Barongwa​—“Meoya ya go Direla Setšhaba”

“Na ka moka ga bona ga se meoya ya go direla setšhaba, yeo e romelwago go direla bao ba tlago go rua phologo e le bohwa?”—BAHEB. 1:14.

1. Ke kgothatšo efe yeo re e hwetšago go Mateo 18:10 le Baheberu 1:14?

JESU KRISTE o lemošitše batho le ge e le bafe bao ba kgopišago balatedi ba gagwe gore: “Bonang gore le se ke la nyatša yo mongwe wa ba banyenyane ba; gobane ke le botša gore barongwa ba bona legodimong ka mehla ba bona sefahlego sa Tate yo a lego legodimong.” (Mat. 18:10) Ge a bolela ka barongwa ba lokilego, moapostola Paulo o ngwadile gore: “Na ka moka ga bona ga se meoya ya go direla setšhaba, yeo e romelwago go direla bao ba tlago go rua phologo e le bohwa?” (Baheb. 1:14) Mantšu ao ke kgonthišetšo e homotšago ya gore Modimo o diriša dibopiwa tšeo tša legodimong go thuša batho. Ke’ng seo Beibele e re botšago sona ka barongwa? Ba re thuša bjang? Re ka ithuta’ng mohlaleng wa bona?

2, 3. Boikarabelo bjo bongwe bja dibopiwa tša moya tša legodimong ke bofe?

² Go na le barongwa ba botegago ba dimilione legodimong. Ka moka ga bona ke “baxale ba matla ba xo dira ka Lentšu la xaxwe.” (Ps. 103:20; bala Kutollo 5:11.) Barwa ba ba Modimo ba moya ba na le dimelo, dika tše swanago le tša Modimo le tokologo ya boikgethelo. Ba rulagantšwe ka bokgwari e bile ba na le maemo a phagamego thulaganyong ya Modimo gomme morongwa yo mogolo ke Mikaele (leina leo Jesu a bitšwago ka lona legodimong). (Dan. 10:13; Juda 9) ‘Leitšibulo le la tlholo yohle’ ke “Lentšu” goba Mmoleledi wa Modimo gomme o ile a dirišwa ke Jehofa ge a be a bopa dilo tše dingwe ka moka.—Bakol. 1:15-17; Joh. 1:1-3.

³ Ka tlase ga morongwa yo mogolo ke barongwa-batuki bao ba phatlalatšago bokgethwa bja Jehofa gotee le go thuša batho ba gagwe gore ba dule ba hlwekile moyeng. Le gona, go na le bakerubi bao ba hlankelago e le bathekgi ba bogoši bja gagwe. (Gen. 3:24; Jes. 6:1-3, 6, 7) Barongwa ba bangwe ba na le mediro e fapa-fapanego yeo ba e dirago ge ba phetha thato ya Modimo.—Baheb. 12:22, 23.

4. Barongwa ba ile ba arabela bjang ge lefase le be le bopša, gona batho ba ka ba ba ile ba ba le mafelelo afe ge nkabe ba diriše tokologo ya bona ya boikgethelo gabotse?

⁴ Barongwa ka moka ba be ba thabile ge ‘lefase le be le thewa’ gomme ba ile ba tšea karolo ka  lethabo medirong yeo ba e abetšwego ge lefase le be le fetoga legae la batho. (Jobo 38:4, 7) Jehofa ile a bopa motho gore ‘a be ka tlase ga barongwa go se nene,’ eupša a ‘swana’ le Yena, ka go rialo a nea batho bokgoni bja go bonagatša dika tša Gagwe tše phagamego. (Baheb. 2:7; Gen. 1:26) Ge nkabe ba ile ba diriša tokologo ya bona ya boikgethelo gabotse, Adama le Efa gotee le ditlogolwana tša bona ba ka be ba ile ba thabela bophelo paradeiseng e le karolo ya lapa la Jehofa la legohle la dibopiwa tše bohlale.

5, 6. Ke borabele bofe bjo bo ilego bja tsoga legodimong, gona Modimo o ile a arabela bjang?

⁵ Go molaleng gore barongwa ba bakgethwa ba swanetše go ba ba ile ba tšhoga ge ba bona borabele bo thoma ka lapeng la Modimo. Morongwa yo mongwe gare ga bona o be a se sa kgotsofalela go tumiša Jehofa, eupša o be a kganyoga go rapelwa. O ile a iphetoša Sathane (yeo e bolelago “Moganetši”) ka go belaela go swanelega ga Jehofa gore a buše le ka go leka go thea mmušo o lwantšhanago le wa Modimo. Ka maaka a pele ao a a boletšego, Sathane ka boradia o ile a tutuetša batho ba pele ba babedi gore ba rabele kgahlanong le Mmopi wa bona yo a nago le lerato.—Gen. 3:4, 5; Joh. 8:44.

