O Swanetše go ba Kae ge Bofelo bo Fihla?

GE JEHOFA a fediša tshepedišo ya gona bjale e kgopo ya dilo ka Haramagedone, go tla direga’ng ka batho ba lokilego? Diema 2:21, 22 e araba ka gore: “Ba ba tl’o xo dula mo naxeng, ké baloki; ba ba tl’o xo šala bà le xôna, ké bôná ba-ila-bokxôpô. Ba babe ba tlo fedišwa naxeng; bakxeloxi ba tlo rakwa mo xo yôna.”

Lega go le bjalo, ke bjang batho ba se nago molato ba tlago go šala lefaseng? Na go tla ba le lefelo leo ba ka tšhabelago go lona? Batho ba lokilego ba swanetše go ba kae ge bofelo bo e-tla? Dipego tše nne tša Mangwalo tša mabapi le phologo di re thuša go araba dipotšišo tše.

Ge Lefelo le be le le Bohlokwa

Mabapi le tlhakodišo ya bapatriareka Noa le Lota, re bala go 2 Petro 2:5-7 gore: “[Modimo] ga se a ka a lesa go otla lefase la bogologolo, eupša a lota Noa mmoledi wa toko le ba bangwe ba šupago ge a be a tliša meetse-fula lefaseng la batho ba go se boife Modimo; ka go bona metse ya Sodoma le Gomora molato a e fetoša molora, a beela batho ba sa boifego Modimo mohlala wa dilo tše di tlago go tla; gomme a hlakodiša Lota wa moloki yo a bego a tlaišwa kudu ke go nwelela ga batho ba nyatšago molao boitshwarong bjo bo hlephilego.”

Noa o phologile Meetse-fula bjang? Modimo o ile a mmotša gore: “Bofêlô bya nama ka moka bo tlile, ka xobane mo batho ba tlaxo xôna, lefase le tlala tša sehloxo. Byale Nna ke tlo ba senya xo-tee le lefase. Wêna itirêlê polokêlô ka mamati a morokwana.” (Gen. 6:13, 14) Noa o ile a aga areka feela bjalo ka ge Jehofa a be a mo laetše. Matšatši a šupa pele Meetse-fula a thoma, Jehofa o ile a mo laela gore a tsenye diphoofolo ka arekeng le gore yena le ba lapa la gagwe ka moka ba tsene ka gare. Ka letšatši la bošupa, lebati le ile la tswalelwa gomme “mo lefaseng xwa na pula ya seretla, ya fetša matšatši a masome a manê le mašexo a masome a manê è e-na.” (Gen. 7:1-4, 11, 12, 16) Noa le lapa la gagwe ‘ba ile ba phološwa meetseng.’ (1 Pet. 3:20) Go phologa ga bona go be go ithekgile ka gore ba be ka gare ga areka. Go be go se na lefelo le lengwe mo lefaseng leo le bego le ka ba šireletša.—Gen. 7:19, 20.

Tabeng ya Lota, ditaelo e be e le tše fapanego. Barongwa ba babedi ba ile ba mmotša gore ke kae moo a bego a se a swanela go ba gona. Barongwa bao ba babedi ba ile ba botša Lota gore: “Mang le mang e ka baxo weno mo motseng wó [wa Sodoma], ba nthšê felô fá. Ka xobane xe re le fá, re ba xo senya motse wó.” Ba be ba swanetše go “thšabêla kwa dithabeng.”—Gen. 19:12, 13, 17.

Phihlelo ya Noa le Lota e bontšha gore “Jehofa o tseba go hlakodiša batho ba boineelo go Modimo molekong, le go bolokela batho ba sa lokago letšatši la kahlolo.” (2 Pet. 2:9) Ditiragalong tše ka bobedi tša tlhakodišo, go phologa ga bona go be go ithekgile ka gore ba ye lefelong le itšego. Noa o be a swanetše gore a tsene ka arekeng; Lota o be a swanetše gore a tloge Sodoma. Eupša na ka mehla go dula go le bjalo? Na Jehofa a ka phološa batho ba lokilego kae le kae moo ba lego gona, ka ntle le gore ba hudugele lefelong le itšego? E le gore re arabe potšišo ye, ela hloko dipego tše dingwe gape tše pedi tša tlhakodišo.

Na ka Mehla ke Gabohlokwa Gore re be Lefelong le Itšego?

