Dipotšišo tše Tšwago go Babadi

Na go na le kholofelo le ge e le efe ya gore lesea leo le hwelago ka popelong ya mmago lona le tla tsošwa?

Bao ba sa kago ba hwelwa ke lesea leo le sešogo la belegwa ba ka thatafalelwa ke go kwešiša maikwelo a bao ba diragaletšwego ke seo. Tahlegelo e bjalo e kweša batswadi ba bangwe bohloko kudu. Mma yo mongwe o ile a hwelwa ke bana ba bahlano pele ba belegwa. Ge nako e dutše e e-ya, o ile a ikwa a šegofaditšwe ka go godiša barwa ba babedi. Lega go le bjalo, o sa dutše a gopola ngwana yo mongwe le yo mongwe yo a hwilego. Bophelo bja gagwe ka moka, o be a tseba gore lesea le lengwe le le lengwe leo le hwilego le sešo la belegwa le ka be le e-na le nywaga e mekae ge nkabe le phela. Na Bakriste ba bjalo ba na le mabaka a go holofela gore bana ba bona ba tla tsošwa?

Karabo e bonolo ya potšišo ye ke gore ga re tsebe. Beibele le gatee ga e bolele ka taba ya go tsošwa ga masea ao a hwilego a sešo a belegwa. Lega go le bjalo, Lentšu la Modimo le na le melao ya motheo yeo e šomago tabeng ye le yeo e ka re homotšago.

Anke re ahla-ahleng dipotšišo tše pedi tšeo di sepedišanago le taba ye. Ya pele, go ya ka pono ya Jehofa, bophelo bja motho bo thoma neng—ge ngwana a ingwa goba ge a belegwa? Ya bobedi, Jehofa o lebelela masea ao a sešogo a belegwa bjang—e le batho ba ikemetšego goba e le feela mokgobo wa disele tšeo di lego ka popelong ya mosadi? Melao ya motheo ya Beibele e nea dikarabo tše di kwagalago dipotšišong tše ka bobedi.

Molao wa Moše o utollotše gabotse gore bophelo ga bo thome nakong ya ge lesea le belegwa, eupša bo thoma nako e telele pele ga moo. Bjang? O bontšhitše gore motho a ka ahlolelwa lehu ge e ba a bolaya lesea leo le lego ka popelong. Ela hloko molao wo: “Bophelô bo lefyê ka bophelô.” * (Ek. 21:22, 23) Ka gona, ngwana yo a sešogo a belegwa yo a lego ka popelong o a phela. Go kwešiša therešo ye go thušitše Bakriste ba dimilione go gana go ntšha mpa, ba go lebelela e le sebe se segolo kgahlanong le Modimo.

Ke therešo gore ngwana yo a sešogo a belegwa o a phela, eupša Jehofa o mo lebelela e le wa bohlokwa gakaaka’ng? Molao o boletšwego ka mo godimo o be o laela gore motho yo mogolo a bolawe ge e ba a bakile lehu la ngwana yo a sešogo a belegwa. Ka gona, go molaleng gore bophelo bja ngwana yo a sešogo a belegwa ke bja bohlokwa mahlong a Modimo. Go oketša moo, mangwalo a mantši ka Beibeleng a utolla gore Jehofa o lebelela bana bao ba sešogo ba belegwa e le batho ba ikemetšego. Ka mohlala, Kgoši Dafida o ile a budulelwa go bolela ka Jehofa gore: “Ke loxilwe ke Wene mmeleng wa mmê. . . . Mahlô a xaxo a mpone kè sešo ka bopêxa; pukung ya xaxo ké xe di šetše di ngwadilwe tšohle, matšatši à beilwe.”—Ps. 139:13-16; Jobo 31:14, 15.

Le gona, Jehofa o a bona gore bana bao ba sešogo ba belegwa ba na le dika tšeo di ba hlaolago le gore ba ka kgona go fihlelela dilo tše dikgolo nakong e tlago. Ge mosadi wa Isaka e lego Rebeka a be a imile mafahla, Jehofa o ile a porofeta mabapi le barwa ba ba babedi bao ba bego ba e-lwa ka popelong ya gagwe, e lego seo se šišinyago gore o ile a bona dika tša bona tšeo di bego di tla kgoma batho ba bantši nakong e tlago.—Gen. 25:22, 23; Baroma 9:10-13.