⁶ Jehofa o ile a ahlola Sathane ka pela ka go bolela boporofeteng bja mathomo ka Beibeleng gore: “Ke bea lehlôyô xare xa xaxo le mosadi, le xare xa peu ya xaxo le peu ya xaxwe. Yôna e tlo Xo phšatla hlôxô; ’me wêna O tlo e loma serêthê.” (Gen. 3:15) Lehloyo le ile la tšwela pele magareng ga Sathane le “mosadi” wa Modimo. Ee, Jehofa o be a lebelela karolo ya legodimong ya mokgatlo wa dibopiwa tša moya tše botegago e le mosadi wa gagwe yo a rategago yo a bego a tlemagantšwe le yena. Boporofeta bjo bo ile ba thea motheo wa kholofelo, gaešita le ge ditaba ka botlalo di ile tša dula e le “sephiri se sekgethwa” seo se bego se tla utollwa ganyenyane-ganyenyane. Modimo o be a rerile gore yo mongwe karolong ya legodimong ya mokgatlo wa gagwe o be a tla pšhatla marabele ka moka le gore ka yena “dilo tše di lego magodimong le dilo tše di lego lefaseng” di be di tla kgoboketšwa.—Baef. 1:8-10.

7. Barongwa ba bangwe ba ile ba dira’ng mehleng ya Noa gomme ba bile le mafelelo afe?

⁷ Mehleng ya Noa, barongwa ba mmalwa ba ile ba tlogela “bodulo bja bona bjo bo swanetšego” gomme ba iphetoša batho e le gore ba tle ba phegelele dikganyogo tša boithati mo lefaseng. (Juda 6; Gen. 6:1-4) Jehofa o ile a lahlela marabele ao lefsifsing leso-leso gomme ka go rialo ba tlatša Sathane go beng “madira a kgopo a moya” le manaba a sehlogo a bahlanka ba Modimo.—Baef. 6:11-13; 2 Pet. 2:4.

Barongwa ba re Thuša Bjang?

8, 9. Jehofa o ile a diriša barongwa bjang go thuša batho?

⁸ Aborahama, Jakobo, Moše, Jošua, Jesaya, Daniele, Jesu, Petro, Johane le Paulo ba gare ga bao ba ilego ba hlankelwa ke barongwa. Barongwa ba lokilego ba ile ba phethagatša dikahlolo tša Modimo gomme ba fetišetša boporofeta le tlhahlo go akaretša le Molao wa Moše bathong. (2 Dikx. 19:35; Dan. 10:5, 11, 14; Dit. 7:53; Kut. 1:1) Ka ge ga bjale re e-na le le Lentšu le feletšego la Modimo, go ka no se nyakege gore barongwa ba fetiše melaetša e tšwago go Modimo. (2 Tim. 3:16, 17) Lega go le bjalo, barongwa ba gare ba phetha thato ya Modimo le go thekga bahlanka ba gagwe re sa ba bone.

⁹ Beibele e re kgonthišetša gore: “Morongwa wa Morêna ó xoraxorêla ba ba mmoifaxo; ó a ba namolêla.” (Ps. 34:7; 91:11) Ka baka la kgang ya potego, Jehofa o dumelela Sathane go re tlišetša diteko tša mehuta ka moka. (Luka 21:16-19) Lega go le bjalo, Modimo o a tseba gore re ka kgotlelela teko go fihla bokgoleng bofe go bontšha gore re a mmotegela. (Bala 1 Bakorinthe 10:13.) Barongwa ba dula ba le komana-madula-a-bapile e le gore ba tsene ditaba gare go ya ka thato ya Modimo. Ba ile ba phološa Sadirake, Mesake, Abedinego, Daniele le Petro, eupša ga se ba ka ba thibela go bolawa ga Stefano le Jakobo ke manaba. (Dan. 3:17, 18, 28; 6:22; Dit. 7:59, 60; 12:1-3, 7, 11) Maemo a bona le dikgang tšeo di bego di akaretšwa di be di sa swane. Ka mo go swanago, bana babo rena ba bangwe le dikgaetšedi ba ile ba bolawa dikampeng tša tshwenyo tša Manazi mola Jehofa a ile a kgonthišetša gore bontši bja bona bo a phologa.