Pele Jehofa a fediša Egipita ka go tliša kotlo ya lesome mehleng ya Moše, O ile a laela Baisiraele gore ba tlotše madi a phoofolo ya Paseka dijakwaneng tša nywako ya bona. Ka baka la’ng? E le gore ‘ge Jehofa a feta Egipita gomme  a e otla, a bone madi ao dikgopheng le dijakwaneng a fete gomme a se ke a dumelela polao gore e tsene ka nywakong ya bona gomme ya ba wela.’ Bošegong bjona bjoo, “Morêna a bolaya maitšibulô ka moka a naxeng ya Egipita, a thôma ka morwa wa pele wa Farao, e a bexo a tlo dula sedulong sa xaxwe, a fetša ka leitšibulô la moxôlêxwa e a bexo a le ngwakong wa kxôlêxô, le maitšibulô ka moka a diruiwa.” Maitšibulo a Baisiraele a ile a phologa ka ntle le gore a hudugele lefelong le itšego.—Ek. 12:22, 23, 29.

Ela hloko gape taba ya Rahaba, e lego mogweba-ka-mmele yo a bego a dula motseng wa Jeriko. Baisiraele ba be ba le kgaufsi le go thoma go thopa Naga ya Kholofetšo. Ge Rahaba a lemoga gore Jeriko e tlo fedišwa, o ile a botša dihlodi tše pedi tša Baisiraele gore motse o be o boifa Baisiraele bao bego ba batametše. O ile a uta dihlodi tšeo gomme a di kgopela gore di dire keno ya gore yena le ba lapa la gabo ka moka ba tla šireletšwa ge Jeriko e fedišwa. Dihlodi tšeo di ile tša laela Rahaba gore a kgoboketše ditho tša lapa labo ka ngwakong wa gagwe, woo o bego o le morakong wa motse. Yo a tšwago ka ngwakong o be a tla fedišwa gotee le motse ka moka. (Još. 2:8-13, 15, 18, 19) Lega go le bjalo, ka morago Jehofa o ile a botša Jošua gore ‘merako ya motse e tla phušoga.’ (Još. 6:5) Ga bjale lefelo leo dihlodi di bego di itše e tla ba la botšhabelo le be le bonala le le kotsing. Rahaba le ba lapa labo ba be ba tla hlakodišwa bjang?

Ge nako e fihla ya gore motse wa Jeriko o thopše, Baisiraele ba ile ba goelela gomme ba letša dinaka. Jošua 6:20 e re: “Ya na ya re xe sethšaba se e-kwa mollô wa dinaka, sa thšêla lehowa le lexolo; ya ba mo merakô e phušoxaxo.” Ga bjale go be go se na motho yo a ka laolago go phušoga ga merako yeo. Lega go le bjalo, ka mohlolo merako e ile ya kgaotša go phušoga ngwakong wa Rahaba. Jošua o ile a laela dihlodi tšela tše pedi gore: “Tsênang ngwakong wa mosadi yola wa seotswa, Le nthšeng mosadi yeo, le bohle ba a naxo nabô’, Le dirê ka mo Le mo enetšexo ka xôna.” (Još. 6:22) Bohle bao ba bego ba le ka ngwakong wa Rahaba ba ile ba phološwa.

Ke’ng Seo se Bego se le Bohlokwa Kudu?

Re ka ithuta’ng phološong ya Noa, Lota, Baisiraele ba mehleng ya Moše le Rahaba? Dipego tše di re thuša bjang go bona moo re swanetšego go ba gona ge bofelo bja tshepedišo ya gona bjale e kgopo ya dilo bo fihla?

Ke therešo gore Noa o ile a phološwa ke areka. Eupša ke ka baka la’ng a be a le ka arekeng? Na e be e se ka gobane a be a e-na le tumelo e bile a theetša? Beibele e re: “Noaxe a dira tšôna-tšeo tšohle, a di dira ka mo Modimo a mo laetšexo ka xôna.” (Gen. 6:22; Baheb. 11:7) Go thwe’ng ka rena? Na re dira sohle seo Jehofa a  re laetšego sona? Noa gape e be e le “mmoledi wa toko.” (2 Pet. 2:5) Go swana le yena, na re a fišega modirong wa boboledi gaešita le ge batho bao ba lego tšhemong ya gabo rena ba sa theetše?