Taba e nngwe gape e kgahlišago ke ya Johane Mokolobetši. Pego ya Ebangedi e re: “Ge Elisabetha a e-kwa tumedišo ya Maria, lesea le lego popelong ya gagwe la tshela; gomme Elisabetha a tlala moya o mokgethwa.” (Luka 1:41) Ge a hlalosa tiragalo ye, ngaka Luka o dirišitše lentšu la Segerika leo le ka šupago ngwana yo a lego ka popelong goba ngwana ka morago ga ge a belegwe. O dirišitše lentšu le swanago ge a be a bolela ka Jesu wa lesea yo a bego a letše ka legopong.—Luka 2:12, 16; 18:15.

Ka kakaretšo, na Beibele e re nea mabaka a go  dira phapano magareng ga lesea leo le lego ka popelong le leo le sa tšwago go belegwa? Ga go bonale go le bjalo. Le gona, se se dumelelana le seo se utollotšwego ke thutamahlale ya lehono. Ka mohlala, banyakišiši ba hweditše gore lesea leo le lego ka popelong le kgona go lemoga dilo tšeo di diregago ka ntle ga popelo. Ka gona, ga go makatše ge mma yo a imilego a kgona go ba le tswalano ya kgaufsi le ngwana yo a golago ka gare ga gagwe.

Bana ba belegwa ka morago ga go fetša nako e sa lekanego ba gola ka popelong. Ela hloko mohlala wo: Mma yo mongwe o belega ngwana pele ga nako gomme ngwana yoo o hwa ka morago ga matšatši a sego kae. Yo mongwe yena o ima ngwana dikgwedi tše senyane ka moka, eupša ngwana yoo o hwa nakwana pele a ka belegwa. Na mma wa mathomo o na le kholofelo ya gore ngwana wa gagwe o tla tsošwa feela ka gobane a belegwe pele ga nako, mola mma wa bobedi yena a se na kholofelo e bjalo?

Ka gona e le go akaretša taba, Beibele e ruta ka mo go kwagalago gore bophelo bo thoma nakong ya ge ngwana a ingwa le gore Jehofa o lebelela ngwana yo a sešogo a belegwa e le motho yo bohlokwa yo a ikemetšego. Ka baka la ditherešo tše tša Mangwalo, ba bangwe ba ka bona e le go ikganetša go bolela gore ga go na kholofelo ya gore ngwana yo a hwilego a sešo a belegwa o tla tsošwa. Ka kgonthe, ba ka nagana gore go bolela bjalo go tsoša dipelaelo mabapi le boemo bja rena bja Mangwalo bja go gana go ntšha mpa bjo bo theilwego ditherešong tšona tšeo.

Nakong e fetilego, makasine wo o ile wa botšiša dipotšišo tša kgonthe tšeo go bonalago di tsoša pelaelo mabapi le kgonagalo ya gore ngwana yo a hwilego pele a belegwa o tla tsošwa. Ka mohlala, na Paradeiseng Modimo o tla bušetša leseana leo le sa thomago go gola ka popelong ya mosadi? Lega go le bjalo, go ithuta ka mo go oketšegilego le go naganišiša ka thapelo go lebišitše Sehlopha se Bušago phethong ya gore maemo a bjalo ga se a bohlokwa kholofelong ya tsogo. Jesu o itše: “Dilo tšohle di a kgonega go Modimo.” (Mar. 10:27) Phihlelo ya Jesu ka boyona e bontšhitše go nepa ga mantšu ao; bophelo bja gagwe bo ile bja fetišetšwa ka popelong ya kgarebe go tšwa legodimong—selo seo se sa kgonegego go ya ka pono ya batho.

Ka gona, na dilo tše ka moka di bolela gore Beibele e ruta gore bana bao ba hwago pele ba belegwa ba tla tsošwa? Re swanetše go gatelela gore Beibele ga e arabe potšišo ye ka go lebanya, ka gona ga go na mabaka a gore re bolele gore ka kgonthe ba tla tsošwa. Taba ye e ka tsoša dipotšišo tše fapa-fapanego tšeo di sa felego. Ka gona, go bonala e le mo gobotse gore re pheme ditaba tša boikgopolelo. Seo re se tsebago ke se: Taba ye e ka diatleng tša Jehofa Modimo yo a tletšego lešoko le kgaugelo. (Ps. 86:15) Ga go pelaelo gore o kganyoga go fediša lehu a diriša tsogo. (Jobo 14:14, 15) Re ka kgodišega gore ka mehla o dira se se nepagetšego. O tla fodiša mahloko a mantši ao re a baketšwego ke go phela tshepedišong ye e kgopo ya dilo ge ka lerato a laela Morwa wa gagwe go “fediša mediro ya Diabolo.”—1 Joh. 3:8.

[Mongwalo wa tlase]

[Seswantšho go letlakala 13]

Jehofa o tla re fodiša mahloko ka moka ao re bilego le ona