10. Go tlaleletša thušong yeo re e newago ke barongwa, ke thušo efe yeo re ka e newago?

 ¹⁰ Mangwalo ga a rute gore motho yo mongwe le yo mongwe lefaseng o na le morongwa yo a mo hlokometšego. Re rapela ka kgodišego gore “go sa šetšwe seo re se kgopelago go ya ka thato ya gagwe, [Modimo] o a re kwa.” (1 Joh. 5:14) Ke therešo gore Jehofa a ka romela morongwa gore a re thuše, eupša thušo e ka tla ka tsela yeo re sa e letelago. Bakriste-gotee le rena ba ka tutueletšega gore thuša le go re homotša. Modimo a ka re nea bohlale le matla a nyakegago e le gore re lebeletšane le “mootlwa nameng” wo o re tlaišago bjalo ka ge eka re phasolwa ke “morongwa wa Sathane.”—2 Bakor. 12:7-10; 1 Bathes. 5:14.

Ekiša Jesu

11. Barongwa ba ile ba dirišwa bjang gore ba thuše Jesu, gona ke’ng seo a ilego a se fihlelela ka go dula a botegela Modimo?

¹¹ Ela hloko kamoo Jehofa a ilego a diriša barongwa ka gona tabeng ya Jesu. Ba ile ba tsebatša go belegwa le go tsošwa ga gagwe gomme ba mo hlankela ge a be a le mo lefaseng. Barongwa ba ka ba ba ile ba thibela gore a se ke a golegwa le go bolawa ka tsela e sehlogo. Go e na le moo, morongwa o ile a romelwa gore a mo matlafatše. (Mat. 28:5, 6; Luka 2:8-11; 22:43) Ka go dumelelana le morero wa Jehofa, Jesu o ile a hwa lehu la sehlabelo gomme a nea bohlatse bja gore motho yo a phethagetšego a ka dula a botegela Modimo go sa šetšwe gore o lekwa ka tsela e sehlogo. Ka baka leo, Jehofa o ile a tsošetša Jesu bophelong bjo bo phethagetšego legodimong, a mo nea “matla ka moka” gomme a dira gore barongwa ba be ka tlase ga gagwe. (Mat. 28:18; Dit. 2:32; 1 Pet. 3:22) Ka go rialo, Jesu o bontšhitše gore ke karolo ya pele ya “peu” ya ‘mosadi wa Modimo.’—Gen. 3:15; Bagal. 3:16.

12. Re ka ekiša mohlala wa Jesu wa teka-tekano ka tsela efe?

¹² Jesu o be a tseba gore ke phošo go leka Jehofa ka go itshwara ka tsela e sego bohlale gomme a letele gore barongwa ba mo phološe. (Bala Mateo 4:5-7.) Ka gona, anke re ekišeng mohlala wa Jesu ka go “phela ka monagano o hlaphogetšwego” re sa ipee kotsing go sa nyakege, eupša re lebeletšana le tlaišo ka kgodišego.—Tito 2:12.

Seo re ka Ithutago Sona go Barongwa ba Botegago

13. Re ka ithuta’ng mohlaleng wa barongwa ba lokilego bao go bolelwago ka bona go 2 Petro 2:9-11?

¹³ Ge a kgalema bao ba ‘bolelago ka go goboša’ ka bahlanka ba Jehofa ba tloditšwego, moapostola Petro o lebiša tlhokomelo mohlaleng o mobotse wa barongwa ba lokilego. Gaešita le ge ba e-na le matla a magolo, “ka baka la go hlompha Jehofa” barongwa ka boikokobetšo ba phema go dira ditatofatšo tšeo di bontšhago gore ba ahlola batho. (Bala 2 Petro 2:9-11.) Anke le rena re phemeng go ahlola ba bangwe ka mo go sa swanelago, re hlompheng bao ba beilwego maemong a go okamela ka phuthegong gomme re tlogele ditaba diatleng tša Jehofa, Moahlodi yo Mogolo.—Baroma 12:18, 19; Baheb. 13:17.