Lota o ile a phologa phedišo ka go tšhaba Sodoma. O ile a phologa ka gobane o be a lokile mahlong a Modimo e bile a tlaišwa kudu ke boitshwaro bjo bo hlephilego bja batho ba nyatšago molao ba Sodoma le Gomora. Na ruri boitshwaro bjo bo hlephilego bjo bo atilego kudu lehono bo a re tlaiša? Goba na re šetše re bo tlwaetše kudu mo e lego gore ga bo sa re tshwenya? Na re dira sohle seo re ka se kgonago gore re hwetšwe re ‘se na sepatso re bile re hloka sekodi gomme re le khutšong’?—2 Pet. 3:14.

Go Baisiraele bao ba bego ba le Egipita le Rahaba yo a bego a le Jeriko, go phologa go be bo ithekgile ka gore ba dule ka nywakong ya bona. Seo se be se nyaka tumelo le go kwa. (Baheb. 11:28, 30, 31) Akanya kamoo lapa le lengwe le le lengwe la Baisiraele le swanetšego go ba le ile la dula le tsepeletše leitšibulo la lona ge go “tsoxa sellô se sexolo” metseng ya Baegipita ka go latelana. (Ek. 12:30) Akanya kamoo Rahaba a swanetšego go ba a ile a gokarela ba lapa labo ka gona ge a e-kwa go phušoga ga merako ya Jeriko go batamela kgaufsi le ngwako wa gagwe. Go ile gwa nyakega gore a be le tumelo ya kgonthe e le gore a kwe gomme a dule ka ngwakong woo.

Bofelo bja lefase le kgopo la Sathane bo tla tla kgaufsinyane. Ga se ra hlwa re tseba gore Jehofa o tla phološa batho ba gagwe bjang letšatšing leo le boifišago la ‘bogale bja gagwe.’ (Tsef. 2:3) Lega go le bjalo, go sa šetšwe moo re lego gona le gore boemo bja rena ka bofe ka nako yeo, re ka kgodišega gore phologo ya rena e tla ithekga ka gore re be le tumelo go Jehofa gomme re mo kwe. Kgabagareng, re swanetše go hlagolela pono e swanetšego ka boporofeta bja Jesaya bjo bo bolelago ka ‘diphapoši’ tša rena.

“Tsêna Phapošing ya Xaxo”

Jesaya 26:20 e re: “Wene Sethšaba sa-ka! Sepela O y’o tsêna phapošing ya xaxo, O itswalêlêlê O iphihlê xo se xokaenyana, xo bê xo fetê dikôtlô.” Boporofeta bjo bo ka ba bo ile bja phethagala ka lekga la pele ka 539 B.C.E. ge Bameda le Baperesia ba fenya Babilona. Ka morago ga go tsena Babilona, go bonala Korese wa Moperesia a ile a laela batho ka moka go dula ka nywakong ya bona ka gobane madira a gagwe a be a laetšwe gore a bolaye motho le ge e le ofe yo a bego a le ka ntle.

Mehleng ya rena, ‘phapoši’ ya boporofeta bjo e ka tswalanywa kgaufsi le diphuthego tše fetago 100 000 tša Dihlatse tša Jehofa lefaseng ka bophara. Diphuthego tše bjalo di kgatha tema ya bohlokwa maphelong a rena. Di tla tšwela pele go dira bjalo go theoša le ‘masetlapelo a magolo.’ (Kut. 7:14) Batho ba Modimo ba laelwa gore ba tsene ka ‘phapošing ya bona’ gomme ba iphihle “xo bê xo fetê dikôtlô.” Ke gabohlokwa gore re hlagolele le go boloka pono e botse ka phuthego gomme re be le boikemišetšo bjo bo tiilego bja go dula re le kgaufsi le yona. Re ka theetša keletšo ya Paulo e rego: “A re naganelaneng gore re hlohleletšaneng leratong le medirong e mebotse, re sa tlogele go bokana ga rena gotee, go etša ge ba bangwe ba tlwaetše go dira bjalo, eupša re kgothatšana, kudu-kudu ka ge [re] bona letšatši le batamela.”—Baheb. 10:24, 25.

[Diswantšho go letlakala 7]

Re ka ithuta’ng medirong ya Modimo ya nakong e fetilego ya tlhakodišo?

[Diswantšho go letlakala 8]

‘Phapoši’ e ka šupa eng mehleng ya lehono?