Na o Swanetše go Gapeletša go Dira Dilo ka Tsela ya Gago?
Na o Swanetše go Gapeletša go Dira Dilo ka Tsela ya Gago?
BANA ba babedi ba bapala gotee. Ngwana yo mongwe o amoga yo mongwe sebapadišwa sa gagwe seo a se ratago kudu gomme o goeletša ka gore, “Ke sa-ka!” Batho ba sa phethagalago ba bonagatša boithati ka tekanyo e itšego go tloga bjaneng. (Gen. 8:21; Baroma 3:23) Go oketša moo, lefase ka kakaretšo le bonagatša moya wa nna-pele. Ge e ba re nyaka go o phema moya wo, re swanetše go lwantšha ka thata ditshekamelo tša boithati. Ge re ka se dire bjalo, re ka kgopiša ba bangwe gabonolo gomme ra fokodiša tswalano ya rena le Jehofa.—Baroma 7:21-23.
Ge moapostola Paulo a re kgothaletša go ela hloko kamoo ditiro tša rena di ka kgomago ba bangwe ka gona, o ile a ngwala gore: “Dilo ka moka di dumeletšwe ke molao; eupša ga se dilo ka moka tšeo di holago. Dilo ka moka di dumeletšwe ke molao; eupša ga se dilo ka moka tšeo di agago.” Paulo o ile a ba a bolela gore: “Phemang go ba ba kgopišago.” (1 Bakor. 10:23, 32) Ka gona, ditabeng tše dingwe tšeo di akaretšago dilo tšeo re di ratago, ke gabohlale go ipotšiša gore: ‘Na ke ikemišeditše go phema go dira dilo ka tsela ya-ka ge e ba di bea khutšo ya phuthego kotsing? Na ke ikemišeditše go latela melao ya motheo ya Beibele, gaešita le ge go dira bjalo go le thata?’
Ge go Kgethwa Mošomo
Batho ba bantši ba nagana gore kgetho ya bona ya mošomo ke phetho ya bona e bile ga e 2 Bakor. 7:1) Ge a be a bontšha kganyogo ya go bolela phatlalatša le phuthego, mogolo yo mongwe ka bohlale o ile a mo kgothaletša go nagana ka mohuta wa mošomo wa gagwe wa boiphedišo. Monna yo o be a e-na le nako e telele e le morekiši yo mogolo wa thothotho—e lego setšweletšwa seo se dirišetšwago merero e mentši eupša lefelong leo se bego se tswakanywa le dino-tšididi gomme sa nwewa ka morero wa gore go tagwe.
kgome ba bangwe gakaalo—ge e ba e ba kgoma. Eupša ela hloko phihlelo ya rakgwebo yo mongwe wa toropong e nyenyane ya Amerika Borwa. O be a tsebja ka go petšha le ka botagwa. Lega go le bjalo, ka ge a ithutile Beibele le Dihlatse tša Jehofa, o ile a dira tšwelopele ya moya gomme a fetoša tsela ya gagwe ya bophelo. (Monna yo o ile a lemoga gore ge a ka bolela phatlalatša eupša a sa dutše a rekiša thothotho yeo, se se be se tla senya botumo bja phuthego gotee le tswalano ya gagwe le Modimo. Gaešita le ge a be a e-na le lapa le legolo leo a bego a swanetše go le fepa, o ile a tlogela go rekiša tagi. Gona bjale o fepa lapa la gagwe ka go rekiša ditšweletšwa tša pampiri. Monna yo, mosadi wa gagwe gotee le ba babedi ba bana ba gagwe ba bahlano ba kolobeditšwe. Ba bolela ditaba tše dibotse ka mafolofolo le ka tokologo ya polelo.
Ge go Kgethwa Bagwera
Na go gwerana le ba sa dumelego e fo ba taba ya motho ka noši, goba na go akaretša melao ya motheo ya Beibele? Kgaetšedi yo mongwe o be a nyaka go ya moletlong le lesogana leo e bego e se Mokriste. Gaešita le ge a ile a lemošwa ka dikotsi tša go dira bjalo, o ile a bona a e-na le tshwanelo ya go dira bjalo gomme o ile a ya moo moletlong. O itše a sa tšwa go fihla, a newa sa go nwa seo se nago le sehlare-tagi se matla. O ile a tsoga ka morago ga diiri tše mmalwa gomme a hwetša gore o be a katilwe ke motho yoo a bego a re ke mogwera.—Bapiša le Genesi 34:2.
Gaešita le ge go gwerana le ba sa dumelego go ka se feleletše ka masetlapelo a bjalo ka mehla, Beibele e nea temošo e rego: “Šika le bahlale O hlalefê; mokxônana-le-mašilo ó tlo thsereana.” (Die. 13:20) Kantle le pelaelo—go kgetha bagwera ba babe go re bea kotsing! Diema 22:3 e re: “Mohlale ó bôna dikotsi dì s’e-tla, a khuta; ba mašilô ba a feta, ba y’o hlaka.” Bagwera ba rena ba ka re kgoma gotee le go kgoma tswalano ya rena le Modimo.—1 Bakor. 15:33; Jak. 4:4.