14. Barongwa ba re beela mehlala efe ya go hlankela ka boikokobetšo?

¹⁴ Barongwa ba Jehofa ba re beela mohlala o mobotse wa go hlankela ka boikokobetšo. Barongwa ba bangwe ba ile ba gana go botša batho  maina a bona. (Gen. 32:29; Baa. 13:17, 18) Gaešita le ge go e na le dibopiwa tša moya tše dimilione legodimong, Beibele e utolla leina la Mikaele le Gabriele feela. Seo e ka ba e le tšhireletšo ya gore re se ke ra nea barongwa kgodišo e sa swanelago. (Luka 1:26; Kut. 12:7) Ge moapostola Johane a be a wela fase e le gore a rapele morongwa, o ile a eletšwa ka gore: “Hlokomela! O se ke wa dira bjalo! Nna ke feela mohlanka-gotee le wena le bana beno.” (Kut. 22:8, 9) Borapedi bja rena, go akaretša le dithapelo, di swanetše go ya feela go Modimo.—Bala Mateo 4:8-10.

15. Barongwa ba re beela mohlala wa go se fele pelo bjang?

¹⁵ Barongwa ba re beela gape mohlala wa go se fele pelo. Gaešita le ge ba e-na le kganyogo e tseneletšego ya go tseba diphiri tše kgethwa tša Modimo, ga ba di botšwe ka moka. Beibele e re: “Barongwa ba kganyoga go nyankurela dilo tšona tše.” (1 Pet. 1:12) Ka gona, ba dira’ng? Ba leta ka go se fele pelo go fihlela go e-tla nako e beilwego ya Modimo ya gore ‘bohlale bja gagwe bja mehuta-huta’ bo “tsebišwe mebušo le matla a taolo mafelong a legodimong ka phuthego.”—Baef. 3:10, 11.

16. Boitshwaro bja rena bo ka kgoma barongwa bjang?

¹⁶ Bakriste bao ba lebeletšanego le teko ke ‘sebogo sa bobogelong go barongwa. (1 Bakor. 4:9) Barongwa ba lemoga mediro ya rena ya potego ka kgotsofalo e kgolo gomme ba a thaba ge modiradibe o tee a sokologa. (Luka 15:10) Barongwa ba lemoga boitshwaro bjo bo bontšhago go boifa Modimo bja basadi ba Bakriste. Beibele e bontšha gore ‘mosadi o swanetše go ba le seka sa go laolwa hlogong ya gagwe ka baka la barongwa.’ (1 Bakor. 11:3, 10) Ee, barongwa ba thabela go bona basadi ba Bakriste gotee le bahlanka ba bangwe ka moka ba Jehofa ba lefaseng ba dumelelana le thulaganyo ya pušo ya Modimo ya bohlogo. Go kwa mo go bjalo ke kgopotšo e swanetšego go barwa ba ba Modimo ba legodimong.

Barongwa ba Thekga Modiro wa Boboledi ka Phišego

17, 18. Ke ka baka la’ng re ka bolela gore barongwa ba thekga modiro wa rena wa boboledi?

¹⁷ Barongwa ba tšea karolo dilong tše dingwe tše makatšago tšeo di diregago “letšatšing la Morena.” Dilo tšeo di akaretša go tswalwa ga Mmušo ka 1914 le go lahlelwa ga Sathane le batemona ba gagwe lefaseng ke “Mikaele le barongwa ba gagwe.”  (Kut. 1:10; 11:15; 12:5-9) Moapostola Johane o bone “morongwa . . . a fofa gare ga legodimo a e-na le ditaba tše dibotse tša ka mo go sa felego gore a di tsebiše e le ditaba tše di thabišago go bao ba dulago lefaseng.” Morongwa yoo o tsebaditše gore: “Boifang Modimo gomme le mo nee letago, gobane nako ya kahlolo ya gagwe e fihlile, ka gona rapelang Yo a dirilego legodimo le lefase le lewatle le methopo ya meetse.” (Kut. 14:6, 7) Ka gona, bahlanka ba Jehofa ba kgonthišetšwa gore barongwa ba tla ba thekga ge ba bolela ditaba tše dibotse tša Mmušo o theilwego go sa šetšwe kganetšo e sehlogo ya Diabolo.—Kut. 12:13, 17.

¹⁸ Lehono, barongwa ga ba re iše bathong ba nago le dipelo tše botegago ka go bolela le rena go etša morongwa a ile a bolela le Filipi gomme a mo iša go molaki wa Moethiopia. (Dit. 8:26-29) Lega go le bjalo, diphihlelo tše dintši tša mehleng yeno di nea bohlatse bja gore barongwa ba thekga modiro wa rena wa go bolela ka Mmušo re sa ba bone gomme ba re lebiša go bao ba “nago le tshekamelo e swanetšego ka bophelo bjo bo sa felego.” * (Dit. 13:48) Ruri ke gabohlokwa gore re tšee karolo ka mehla bodireding e le gore re phethe karolo ya rena go tsomeng bao ba kganyogago go “rapela Tate ka moya le ka therešo”!—Joh. 4:23, 24.

