Banna, Ekišang Lerato la Kriste!

BOŠEGONG bja gagwe bja mafelelo a le mo lefaseng, Jesu o ile a botša baapostola ba gagwe gore: “Ke le nea taelo e mpsha ya gore le ratane; go etša ge ke le ratile, gore le lena le ratane. Bohle ba tla tseba ka se gore le barutiwa ba-ka, ge e ba le ratana.” (Joh. 13:34, 35) Ka kgonthe, Bakriste ba therešo ba swanetše go ratana.

Ge a bolela le banna ka go lebanya gare ga balatedi ba Kriste, moapostola Paulo o ngwadile gore: “Banna, tšwelang pele le rata basadi ba lena go etša ge Kriste le yena a ratile phuthego gomme a ikgafela yona.” (Baef. 5:25) Monna wa Mokriste a ka diriša keletšo ye ya Mangwalo bjang lenyalong la gagwe, kudu-kudu ge e ba mosadi wa gagwe e le mohlanka yo a ineetšego wa Jehofa?

Kriste o be a Rata Phuthego

Beibele e re: “Banna ba swanetše go rata basadi ba bona bjalo ka mebele ya bona. Yo a ratago mosadi wa gagwe o a ithata, gobane ga go na motho yo a kilego a hloya nama ya gagwe; eupša o a e fepa le go e babalela, go etša ge Kriste le yena a dira phuthego bjalo.” (Baef. 5:28, 29) Jesu o be a rata barutiwa ba gagwe. Gaešita le ge ba be ba sa phethagala, o be a ba swara ka tsela e bonolo le e botho. Ka ge a be a kganyoga go “[tšweletša] phuthego go yena e le letagong la yona,” o ile a lebiša tlhokomelo dikeng tša barutiwa ba gagwe tše dibotse.—Baef. 5:27.

Go etša ge Kriste a ile a bontšha phuthego lerato, monna le yena o swanetše go bontšha molekane wa gagwe lerato ka mantšu le ditiro. Mosadi yoo ka mehla monna wa gagwe a mmontšhago lerato o ikwa a ratwa e bile o a thaba. Ka lehlakoreng le lengwe, mosadi yo a phelago bophelo bja matsaka a ka nyama kudu ge e ba molekane wa gagwe wa lenyalo a mo hlokomologa.

Monna o bontšha bjang gore o rata mosadi wa gagwe? Ge ba le gare ga batho, o mo tsebiša batho ba bangwe ka tlhompho gomme o mo reta phatlalatša bakeng sa thekgo ya gagwe. Ge e ba mosadi wa gagwe a kgathile tema katlegong yeo lapa le bilego le yona, ga a dika-dike go tsebiša ba bangwe seo. Ge ba le noši, mosadi o a bona gore monna o a mo rata. Go mo kgwatha ka seatla, go myemyela le go mo reta go ka bonala e le dilo tše sa rego selo, eupša ke tša bohlokwa kudu go mosadi.

“Ga a Hlabje ke Dihlong go ba Bitša ‘Bana Bešo’”

Jesu Kriste o be a sa “hlabje ke dihlong go ba bitša [balatedi ba gagwe ba tloditšwego] ‘bana bešo.’” (Baheb. 2:11, 12, 17) Ge e ba o le monna wa Mokriste, gopola gore mosadi wa gago ke kgaetšedi ya gago moyeng. Boineelo bja gagwe go Jehofa bo tla pele ga keno ya gagwe ya lenyalo, go sa šetšwe gore o kolobeditšwe ka morago ga ge le nyalane goba pele ga moo. Ge ngwanabo rena yo a swerego seboka sa phuthego a šupa mosadi wa gago gore a nee tlhaloso dibokeng, o mmitša ka mo go swanetšego gore ke “Kgaetšedi.” Le wena ke kgaetšedi ya gago, e sego feela ge le le Holong ya Mmušo eupša le ge le le ka gae. Ke gabohlokwa gore o mo sware ka botho ge le le ka gae go etša ge go le bohlokwa gore o dire bjalo ge le le Holong ya Mmušo.

