona ba le tshela ba ile ba abelwa Puerto Rico, moo go bego go e-na le Dihlatse tše sego kae ka nako yeo.

Ka morago ga ngwaga, Lilian le Gordon gotee le Marvin le Joyce ba bile barutwana sehlopheng sa boraro sa Gilead. Le bona ba ile ba romelwa Puerto Rico. Ke moka, ka September 1944, ke e-na le nywaga e 18, ke ile ka ba morutwana sehlopheng sa bone sa Gilead. Ka morago ga go aloga ka February 1945, ke ile ka tlatša bo-mogol’a-ka kua Puerto Rico. A phihlelo e kgahlišago gakaakang yeo ke bilego le yona! Gaešita le ge go ithuta Sepaniši e be e le tlhohlo, go se go ye kae go ba bangwe ba rena motho o tee o be a swara dithuto tša Beibele tše di fetago 20. Jehofa o ile a šegofatša modiro wo. Lehono, go na le Dihlatse tše ka bago 25 000 kua Puerto Rico!

Lapa Lešo le Welwa ke Manyami

Leo le Eunice ba ile ba tšwela pele ba dula Puerto Rico ka morago ga go belegwa ga morwa wa bona e lego Mark, ka 1950. Ka 1952 ba ile ba rulaganya go tšea nako ya maikhutšo gore ba etele ba leloko gae. Ka April 11, ba ile ba tloga ka sefofane. Ka manyami, sefofane se ile sa wela ka lewatleng ge se be se sa tšwa go tloga. Leo le Eunice ba ile ba hwa. Mark wa nywaga e mebedi o ile a hwetšwa a phaphametše lewatleng. Mophologi yo mongwe o ile a mo gogela sekepeng seo se phološago maphelo gomme a newa sethuša-go-hema—ke moka o ile a phela. *

Nywaga e mehlano ka morago, ka March 7, 1957, tate le mma ba be ba sepela ka koloi ba e-ya Holong ya Mmušo gomme leotwana la koloi le ile la fela moya. Ge tate a be a sa dutše a fetoša leotwana ka thoko ga tsela, o ile a thulwa ke koloi yeo e bego e feta gomme o ile a hwa le semeetseng. Batho ba ka bago 600 ba ile ba ba gona polelong ya poloko gomme go ile gwa newa bohlatse bjo bobotse setšhabeng, moo tate a bego a hlompšha kudu.

Dikabelo tše Difsa

Pejana ga lehu la tate, ke be ke ile ka hwetša kabelo ya go hlankela kua Argentina. Ka August 1957, ke ile ka fihla motseng wa Mendoza thitong ya Dithaba tša Andes. Ka 1958, George Pappas, sealoga sa sehlopha sa bo-30 sa Gilead o ile a abelwa go ya Argentina. Nna le George re ile ra ba bagwera ba paale gomme re ile ra nyalana ka April 1960. Ka 1961, mma o ile a hwa a e-na le nywaga e 83. O  be a ile a sepela ka go botega tseleng ya borapedi bja therešo gomme o be a thušitše ba bantši, ba bantši kudu gore le bona ba dire se se swanago.

Nna le George re hlanketše gotee le baromiwa ba bangwe magaeng a fapa-fapanego ka nywaga e lesome. Ke moka re ile ra fetša nywaga e šupa re le modirong wa tikologo. Ka 1975 re ile ra boela United States gore re ye go thuša ditho tša lapa tšeo di bego di babja. Ka 1980 monna wa-ka o ile a laletšwa gore a dire modiro wa tikologo tšhemong yeo go yona go bolelwago Sepaniši. Ka nako yeo go be go e-na le diphuthego tše 600 tša Sepaniši kua United States. Re etetše bontši bja tšona ka nywaga e 26 gomme ra bona diphuthego tše dintši di oketšega go fihlela di e ba ka godimo ga tše 3 000.

Ba Ile ba Sepela ka “Tsela”

Mma le yena o ile a thabela go bona ditho tše difsa tša lapa labo di tsenela bodiredi bja nako e tletšego. Ka mohlala, Carol e lego morwedi wa mogol’a-ka, Ester, o ile a thoma go bula madibogo ka 1953. O ile a nyalana le Dennis Trumbore gomme ba ile ba tšea karolo bodireding bja nako e tletšego ga e sa le go tloga ka nako yeo. Morwedi yo mongwe wa Ester e lego Lois, o ile a nyalana le Wendell Jensen. Ba bile barutwana sehlopheng sa bo-41 sa Gilead gomme ba hlanketše ka nywaga e 15 e le baromiwa kua Nigeria. Mark, yoo batswadi ba gagwe ba hwilego kotsing ya sefofane, o ile a thwalwa le go godišwa ke kgaetšedi ya Leo e lego Ruth La Londe le monna wa gagwe, Curtiss. Mark le mosadi wa gagwe, Lavonne, ba bile babulamadibogo ka nywaga e mentši gomme ba godišetša bana ba bona ba bane ‘tseleng.’—Jes. 30:21.

Orlen, mogol’a-ka o tee feela yo a sa dutšego a phela, o magareng ga nywaga ya bo-90. O sa dutše a hlankela Jehofa ka potego. Nna le George re sa dutše re hlankela ka lethabo tirelong ya nako e tletšego.

Seo Mma a se Tlogetšego

Ga bjale ke na le e nngwe ya dilo tšeo mma a bego a di tšeela godimo kudu—teseke ya gagwe. Tate o be a mo neile yona e le mpho ya lenyalo. Go e nngwe ya dilaiki go na le puku ya kgale, yeo e nago le mangwalo gotee le dihlogo tše di gatišitšwego tša kuranta tšeo a di ngwadilego le tšeo di ilego tša nea bohlatse bjo bobotse ka Mmušo. Tše dingwe ke tša kgale kua ka bo-1900. Teseke ye gape e na le mangwalo a bohlokwa ao a tšwago go bana ba mma bao e lego baromiwa. Ke tloga ke thabela go a bala leboelela! Le gona mangwalo a gagwe a be a dula a re kgothatša, ka ge a be a tletše ka dikgopolo tše di nepagetšego. Mma ga se a ka a kgotsofatša kganyogo ya gagwe ya go ba moromiwa. Lega go le bjalo, o be a e-na le mafolofolo a tirelo ya boromiwa ao a ilego a tutuetša dipelo tša ba bangwe melokong ya ka morago ga wa gagwe. Ruri ke fagahletše nakong ya ge lapa le legolo le tla ba le kopana gape le tate le mma lefaseng la paradeise!—Kut. 21:3, 4.

[Mengwalo ya tlase]

[Seswantšho go letlakala 17]

Emilia Pederson

[Seswantšho go letlakala 18]

1916: Mma, Tate (o kukile Marvin); tlase go tloga ka go le letshadi go ya ka go le letona: Orlen, Ester, Lilian, Mildred

[Seswantšho go letlakala 19]

Leo le Eunice, nakwana pele ga ge ba ka hwa

[Seswantšho go letlakala 20]

1950: Go tloga ka go le letshadi go ya ka go le letona, godimo: Ester, Mildred, Lilian, Eunice, Ruth; tlase: Orlen, mma, tate le Marvin

[Seswantšho go letlakala 20]

George le Ruth Pappas modirong wa tikologo, 2001