19, 20. Barongwa ba kgatha tema efe ditiragalong tšeo di swayago ‘bofelo bja tshepedišo ya dilo’?

¹⁹ Ge a bolela ka mehla ya rena, Jesu o itše “bofelong bja tshepedišo ya dilo” barongwa ba be ba tla “hlaola ba kgopo go ba lokilego.” (Mat. 13:37-43, 49) Barongwa ba kgatha tema go kgoboketšweng le go swaiweng ga mafelelo ga batlotšwa. (Bala Mateo 24:31; Kut. 7:1-3) Go oketša moo, Jesu o sepela le barongwa ge a “kgethologanya dinku go dipudi.”—Mat. 25:31-33, 46.

²⁰ “Kutollong ya Morena Jesu go tšwa legodimong a e-na le barongwa ba gagwe ba matla” bohle “bao ba sa tsebego Modimo le bao ba sa kwego ditaba tše dibotse mabapi le Morena wa rena Jesu” ba tla fedišwa. (2 Bathes. 1:6-10) Ge Johane a bona tiragalo e swanago ponong, o hlalositše Jesu le madira a gagwe a legodimong a barongwa ba nametše dipere tše dišweu e le gore ba lwe ntwa ya go loka.—Kut. 19:11-14.

21. Ke kgato efe yeo morongwa yo a ‘swerego senotlelo sa sekoti le ketane e kgolo seatleng sa gagwe’ a tlago go e tšea kgahlanong le Sathane le batemona ba gagwe?

²¹ Le gona, Johane o “[bone] morongwa a theoga legodimong a swere senotlelo sa sekoti le ketane e kgolo seatleng sa gagwe.” Yo ke morongwa yo mogolo e lego Mikaele yo a tlago go tlema Diabolo le go mo lahlela sekoting gomme go molaleng gore o tla lahlela le batemona ba gagwe. Ba tla lokollwa lebakanyana bofelong bja Pušo ya Kriste ya Nywaga e Sekete ge batho ba phethagetšego ba tla be ba lebeletšana le teko ya mafelelo. Ka morago ga moo, Sathane le marabele ka moka ba tla fedišetšwa sa ruri. (Kut. 20:1-3, 7-10; 1 Joh. 3:8) Borabele ka moka kgahlanong le Modimo bo tla ba bo fedišitšwe.

22. Barongwa ba kgatha tema bjang tiragalong yeo e tla tlogago e direga, gona re swanetše go ikwa bjang ka karolo ya bona?

²² Re kgaufsi le go phološwa ka tsela e kgolo tshepedišong e kgopo ya dilo ya Sathane. Barongwa ba tla ba le karolo ya bohlokwa ditiragalong tše tša bohlokwa tšeo di tlago go godiša bogoši bja Jehofa le go phethagatša morero wa gagwe ka lefase le batho ka mo go feletšego. Ka kgonthe, barongwa ba lokilego ke “meoya ya go direla setšhaba, yeo e romelwago go direla bao ba tlago go rua phologo e le bohwa.” Ka gona, a re lebogeng Jehofa Modimo bakeng sa tsela yeo a dirišago barongwa go re thuša go dira thato ya gagwe le go hwetša bophelo bjo bo sa felego.

[Mongwalo wa tlase]

O be o tla Araba Bjang?

• Dibopiwa tša legodimong tša moya di rulagantšwe bjang?

• Barongwa ba bangwe ba ile ba dira’ng mehleng ya Noa?

• Jehofa o dirišitše barongwa bjang go re thuša?

• Barongwa ba kgatha tema efe mehleng ya rena?

[Dipotšišo tša Thuto]

[Seswantšho go letlakala 21]

Barongwa ba thabela go dira thato ya Modimo

[Seswantšho go letlakala 23]

Go etša tabeng ya Daniele, barongwa ba dula ba le komana-madula-a-bapile e le gore ba tsene ditaba gare go ya ka thato ya Modimo

[Seswantšho go letlakala 24]

E-ba le sebete ka gobane barongwa ba thekga modiro wa go bolela ka Mmušo

[Mothopo]

Globe: NASA photo