“Xo Homola xo na le Mohla wa Xôna”

SEEMA sa kgale seo go thwego ke sa Bohlabela se re: “Go bolela go a hola, eupša go homola go hola kudu.” Go ya ka Brewer’s Dictionary of Phrase and Fable, seema se swanago le sona sa Seheberu se re: “Ge e ba go bolela go lekana le šekele e tee, go homola go lekana le tše pedi.” Kgoši Solomone yo bohlale wa Isiraele ya bogologolo o ngwadile gore: “Tšohle di na le mohla wa tšôna, le ’tirwa tša ka tlase xa letšatši di na le mabaka a tšôna. . . . Xo homola xo na le mohla wa xôna, le xo bolêla xo na le mohla wa xôna.”—Mmo. 3:1, 7.

Lega go le bjalo, ke neng moo e lego mo go swanetšego gore motho a homole go e na le go bolela? Mantšu “homola” le “homotše” a tšwelela ka makga a mantši ka Beibeleng. Taba yeo mantšu a a dirišwago go yona e utolla go swanelega ga gore motho a homole bonyenyane dikarolong tše tharo tša bophelo. Anke re ahla-ahleng go homola e le leswao la tlhompho, e le bohlatse bja gore re na le kahlolo e botse le temogo e bile e le selo seo se re thušago go naganišiša.

Leswao la Tlhompho

Go homola ke leswao la tlhompho goba kgodišo. Moporofeta Habakuku o itše: “Morêna Yêna ó Ntlong e kxêthwa ya xaxwe; a lefase lohle le ikhomolêlê pel’a xaxwe.” (Habak. 2:20) Barapedi ba therešo ba swanetše go ‘leta ba ikhomoletše ba be ba hlakodišwe ke Jehofa.’ (Dillo 3:26) Mopsalme o opetše ka gore: “Ikhomolêlê pele xa Morêna, O mo letêlê; O se kê wa ja pelo xe mo-loxa-maanô à lêtlêlwa ke ditsela.”—Ps. 37:7.

Na re ka tumiša Jehofa ka ntle le go diriša mantšu? Na ka dinako tše dingwe ge re bona bobotse bja tlholo ga re makale wa go hloka molomo? Na go nagana ka dilo tše bjalo tše makatšago ga se tsela ya go tumiša Mmopi ka dipelong tša rena? Mopsalme Dafida o thomile e nngwe ya dikoša tša gagwe ka gore: “Modimo, motseng wa Tsione dithêtô di išwa xo Wêna xò ikhomoletšwe; xo phêthwa tše ba Xo enetšexo tšôna.”—Ps. 65:1.

Re swanetše go hlompha dipolelo tša Jehofa, go etša ge re hlompha Jehofa ka boyena. Ka mohlala, ge moporofeta wa Modimo e lego Moše a  be a nea polelo ya gagwe ya mafelelo go setšhaba sa Isiraele, yena le baperisita ba ile ba eletša bohle bao ba bego ba le gona ka gore: “Hlwayang ditsêbê Le kwê! . . . Theetšang-xê se Morêna Modimo wa lena a se bolêlaxo.” Bana ba Baisiraele le bona ba be ba swanetše go theetša ka kelohloko ge Baisiraele ba bokane bakeng sa go bala Molao wa Modimo. Moše o itše: “O phuthêlê sethšaba mmôxô, banna le basadi le bana, . . . ba ithutê.”—Doit. 27:9, 10; 31:11, 12.

Ruri ke gabohlokwa gore barapedi ba Jehofa ba lehono ba theetše ka tlhompho tayo yeo ba e newago dipokanong tša Bokriste go akaretša le dikopanong tše dikgolo! Ge ditherešo tša bohlokwa tša Beibele di newa sethaleng, na e tla ba e se go bontšha lenyatšo bakeng sa Lentšu la Modimo le mokgatlo wa gagwe ge e ba re boledišana go sa nyakege? Ge lenaneo le tšwela pele, ke nako ya gore re homole gomme re theetše.

Go ba motheetši yo mobotse ke leswao la tlhompho gaešita le dipoledišanong tšeo re bago le tšona le batho ba bangwe. Ka mohlala, mopatriareka Jobo o ile a botša balatofatši ba gagwe gore: “Lena nthuteng, ke tlê ke homolê.” Jobo o be a ikemišeditše go theetša ka setu ge ba be ba bolela. Ge e be e le nako ya gore a bolele, o ile a kgopela ka gore: “Homolang, xo bolêlê nna.”—Jobo 6:24; 13:13.

Bohlatse bja Gore re na le Kahlolo e Botse le Temogo

Beibele e re: “Yo a swarago molomo wa gagwe, ke yo bohlale.” “Monna wa kêlêllô ó a ikhomolêla.” (Die. 10:19, PK; 11:12) Ela hloko tsela e kgahlišago yeo Jesu a ilego a bontšha ka yona kahlolo e botse le temogo ka go homola. Ka morago ga go lemoga gore go bolela maemong a šoro ao a bakilwego ke manaba a gagwe go be go ka se mo hole ka selo, ‘Jesu o ile a homola.’ (Mat. 26:63) Ka morago ge Jesu a be a sekišwa ke Pilato, “ga se a ka a araba.” Ka bohlale o ile a kgetha go dumelela mediro ya gagwe ya phatlalatša gore e ipolelele.—Mat. 27:11-14.

Le rena re tla dira ka bohlale ge e ba re swara melomo ya rena, kudu-kudu ge e ba re galefišwa. Seema se sengwe se re: “Mo-se-fele-pelo ó n’e thlaloxanyô-kxolo; wa sebefedi ó runya bošilo.” (Die. 14:29) Go akgofela go araba ge o le boemong bjo thata go ka feleletša ka gore o akgofele go bolela dilo tšeo o tlago go itsholela tšona ka morago. Ka tlase ga maemo a bjalo, mantšu a rena a ka bonala e le a bošilo gomme ka baka leo ra lahlegelwa ke khutšo ya monagano.