Ge e ba o e-na le ditokelo tše oketšegilego tša tirelo ka phuthegong, ka dinako tše dingwe o ka hwetša go le thata gore o phethe boikarabelo bja phuthego le bja ka lapeng gabotse. Tirišano e botse magareng ga bagolo le bahlanka ba bodiredi gotee le go tlwaetša ba bangwe gore ba kgone go phetha boikarabelo bjo bongwe ka phuthegong, di ka go thuša gore o be le nako  yeo o ka e fetšago le kgaetšedi yo a go hlokago kudu go feta batho ba bangwe ka moka—mosadi wa gago. Gopola gore go na le bana babo rena ba bangwe bao ka ntle le pelaelo ba ka kgonago go phetha boikarabelo bja phuthego bjoo o bo neilwego, eupša ke wena feela yo a ikarabelago ka go hlokomela mosadi wa gago.

Go tlaleletša moo, o hlogo ya mosadi wa gago. Beibele e re: “Hlogo ya monna yo mongwe le yo mongwe ke Kriste; hlogo ya mosadi yona ke monna.” (1 Bakor. 11:3) O swanetše go diriša bohlogo bjo bjang? Ka lerato, e sego ka go boa-boeletša temana e boletšwego ka mo godimo gomme o nyake gore mosadi wa gago a go hlomphe. Sephiri sa go diriša bohlogo bja gago gabotse ke gore o ekiše Jesu Kriste tseleng yeo o swarago mosadi wa gago ka yona.—1 Pet. 2:21.

“Le Bagwera Ba-Ka”

Jesu o be a bitša barutiwa ba gagwe gore ke bagwera ba gagwe. O ba boditše gore: “Ga ke sa le bitša bahlanka gobane mohlanka ga a tsebe seo mong wa gagwe a se dirago. Eupša ke le biditše bagwera gobane dilo ka moka tšeo ke di kwelego go Tate ke le tsebišitše tšona.” (Joh. 15:14, 15) Jesu le barutiwa ba gagwe ba be ba boledišana gabotse. Le gona, ba be ba dira dilo gotee. “Jesu le barutiwa ba gagwe” ba be ba laleditšwe monyanyeng wa lenyalo kua Kana. (Joh. 2:2) Ba be ba e-na le mafelo ao ba a ratago, bjalo ka serapa sa Getsemane. Beibele e re “Jesu o be a ile a gahlana gantši le barutiwa ba gagwe moo.”—Joh. 18:2.

Ka kgonthe, mosadi o nyaka go ikwa gore ke mogwera wa paale wa monna wa gagwe. Ruri ke gabohlokwa gore lena banna le basadi le thabele bophelo gotee! Hlankelang Modimo gotee. Thabelang go ithuta Beibele gotee. Fetšang nako le le gotee—le sepela, le bolela gaešita le go ja gotee. E-bang bagwera ba paale; e sego feela batho bao ba nyalanego.

O “ba Ratile go Fihla Bofelong”

Jesu o ‘ratile barutiwa ba gagwe go fihla bofelong.’ (Joh. 13:1) Banna ba bangwe ba palelwa ke go ekiša Kriste tabeng ye. Ba ka ba ba lahla ‘basadi ba mola e sa le bafsa,’ mohlomongwe e le gore ba nyale basadi ba bangwe ba banyenyane go basadi ba bona.—Mal. 2:14, 15.

Ba bangwe, ba swanago le Willi, ba ekiša Kriste. Ka baka la go fokolelwa ke bophelo, mosadi wa Willi o be a nyaka tlhokomelo e sa kgaotšego ka nywaga e mentši. Willi o be a ikwa bjang ka se? O itše: “Ka mehla ke be ke lebelela mosadi wa-ka e le mpho e tšwago go Modimo gomme ke mo swara bjalo ka yona. Ka ntle le moo, nywageng e 60 e fetilego ke mo holofeditše gore ke tla mo hlokomela dinakong tše thabišago le tše bohloko. Nka se tsoge ke lebetše kholofetšo yeo.”

Banna ba Bakriste, ekišang lerato la Kriste. Ratang basadi ba lena bao ba boifago Modimo—dikgaetšedi tša lena le bagwera ba lena.

[Seswantšho go letlakala 20]

Na mosadi wa gago ke mogwera wa gago wa paale?

[Seswantšho go letlakala 20]

‘Tšwela pele o rata mosadi wa gago’