Moaparong le go Itokišeng
Mekgwa ya go apara le difešene di dula di fetoga. Lega go le bjalo, melao ya motheo ya Beibele ya mabapi le go apara le go itokiša ga e fetoge. Paulo o ile a kgothaletša basadi ba Bakriste gore ba “ikgabiše ka moaparo o rulagantšwego gabotse, ka go se solege le ka go hlaphogelwa ga monagano”—e lego molao wa motheo woo o šomago ka mo go swanago le go banna. (1 Tim. 2:9) Paulo o be a sa re gore go aparwe ka tsela e sa kgahlišego, goba gore Bakriste ka moka ba apare ka tsela e swanago. Eupša go thwe’ng ka go se solege goba boipoetšo? Pukuntšu e nngwe e hlalosa boipoetšo e le “go hloka boikgodišo goba boikgantšho . . . go apara, go bolela goba go itshwara ka tsela e swanetšego.”
Re swanetše go ipotšiša gore: ‘Na ke ba ke bolela therešo ge ke re ke na le boipoetšo ge e ba ke gapeletša go apara ka tsela yeo e kgahlago nna yeo e dirago gore batho ba lebiše tlhokomelo e sa nyakegego go nna? Na tsela yeo ke aparago ka yona e dira gore batho ba makale gore ke motho wa mohuta mang goba ba belaele boitshwaro bja-ka?’ Re ka phema go ‘nea lebaka la go kgopša’ tabeng ye ka go ‘bea leihlo, e sego ka kgahlego ya motho ka noši ditabeng tša rena feela, eupša le ka kgahlego ya motho ka noši go tša ba bangwe.’—2 Bakor. 6:3; Bafil. 2:4.
Go tša Kgwebo
Ge go be go tsoga dikgang tše dikgolo tšeo di tswalanago le ditirišano tše fošagetšego goba tša boradia ka phuthegong ya Korinthe, Paulo o ile a ngwala gore: “Ke ka baka la’ng le sa upše la dumela go fošetšwa? Ke ka baka la’ng le sa upše la dumela go radiwa?” Paulo o kgothaleditše Bakriste gore ba ikemišetše go gafa selo se itšego go e na le gore ba iše ngwanabo bona kgorong ya tsheko. (1 Bakor. 6:1-7) Ngwanabo rena yo mongwe kua United States o ile a diriša keletšo ye. O ile a fapana le mothwadi wa gagwe yo e lego Mokriste mabapi le tšhelete yeo a bego a swanetše go mo godiša yona. Ka go latela tlhahlo ya Mangwalo, bana babo rena ba ba babedi ba ile ba kopana gantši eupša ba se hwetše tharollo. Mafelelong, ba ile ba iša taba yeo ‘phuthegong,’ ka ge e emelwa ke bagolo ba Bakriste.—Mat. 18:15-17.
Ka manyami, bothata bjoo ga se bja ka bja rarollwa. Ka morago ga thapelo e tseneletšego, mothwalwa o ile a dira phetho ya gore a lahlegelwe ke tšhelete yeo a bego a re o a e kolotwa. Ka baka la’ng? O ile a bolela ka morago gore, “Phapano ye e be e nkamoga lethabo e bile e tšea nako ya-ka e ntši e bohlokwa yeo ke bego nka e diriša medirong ya moya.” Ka morago ga go dira phetho yeo, ngwanabo rena o ile a kwa a boelwa ke lethabo e bile o ile a lemoga gore Jehofa o be a šegofatša tirelo ya gagwe.
Gaešita le Dilong tše Dinyenyane
Go se gapeletše gore dilo di dirwe ka tsela ya rena gape go tliša ditšhegofatšo le dilong tše dinyenyane. Letšatšing la mathomo la kopano ya selete, banyalani ba bangwe ba babulamadibogo ba ile ba fihla ka pela gomme ba ipolokela madulo. Ge lenaneo le thoma, lapa le lengwe leo le nago le bana ba mmalwa le ile la tsena ka go akgofa ka lepatlelong le legolo leo le tletšego batho. Ge ba lemoga gore lapa leo le be le nyaka madulo a lekanego, banyalani bao ba babulamadibogo ba ile ba le gafela madulo a bona. Se se ile sa dira gore lapa leo ka moka le kgone go dula gotee. Matšatši a mmalwa ka morago ga kopano, babulamadibogo bao ba ile ba amogela lengwalo la ditebogo leo le tšwago lapeng leo. Lengwalo leo le hlalosa kamoo lapa leo le bego le nyamile ka gona ka baka la go fihla kopanong ka morago ga nako. Maikwelo ao a ile a fetoga kapejana gomme lapa leo la thaba le go leboga ka baka la botho bja banyalani bao ba babulamadibogo.
Ge re e-na le sebaka, anke re ikemišetšeng go gafa dilo tšeo re di ratago bakeng sa go hola ba bangwe. Ka go bontšha lerato leo le ‘sa nyakego tša go ikhola,’ re dira gore phuthego e dule e e-na le khutšo gotee le go ba le khutšo le baagišani ba rena. (1 Bakor. 13:5) Eupša se bohlokwa go feta tšohle, re šireletša tswalano ya rena le Jehofa.
[Seswantšho go letlakala 20]
Na o ikemišeditše go se gapeletše kgetho ya gago tabeng ya moaparo?
[Seswantšho go letlakala 20, 21]
Na o ikemišeditše go gafela bana beno madulo a gago?