Ke gabohlale gore re šetše seo re se bolelago ge re le gare ga batho ba kgopo. Ge re lebeletšane le bakweri bodireding bja rena, go homola e ka ba tsela e kaone ya go arabela. Go oketša moo, na e be e ka se be gabohlale gore ka dinako tše dingwe re homole e le gore re se fetiše maikwelo a gore re amogela seo bašomi-gotee le rena goba bao re tsenago le bona sekolo ba se dirago ge ba dira meswaso yeo e bontšhago kgethollo goba e nago le maroga? (Baef. 5:3) Mopsalme o ngwadile gore: “Molomo wa-ka ke tlo o swara ka moxala, xe ke sa fêla kè lebane le yo mobe.”—Ps. 39:1.

Motho yo a nago le “kêlêllô” ga a rothiše mmutla madi. (Die. 11:12) Mokriste wa kgonthe  a ka se utolle diphiri ka go bolela a sa šetše. Bagolo ba Bakriste ba swanetše go ba šedi ka mo go kgethegilego tabeng ye e le gore ba dire gore ditho tša phuthego di dule di ba bota.

Motho a ka hlalosa dilo tše dintši ka ntle le go ntšha lentšu le tee. Ge a bolela ka yo mongwe wa batho ba mehleng ya gagwe, mongwadi wa Leisemane wa lekgolong la bo-19 la nywaga e lego Sydney Smith o ngwadile gore: “Tsela yeo ka yona a kgethago go homola ka dinako tše dingwe e dira gore go bolela le yena e be mo go thabišago.” Ka kgonthe, poledišano ya letšatši le letšatši magareng ga batho ba babedi e swanetše go dumelela batho bao ka bobedi go bolela. Motho yo a nago le bokgoni bja go boledišana le batho ke motheetši yo mobotse.

Solomone o lemošitše ka gore: “Boati bya phokô xa bo hloke diphapoxô; matsebe ó swara molomo.” (Die. 10:19) Ka gona, ge re sa bolele kudu, ke mo re tlago go phema go bontšha bošilo. Ge e le gabotse, “Le lešilo le ka sengwa yo bohlale, xe le homola; xe le sa ahlame, ba ka re le a tseba.” (Die. 17:28) Ka gona, eka re ka kgopela Jehofa ka thapelo gore a ‘bee bahlapetši melomong ya rena.’—Ps. 141:3.

Selo Seo se re Thušago go Naganišiša

Mabapi le monna yo a latelago tsela ya toko, Mangwalo a re botša gore ‘molao wa Modimo o o akanya mosegare le bošego.’ (Ps. 1:2) The Amplified Bible e balega ka gore: “Molao wa Gagwe . . . o naganišiša ka ona ka tlwaelo . . . mosegare le bošego.” Ke boemo bofe bjo bo thušago motho gakaone gore a kgone go naganišiša ka tsela yeo?

Isaka, e lego morwa wa mopatriareka Aborahama ‘o ile a tšwa a itshepelela gore a yo naganišiša kua nageng mo e ka bago mantšiboa.’ (Gen. 24:63, bapiša le NW.) O ile a kgetha lefelo le nako e homotšego bakeng sa go naganišiša. Kgoši Dafida o be a naganišiša dinakong tša bošego. (Ps. 63:6, bapiša le PK) E le motho yo a phethagetšego, Jesu o ile a dira maiteko a go kgotsofatša kganyogo ya gagwe ya go ba noši le go naganišiša a le kgole le lešata leo le bakwago ke mašaba a batho, a le mafelong a lego lekatana a dithabeng, maganateng le mafelong a mangwe ao go se nago batho go ona.—Mat. 14:23; Luka 4:42; 5:16.

Go homola go tliša bophelo bjo bobotse bja mmele. Go homola go ka re nea sebaka se sebotse sa go itlhahloba, e lego karolo ya bohlokwa e nyakegago bakeng sa go dira tšwelopele. Go homola go ka re nea khutšo ya monagano. Go naganišiša nakong ya ge re homotše go ka dira gore re be le boipoetšo le boikokobetšo e bile go ka oketša tebogo ya rena bakeng sa dilo tša bohlokwa kudu bophelong.

Gaešita le ge e le mo gobotse gore re homole, “xo bolêla xo na le mohla wa xôna.” (Mmo. 3:7) Barapedi ba therešo ga bjale ba swaregile ka go bolela ditaba tše dibotse tša Mmušo wa Modimo “lefaseng ka moka le go agilwego go lona.” (Mat. 24:14) Lešata leo le kwagalago ka baka la lethabo leo le bakwago ke modiro wo le tšwela pele go gola ge palo ya bona e oketšega. (Mika 2:12) Ka gona, anke re beng gare ga bao ka phišego ba bolelago ditaba tše dibotse tša Mmušo gomme ba bolela ka mediro e makatšago ya Modimo. Ge re dutše re tšea karolo modirong wo wa bohlokwa, eka tsela ya rena ya bophelo e ka bontšha gore re lemoga gore ka dinako tše dingwe go homola go a hola.

[Seswantšho go letlakala 3]

Ge re le dibokeng tša rena tša Bokriste, re swanetše go homola gomme re ithute

[Seswantšho go letlakala 4]

Go homola e ka ba karabelo e kaone ge re hlaselwa ka mantšu bodireding bja rena

[Seswantšho go letlakala 5]

Go homola go re thuša go naganišiša